លោក ម៉ិច សីហា

លោកគ្រូ មុិច សីហា និងភរិយា កំពុងប្រកាសលក់ស្ពៃសហគមន៍កសិកម្មទំនើប

ឧកញ៉ាដែនដី — Sat, 14 Dec 2024 01:15:00 +0000

លោក មុិច សីហា នាយកវិទ្យាស្ថាន អាយឃីអុិនធើណេសិនណល និងភរិយា បានប្រកាសលក់ស្ពៃសហគមន៍កសិកម្មទំនើប ដែលទើបនឹងទទួលបានផល ក្នុងតម្លៃសមរម្យជាមួយនឹងគុណភាពខ្ពស់។

លោកគ្រូ មុិច សីហា បានធ្វើការអំពាវនាវនៅលើទំព័រហ្វេសប៊ុក នៅថ្ងៃទី១៣ ខែធ្នូ ឆ្នាំ២០២៤ ថាសូមឱ្យបងប្អូនជួយទិញបន្លែស្ពៃសហគមន៍កសិកម្មទំនើបនេះផង។ ចំពោះតម្លៃលោកបានបញ្ជាក់ឱ្យដឹងថា ស្ពៃក្រញាញ់ ៣០០០រៀលក្នុងមួយគីឡូក្រាម, ស្ពៃតឿ ៣០០០រៀលក្នុងមួយគីឡូក្រាម និងស្ពៃចង្កឹះតម្លៃ ៣០០០រៀលក្នុងមួយគីឡូក្រាមដូចគ្នាផងដែរ។

ដោយមើលឃើញពីសក្តានុពលវិស័យកសិកម្មនៅកម្ពុជា និងតម្រូវការបន្លែគុណភាពខ្ពស់លើទីផ្សារ ថ្មីៗនេះលោក មុិច សីហា បានធ្វើអាជីវកម្មលើវិស័យកសិកម្មបង្កើតជាសហគមន៍កសិកម្មទំនើប ដោយដាំខ្ញី សាឡាដ និងស្ពៃ ព្រមទាំងបន្លែអាទិភាពមួយចំនួនទៀតសម្រាប់លក់ ដោយលោកលើកឡើងថា នេះជាការធ្វើអាជីវកម្មជាលក្ខណៈទ្រង់ទ្រាយគ្រួសារ។

លោក មុិច សីហា បានលើកឡើងថា ប្រទេសកម្ពុជាភាពច្រើនបាននាំចូលបន្លែស្លឹក មកពីបណ្តាប្រទេសជិតខាង ដូច្នេះទីផ្សារលើវិស័យនេះនៅមានភាពទូលំទូលាយខ្លាំង ហើយបើសិនជាយើងធ្វើឱ្យបានត្រឹមត្រូវតាមបច្ចេកទេស នោះនឹងទទួលបានទីផ្សារលឿន ការគាំទ្រពីក្រសួងកសិកម្ម និងទទួលបានការគាំទ្រពីសហគមន៍កសិកម្មទំនើបផងដែរ។

គួរបញ្ជាក់ថា លោក មុិច សីហា ជានាយកវិទ្យាស្ថាន អាយឃីអុិនធើណេសិនណល ដែលជារឿយៗលោកតែងតែបើកវគ្គបណ្តុះបណ្តាលពាក់ព័ន្ធនឹងប្រធានបទការធ្វើអាជីវកម្ម។ វាគ្មិនពូកែវោហារ និយមចែករំលែកបទពិសោធន៍ក្បួនរកស៊ី តាមប្រព័ន្ធឌីជីថល រូបនេះ ធ្លាប់បានលើកឡើងថា លោកបានឆ្លងកាត់នូវបញ្ហាជាច្រើន រហូតមានពេលខ្លះលោកបែកគំនិតគិតចង់សម្លាប់ខ្លួនម្ដងៗក៏មាន ដោយសារទ្រាំ និងភាពបរាជ័យ ជាពិសេសការឈឺចាប់ធំៗនៅក្នុងជីវិតជាហូហែរ មុននឹងកែច្នៃជីវិតអាចក្លាយជានាយកវិទ្យាស្ថាន និងអាចចាប់ផ្តើមអាជីវកម្មលើវិស័យកសិកម្មមកទល់បច្ចុប្បន្ន៕

The post លោកគ្រូ មុិច សីហា និងភរិយា កំពុងប្រកាសលក់ស្ពៃសហគមន៍កសិកម្មទំនើប appeared first on .

លោក ម៉ិច សីហា៖ យុវសិស្ស យុវវ័យជំនាន់នេះមានឱកាសច្រើន តែច្រើនតែភ្លេចឱកាស!

ឧកញ៉ាសំពៅ — Mon, 07 Aug 2023 03:50:44 +0000

កាលពីថ្ងៃអាទិត្យ ទី ០៦ ខែសីហាកន្លងទៅ លោកគ្រូ ម៉ិច សីហា បានបើកវគ្គបណ្ដុះបណ្ដាលទ្រង់ទ្រាយធំ ក្រោមប្រធានបទ “សេដ្ឋកិច្ចឌីជីថល និងប្លង់អាជីវកម្ម” ដែលមានអ្នកចូលរួមប្រមាណ ៥០០នាក់ នៅមជ្ឈមណ្ឌលសហប្រតិបត្តិការកម្ពុជា-ជប៉ុន(CJCC)។

អំឡុងពេលបង្រៀននោះ លោក ម៉ិច សីហា ក៏បានលើកឡើងថា យុវសិស្ស និងយុវវ័យជំនាន់នេះមានឱកាសច្រើនណាស់ ប៉ុន្តែច្រើនតែភ្លេចខ្លួន និងភ្លេចចាប់យកឱកាសទាំងនោះ។

លោកលើកឡើងបែបនេះ ដោយសារក្នុងសម័យសេដ្ឋកិច្ចឌីជីថលនេះ មនុស្សមានឱកាសច្រើន ជាពិសេសគឺយុវវ័យ និងយុវសិស្សតែម្ដង ព្រោះថាព័ត៌មានគ្រប់យ៉ាង គឺសុទ្ធតែអាចស្រាវជ្រាវ និងរកបាននៅលើប្រព័ន្ធអ៊ីនធឺណិត ប៉ុន្តែមួយភាគធំមិនចេះចាប់យកឱកាស រវល់តែភ្លើតភ្លើនជាមួយនឹងភាពសប្បាយ ហ៊ឺហារ ភ្លេចការរៀនសូត្រ។

បន្ថែមពីនោះ លោកអគ្គនាយកវិទ្យាស្ថានអន្តរជាតិ IKEYក៏បានសំណូមពរឲ្យយុវសិស្ស និងយុវវ័យ ដកឃ្លាខ្លះពីភាពសប្បាយហួសមាឌ ងាកមកចាប់យកឱកាសក្នុងសម័យសេដ្ឋកិច្ចឌីជីថលនេះវិញ ព្រោះកម្ពុជាប្រទេសកំពុងអភិវឌ្ឍន៍ ដូច្នេះត្រូវការទំពាំងល្អៗច្រើនណាស់ ដើម្បីអាចជួយអភិវឌ្ឍន៍សង្គមជាតិ ឲ្យកាន់តែរីកចម្រើនថែមទៀត៕

The post លោក ម៉ិច សីហា៖ យុវសិស្ស យុវវ័យជំនាន់នេះមានឱកាសច្រើន តែច្រើនតែភ្លេចឱកាស! appeared first on .

លោក ម៉ិច សីហា៖ ការរត់ការឡើងងារ «ឧកញ៉ា» ទៅរកស៊ីនៅអាណត្តិថ្មីនេះ ហួសសម័យហើយ

ឧកញ៉ាដែនដី — Tue, 01 Aug 2023 01:15:00 +0000

លោក ម៉ិច សីហា អគ្គនាយកវិទ្យាស្ថានអន្តរជាតិ IKEY យល់ឃើញថា អ្នកដែលមានបំណងចង់រត់ឯកសារឡើងងារឯកឧត្តម ឬឧកញ៉ា ដើម្បីចេញរកស៊ីនៅអាណត្តិថ្មី នីតិកាលទី៧ ខាងមុខនេះ ខណៈដែលខ្លួនឯងជាមនុស្សក្លែងក្លាយ គឺហួសសម័យហើយ ព្រោះគណៈរដ្ឋមន្ត្រីថ្មី និងនាយករដ្ឋមន្ត្រីថ្មី សុទ្ធតែជាបញ្ញវន្តដែលមានភាពច្បាស់លាស់ណាស់។

លោកអគ្គនាយក IKEY បានលើកឡើងក្នុងវីដេអូឃ្លីបមួយថា៖ “តិចថាបុកលុយរត់ឯកសារឡើងឯកឧត្តម ឬឧកញ៉ា ដើម្បីចេញរកស៊ី គិតថាត្រឹមត្រូវក្នុងយុគសម័យឆ្នាំ២០២៣នេះ។ ច្រឡំហើយ គណៈរដ្ឋមន្ត្រី និងនាយករដ្ឋមន្ត្រី ឡើងថ្មីជំនាន់ក្រោយនេះ មិនមែនលំៗទេ។ បើចេញរកស៊ី អួតខ្លួនឯង ឯកឧត្តមទីប្រឹក្សា ខ្ញុំឧកញ៉ា ដែលខ្លួនឯងជាមនុស្សក្លែងក្លាយ គឺវាហួសសម័យហើយ”។

លោកបានបន្តថា ចេញរកស៊ី គេនិយាយពីរបាយការណ៍អតិថិជនគោល ស្ថិតិលើរបាយការណ៍អតិថិជនឱ្យបានច្បាស់ និងលំហូរសាច់ប្រាក់របស់ក្រុមហ៊ុន ប្រព័ន្ធផ្លូវច្បាប់លើរបាយការណ៍ឯកសារ។ បើយកលុយ ចេះតែតាមគេតាមឯងថា ខ្ញុំទៅខ្សែនេះបានឡើងឯកឧត្តម ខ្ញុំទៅខ្សែឯណោះបានឡើងឧកញ៉ា ហើយធ្វើកិច្ចការតូចធំ គេយល់មុខ គឺច្រឡំហើយ មន្ត្រីជំនាញគេគ្មានយល់មុខយើងឯកឧត្តម ឬឧកញ៉ានោះទេ។ យើងធំនៅកន្លែងណា ជារឿងរបស់យើង ប៉ុន្តែនៅកន្លែងគេគឺមិនធំជាងនៅកន្លែងគេនោះទេ។

លោក ម៉ិច សីហា បានបន្ថែមទៀតថា វប្បធម៌មួយ ដែលលោកចង់បញ្ជាក់ប្រាប់បងប្អូនទាំងអស់គ្នា នៅក្នុងវប្បធម៌ការងារនោះគឺ ទោះយើងពាក់ផ្កាយពីរ ឬផ្កាយបីក៏ដោយ យើងធំតែកន្លែងខ្លួនឯងនោះទេ ពេលឡើងមកនាយកដ្ឋានជំនាញរបស់គេ គឺគេទាមទារភាពច្បាស់លាស់។ ដូច្នេះសម័យនេះ ការរកស៊ីគួរតែពិនិត្យមើលពី គម្រោងអាជីវកម្មរបស់ខ្លួន ការដឹកនាំគម្រោងអាជីវកម្មរបស់ខ្លួនឯង របាយការណ៍អតិថិជនគោលអាស្រ័យផលនៅក្នុងតំបន់របស់ខ្លួនឯង តិចនិកក្នុងការដឹកនាំ ជាពិសេសជំនាញផ្នែកទីផ្សារ ត្រូវតែធ្វើឱ្យបានច្បាស់លាស់។

សូមជម្រាបថា នៅអាណត្តិថ្មី នីតិកាលទី៧នេះ ឯកឧត្តមបណ្ឌិត ហ៊ុន ម៉ាណែត នឹងឡើងធ្វើជានាយករដ្ឋមន្ត្រី ចាប់ពីល្ងាចថ្ងៃទី២២ ខែសីហា ឆ្នាំ២០២៣ទៅ ហើយគណៈរដ្ឋមន្ត្រីថ្មីមួយ នឹងត្រូវបានរៀបចំឡើង ដែលភាគច្រើនជាថ្នាក់ដឹកនាំវ័យក្មេង ខណៈដែលអ្នកជំនាញសេដ្ឋកិច្ចភាគច្រើនជឿជាក់ថា បញ្ញវន្តវ័យក្មេងទាំងនេះ នឹងអាចដឹកនាំនាវាកម្ពុជា ឱ្យទទួលបាននូវអត្រាកំណើនសេដ្ឋកិច្ច កាន់តែខ្ពស់ប្រសើរឡើងបន្ថែមទៀត៕

The post លោក ម៉ិច សីហា៖ ការរត់ការឡើងងារ «ឧកញ៉ា» ទៅរកស៊ីនៅអាណត្តិថ្មីនេះ ហួសសម័យហើយ appeared first on .

លោក ម៉ិច សីហា គ្រោងសរសេរសៀវភៅចែកជូនពលរដ្ឋខ្មែរ ក្រោយទៅចូលរួមវគ្គសិក្សាមួយលក្ខណៈអន្តរជាតិ

ឧកញ៉ាដែនដី — Thu, 01 Jun 2023 00:30:00 +0000

លោក ម៉ិច សីហា អគ្គនាយកវិទ្យាស្ថានអន្តរជាតិ IKEY កំពុងត្រៀមផលិតមេរៀន និងសរសេរជាសៀវភៅចែកជូនពលរដ្ឋខ្មែរ ជាពិសេសសម្រាប់អ្នករកស៊ី ឱ្យបានយល់ដឹងពីគន្លឹះសំខាន់ៗមួយចំនួន បន្ទាប់ពីលោកបានទៅចូលរួមវគ្គសិក្សាមួយ ទាក់ទងនឹងការធ្វើទីផ្សារ និងការគ្រប់គ្រងប្រព័ន្ធឌីជីថល ដែលមានអ្នកចូលមកពី ១៩ប្រទេស ទាំងតំបន់អឺរ៉ុប និងអាស៊ី នៅប្រទេសថៃ កាលពីពេលថ្មីៗកន្លងទៅនេះ។

លោកអគ្គនាយក IKEY បានថ្លែងប្រាប់ ឧកញ៉ា ញូស៍ ឱ្យដឹងថា លោកបានទៅចូលរួមវគ្គសិក្សាដ៏សំខាន់នេះ គឺតាមរយៈក្រុម Warehouse Solution Specialized Co Ltd (WSP) ជាអ្នកផ្តល់ឱកាសធ្វើឱ្យរូបលោកបានរៀនសូត្រជាលក្ខណៈអន្តរជាតិ ដែលមានអ្នកចូលរួមមកពី ១៩ប្រទេស មកពីតំបន់អឺរ៉ុប និងអាស៊ី ដែលទៅរៀននៅ KION Group ប្រទេសថៃ រយៈពេល ៣ថ្ងៃ។

លោក ម៉ិច សីហា បានលើកឡើងទៀតថា ចំណេះដឹងដែលលោកបានរៀន គឺទាក់ទងពីប្រព័ន្ធទីផ្សារឌីជីថល (System Digital Marketing), ប្រព័ន្ធគ្រប់គ្រងឌីជីថល (System Digital Management), ភាពងាយស្រួលក្នុងការដាក់ដំណើរការអាជីវកម្ម ដោយប្រើបច្ចេកវិទ្យា ព្រមទាំងម៉ាស៊ីនចូលរួមកាត់បន្ថយការចំណាយផ្សេងៗ ដែលលើសពីបរិមាណដែលម្ចាស់អាជីវកម្មគួរតែយល់ដឹង។

លោកបានបន្តដូច្នេះថា៖ “ក្រោយពេលត្រឡប់មកវិញ ខ្ញុំបានទទួលចំណេះដឹងជាច្រើន ទាក់ទងនឹងចំណេះដឹងអន្តរជាតិ ដែលចំណេះដឹងទាំងអស់នោះ វាបន្ថែមទៅលើ Business Structure ដែលខ្ញុំមានស្រាប់ ប៉ុន្តែគ្រាន់តែថានៅក្រៅប្រទេស គេបន្ថែមជាមួយម៉ាស៊ីន និងបច្ចេកវិទ្យាចូលរួម ដើម្បីពន្លឿន លើរចនាសម្ព័ន្ធនៃការរកស៊ីរបស់គេឱ្យខ្លាំង។ បេសកកម្មដែលខ្ញុំត្រឡប់មកវិញនេះ គឺខ្ញុំនឹងចងក្រងផលិតជាមេរៀន ពីព្រោះយើងបានទៅដកស្រង់បានអត្តរូបបុគ្គល ព្រមទាំងបុព្វហេតុច្បាស់លាស់ ដូច្នេះយើងយកវាមកផលិតជាមេរៀន ដើម្បីចែកជូនបងប្អូនកម្ពុជាយើងបន្តទៀត ដូចអ្វីដែលខ្ញុំធ្លាប់ធ្វើ គ្រាន់តែបញ្ហាប្រឈមគឺ ទាក់ទងនឹងសមត្ថភាពក្នុងការផលិតមេរៀន ដោយសារការប្រើថវិកាខ្ពស់ពេក ហើយថវិការបស់យើងមានកម្រិត ដូច្នេះយើងនឹងផលិតទៅតាមអ្វីដែលយើងអាចធ្វើទៅបាន”។

លោក ម៉ិច សីហា បានបន្ថែមថា អ្នកខ្លះនិយាយថា ការផលិតមេរៀនមិនចាំបាច់ប្រើលុយទេ ប៉ុន្តែតាមពិតការផលិតមេរៀន ក៏ត្រូវការចំណាយលុយដែរ ដោយសារយើងត្រូវការចំណាយពេលអង្គុយសរសេរ ដោយពុំបានរកស៊ីអ្វីសោះ ហើយការថតក៏ត្រូវការក្រុម Media ចូលរួម ដែលត្រូវការចំណាយប្រាក់ខែទាំងអស់ ព្រមទាំងទីតាំង និងសម្ភារៈផ្សេងៗទៀត។ ជាទូទៅ ក្នុងមួយខែ ក្រុមការងារលោកផលិតខ្លាំងបំផុត បានត្រឹមតែ ៥មេរៀនទេ ប៉ុន្តែវាមានប្រយោជន៍ខ្លាំងសម្រាប់អ្នករកស៊ីទាំងមូល។

”សម្រាប់ខ្ញុំ ខ្ញុំនឹងព្យាយាមធ្វើឱ្យហើយ នៅពេលដែលខ្ញុំមិនទាន់ខូចភ្នែកទាំងសងខាង ព្រោះភ្នែករបស់ខ្ញុំខូចមួយចំហៀងហើយ ហើយមួយចំហៀងទៀតអាចនឹងឆ្លង នៅពេលវាទ្រាំទ្រលែងបាន។ ខ្ញុំក៏មានអាយុច្រើនដែរហើយ ទើបចង់ចំណាយពេលវេលា ដើម្បីសង្គមជាតិឱ្យបានច្រើន”។ លោក ម៉ិច សីហា បានបញ្ជាក់ដូច្នេះ។

គួរបញ្ជាក់ថា ក្រុមហ៊ុន Warehouse Solution Specialized Co Ltd (WSP) គឺជាក្រុមហ៊ុនមួយ ដែលមានសិទ្ធចែកចាយស្របច្បាប់ ( Authorize dealership ) ពីក្រុមហ៊ុន KION Group របស់ប្រទេសអាល្លឺម៉ង់ នៅក្នុងប្រទេសកម្ពុជា នូវប្រភេទម៉ាស៊ីនលើកដាក់ទំនិញ ប្រើអាគុយស្ងូត ( Lithium batteries) អាគុយទឹក( Lead acid) ពីអាល្លឺម៉ង់។ ក្រុមហ៊ុន KION Group ជាក្រុមហ៊ុនយក្សរបស់អាល្លឺម៉ង់ ហើយក៏ជាក្រុមហ៊ុនយក្សទី២ ដែលប្រកួតប្រជែងជាមួយក្រុមហ៊ុន Toyota លើស្ថាបត្យកម្មផលិតគ្រឿងចក្ររថយន្ត ដូចជាម៉ាស៊ីន ដែលមានទីតាំងផ្គត់ផ្គង់នៅអាស៊ី គឺស្ថិតនៅប្រទេសថៃ៕

The post លោក ម៉ិច សីហា គ្រោងសរសេរសៀវភៅចែកជូនពលរដ្ឋខ្មែរ ក្រោយទៅចូលរួមវគ្គសិក្សាមួយលក្ខណៈអន្តរជាតិ appeared first on .

អ្នកឧកញ៉ា គួច ម៉េងលី ចូលរួមជាវាគ្មិនវេទិកាពិភាក្សាពិសេសនាព្រឹកនេះ

Yen Pheary — Fri, 23 Dec 2022 01:26:41 +0000

នៅព្រឹកថ្ងៃទី ២៣ ខែធ្នូនេះ អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិនៃក្រុមហ៊ុន ម៉េងលី ជេ.គួច អេឌ្យូខេសិន បានអញ្ជើញជាវាគ្មិនកិត្តិយសក្នុងវេទិកាជជែកពិភាក្សាពិសេសមួយ ក្រោមប្រធានបទ «ការរៀបចំផែនការ និងការអនុវត្ត ដើម្បីឈានទៅសម្រេចជោគជ័យ» វេលាម៉ោង ៩ព្រឹក នៅ The Factory Phnom Penh ទល់មុខវត្តចាក់អង្រែលើ។

ទន្ទឹមនឹងការអញ្ជើញចូលរួមពីអ្នកឧកញ៉ា ក៏មានវាគ្មិនល្បីៗចំនួន ២រូបទៀតផងដែរ ទី១/ លោក ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន និងទី២/ លោក ម៉ិច សីហា អគ្គនាយកវិទ្យាស្ថានអន្តរជាតិ ikey។

សូមបញ្ជាក់បន្តិចថា វេទិកាគូសវាសគោលដៅនៅព្រឹកនេះ ធ្វើឡើងក្រោមការរៀបចំដឹកនាំរបស់ស្ថាប័នសារព័ត៌មាន «កម្ពុជាថ្មី» ក្នុងគោលបំណងជួយចង្អុលបង្ហាញផ្លូវជោគជ័យនៅក្នុងឆ្នាំថ្មី។ មិនតែប៉ុណ្ណោះ វេទិកានេះមានការបើកឱ្យចូលរួមដោយសេរី និងមានការផ្សាយផ្ទាល់(Live) នៅលើទំព័រហ្វេសប៊ុក Kampuchea Thmey Daily និង Kampuchea Thmey Media ផងដែរ៕

The post អ្នកឧកញ៉ា គួច ម៉េងលី ចូលរួមជាវាគ្មិនវេទិកាពិភាក្សាពិសេសនាព្រឹកនេះ appeared first on .

អតីតកាល លោក ម៉ិច សីហា ធ្លាប់គិតចង់សម្លាប់ខ្លួនឯងម្ដងៗ ដោយសាររឿងទាំងនេះ!

អ្នកឧកញ៉ាវត្តភ្នំ — Fri, 08 Oct 2021 06:51:02 +0000

នៅក្នុងវីដេអូនៃការចែករំលែកបទពិសោធន៍ជីវិតផ្ទាល់ខ្លួន ពីបញ្ហាបាក់ទឹកចិត្តកម្រិតធ្ងន់ធ្ងរ លោក ម៉ិច សីហា អគ្គនាយកវិទ្យាស្ថានអន្តរជាតិ ikey បានរៀបរាប់នូវបញ្ហាជាច្រើនដែលធ្លាប់ឆ្លងកាត់កន្លងមក រហូតមានពេលខ្លះលោកបែកគំនិតគិតចង់សម្លាប់ខ្លួនម្ដងៗ ដោយសារទ្រាំ និងភាពបរាជ័យ ជាពិសេសការឈឺចាប់ធំៗនៅក្នុងជីវិត។

វាគ្មិនពូកែវោហារ និយមចែករំលែកបទពិសោធន៍ក្បួនរកស៊ី តាមប្រព័ន្ធឌីជីថល រូបនេះថ្លែងថា៖ “កាលពីមុន ពេលខ្លះខ្ញុំសឹងមិនអាចទ្រាំបាន ជីវិតខ្ញុំធ្លាប់ឆ្លងកាត់ទាំងជោគជ័យ និងបរាជ័យ។ ទម្រាំមកដល់ចំណុចនេះ អាយុប៉ុណ្ណឹង ភាពបរាជ័យ និងជោគជ័យ កាលពីអតីតកាលសរបស់ខ្ញុំ គឺដើរទន្ទឹមគ្នា ហាក់បីដូចជាស្រមោលអន្ទោលតាមប្រាណ”។

ងាកមកនិយាយដល់បច្ចុប្បន្នភាពរបស់ខ្លួនវិញ ម៉ិច សីហា បញ្ជាក់ថា សព្វថ្ងៃ គាត់អាចសម្រេចក្ដីសុបន្តិបានមួយផ្នែកក្នុងជីវិត ពោលគឺអាចមានលទ្ធភាពមើលថែឳពុកម្ដាយ ភរិយា ខ្លួនឯង និងគ្រួសារទាំងមូលបានសមរម្យ ហូបឆ្ងាញ់ រស់នៅស្រួល ប្រកបដោយកិត្តិយស។

អគ្គនាយកវិទ្យាស្ថានអន្តរជាតិ ikey រូបនេះឱ្យដឹងទៀតថា គាត់សប្បាចិត្ត និងអ្វីដែលលោកទទួលបានសព្វថ្ងៃ ក៏ប៉ុន្តែលោកសង្កត់ធ្ងន់ថា ភាពជោគជ័យវាមានកម្រិតគួរអោយកត់សម្គាល់ ជីវិតរបស់គាត់នៅអាយុប្រហែលជា ២៥ឆ្នាំ គាត់បានជួបឧបសគ្គធំៗ ធ្វើអោយលោករើខ្លួនសឹងមិនផុត ហើយក៏ត្រូវបណ្ដែតបណ្ដោយខ្លួននៅក្នុងស្ថាននោះ បីទៅបួនឆ្នាំថែមទៀតផង។

លោកក៏បានរំលឹកទៀតថា ចាប់តាំងពីអាយុ២៥ឆ្នាំ មក ការបរាជ័យរបស់ខ្លួន ទាំងការងារ ការរកសុី ទាំងទ្រព្យសម្បត្តិ ថវិកា បានបាត់បង់ទាំងអស់ ស្ទើរតែពេលនោះទ្រាំមិនបាននៅអ្វីដែល យើងគិតថាយើងអាចឈ្នះតែបែរជាបរាជ័យទៅវិញ។ ការបរាជ័យធំមួយទៀតដែលធ្វើអោយគាត់ស្ទើរតែចង់បោះបង់សូម្បីតែជីវិត គឺការបែកបាក់គ្រួសារ ហើយការបែកបាក់គ្រួសារនេះហើយដែលធ្វើអោយគាត់មានសតិ ឬក៏អាចហៅថា សម្ពាធផ្លូវចិត្ត មួយកម្រិតធ្ងន់។

ក្នុងន័យនេះ អគ្គនាយកវិទ្យាស្ថានអន្តរជាតិ ikey លោក ម៉ិច សីហា ចង់ចែករំលែកបទពិសោធន៍ជីវិតពិត និងជាពិសេសដាស់តឿនដល់អ្នកដែលឆ្លងកាត់រសជាតិបែបនេះ សូមកុំបោះបង់ខ្លួនឯងចោលឱ្យសោះ ឬឈានដល់ការគិតខ្លីដូចលោក ព្រោះគ្រប់បញ្ហាតែងតែមានដំណោះស្រាយ៕

ទស្សនាវីដេអូពេញ៖ បើអ្នកបាក់ទឹកចិត្តនៅក្នុងជីវិត ពិបាកគំនិតរកស៊ីសូមស្ដាប់វីឌីអូនេះ

The post អតីតកាល លោក ម៉ិច សីហា ធ្លាប់គិតចង់សម្លាប់ខ្លួនឯងម្ដងៗ ដោយសាររឿងទាំងនេះ! appeared first on .