មហាសេដ្ឋីអចលនទ្រព្យ

ស្ត្រី ៥រូប ជាប់ឈ្មោះជាមហាសេដ្ឋីនីអចលនទ្រព្យ មានដាច់គេនៅលើពិភពលោក

ឧកញ៉ាសាមញ្ញ — Fri, 23 May 2025 09:37:34 +0000

យោងតាមទស្សនាវដ្តី Forbes បានបង្ហាញពីបញ្ជីឈ្មោះស្រ្តីមានទ្រព្យសម្បត្តិច្រើនជាងគេបំផុតទាំង៥ នៅក្នុងវិស័យអចលនទ្រព្យ ជាមូយនឹងការកាន់កាប់ទ្រព្យរួមគ្នាសរុបប្រមាណ ៣៩,១ពាន់លានដុល្លារ ហើយម្នាក់ៗ សុទ្ធសឹងតែរកស៊ីចេញពីបាតដៃទទេ។

លោកស្រី Kwong Siu-hing បច្ចុប្បន្នវ័យ ៩៥ឆ្នាំ គឺបុគ្គលដ៏លេចធ្លោបំផុតនៅក្នុងគ្រួសារត្រកូល Kwok ដែលគ្រប់គ្រងទៅលើក្រុមហ៊ុន Sun Hung Kai Properties ដែលជាអ្នកអភិវឌ្ឍន៍អចលនទ្រព្យធំបំផុតក្នុងចំណោម៤ របស់ហុងកុង។ កើតនៅទីក្រុងក្វាងចូវក្នុងឆ្នាំ១៩២៩ លោកស្រី Siu-hing បានផ្លាស់ទៅរស់នៅទីក្រុងហុងកុងក្នុងឆ្នាំ១៩៤៧ ហើយបានរៀបការជាមួយមហាសេដ្ឋីលោក Kwok Tak-seng ដែលជាសហស្ថាបនិកម្នាក់របស់ Sun Hung Kai Properties។

លោកស្រី Kwong Siu-hing ត្រូវបានចាត់ទុកថាជាបុគ្គលម្នាក់ក្នុងចំណោមអ្នកមានបំផុតរបស់ហុងកុងដែលមានទ្រព្យសម្បត្តិសរុប ១២,៩ពាន់លានដុល្លារ។

ចំណែកឯលោកស្រី Zhu Yan និងគ្រួសារ ក៏ត្រូវបានចាត់ទុកថាបុគ្គលដ៏លេចធ្លោម្នាក់ នៅក្នុងវិស័យអចលនទ្រព្យផងដែរ ដោយកើតចេញពីការគ្រប់គ្រងទៅលើក្រុមហ៊ុន KE Holdings ដែលបង្កើតឡើងដោយប្តីចុងរបស់លោកស្រី ឈ្មោះ Zuo Hui។ ក្រោយស្វាមីទទួលមរណភាពទៅ លោកស្រី Zhu Yan ត្រូវបានរាយការណ៍ថាមានទ្រព្យសម្បត្តិប្រមាណ ៧,១ពាន់លានដុល្លារ ដោយប្រភពចំណូលភាគច្រើនទទួលបានពីការកាន់កាប់ភាគហ៊ុនភាគច្រើនរបស់ក្រមហ៊ុន។

ទន្ទឹមនឹងនេះ លោកស្រី Alexandra Schoerghuber បច្ចុប្បន្ន វ័យ ៦៦ គឺជាម្ចាស់ក្រុមហ៊ុន Schoerghuber Unternehmensgruppe ដែលជាក្រុមហ៊ុនវិនិយោគឯកជន មានមូលដ្ឋាននៅប្រទេសអាឡឺម៉ង់ ខណ:ពួកគេរកស៊ីលើអាជីវកម្មជាច្រើន រួមមានអចលនទ្រព្យ បដិសណ្ឋារកិច្ច ភេសជ្ជៈ និងអាហារសមុទ្រ ជាដើម។ បច្ចុប្បន្ន លោកស្រី Alexandra មានទ្រព្យសរុបប្រមាណ ៧ពាន់លានដុល្លារ។

ដោយឡែក លោកស្រី Wu Yajun ដែលមានវ័យ ៦១ឆ្នាំ ត្រូវបានចាត់ទុកថាមហាសេដ្ឋីស្រីដែលមានទ្រព្យសម្បត្តិច្រើនបំផុតនៅលើពិភពលោក តាមរយ:ការរកស៊ី ចាប់តាំងពីបាតដៃទទេ។ លោកស្រី បានសហការបង្កើតក្រុមហ៊ុនអចលនទ្រព្យខ្នាតយក្សរបស់ចិន Longfor Properties ក្នុងឆ្នាំ១៩៩៣ ជាមួយនឹងអតីតស្វាមីរបស់ខ្លួន គឺលោក Cai Kui ។ បច្ចុប្បន្ន ទ្រព្យសម្បត្តិរបស់លោកស្រី ត្រូវបានប៉ាន់ប្រមាណថាមានចំនួន ៦,៧ពាន់លានដុល្លារ ដែលភាគច្រើនទទួលបានពីភាគហ៊ុនក្រុមហ៊ុន។

ចុងក្រោយ គឺលោកស្រី Annette Lerner ដែលដំបូងឡើយចាយទុនត្រឹមតែ ២៥០ដុល្លារប៉ុណ្ណោះ ទៅឲ្យប្តីរបស់លោកស្រី ដើម្បីចាប់ផ្តើមក្រុមហ៊ុន Lerner Enterprises ដែលជាអ្នកផ្តល់សេវាកម្មលក់ផ្ទះ រហូតក្លាយជាក្រុមហ៊ុនអភិវឌ្ឍអចលនទ្រព្យធំបំផុតមួយនៅក្នុងទីក្រុង Washington សហរដ្ឋអាមេរិក។ នៅក្នុងវ័យ ៩៥ឆ្នាំ លោកស្រី Lerner និងគ្រួសារ ត្រូវបានទស្សនាវដ្តី Forbes ប៉ាន់ប្រមាណថាមានទ្រព្យសម្បត្តិសរុបរហុតដល់ទៅ ៥,៧ពាន់លានដុល្លារ៕

The post ស្ត្រី ៥រូប ជាប់ឈ្មោះជាមហាសេដ្ឋីនីអចលនទ្រព្យ មានដាច់គេនៅលើពិភពលោក appeared first on .

សិង្ហបុរី ចោទប្រកាន់មហាសេដ្ឋីអលចនទ្រព្យម្នាក់ ពីបទជាប់ទាក់ទងជាមួយអតីតរដ្ឋមន្ត្រីពុករលួយ

ឧកញ៉ាសាមញ្ញ — Mon, 07 Oct 2024 04:25:00 +0000

មហាសេដ្ឋីអលចនទ្រព្យ លោក Ong Beng Seng ដែលជាម្ចាស់ក្រុមហ៊ុន Hotel Properties Ltd ត្រូវបានតុលាការប្រទេសសង្ហបុរី ចោទប្រកាន់ពីបទធ្វើឲ្យរាំងស្ទះដល់ដំណើរការយុត្តិធម៌ និងផ្តល់អំណោយជូនដល់អតីតរដ្ឋមន្ត្រីដឹកជញ្ជូនម្នាក់ ដែលត្រូវបានកាត់ទោសឲ្យជាប់ពន្ធនាគារ ក្នុងសំណុំរឿងពុករលួយដ៏ធំមួយ។ នេះបើតាមការចុះផ្សាយពីសារព័ត៌មាន Reuters។

ការចោទប្រកាន់ទាំងពីរករណីនេះ ត្រូវបានឡើង ក្នុងអំឡុងពេលនៃការស៊ើបអង្កេតរបស់ការិយាល័យស៊ើបអង្កេតការអនុវត្តន៍អំពើពុករលួយ (CPIB) ទៅលើអតីតរដ្ឋមន្ត្រីដឹកជញ្ជូន លោក S. Iswaran ដែលត្រូវបានកាត់ទោសឲ្យជាប់ពន្ធនាគាររយៈពេល ១២ខែ កាលពីថ្ងៃទី៣ ខែតុលា ពីបទទទួលសំណូកសូកប៉ាន់ និងវត្ថុមានតម្លៃមួយចំនួនពីលោក Ong ។

ក្នុងអំឡុងពេលសវនាការរបស់លោក Iswaran ព្រះរាជអាជ្ញាបាននិយាយថា អតីតរដ្ឋមន្ត្រីរូបនេះ បានទទួលអំណោយពិសេសៗជាច្រើនពីលោក Ong ដែលមានតម្លៃសរុបជាង ៣សែនដុល្លារ រួមទាំងសំបុត្រចូលរួមមើលការប្រកួតបាល់ទាត់ English Premier League, សំបុត្រប្រណាំងឡាន F1 Grand Prix, ការប្រគុំតន្ត្រីនៅទីក្រុងឡុងដ៍ និងការជិះយន្តហោះឯកជន ទៅកាន់ទីក្រុង Doha ផងដែរ។

សូមជម្រាបថា ដោយផ្អែកតាមសេចក្តីថ្លែងការណ៍របស់ការិយាល័យនាយករដ្ឋមន្ត្រីបានបង្ហាញថា លោក Iswaran បានប្រកាសលាលែងពីតំណែងជារដ្ឋមន្ត្រីក្រសួងដឹកជញ្ជូន និងជាសមាជិកនៃគណបក្សសកម្មភាពប្រជាជន ដែលជាបក្សកំពុងកាន់អំណាចសព្វថ្ងៃ កាលពីថ្ងៃទី១៧ ខែមករា ឆ្នាំ២០២៤៕

The post សិង្ហបុរី ចោទប្រកាន់មហាសេដ្ឋីអលចនទ្រព្យម្នាក់ ពីបទជាប់ទាក់ទងជាមួយអតីតរដ្ឋមន្ត្រីពុករលួយ appeared first on .

ណែនាំឲ្យស្គាល់មហាសេដ្ឋីអចលនទ្រព្យ ១០រូបមានទ្រព្យច្រើនបំផុតនៅលើពិភពលោក

monyokn — Fri, 31 May 2024 01:05:00 +0000

វិស័យអចលនទ្រព្យជាវិស័យដ៏មានសក្តានុពលបំផុតមួយនៅទូទាំងពិភពលោក ដ្បិតវាជាតម្រូវការក្នុងការស្នាក់នៅរបស់មនុស្សគ្រប់ៗគ្នា។ មួយវិញទៀតសោត ការវិនិយោគលើសំណង់អាគារ ខុនដូ និងផ្ទះជាដើម ក៏អាចកត់សំគាល់បានថា ជាកត្តារុញច្រានដ៏សំខាន់ក្នុងការបង្កើនប្រាក់ចំណេញទៅដល់អ្នកវិនិយោគ ព្រមទាំងសេដ្ឋកិច្ចរបស់ប្រទេស ដ្បិតអីវាជាទ្រព្យដែលត្រូវប៉ាន់គ្រប់សម័យកាល ព្រោះថានេះជាតម្រូវការស្នាក់នៅរបស់មនុស្ស ដែលកំពុងតែមានការកើនឡើងជាលំដាប់។

យ៉ាងនេះហើយ Oknha News សូមបង្ហាញនូវបញ្ជីឈ្មោះមហាសេដ្ឋីមានដាច់គេទាំង ១០រូបកំពុងរកស៊ីជោគជ័យលើវិស័យអចលនទ្រព្យ ផ្អែកតាមការចុះផ្សាយពីទស្សនាវដ្តី Forbes គិតត្រឹមថ្ងៃទី៣០ ឧសភា ២០២៤ ៖

១. លោក Lee Shau Kee ស្ថាបនិកក្រុមហ៊ុន Henderson Land Development មានទ្រព្យសម្បត្តិ ២៨,៧ពាន់លានដុល្លារ

២. លោក Kushal Pal Singh ប្រធានកិត្តិយសក្រុមហ៊ុន DLF មានទ្រព្យសម្បត្តិ ១៨,២ពាន់លានដុល្លារ

៣. លោក Donald Bren ប្រធានក្រុមហ៊ុន Irvine មានទ្រព្យសម្បត្តិ ១៨ពាន់លានដុល្លារ

៤. លោក Harry Triguboff ស្ថាបនិក និងជានាយកគ្រប់គ្រងក្រុមហ៊ុន Meriton មានទ្រព្យសម្បត្តិ ១៦,៦ពាន់លានដុល្លារ

៥. លោក Peter Woo អតីតប្រធានក្រុមហ៊ុន Wheelock & Co មានទ្រព្យសម្បត្តិ ១៣,៩ពាន់លានដុល្លារ

៦. លោក Joseph Lau អតីតប្រធានក្រុមហ៊ុន China Estates មានទ្រព្យសម្បត្តិ ១៣,២ពាន់លានដុល្លារ

៧. លោកស្រី Kwong Siu-Hing សហស្ថាបនិកក្រុមហ៊ុន Sun Hung Kai Properties Kwok Tak-Seng មានទ្រព្យសម្បត្តិ ១១,៧ពាន់លានដុល្លារ

៨. លោក Mangal Prabhat Lodha ស្ថាបនិកក្រុមហ៊ុន Macrotech Developers មានទ្រព្យសម្បត្តិ ១១,៦ពាន់លានដុល្លារ

៩. លោក Manuel Villar ប្រធានក្រុមហ៊ុន Vista Land & Lifescapes មានទ្រព្យសម្បត្តិ ១១,៤ពាន់លានដុល្លារ

១០. លោក Stephen Ross ប្រធានក្រុមហ៊ុន Related Companies មានទ្រព្យសម្បត្តិ ១០,១ពាន់លានដុល្លារ៕

The post ណែនាំឲ្យស្គាល់មហាសេដ្ឋីអចលនទ្រព្យ ១០រូបមានទ្រព្យច្រើនបំផុតនៅលើពិភពលោក appeared first on .

មេធំ Evergrande ប្រកាសលក់អចលនទ្រព្យថ្លៃបំផុតនៅទីក្រុងឡុងដ៍ សងបំណុលក្រុមហ៊ុន

ឧកញ៉ាសំពៅ — Wed, 12 Oct 2022 11:51:00 +0000

មហាសេដ្ឋីចិន Hui Ka-yan ឬត្រូវគេស្គាល់ថា Xu Jiayin ដែលជាស្ថាបនិកក្រុមហ៊ុន Evergrande ជាក្រុមហ៊ុនអភិវឌ្ឍន៍អចលនទ្រព្យជាប់បំណុលច្រើនបំផុតលើលោក បានប្រកាសលក់ផ្ទះនៅទីក្រុងឡុងដ៍។ នេះបើតាមការចុះផ្សាយពី The Financial Times។

ដោយឡែក SCMP បានបន្ថែមថា ផ្ទះដែលមហាសេដ្ឋីចិនបានប្រកាសលក់ គឺជាអចលនទ្រព្យមានតម្លៃថ្លៃបំផុតនៅរដ្ឋធានីនៃចក្រភពអង់គ្លេស ពោលគឺមានតម្លៃរហូតដល់ ២២៧ លានដុល្លារអាមេរិក។

មូលហេតុដែលធ្វើឲ្យ ម្ចាស់ភាគហ៊ុនធំបំផុតនៃ Evergrande ប្រកាសលក់អចលនទ្រព្យដ៏មហាសាលមួយនេះ ក៏ដូចជាលក់ភាគហ៊ុន ទ្រព្យសម្បត្តិផ្ទាល់ខ្លួនមួយចំណែកធំ គឺដើម្បីត្រូវដោះបំណុលខ្លះៗនៃក្រុមហ៊ុន បន្ទាប់ពីរដ្ឋាភិបាលចិនបដិសេធមិនព្រមចេញមុខជួយក្រុមហ៊ុននេះ។

សូមជម្រាបដែរថា ទ្រព្យសម្បត្តិរបស់លោក Hui គឺបានធ្លាក់រហូត ៨៣% តាំងពីខែកក្កដា ២០២០ ហើយបច្ចុប្បន្នទ្រព្យសម្បត្តិរបស់លោកនៅសល់ប្រមាណ ៦ ពាន់លានដុល្លារ។ នេះបើតាមទិន្នន័យផ្ដល់ឲ្យដោយ Bloomberg Billionaires’ Index៕

The post មេធំ Evergrande ប្រកាសលក់អចលនទ្រព្យថ្លៃបំផុតនៅទីក្រុងឡុងដ៍ សងបំណុលក្រុមហ៊ុន appeared first on .

ឃាត់ខ្លួនស្ដេចត្រាញ់អចលនទ្រព្យវៀតណាមមួយរូប ក្រោយរកឃើញពាក់ព័ន្ធនឹងការឆបោក

ឧកញ៉ាសំពៅ — Mon, 10 Oct 2022 06:36:25 +0000

កាលពីពេលកន្លងទៅ ស្ដេចត្រាញ់អចលនទ្រព្យវៀតណាមមួយរូបត្រូវបានក្រុមប៉ូលិសចាប់ខ្លួន ក្រោយសង្ស័យមានជាប់ពាក់ព័ន្ធនឹងករណីឆបោកប្រាក់កាលពីប៉ុន្មានឆ្នាំមុន។ នេះបើតាមការចុះផ្សាយពី Economictimes។

លោកស្រី Truong My Lan ប្រធានក្រុមហ៊ុន Van Thinh Phat Holdings Group ដែលមានទីស្នាក់ការនៅចំកណ្ដាលទីក្រុងហូជីមិញ ត្រូវបានគេសង្ស័យជាប់ពាក់ព័ន្ធនឹងការចេញមូលបត្របំណុលខុសច្បាប់ រាប់ទ្រីលានដុង ឬប្រមាណរាប់សិបលានដុល្លារ ពីបណ្ដាវិនិយោគិនចន្លោះឆ្នាំ ២០១៨-២០១៩។ នេះបើតាមការឲ្យដឹងពីក្រសួងសន្តិសុខសាធារណៈ។

សូមជម្រាបដែរថា លោកស្រី My Lan គឺជាប់ឈ្មោះជាគ្រួសារមានបំផុតមួយប្រចាំវៀតណាម ដោយលោកស្រីគ្រប់គ្រងភាគហ៊ុន ៨០% នៃក្រុមហ៊ុន VTP Group Holdings ដែលមានតម្លៃសរុបរហូតដល់ ៤៨០០ ពាន់លានដុង ឬប្រហែលជាង ២០០ លានដុល្លារ។

ដោយឡែក ថ្មីៗនេះ ប្រទេសវៀតណាមបានពង្រីកការប្រឆាំងអំពើពុករលួយរបស់ខ្លួន ជាមួយនឹងការចាប់ខ្លួនសាជីវកម្មគ្រាក់ៗជាបន្តបន្ទាប់ រួមទាំងឈ្មួញកណ្តាល អ្នកអភិវឌ្ឍន៍អចលនទ្រព្យ និងសូម្បីតែនិយតករទៀតផង៕

The post ឃាត់ខ្លួនស្ដេចត្រាញ់អចលនទ្រព្យវៀតណាមមួយរូប ក្រោយរកឃើញពាក់ព័ន្ធនឹងការឆបោក appeared first on .

អតីតស្ត្រីមានបំផុតនៅអាស៊ី ខ្ទាតដល់បាតតារាងបញ្ជីមហាសេដ្ឋីអចលនទ្រព្យមានដាច់គេលើលោក

ឧកញ៉ាសាមញ្ញ — Tue, 06 Sep 2022 11:55:00 +0000

វិស័យអចលនទ្រព្យ ត្រូវបានចាត់ទុកថាជាប្រភពចំណូលដ៏ធំបំផុតមួយ និងមានការរីកដុះដាលខ្លាំង នៅទូទាំងសកលលោក ហើយហេតុដូច្នេះហើយ ទើបធ្វើឱ្យមានមហាសេដ្ឋីជាច្រើន កំពុងឈរជើងរកស៊ី នៅក្នុងវិស័យនេះ ។

យ៉ាងណា កាលពីអត្ថបទមុន ឧកញ៉ាញូវបានចុះផ្សាយរួចម្តងហើយ នូវអត្ថបទដែលបានបង្ហាញពីស្តេចត្រាញ់អចលនទ្រព្យមានបំផុត ១០ រូបលើពីភពលោក ហើយក៏បានបង្ហាញពីទំហំទ្រព្យសម្បត្តិរបស់មហាសេដ្ឋីទាំងនោះផងដែរ ។

គួរឱ្យដឹងថា បច្ចុប្បន្ននេះ ខណ:ពេលដែលវិបត្តិហិរញ្ញវត្ថុនៅក្នុងប្រទេសចិន កំពុងតែធ្លាក់ចូលទៅក្នុងស្ថានភាពធ្ងន់ធ្ងរ ដែលបានធ្វើឱ្យទ្រព្យសម្បត្តិរបស់មហាសេដ្ឋីអចលនទ្រព្យ នៅក្នុងប្រទេសនេះ មានការប្រែប្រួលយ៉ាងខ្លាំង តួរយ៉ាងដូចជាលោកស្រី Yang Huiyan ដែលជាម្ចាស់ភាគហ៊ុនធំបំផុតរបស់ក្រុមហ៊ុន Country Garden ត្រូវបានរបូតចេញពីតំណែងជាស្រ្តីមានដាច់គេបំផុត នៅអាស៊ី ក្រោយបាត់បង់ទ្រព្យសម្បត្តិសរុបអស់ជាងពាក់កណ្តាល ។

ដោយឡែកសម្រាប់ថ្ងៃនេះ យើងក្រឡេកមកមើល ពីទំហំទ្រព្យសម្បត្តិរបស់មហាសេដ្ឋីអចលនទ្រព្យកំពូលៗ លើពិភពលោក ថាមានការការប្រែប្រួលបែបណាខ្លះ បើធៀបនឹងរយ:ពេល កាលពី ៣ ខែមុន ។

១, Li Ka-shing ជនជាតិចិនហុងកុង ក្រុមហ៊ុនគោល Cheung Kong មានទ្រព្យសម្បត្តិសរុប ៣៤,៧ ពាន់លានដុល្លា កើនឡើងពី ៣៣ ពាន់លានដុល្លារ

២, Lee Shau-kee ជនជាតិចិន ក្រុមហ៊ុនគោល Henderson Land មានទ្រព្យសម្បត្តិសរុប ២៩,៧ ពាន់លានដុល្លារ កើនឡើងពី ២៧ ពាន់លានដុល្លារ

៣, Peter Woo Kwong-ching ជនជាតិចិនហុងកុង ក្រុមហ៊ុនគោល Wheelock មានទ្រព្យសម្បត្តិសរុប ១៧,៤ ពាន់លានដុល្លារ ធ្លាក់ចុះពី ១៨ ពាន់លានដុល្លារ

៤, Donald Bren ជនជាតិអាមេរិក ក្រុមហ៊ុនគោល Irvine Company មានទ្រព្យសម្បត្តិសរុប ១៦,២ ពាន់លានដុល្លារ កើនឡើងពី ១៥ ពាន់លានដុល្លារ

៥, Joseph Lau Luen-hung ជនជាតិចិនហុងកុង ក្រុមហ៊ុនគោល Chinese Estate មានទ្រព្យសម្បត្តិសរុប ១៣,៥ ពាន់លានដុល្លារ ធ្លាក់ចុះពី ១៤ ពាន់លានដុល្លារ

៦, Wang Jianlin ជនជាតិចិន ក្រុមហ៊ុនគោល Wanda មានទ្រព្យសម្បត្តិសរុប ១១,៩ ពាន់លានដុល្លារ ធ្លាក់ចុះពី ១៧ ពាន់លានដុល្លារ

៧, Hugh Grosvenor ជនជាតិអង់គ្លេស ក្រុមហ៊ុនគោល Grosvenor មានទ្រព្យសម្បត្តិសរុប ១១,៦ ពាន់លានដុល្លារ ធ្លាក់ចុះពី ១៦ ពាន់លានដុល្លារ

៨, Wu Yajun ជនជាតិចិន ក្រុមហ៊ុនគោល Longfor មានទ្រព្យសម្បត្តិសរុប ១១,១ ពាន់លានដុល្លារ ធ្លាក់ចុះពី ១៧ ពាន់លានដុល្លារ

៩, Li Hua ជនជាតិចិន ក្រុមហ៊ុនគោល Excellence មានទ្រព្យសម្បត្តិសរុប ៩,៦ ពាន់លានដុល្លារ ធ្លាក់ចុះពី ១១ ពាន់លានដុល្លារ

១០, Yang Huiyan ជនជាតិចិន ក្រុមហ៊ុនគោល Country Garden មានទ្រព្យសម្បត្តិសរុប ៩,៤ ពាន់លានដុល្លារ ធ្លាក់ចុះពី ២៦ ពាន់លានដុល្លារ

បញ្ជាក់ផងដែរថា ទិន្នន័យដែលបានបង្ហាញខាងលើ គឺទទួលបានពីសារព័ត៌មាន Forbes , Bloomberg , INF គិតត្រឹមថ្ងៃទី ៦ ខែកញ្ញា ឆ្នាំ ២០២២ នេះ ៕

The post អតីតស្ត្រីមានបំផុតនៅអាស៊ី ខ្ទាតដល់បាតតារាងបញ្ជីមហាសេដ្ឋីអចលនទ្រព្យមានដាច់គេលើលោក appeared first on .