មហាសេដ្ឋីអូស្ត្រាលី

មហាសេដ្ឋីកំពូលៗរបស់អូស្រា្តលីមើលឃើញទ្រព្យសម្បត្តិសរុបពួកគេកើនឡើងជិត ១០០ពាន់លានដុល្លារ

ឧកញ៉ាសាមញ្ញ — Fri, 20 Feb 2026 06:25:04 +0000

មហាសេដ្ឋីកំពូលៗទាំងប្រាំរបស់អូស្ត្រាលី បានឃើញទ្រព្យសម្បត្តិសរុបរបស់ពួកគេកើនឡើង ១៤% ដល់ចំនួន ៩៤ពាន់លានដុល្លារនៅឆ្នាំនេះ បើទោះបីជាមានភាពមិនប្រាកដប្រជាជាសកលដែលបង្កឡើងដោយពន្ធគយរបស់សហរដ្ឋអាមេរិក និងភាពតានតឹងផ្នែកភូមិសាស្ត្រនយោបាយក៏ដោយ។

មហាសេដ្ឋីរ៉ែ លោកស្រី Gina Rinehart នៅតែបន្តរក្សាតំណែងកំពូលរបស់ខ្លួន ក្នុងនាមជាអ្នកមានបំផុតរបស់ប្រទេស។ ប៉ុន្តែទោះជាយ៉ាងណាក លោកស្រីបានមើលឃើញទ្រព្យសម្បត្តិរបស់ខ្លួន ធ្លាក់ចុះ ១៥% មកនៅត្រឹម ២៤,៦ពាន់លានដុល្លារ។ នេះបើយោងតាមការធ្វើបច្ចុប្បន្នភាពចុងក្រោយដោយទស្សនាវដ្តីអាមេរិក Forbes ។

ទន្ទឹមនឹងនេះ លោក Harry Triguboff ដែលជានាយកគ្រប់គ្រងក្រុមហ៊ុនអភិវឌ្ឍអចលនទ្រព្យ Meriton បានពង្រឹងជំហររបស់លោកក្នុងនាមជាអ្នកមានបំផុតទីពីររបស់ប្រទេសអូស្ត្រាលី ដោយទ្រព្យសម្បត្តិរបស់លោកបានកើនឡើង ២០% ដល់ ២២,៦ពាន់លានដុល្លារ។

បន្ទាប់មក គឺលោក Andrew Forrest ដែលជាមហាសេដ្ឋីរ៉ែ បានឡើងមកឈរនៅលំដាប់ទីបី បន្ទាប់ពីការកើនឡើងនៃតម្លៃភាគហ៊ុននៅក្រុមហ៊ុនផលិតរ៉ែដែក Fortescue Metals Group ដែលបានបង្កើនទ្រព្យសម្បត្តិរបស់លោកដល់ ២០,១ពាន់លានដុល្លារ។

ដោយឡែកសហស្ថាបនិកក្រុមហ៊ុនរចនាសូហ្វវែ Canva លោក Cliff Obrecht និងលោកស្រី Melanie Perkins បានឡើងមកកាន់ចំណាត់ថ្នាក់ទីបួន ជាមួយចំនួនទ្រព្យសម្បត្តិសរុបប្រមាណជាង ១៥ពាន់លានដុល្លារ។ និងចុងក្រោយគឺលោក Anthony Pratt ដែលជាប្រធានក្រុមហ៊ុនវេចខ្ចប់ និងកែច្នៃឡើងវិញ Visy Asia-Pacific បានឃើញទ្រព្យសម្បត្តិសរុបរបស់ខ្លួន កើនឡើងដល់ ១១,៥ពាន់លានដុល្លារ៕

The post មហាសេដ្ឋីកំពូលៗរបស់អូស្រា្តលីមើលឃើញទ្រព្យសម្បត្តិសរុបពួកគេកើនឡើងជិត ១០០ពាន់លានដុល្លារ appeared first on .

បើសរុបបញ្ចូលគ្នា តើទ្រព្យសម្បត្តិមហាសេដ្ឋីកំពូលៗរបស់ប្រទេសអូស្រា្តលីមានចំនួនប៉ុន្មានទៅ?

ឧកញ៉ាសាមញ្ញ — Fri, 14 Feb 2025 09:00:00 +0000

យោងតាមការចុះផ្សាយពីទស្សាវដ្តី Forbes បានបង្ហាញឲ្យដឹងកាលពីថ្ងៃទី១៣ ខែកុម្ភ:កន្លងទៅថា ទ្រព្យសម្បត្តិរួមរបស់មហាសេដ្ឋីទាំង៥០ របស់ប្រទេសអូស្ត្រាលី បានកើនឡើងជិត ១០% ដល់ចំនួន ២៤៣ពាន់លានដុល្លារអូស្ត្រាលី (១៥២,៩ពាន់លានដុល្លារ) ក្នុងរយៈពេល ១២ខែចុងក្រោយនេះ។

ប្រភពដដែលនេះ បានបង្ហាញឲ្យដឹងទៀតថា លោកស្រី Gina Rinehart ដែលគ្រប់គ្រងទៅលើក្រុមហ៊ុនជីកយករ៉ែ Hancock Prospecting នៅតែបន្តឈរនៅតំណែងកំពូលជាអ្នកមានដាច់គេបំផុតរបស់ប្រទេស បើទោះបីជាទ្រព្យសម្បត្តិរបស់លោកស្រី បានធ្លាក់ចុះអស់ ៤% មកនៅសល់ត្រឹមប្រមាណជាង ១៨ពាន់លានដុល្លារ ក៏ដោយ។

ទន្ទឹមនឹងនេះ មហាសេដ្ឋីលោក Harry Triguboff ដែលជាម្ចាស់ក្រុមហ៊ុនអចលនទ្រព្យ Meriton Groupដណ្តើមបានតំណែងទីពីរត្រលប់មកវិញ បន្ទាប់ពីខកខានអស់រយៈពេលប្រាំឆ្នាំ ជាមួយនឹងទ្រព្យសម្បត្តិសរុបរបស់លោក បានកើនឡើងដល់ជាង ១១,៩ពាន់លានដុល្លារ។

ដោយឡែកសហស្ថាបនិកក្រុមហ៊ុន Atlassian លោក Mike Cannon-Brookes ជាប់ចំណាត់ថ្នាក់លេខ៣ ជាមួយចំនួនទ្រព្យសម្បត្តិសរុប ១១,៥ពាន់លានដុល្លារ និងលោក Scott Farquhar ជាប់លេខ៤ ជាមួយទ្រព្យសម្បត្តិសរុបចំនួន ១១,៣ពាន់លានដុល្លារ បន្ទាប់ពីតម្លៃភាគហ៊ុនក្រុមហ៊ុនសូហ្វវែររបស់លោកកើនឡើងខ្លាំង។

ទន្ទឹមនឹងនេះ លោក Andrew Forrest បានធ្លាក់មកកាន់ចំណាត់ថ្នាក់លេខ៥ បន្ទាប់ពីតម្លៃភាគហ៊ុនរបស់ក្រុមហ៊ុន Fortescue Metals Group បានថយចុះអស់ជាងមួយភាគបី ដោយកាត់បន្ថយទ្រព្យសម្បត្តិរបស់លោកមកនៅត្រឹមចំនួន ៣,៤ពាន់លានដុល្លារ ពីចំនួន ១០,១ពាន់លានដុល្លារ៕

The post បើសរុបបញ្ចូលគ្នា តើទ្រព្យសម្បត្តិមហាសេដ្ឋីកំពូលៗរបស់ប្រទេសអូស្រា្តលីមានចំនួនប៉ុន្មានទៅ? appeared first on .

នាវា Titanic ទី២ គ្រោងចាប់ផ្ដើមធ្វើដំណើរទេសចរណ៍ក្នុងឆ្នាំ២០២៧

ឧកញ៉ាសំពៅ — Tue, 19 Mar 2024 09:00:00 +0000

នាវា Titanic ទី២ នឹងចាប់ផ្ដើមបើកការធ្វើដំណើរទេសចរណ៍តាមផ្លូវទឹក នាឆ្នាំ២០២៧ ស្របពេលគម្រោងផលិតនាវាមួយនេះ គឺបង្កើតឡើងដោយមហាសេដ្ឋីអូស្ត្រាលី Clive Palmer។ នេះបើតាមការចុះផ្សាយពីសារព័ត៌មានអន្តរជាតិជាច្រើន។

មហាសេដ្ឋីវ័យ ៦៩ឆ្នាំរូបនេះ បានប្រាប់ទៅកាន់បណ្ដាញសារព័ត៌មានថា នាវា Titanic ទី២ ផលិតឡើងតាមលំនាំនាវា Titanic ដើម ក៏ប៉ុន្តែរចនាបទខាងក្នុង នឹងមានលក្ខណៈទំនើប ប្រណីត និងស៊ីវិល័យដាច់នាវាដើម ហើយក៏ធានានូវប្រព័ន្ធសុវត្ថិភាពល្អបំផុតផងដែរ។

លោក Palmer បានជំនឿចិត្តថា លោកនឹងអាចស្វែងរកចំណតនាវាខ្នាតយក្សមួយនេះបាន ហើយដំណើរការសាងសង់ នឹងចាប់ផ្ដើមពីឆ្នាំ ២០២៥ ស្របពេលមានការសន្និដ្ឋានថា នាវា Titanic ទី២ ដែលមានទម្ងន់ ៥៦ ០០០តោន នឹងត្រូវចំណាយប្រាក់ប្រហែល ១ពាន់លានដុល្លារ ដើម្បីបញ្ចប់ការសាងសង់។

បើទោះជានាវា Titanic ទី២ មិនទាន់លេចចេញជារូបរាងក្ដី ក៏ប៉ុន្តែមហាសេដ្ឋីមានលុយជាង ៤ពាន់លានដុល្លាររូបនេះអះអាងថា បច្ចុប្បន្នមានមនុស្សជាច្រើនពាន់នាក់ បានកក់កៅអីសម្រាប់ដំណើរទេសចរណ៍ខ្នាតធំ លើនាវាដែលអាចផ្ទុកមនុស្សបាន ២ ៥០០នាក់រួចស្រេចហើយ។

គួររំលឹកបន្តិចថា ផែនការផលិតនាវា Titanic ទី២ របស់មហាសេដ្ឋី Clive Palmer គឺមានតាំងពីឆ្នាំ២០១២ ហើយគ្រោងផលិតនៅឆ្នាំ២០១៨ ក៏ប៉ុន្តែដោយសារពេលនោះមានផ្ទុះជំងឺរាតត្បាតកូវីដ ១៩ បានធ្វើឲ្យគ្រោងការណ៍មួយនេះ ត្រូវពន្យារពេលដល់ឆ្នាំ២០២៥វិញ៕

The post នាវា Titanic ទី២ គ្រោងចាប់ផ្ដើមធ្វើដំណើរទេសចរណ៍ក្នុងឆ្នាំ២០២៧ appeared first on .

មហាសេដ្ឋីអូស្ត្រាលីរងការរិះគន់ខ្លាំងៗ ក្រោយក្លាយជាម្ចាស់កម្មសិទ្ធិរថយន្តរបស់មេដឹកនាំផ្ដាច់ការហ៊ីត្លែរ

ឧកញ៉ាសំពៅ — Tue, 01 Mar 2022 08:46:58 +0000

កាលពីពេលថ្មីៗនេះ មហាសេដ្ឋី Clive Palmer បានទទួលការរិះគន់ឥតសំចៃដៃពីគណៈកម្មការប្រឆាំងការបរិហារកេរ្តិ៍នៃប្រទេសអូស្ត្រាលី ក្រោយរូបលោកបានទិញរថយន្ត Mercedes ដែលអាចការពារគ្រាប់កាំភ្លើង ហើយវាជាអតីតកម្មសិទ្ធិរបស់មេដឹកនាំផ្ដាច់ការ Adolf Hitler។

យោងតាមការចុះផ្សាយពីសារព័ត៌មានអូស្ត្រាលីបានឲ្យដឹងថា ស្ដេចត្រាញ់រ៉ែ និងបេក្ខភាពតំណាងរាស្ត្ររូបនេះ បានទិញរថយន្តខាងលើពីជនជាតិរុស្ស៊ីម្នាក់នៅឯកម្មវិធីដេញថ្លៃនៅទីក្រុងឡុង ក្នុងគោលបំណងយកវាមកតាំងបង្ហាញ ដោយសាររូបលោកជាអ្នកស្រលាញ់រថយន្តបំផុត។

រថយន្តដែលមហាសេដ្ឋីរូបនេះបានទិញគឺ Mercedes-Benz 770 Grosser Offener Tourenwagen ដែលត្រូវបានគេស្គាល់ថាជា Super Mercedes ដែលជារថយន្តមួយក្នុងចំណោមរថយន្តទាំង ៥ គ្រឿងដែលធ្លាប់ប្រើប្រាស់ដោយហ៊ីត្លែរ ខណៈ ៣ គ្រឿងទៀតកំពុងស្ថិតនៅក្នុងដៃបុគ្គលឯកជនផ្សេងទៀត។

“ខ្ញុំពិតជាមិនយល់ថាគាត់គិតពីអ្វី ខ្ញុំបានតេទូរស័ព្ទទៅកាន់ Clive Palmer សួរនាំពីរឿងមួយនេះ និងបានឲ្យគាត់គិតឡើងវិញពីកូនក្មេងប្រមាណ ១,៥ លាននាក់ដែលបានស្លាប់ដោយសារ Nazi និងជនជាតិជ្វីហ្វប្រមាណ ៦ លាននាក់ដែលបានសម្លាប់យ៉ាងរង្គាលនៅសម័យនោះ”។ នេះបើតាមការលើកឡើងរបស់ Dvir Abramovich ប្រធានគណៈកម្មការប្រឆាំងការបរិហារកេរ្តិ៍។

“បើទោះជាជំនាន់ប្រល័យពូជសាសន៍នេះវាផុតទៅយូរហើយក្ដី តែវប្បធម៌ និងមនោគមវិជ្ជាដ៏គ្រោះថ្នាក់របស់វានៅតែមានដល់សព្វថ្ងៃ។ យានយន្តដែលប្រើប្រាស់ដោយមនុស្សឃោរឃៅមួយនេះ មិនសក្ដិសមស្ថិតនៅក្នុងការតាំងបង្ហាញយានយន្តណាមួយ ឬក៏សារមន្ទីរណាមួយលើលោកឡើយ”៕

ប្រភព: timesofisrael

The post មហាសេដ្ឋីអូស្ត្រាលីរងការរិះគន់ខ្លាំងៗ ក្រោយក្លាយជាម្ចាស់កម្មសិទ្ធិរថយន្តរបស់មេដឹកនាំផ្ដាច់ការហ៊ីត្លែរ appeared first on .

មហាសេដ្ឋីអូស្ត្រាលីប្ដឹងក្រុមហ៊ុន Facebook ទាក់ទងនឹងករណីឆបោក

ឧកញ៉ាសំពៅ — Sun, 06 Feb 2022 01:28:38 +0000

កាលពីពេលថ្មីៗនេះ មហាសេដ្ឋីអូស្ត្រាលី Andrew Forrest បានដាក់ពាក្យបណ្ដឹងទៅកាន់ក្រុមហ៊ុន Facebook ពីបទមិនអាចគ្រប់គ្រងប្រព័ន្ធផ្សព្វផ្សាយបានល្អ ដោយមានផ្ទាំងពាណិជ្ជកម្មឆបោកមួយមានរូបលោកនៅលើនោះ។ នេះបើតាមការចុះផ្សាយពីកាសែត Sydney Morning Herald។

ក្រុមការពារក្ដីរបស់មហាសេដ្ឋីខាងលើបានអះអាងថា នេះគឺជាលើកដំបូងដែល Facebook នឹងជួបប្រទះការប្ដឹងទាក់ទងនឹងករណីឆបោកបែបនេះលើពិភពលោក ខណៈកាលពីឆ្នាំ ២០១៩ ក្រុមហ៊ុនបណ្ដាញសង្គមខ្នាតយក្សមួយនេះក៏ធ្លាប់ត្រូវបានស៊ើបអង្កេតពីសហរដ្ឋអាមេរិកទាក់ទងនឹងការគ្រប់គ្រងទិន្នន័យអ្នកប្រើប្រាស់ផងដែរ។

ប្រភពខាងលើអះអាងទៀតថា មហាសេដ្ឋី Forrest បានដាក់ពាក្យបណ្ដឹងនៅទីក្រុង California ដែលជាទីស្នាក់ការកណ្ដាលរបស់ Facebook តែម្ដង ស្របពេលតុលាការ The Magistrates Court of Western Australia នឹងចាប់ផ្ដើមសវនាការនៅចុងខែមីនា ហើយប្រសិនបើចៅក្រមរកឃើញថា Facebook ពិតជាមានកំហុស នោះពួកគេនឹងទទួលរងពិន័យជាទឹកប្រាក់ ឬអាចបង្ខំឲ្យផ្លាស់ប្ដូរផែនការផ្សព្វផ្សាយពាណិជ្ជកម្មរបស់ពួកគេ។

បញ្ជាក់ដែរថា កន្លងមកធ្លាប់មានអ្នកចាញ់បោកផ្ទាំងពាណិជ្ជកម្មដែលមាននៅលើ Facebook នៅក្នុងប្រទេសអូស្ត្រាលីដល់ទៅ ៦៧០ ០០០ ដុល្លារដែលផ្ទាំងពាណិជ្ជកម្មមួយនោះមានរូបលោក Forrest នៅជាមួយ ទើបធ្វើឲ្យកិត្តិយសរបស់មហាសេដ្ឋីរូបនេះខូចខាតជាខ្លាំង ទើបសម្រេចចិត្តប្ដឹងផ្ដល់ទៅកាន់ក្រុមហ៊ុនបណ្ដាញសង្គមខ្នាតយក្សមួយនេះ។ នេះបើតាមការអះអាងពី The Australian៕

ប្រភព: Forbes

The post មហាសេដ្ឋីអូស្ត្រាលីប្ដឹងក្រុមហ៊ុន Facebook ទាក់ទងនឹងករណីឆបោក appeared first on .

ពិន័យស្ដេចត្រាញ់ផលិតទឹកដោះគោនៅអូស្ត្រាលី ជិតកន្លះលានដុល្លារ ក្រោយប្រើប្រាស់ទឹកលើសកំណត់

ឧកញ៉ាសំពៅ — Wed, 02 Feb 2022 01:37:44 +0000

ក្រុមហ៊ុន The Leppington Pastoral Company ដែលគ្រប់គ្រងដោយបងប្អូនត្រកូល Perich គឺ Tony និង Ron បានយល់ព្រមដកទំនប់ទឹកដ៏ធំមួយនៅកសិដ្ឋានចិញ្ចឹមគោយកទឹកដោះ និងបង់ប្រាក់ ៤២៥ ០០០ ដុល្លារទៅកាន់រដ្ឋាភិបាល។

ក្រោយការផាកពិន័យ ក្រុមហ៊ុនសារភាពបានយកទឹកពីទំនប់ធំ ៣ មកប្រើប្រាស់ដោយគ្មានអាជ្ញាប័ណ្ណត្រឹមត្រូវ និងបានសាងសង់អាងស្តុបទឹកដោយគ្មានការអនុញ្ញាត។

បញ្ជាក់ដែរថា បងប្អូនត្រកូល Perich មានឪពុកម្តាយសញ្ជាតិក្រូអាតអន្តោប្រវេសន្តមកប្រទេសអូស្ត្រាលី និងចាប់ផ្ដើមអាជីវកម្មចិញ្ចឹមគោយកទឹកដោះនៅជាយក្រុង Sydney កាលពីឆ្នាំ ១៩៥១ ជាមួយគោ ២៥ ក្បាល។ បងប្អូនត្រកូល Perich បច្ចុប្បន្នមានទ្រព្យសម្បត្តិប្រមាណ ២,៦៤ ពាន់លានដុល្លារ៕

ប្រភព: smh

The post ពិន័យស្ដេចត្រាញ់ផលិតទឹកដោះគោនៅអូស្ត្រាលី ជិតកន្លះលានដុល្លារ ក្រោយប្រើប្រាស់ទឹកលើសកំណត់ appeared first on .