លុយខុសច្បាប់

រកឃើញកូនប្រុសប្រធានាធិបតីកូឡុំប៊ី ប្រើលុយកខ្វក់ក្នុងយុទ្ធនាឃោសនារកសន្លឹកឆ្នោត

ឧកញ៉ាសំពៅ — Fri, 04 Aug 2023 08:54:42 +0000

កូនប្រុសច្បងប្រធានាធិបតីកូឡុំប៊ី Gustavo Petro គឺលោក Nicolas Petro បានសារភាពថា ទទួលបានលុយកខ្វក់ សម្រាប់ប្រើប្រាស់យុទ្ធនាការឃោសនារកសន្លឹកឆ្នោត សម្រាប់ការប្រជែងតំណែងប្រធានាធិបតីរបស់ឪពុក កាលពីឆ្នាំ ២០២២។ នេះបើតាមការចុះផ្សាយពីសារព័ត៌មាន Reuters។

ព្រះរាជអាជ្ញា Mario Burgos បានប្រាប់ទៅកាន់ចៅក្រមថា Nicolas Petro ដែលត្រូវបានចាប់ខ្លួន កាលពីចុងសប្ដាហ៍ ក្រោយរងការចោទប្រកាន់ទាក់ទង នឹងការលាងលុយកខ្វក់ និងការបង្រ្កាបដោយខុសច្បាប់ បានលាតត្រដាងថា លោកបានទទួលប្រាក់យ៉ាងច្រើនពីអ្នកម៉ៅការជនជាតិកូឡុំប៊ីម្នាក់ ដែលត្រូវបានចោទប្រកាន់ពីបទមនុស្សឃាត និងអតីតសមាជិកព្រឹទ្ធសភាម្នាក់ទៀត ដែលត្រូវបានកាត់ទោសពីបទជួញដូរគ្រឿងញៀន និងជាអ្នកជំនួញ “ដ៏មានអំណាច” មួយរូប។

នៅក្នុងសវនាការ លោក Burgos បាននិយាយថា កូនប្រុសច្បងប្រធានាធិបតីកូឡុំប៊ីសារភាពទាំងអស់ថា ប្រាក់ដែលគេទទួលបាន មួយចំណែកធំយកទៅបង្កើនទ្រព្យសម្បត្តិខ្លួនឯង ខណៈសល់ប៉ុន្មាន យកទៅប្រើប្រាស់ក្នុងយុទ្ធនាការឃោសនារកសន្លឹកឆ្នោត ជូនឪពុកដែលជាបេក្ខភាពប្រធានាធិបតីនាពេលនោះ។

បន្ថែមពីនោះ ព្រះរាជអាជ្ញាខាងលើក៏បានបញ្ជាក់ដែរថា Nicolas Petro យល់ព្រមសហការ ដោយផ្ដល់នូវភស្តុតាងបន្ថែម និងលាលែងតំណែង ក្នុងនាមជាសមាជិកសភា ក្នុងស្រុកនៅនាយកដ្ឋាន Atlántico របស់ប្រទេសកូឡុំប៊ី និងជៀសវាងទទួលយកតួនាទីនយោបាយផ្សេងទៀតផងដែរ។

ជម្រាបបន្ថែមថា តាមរយៈការចោទប្រកាន់ខាងលើ តុលាការអាចនឹងសម្រេចផ្ដន្ទាទោសដល់កូនប្រុសប្រធានាធិបតីកូឡុំប៊ី ជាប់ពន្ធនាគារពី ១២ឆ្នាំ ទៅ ២០ឆ្នាំ៕

The post រកឃើញកូនប្រុសប្រធានាធិបតីកូឡុំប៊ី ប្រើលុយកខ្វក់ក្នុងយុទ្ធនាឃោសនារកសន្លឹកឆ្នោត appeared first on .

ទីបំផុត FATF សម្រេចដកកម្ពុជាពី “បញ្ជីប្រផេះ” នៃប្រទេសមានហានិភ័យលាងលុយកខ្វក់

ឧកញ៉ាសំពៅ — Sat, 25 Feb 2023 03:45:51 +0000

កាលពីពេលថ្មីៗនេះ ក្រុមការងារសកម្មភាពហិរញ្ញវត្ថុ ហៅកាត់ FATF ដែលមានមូលដ្ឋាននៅទីក្រុងប៉ារីស បានប្រកាសសម្រេចដកកម្ពុជាចេញពី “បញ្ជីប្រផេះ” នៃប្រទេសដែលមានហានិភ័យខ្ពស់សម្រាប់ធ្វើការលាងលុយកខ្វក់ បន្ទាប់ពីកម្ពុជាជាប់ក្នុងបញ្ជីមួយនេះ តាំងពីឆ្នាំ ២០១៩។

យោងតាមការចុះផ្សាយពីគេហទំព័រផ្លូវការរបស់ FATF បានបញ្ជាក់ថា ក្រុមអ្នកសង្កេតការសកលផ្នែកលាងលុយកខ្វក់ បានកត់សម្គាល់ថា កម្ពុជាបានបង្កើនការវិវឌ្ឍន៍ជាច្រើន ជុំវិញបញ្ហាប្រឆាំងនឹងការលាងលុយ ក៏ដូចជាប្រយុទ្ធប្រឆាំងដល់ការផ្ដល់ហិរញ្ញប្បទាននៃក្រុមភារវកម្មជាដើម (AML/CFT)។

FATF បាននិយាយថា ប្រទេសនេះ “បានដោះស្រាយភាពខ្វះខាតបច្ចេកទេសរបស់ខ្លួន ដើម្បីបំពេញតាមការប្តេជ្ញាចិត្តនៃផែនការសកម្មភាពស្តីពីភាពខ្វះខាតជាយុទ្ធសាស្រ្ត ដែល FATF កំណត់ក្នុងខែកុម្ភៈ ឆ្នាំ 2019” ហើយពួកគេបានបន្ថែមថា ប្រទេសកម្ពុជា “លែងជាកម្មវត្ថុនៃដំណើរការត្រួតពិនិត្យរបស់ FATF ទៀតហើយ”។

គួររំលឹកដែរថា ប្រទេសដែលត្រូវបានដាក់ក្នុង “បញ្ជីប្រផេះ” ដោយ FATF គឺជាការព្រមានលើផ្នែកហិរញ្ញវត្ថុនៃប្រទេសនោះ ដោយសារពួកគេមិនបានខិតខំលើការប្រយុទ្ធប្រឆាំង នឹងឧក្រិដ្ឋកម្មហិរញ្ញវត្ថុ។ គោលដៅចំបងរបស់ FATF គឺប្រយុទ្ធប្រឆាំងនឹងឧក្រិដ្ឋកម្មទាំងអស់ ការជួញដូរគ្រឿងញៀន ការជួញដូរមនុស្ស អំពើពុករលួយ និងអំពើភារវកម្ម៕

The post ទីបំផុត FATF សម្រេចដកកម្ពុជាពី “បញ្ជីប្រផេះ” នៃប្រទេសមានហានិភ័យលាងលុយកខ្វក់ appeared first on .

ឃាត់ខ្លួនស្ដេចត្រាញ់រុស្ស៊ីម្នាក់នៅចក្រភពអង់គ្លេស ពាក់ព័ន្ធនឹងករណីលាងលុយកខ្វក់

ឧកញ៉ាសំពៅ — Sun, 04 Dec 2022 23:33:00 +0000

អ្នកជំនួញខ្នាតយក្សរុស្ស៊ីម្នាក់ដែលត្រូវបានកាសែតរដ្ឋរុស្ស៊ីបង្ហើបឈ្មោះថា Mikhail Fridman ត្រូវបានឃាត់ខ្លួននៅទីក្រុងឡុងដ៍ នៃចក្រភពអង់គ្លេស ខណៈរូបលោកគឺជាមហាសេដ្ឋីមានបំផុតមួយរូបប្រចាំប្រទេស។

យោងតាមការចុះផ្សាយពី Timeofisrael បានបង្ហើបថា របាយការណ៍បញ្ចេញដោយទីភ្នាក់ងារឧក្រិដ្ឋកម្មជាតិចក្រភពអង់គ្លេស មិនបានបញ្ជាក់ពីឈ្មោះរបស់បុគ្គលដែលបានឃាត់ខ្លួនឡើយ គ្រាន់តែទម្លាយថា បុគ្គលរូបនេះជាប់ពាក់ព័ន្ធនឹងករណីលាងលុយកខ្វក់ ឃុបឃិតការបោកបន្លំឯកសារការិយាល័យផ្ទះ និងការភូតកុហក។

ប្រភពដដែលបានបន្ថែមទៀតថា អំឡុងពេលធ្វើការឃាត់ខ្លួននោះ មានរកឃើញភុស្តតាងជាច្រើនដូចជា ឧបករណ៍ឌីជីថលមួយចំនួន និងសាច់ប្រាក់ដ៏ច្រើនសន្ធឹកសន្ធាប់ពី “លំនៅដ្ឋានរាប់លានផោន”របស់ស្ដេចត្រាញ់រុស្ស៊ីម្នាក់នេះ។

យ៉ាងណា សារព័ត៌មានរុស្ស៊ី TASS បានស្រង់សម្ដីប្រភពជិតស្និទ្ធនឹងលោក Fridman ថា លោកត្រូវបានឃាត់ខ្លួន ដោយសារល្មើសច្បាប់ទណ្ឌកម្មដែលបានដាក់មកលើលោក និងបានបញ្ជាក់លំអិតពីបញ្ហានេះឡើយ៕

The post ឃាត់ខ្លួនស្ដេចត្រាញ់រុស្ស៊ីម្នាក់នៅចក្រភពអង់គ្លេស ពាក់ព័ន្ធនឹងករណីលាងលុយកខ្វក់ appeared first on .

រដ្ឋមន្ត្រីយុត្តិធម៌ ស្នើឱ្យក្រសួង-ស្ថាប័នពាក់ព័ន្ធសហការគ្នាប្រឆាំងការសម្អាតប្រាក់ ដើម្បីអាចដកកម្ពុជាចេញពីបញ្ជីប្រផេះ

ឧកញ៉ាកោះក្របី — Sun, 24 Jul 2022 10:57:02 +0000

នៅចំពោះមុខ លោក កើត រិទ្ធ រដ្ឋមន្រ្តីក្រសួងយុត្តិធម៌ និងជាប្រធាន អ.អ.ផ. ស្នើឱ្យក្រុមការងារនីមួយៗ ក៏ដូចជា ក្រសួង-ស្ថាប័ន ដែលមានការពាក់ព័ន្ធត្រូវបន្តចូលរួមសហការ និងខិតខំបំពេញការងាររបស់ខ្លួនប្រកបដោយស្មារតីទទួលខុសត្រូវខ្ពស់លើការងារប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យឱ្យមានប្រសិទ្ធភាព និងនិរន្តភាព ដើម្បីកម្ពុជាអាចត្រូវបានដកចេញពីបញ្ជីប្រផេះ។

លើកឡើងក្នុងពេលដឹកនាំកិច្ចប្រជុំលើកទី៥ របស់អនុគណៈកម្មការចំពោះកិច្ចអនុវត្តផែនការសកម្មភាពការងាររបស់ក្រុមការងារត្រួតពិនិត្យរួមនៃក្រុមប្រទេសអាស៊ីប៉ាស៊ីហ្វិកអំពីកិច្ចសហប្រតិបត្តិការអន្តរជាតិ (អ.អ.ផ.) កាលពីថ្ងៃទី២៣ កក្កដា លោក កើត រិទ្ធ ក៏បានស្នើឱ្យក្រសួង-ស្ថាប័ន ដែលធ្វើការងារលើវិស័យពាក់ព័ន្ធនឹងបទល្មើសដែលមានហានិភ័យក្នុងការសម្អាតប្រាក់ ត្រូវបង្កើនសកម្មភាពរបស់ខ្លួន និងផ្តល់អាទិភាពខ្ពស់លើការងារប្រឆាំងការសម្អាតប្រាក់ ព្រមទាំងបន្តបណ្តុះបណ្តាល និងពង្រឹងសមត្ថភាពមន្រ្តីអនុវត្តច្បាប់ ដោយផ្តោតជាសំខាន់លើបច្ចេកទេសស៊ើបអង្កេតពាក់ព័ន្ធនឹងការសម្អាតប្រាក់។

គួរជម្រាបថា បើទោះបីជាកម្ពុជាបានខិតខំប្រឹងប្រែង ធ្វើសេចក្ដីព្រាងច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ឬការលាងលុយកខ្វក់ តាំងពីឆ្នាំពី២០២០ក៏ដោយ កម្ពុជានៅតែបន្តស្ថិតក្នុងបញ្ជីប្រផេះ នៃក្រុមប្រទេសដែលមានហានិភ័យខាងលាងលុយកខ្វក់ ដែលពិភពលោកត្រូវបង្កើនការតាមដានក្នុងឆ្នាំនេះ។ នេះបើតាមក្រុមការងារហិរញ្ញវត្ថុ ហៅកាត់ថា (FATF) ដែលមានមូលដ្ឋាននៅទីក្រុងប៉ារីស កាលពីថ្ងៃទី៤ ខែមីនា២០២២។

ជាមួយគ្នានេះ កម្ពុជាត្រូវបានអង្គការនេះ ដាក់ក្នុង«បញ្ជីប្រផេះ»អស់រយៈពេលជាង៣ឆ្នាំជាប់ៗគ្នាតាំងពីឆ្នាំ២០១៩មក ហើយវិស័យដែលរងហានិភ័យខ្ពស់ខាងអំពើលាងលុយកខ្វក់នៅកម្ពុជា រួមមាន វិស័យធនាគារ ហិរញ្ញវត្ថុ វិស័យសំណង់ អចលនទ្រព្យ និងវិស័យកាស៊ីណូ៕

The post រដ្ឋមន្ត្រីយុត្តិធម៌ ស្នើឱ្យក្រសួង-ស្ថាប័នពាក់ព័ន្ធសហការគ្នាប្រឆាំងការសម្អាតប្រាក់ ដើម្បីអាចដកកម្ពុជាចេញពីបញ្ជីប្រផេះ appeared first on .

ក្ដៅៗចាប់ជនជាតិចិន៣នាក់ទៀត រឿងនាំលុយសុទ្ធចូលកម្ពុជា ៩០ម៉ឺនដុល្លារ

កូនចៅឧកញ៉ា — Wed, 10 Jul 2019 01:48:45 +0000

កម្លាំងការិយាល័យគយ នៅព្រលានយន្ដហោះអន្ដរជាតិភ្នំពេញ សហការជាមួយកម្លាំងនគរបាលអន្ដោប្រវេសន៍ ប៉ុស្ដិ៍ច្រកទ្វារអន្ដរជាតិភ្នំពេញ បានចាប់ខ្លួជនជាតិចិន៣នាក់ ក្រោយនាំលុយចូលមកប្រទេសកម្ពុជាចំនួន៩០មុឺនដុល្លារ ដោយគ្មានប្រភពច្បាស់លាស់ នៅល្ងាចថ្ងៃទី០៩ ខែកក្កដា ឆ្នាំ២០១៩។ នេះបើតាមមន្ដ្រីការិយាល័យគយព្រលានយន្ដហោះអន្ដរជាតិភ្នំពេញ បានប្រាប់បណ្ដាញព័ត៌មានក្នុងស្រុក។

ជនជាតិចិនដែលសមត្ថកិច្ចចាប់ខ្លួននោះរួមមាន ទី១៖ឈ្មោះ Huang Canming អាយុ២៧ឆ្នាំ និងទី២៖ឈ្មោះ Yang Yongwei អាយុ២៦ឆ្នាំ ពួកគេធ្វើដំណើរចេញពីទីក្រុងហុងកុង ប្រទេសចិន មកអាកាសយានដ្ឋានអន្ដរជាតិភ្នំពេញ តាមជើងយន្ដហោះលេខ LQ971 និងទី៣៖ឈ្មោះ Zizheng Zheng អាយុ៣២ឆ្នាំ (ជាអ្នកមកចាំទទួលនៅភ្នំពេញ)។ ក្រោយធ្វើការត្រួតពិនិត្យ និងបានរកឃើញក្រដាសប្រាក់ដែលជនសង្ស័យ ដាក់ក្នុងកាបូបយួរដៃចំនួន៣ ដែលមានទឹកប្រាក់សរុប ៩០០,០០០ដុល្លារ ដោយអ្នកដំណើរមិនបានប្រកាសជូនដំណឹងដល់មន្ដ្រីគយ និងរដ្ឋាករ លើលិខិតរាយការណ៍គយនោះឡើយ។ ការនាំចូលក្រដាសប្រាក់ទាំងនេះមានចំនួនច្រើន មិនមានប្រភពច្បាស់លាស់ និងមិនបង្ហាញពីគោលដៅច្បាស់លាស់របស់ប្រាក់ ទើបការិយាល័យត្រួតពិនិត្យគយអាកាសយានដ្ឋានអន្ដរជាតិភ្នំពេញ បានសម្រេចឃាត់ខ្លួនតែម្ដង៕

The post ក្ដៅៗចាប់ជនជាតិចិន៣នាក់ទៀត រឿងនាំលុយសុទ្ធចូលកម្ពុជា ៩០ម៉ឺនដុល្លារ appeared first on .