ព្រះមហាក្សត្រ ព្រុយណេ

ទម្លាយឈ្មោះមហាសេដ្ឋីមានបំផុតប្រចាំប្រទេស នៅតំបន់អាស៊ីអាគ្នេយ៍

ឧកញ៉ាសំពៅ — Mon, 20 Nov 2023 03:11:00 +0000

ស្ដេចសុលតង់នៃប្រទេសប៊្រុយណេ ជាបុគ្គលមានឥទ្ធិពលមួយរូបនៅប៉ែកអាស៊ីអាគ្នេយ៍នេះ ហើយធ្លាប់ល្បីសុសសាយជាបុគ្គលមានបំផុតប្រចាំតំបន់ តែការពិតមិនអីចឹងទេ។

បើទោះជាទ្រង់ជាប់ងារជាបុគ្គលមានឥទ្ធិពលមួយរូបក្នុងចំណោមមនុស្សរាប់រយលាននាក់ក៏ពិតមែន តែបើនិយាយពីទំហំទ្រព្យសម្បត្តិវិញ គឺនៅចាញ់ស្ដេចត្រាញ់ឥណ្ឌូណេស៊ីនៅឡើយ គឺលោក Prajogo Pangestu ដែលមានទ្រព្យសម្បត្តិច្រើនបំផុតនៅអាស៊ីអាគ្នេយ៍។

ខាងក្រោមនេះ គឺជាបញ្ជីឈ្មោះមហាសេដ្ឋីមានបំផុតប្រចាំប្រទេសនៅតំបន់អាស៊ីអាគ្នេយ៍ សម្រាប់ឆ្នាំ ២០២៣ ផ្អែកតាមទិន្នន័យផ្ដល់ឲ្យដោយ Forbes៖

1/ មហាសេដ្ឋី Prajogo Pangestu នៃប្រទេសឥណ្ឌូណេស៊ី មានទ្រព្យសម្បត្តិប្រមាណ ៤៦,២ពាន់លានដុល្លារ

2/ ស្ដេចសុលតង់ Sultan Hassanal Bolkiah នៃប្រទេសប៊្រុយណេ មានទ្រព្យសម្បត្តិប្រមាណ ៣០ពាន់លានដុល្លារ

3/ លោក Li Xiting នៃប្រទេសសិង្ហបុរី មានទ្រព្យសម្បត្តិប្រមាណ ១៤,៦ ពាន់លានដុល្លារ

4/ បងប្អូនត្រកូល Chearavanont នៃប្រទេសថៃ មានទ្រព្យសម្បត្តិប្រមាណ ១២,៦ពាន់លានដុល្លារ

5/ លោក Tan Sri Robert Kuok នៃប្រទេសម៉ាឡេស៊ី មានទ្រព្យសម្បត្តិប្រមាណ ១០,៣ពាន់លានដុល្លារ

6/ មហាសេដ្ឋី Manuel Villar នៃប្រទេសហ្វីលីពីន មានទ្រព្យសម្បត្តិប្រមាណ ៩,២ពាន់លានដុល្លារ

7/ លោក Pham Nhat Vuong នៃប្រទេសវៀតណាម មានទ្រព្យសម្បត្តិប្រមាណ ៤,៤ពាន់លានដុល្លារ

បញ្ជាក់ដែរថា ដោយសារនៅប្រទេស ៤ផ្សេងទៀតដូចជា ប្រទេសឡាវ កម្ពុជា មីយ៉ាន់ម៉ា និងទីម័រខាងកើតមិនមានព័ត៌មានបញ្ជាក់ច្បាស់លាស់ពីទំហំទ្រព្យសម្បត្តិរបស់បុគ្គលមានបំផុតប្រចាំប្រទេស ទើបឧកញ៉ាញូវសន៍មិនអាចរកទិន្នន័យមកចុះផ្សាយបាន៕

The post ទម្លាយឈ្មោះមហាសេដ្ឋីមានបំផុតប្រចាំប្រទេស នៅតំបន់អាស៊ីអាគ្នេយ៍ appeared first on .

រាស្ត្រសាមញ្ញចិញ្ចឹមសត្វឆ្មា សត្វឆ្កែ តែព្រះអង្គម្ចាស់ Mateen ចិញ្ចឹមដល់សត្វខ្លារខិន

ឧកញ៉ាសំពៅ — Sun, 13 Nov 2022 04:57:00 +0000

វត្តមានរបស់ព្រះចៅស៊ុលតង់ ហាជី ហាលសាណាល់ បុលគីយ៉ាស់ មុយអ៊ីហ្សាឌីន វ៉ាឌូឡាហ៍ ព្រះមហាក្សត្រ ព្រុយណេដារូហ្សាឡឹម និងបុត្រា Abdul Mateen ដែលបានចូលរួមកិច្ចប្រជុំកំពូលអាស៊ាននៅកម្ពុជា កំពុងទទួលបានការចាប់អារម្មណ៍ជាខ្លាំងពីអ្នកលេងបណ្ដាញសង្គម ដោយសាររូបរាងដ៏សង្ហាររបស់ព្រះអង្គម្ចាស់នៃប្រទេសព្រុយណេ។

ឧកញ៉ាញ៉ូវស៍ ធ្លាប់បានចុះផ្សាយរួចម្ដងមកហើយពីប្រវត្តិរូបសង្ខេបខ្លះៗនៃការសិក្សារបស់ព្រះអង្គម្ចាស់ Mateen ប៉ុន្តែសម្រាប់អត្ថបទមួយនេះ យើងនឹងគាស់កកាយពីចំណង់ចំណូលចិត្តរបស់ទ្រង់បន្ថែមទៀត។

ព្រះអង្គម្ចាស់ Mateen គឺជាមនុស្សស្រលាញ់សត្វ ប៉ុន្តែអ្វីដែលទ្រង់មានខុសពីរាស្ត្រសាមញ្ញគឺ សត្វចិញ្ចឹមរបស់ទ្រង់គឺ សត្វខ្លា។ ទ្រង់មានសត្វចិញ្ចឹមជាច្រើនដូចជា កូនខ្លាស ឆ្មាព្រៃ និងកូនខ្លារខិនជាដើម។

ក្រៅពីមានសត្វចិញ្ចឹមប្លែកពីរាស្ត្រសាមញ្ញ ទ្រង់ក៏ធ្លាប់ចូលហ្វឹកហាត់នៅកងយោធានៅចក្រភពអង់គ្លេសរយៈពេល ៤៤ សប្ដាហ៍ និងជាអ្នកបើកយន្តហោះដ៏ស្ទាត់ជំនាញថែមទៀតផង ហើយជាញឹកញយទ្រង់តែងតែលេងកីឡា លោតឆ័ត្រយោង (Skydiving)។

ចំណូលចិត្តមួយទៀតរបស់ទ្រង់ គឺស្រលាញ់វិស័យកីឡា ហើយ Idol ក្នុងដួងចិត្តរបស់ទ្រង់គឺ អតីតកីឡាករបាល់ទាត់ David Beckham ប៉ុន្តែកីឡាដែលទ្រង់ឧស្សាហ៍លេងមិនមែនជាកីឡាបាល់ទាត់ឡើយ។

កីឡាដែលទ្រង់តែងតែកម្សាន្តមានដូចជា ជ្រមុជទឹកក្នុងបាតសមុទ្រ លោតឆ័ត្រយោង វាយកូនហ្គោល ជិះស្គី ជិះទូក កីឡាប្រដាល់ កីឡាវាយសី និងជិះសេះជាដើម ហើយទ្រង់ក៏ធ្លាប់ជាអត្តពលិកតំណាងប្រទេស ចូលប្រកួតនៅ Sea Games ទៀតផង៕

The post រាស្ត្រសាមញ្ញចិញ្ចឹមសត្វឆ្មា សត្វឆ្កែ តែព្រះអង្គម្ចាស់ Mateen ចិញ្ចឹមដល់សត្វខ្លារខិន appeared first on .

បុត្រាស្ដេចប្រុយណេ មានប្រវត្តិសិក្សាមិនធម្មតា និងធ្លាប់ជាអត្តពលិកតំណាងប្រទេស

ឧកញ៉ាសាមញ្ញ — Thu, 10 Nov 2022 05:37:02 +0000

ព្រះមហាក្សត្រនៃប្រទេសប៊្រុយណេ ព្រះចៅ Sultan Hassanal Bolkiah បានយាងដល់ប្រទេសកម្ពុជាហើយ កាលពីរសៀលថ្ងៃពុធ ទី ៩ ខែវិច្ឆិកានេះ ដើម្បីរួមកិច្ចប្រជុំកំពូលអាស៊ាន លើកទី៤០ និង៤១ និងកិច្ចប្រជុំព័ន្ធនៅកម្ពុជា ចាប់ពីថ្ងៃទី១០ ដល់ថ្ងៃទី១៣ ខែវិច្ឆិកា ឆ្នាំ២០២២។

ក្នុងព្រះរាជដំណើរយាងមកកាន់កម្ពុជានេះ ព្រះអង្គយាងបើកយន្តហោះដោយផ្ទាល់ព្រះអង្គ មកដល់ព្រលានយន្តហោះអន្តរជាតិភ្នំពេញ ជាមួយនឹងបុត្រាមួយព្រះអង្គផងដែរ។

យ៉ាងណាថ្ងៃនេះឧកញ៉ាញូវសូមយកប្រវត្តិខ្លះៗ ទាក់ទងនឹងបុត្រារបស់ស្តេច Sultan Hassanal Bolkiah ដែលមានព្រះនាម Abdul Mateen មកបង្ហាញដូចតទៅ៖

ព្រះអង្គម្ចាស់ Abdul Mateen បានប្រសូតនៅថ្ងៃទី ១០ ខែសីហា ឆ្នាំ ១៩៩១ នៅប្រទេសប្រ៊ុយណេ ដែលត្រូវជាបុត្រទី ១០ របស់ស្តេច Sultan Hassanal Bolkiah និងអតីតព្រះមហេសីទី ២ ព្រះនាម Mariam ។ ព្រះអង្គម្ចាស់ Mateen គឺជាបុត្រទីប្រាំមួយ ដែលត្រូវបន្តស្នងតំណែង នៅក្នុងខ្សែរាជវង្ស ។

ចំពោះប្រវត្តិសិក្សាវិញ ព្រះអង្គម្ចាស់ Mateen បានទទួលការអប់រំកម្រិតមធ្យមសិក្សា នៅមហាវិទ្យល័យវិទ្យាសាស្រ្ត Paduka Seri Begawan Sultan និងសាលាអន្តរជាតិ Jerudong ដែលសុទ្ធសឹងតែជាសាលារៀនលំដាប់កំពូលទាំងពីរ នៅក្នុងប្រទេសប្រ៊ុយណេ ។

នៅខែឧសភា ឆ្នាំ ២០១០ ព្រះអង្គម្ចាស់ Mateen ត្រូវបានអនុញ្ញាឱ្យចូលវៀនវគ្គបណ្តុះបណ្តាលសម្រាប់មន្ត្រីកងទ័ពធម្មតា រួមជាមួយនឹងពលរដ្ឋដែលត្រូវបានជ្រើសរើសចំនួន ២០០ នាក់ផ្សេងទៀត នៅក្នុងសាលាទ័ព Royal Military Aacademy Sandhurst ។

លុះដល់ខែមេសា ឆ្នាំ ២០១១ សេ្តច Sultan Hassanal Bolkiah បានផ្តល់ជូនសញ្ញាប័ត្របញ្ចប់ការសិក្សា ដល់ព្រះអង្គម្ចាស់ Mateen និងបានធ្វើឱ្យទ្រង់ទទួលបានឋាន:ជាយោធាលើកដំបូង ។ នៅខែក្កដា ឆ្នាំ ២០១៦ ព្រះអង្គម្ចាស់ Mateen បានបន្តបញ្ចប់ការសិក្សាថ្នាក់អនុបណ្ឌិតផ្នែកការទូតអន្តរជាតិ ក្នុងមហាវិទ្យាល័យ SOAS នៃសាកលវិទ្យាល័យទីក្រុងឡុងដ៏ ។

ក្រៅពីនោះព្រះអង្គម្ចាស់ Mateen ក៏មានសមត្ថភាពអាចបើកបរឧទ្ធម្ភាគចក្របានផងដែរ បន្ទាប់ពីព្រះអង្គបានបញ្ចប់ការសិក្សាពីសាលា Defence Helicopter Flying School នៅ RAF Shawbury ស្របពេលព្រះអង្គក៏ជាអ្នកស្រលាញ់ខាងវិស័យកីឡាមួយរូប ដោយថែមទាំងធ្លាប់បានតំណាងឱ្យប្រទេសប្រ៊ុយណេ ចូលរួមនៅក្នុងព្រឹត្តិការណ៍ SEA Games សម្រាប់កីឡាជិះសេះវាយកូនបាល់ (polo) នៅក្នុងឆ្នាំ ២០១៧ និង ២០១៩ ផងដែរ ។

គួរឱ្យដឹងផងដែរថា ព្រះអង្គម្ចាស់ Mateen ត្រូវបានចាត់ទុកថាជាព្រះអង្គម្ចាស់ ដែលមានជាងគេ និងមានប្រជាប្រិយបំផុត។ យោងតាមការវិភាគរបស់ Forbes និង Business Insider បានបង្ហាញថា ទ្រព្យសម្បត្តិសរុបរបស់ទ្រង់ មានប្រហែល ១,៥ លានដុល្លារ ទៅ ៥ លានដុល្លារ ៕

The post បុត្រាស្ដេចប្រុយណេ មានប្រវត្តិសិក្សាមិនធម្មតា និងធ្លាប់ជាអត្តពលិកតំណាងប្រទេស appeared first on .

ស្ដេចព្រុយណេ ជាម្ចាស់យន្តហោះផ្ទាល់ខ្លួនមានតម្លៃថ្លៃបំផុតលើលោកជិត ៤០០ លានដុល្លារ

ឧកញ៉ាសំពៅ — Thu, 10 Nov 2022 02:11:59 +0000

កាលពីរសៀលថ្ងៃទី ០៩ វិច្ឆិកាកន្លងទៅ ព្រះមហាក្សត្រនៃប្រទេសព្រុយណេដារ៉ូសាឡឹម ព្រះចៅស៊ុលតង់ ហាជី ហាសសាណាល់ បុលគីយ៉ាស់ មុយអ៊ីហ្សាឌីន វ៉ាឌូឡាហ៍ បានយាងមកដល់ប្រទេសកម្ពុជា ដើម្បីចូលរួមកិច្ចប្រជុំកំពូលអាស៊ានលើកទី ៤០ និង ៤១ ពីថ្ងៃទី ១០ ដល់ទី ១៣ ខែវិច្ឆិកា ២០២២។

សម្រាប់ការធ្វើដំណើរមកកម្ពុជាសារនេះវិញ ទ្រង់បានបើកយន្តហោះផ្ទាល់ព្រះអង្គ ជាមួយបុត្រាមួយអង្គ ព្រះនាម ព្រះអង្គម្ចាស់ Abdul Mateen ខណៈយន្តហោះដែលទ្រង់បានបើកមកដោយផ្ទាល់ព្រះអង្គ គឺជាយន្តហោះកម្រមួយមិនសូវមានអ្នកបើកក្នុងពេលបច្ចុប្បន្ន។ នេះបើតាមការចុះផ្សាយពី SCMP។

ប្រភពដដែលបន្ថែមថា យន្តហោះដែលព្រះមហាក្សត្របានបើកមកនោះ ជាប្រភេទ Boeing 767 គឺមិនសូវមានអ្នកប្រើប្រាស់ទូលាយឡើយ ខណៈតម្លៃវិញគឺមិនត្រូវបានទម្លាយដូចគ្នា គ្រាន់តែថា អ្វីដែលគ្រប់គ្នាដឹង គឺទ្រង់ជាម្ចាស់នៃយន្តហោះផ្ទាល់ខ្លួនដែលមានតម្លៃថ្លៃបំផុតលើលោក។

យន្តហោះផ្ទាល់ខ្លួនដែលត្រូវបានចាត់ទុកថាថ្លៃបំផុតនោះ ជាប្រភេទ Boeing 747-400 ដែលមានតម្លៃប្រមាណ ១០០ លានដុល្លារ ប៉ុន្តែត្រូវបានទ្រង់យកមកកែលំអទាំងរចនាបថខាងក្នុង និងក្រៅ ស្រោបដោយមាសផង រហូតធ្វើឲ្យតម្លៃយន្តហោះមួយគ្រឿងនេះឡើងដល់ជិត ៤០០ លានដុល្លារ និងទទួលបានរហស្សនាមថា “The Floating Palace” ថែមទៀតផង។

ក្រៅពីមានយន្តហោះផ្ទាល់ព្រះអង្គជាច្រើនគ្រឿង ព្រះមហាក្សត្រអង្គនេះក៏ត្រូវបានគេដឹងថា ជាអ្នកនិយមចូលចិត្តសន្សំរថយន្តផងដែរ រហូតលឺចចាមអារ៉ាមថា ទ្រង់មានរថយន្តទំនើបនៅឃ្លាំងប្រមាណ ៧ ០០០ គ្រឿងឯណោះ ដែលមានដូចជា Roll Royces ៦០០ គ្រឿង Ferraris ៤៥០ គ្រឿង និង Bentleys ៣៥០ គ្រឿង និងរថយន្តកម្រផ្សេងៗទៀត៕

The post ស្ដេចព្រុយណេ ជាម្ចាស់យន្តហោះផ្ទាល់ខ្លួនមានតម្លៃថ្លៃបំផុតលើលោកជិត ៤០០ លានដុល្លារ appeared first on .

ព្រះមហាក្សត្រ ព្រុយណេ បើកយន្តហោះផ្ទាល់ព្រះអង្គយាងចូលរួមកិច្ចប្រជុំកំពូលអាស៊ាននៅកម្ពុជា

ឧកញ៉ាកោះក្របី — Wed, 09 Nov 2022 10:30:07 +0000

ព្រះមហាក្សត្រ នៃប្រទេសព្រុយណេដារ៉ូសាឡឹម ព្រះចៅស៊ុលតង់ ហាជី ហាសសាណាល់ បុលគីយ៉ាស់ មុយអ៊ីហ្សាឌីន វ៉ាឌូឡាហ៍ បានយាងដល់កម្ពុជាហើយនៅរសៀលថ្ងៃពុធ ទី៩ ខែវិច្ឆិកានេះ ដើម្បីចូលរួមកិច្ចប្រជុំកំពូលអាស៊ាន លើកទី៤០ និង៤១ និងកិច្ចប្រជុំព័ន្ធនៅកម្ពុជា ចាប់ពីថ្ងៃទី១០ ដល់ថ្ងៃទី១៣ ខែវិច្ឆិកា ឆ្នាំ២០២២។

ក្នុងព្រះរាជដំណើរយាងមកកាន់កម្ពុជានាពេលនេះ ព្រះអង្គយាងបើកយន្តហោះដោយផ្ទះព្រះអង្គមកដល់ព្រលានយន្តហោះអន្តរជាតិភ្នំពេញ ជាមួយនឹងបុត្រាមួយព្រះអង្គផងដែរ។

ព្រះចៅស៊ុលតង់ ជាមហាសេដ្ឋីមួយព្រះអង្គ ក្នុងចំណោមស្ដេចដែលមានទ្រព្យសម្បត្តិច្រើនជាងគេលើលោក។ ថ្វីត្បិតព្រះរាជាអង្គនេះ មិនឈរលំដាប់ទី១ នៃបញ្ជីស្ដេចមានបំផុតក៏ពិតមែន ប៉ុន្តែទ្រង់ជាស្ដេចមួយអង្គដែលចាយព្រះជន្មហ៊ឺហារលើសស្ដេចណាៗទាំងអស់ ដោយសារការសម្ញែងទ្រព្យសម្បត្តិរបស់ទ្រង់ទៅកាន់ពិភពលោក។

យោងតាមទស្សនាវដ្ដី Forbes នៅឆ្នាំ២០២២ នេះ ស្តេចព្រះមហាក្សត្រ ប្រុយណេ មានទ្រព្យសម្បត្តិប៉ាន់ស្មានរហូតដល់ ២៨ពាន់លានដុល្លារអាមេរិក ហើយទ្រង់មានកេរ្តិ៍ឈ្មោះល្បីល្បាញជាងគេដោយសារព្រះអង្គជាស្តេចដែលនិយមចាយវាយកប់ពពក ទៅលើសម្ភារថ្លៃៗ និងវត្ថុប្រើប្រាស់ប្រណីតៗ៕

The post ព្រះមហាក្សត្រ ព្រុយណេ បើកយន្តហោះផ្ទាល់ព្រះអង្គយាងចូលរួមកិច្ចប្រជុំកំពូលអាស៊ាននៅកម្ពុជា appeared first on .