លោក លី ឡាវិល ប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជាបានឱ្យដឹងថា ផ្អែកលើតម្លៃជ្រូករស់ក្នុងពេលសព្វថ្ងៃនេះមានស្ថិរភាពល្អមានរយៈពេលជាង៣ខែមកនេះ យើងឃើញថាពលរដ្ឋភាគច្រើនងាកមកចាប់ផ្តើមចិញ្ចឹមជ្រូកឡើងវិញហើយ ព្រោះតម្លៃជ្រូកសព្វថ្ងៃនេះអាចឱ្យអ្នកចិញ្ចឹមរកប្រាក់ចំណេញបាន និងហ៊ានប្រឈរមុខជាមួយហានិភ័យដោយខ្លួនឯង។ ប៉ុន្តែបើតម្លៃជ្រូករស់នៅក្រោម៩៥០០រៀល ប្រហែលកសិករមិនហ៊ានចិញ្ចឹមឡើងវិញនោះទេ ខ្លាចមានហានិភ័យកើតឡើង ប៉ុន្តែបើតម្លៃ នៅចន្លោះពី១ម៉ឺនទៅ១ម៉ឺន១ពាន់រៀលក្នុងមួយគីឡូដូចបច្ចុប្បន្ននេះ ទោះបីមានបញ្ហាកើតឡើង កសិករក៏មិនមានការខាតបង់ប្រាក់ធ្ងន់ធ្ងរពេកនោះដែរ។

បើតាមប្រធានក្រុមប្រឹក្សាភិបាលខាងលើ កាលណាកសិករធ្វើការចិញ្ចឹមជ្រូកផ្គត់ផ្គង់លើទីផ្សារលើសពីតម្រូវការ វានិងធ្វើឱ្យតម្លៃធ្លាក់ចុះមកវិញ ប៉ុន្តែនៅពេលណាមួយវាឡើងថ្លៃវិញនៅពេលតម្រូវការច្រើនជាងការផ្គត់ផ្គង់។ តែទោះជាតម្លៃជ្រូកមានការប្រែប្រួលបែបនេះក្តី សម្រាប់កសិករមួយចំនួននៅតែមិនបោះបង់ការចិញ្ចឹមជ្រូករបស់ខ្លួនចោលទេ ព្រោះរបរនៅផ្ទះដោយពុំចាំបាច់ចំណាកស្រុកធ្វើការនៅឆ្ងាយ។

ស្របពេលតម្លៃជ្រូកសាច់បន្តរក្សាបានថ្លៃល្អនៅលើទីផ្សារ លោក លី ឡាវិល បានសង្កេតឃើញថា តម្លៃកូនជ្រូកនៅតាមក្រុមហ៊ុន ឬកសិដ្ឋានក្នុងមួយក្បាលថ្លៃចន្លោះ២០ទៅ២៥ម៉ឺនរៀល តែសម្រាប់កសិករដែលមានកូនជ្រូក អាចលក់បានថ្លៃ២០ម៉ឺនរៀលតិចតួចក្នុងមួយក្បាល ខណៈពេលមុនៗមានតម្លៃទាបជាងសព្វថ្ងៃនេះ៕

The post អ្នកជំនាញ៖ កសិករភាគច្រើនចាប់ផ្តើមចិញ្ចឹមជ្រូកឡើងវិញ ក្រោយឃើញជ្រូកសាច់រក្សាបានថ្លៃល្អលើទីផ្សារ appeared first on .

ប្រធានក្រុមប្រឹក្សាភិបាលសមាគមអ្នកចិញ្ចឹមជ្រូកកម្ពុជាបានឱ្យដឹងថា បន្ទាប់ពីរាជរដ្ឋាភិបាលសម្រេចផ្អាកបណ្តោះអាសន្នមិនឱ្យមានការនាំចូលបំណែកសាច់បង្កក និងគ្រឿងក្នុងសត្វ កាលពីថ្ងៃទី១២ ខែមីនាមក លោកបានសង្កេតឃើញថាតម្រូវការ និងតម្លៃជ្រូករស់ចាប់ផ្តើមឡើងថ្លៃបន្តិចខ្លះវិញហើយ មកដល់សព្វថ្ងៃនេះ ពោលតម្លៃជ្រូកបានកើនឡើងពី៥០០ទៅ៦០០រៀលក្នុងមួយគីឡូក្រាមជ្រូករស់។

លោក លី ឡាវីល បន្តថា ដូចនេះក្រោយពីយើងបិទមិនឱ្យនាំចូលបំណែកសាច់បង្កកមកពីខាងក្រៅ ឃើញថាតម្លៃជ្រូកមានសញ្ញាល្អ ពោលការផ្គត់ផ្គង់សាច់បង្កកនៅលើទីផ្សារមានការថយចុះ ធ្វើឱ្យប្រជាពលរដ្ឋដែលជាអ្នកលក់សាច់ស្រស់នៅលើទីផ្សារ គាត់អាចលក់បានច្រើនជាងមុន ជួយទាញតម្លៃជ្រូករស់ឡើងវិញបន្តិចខ្លះហើយ។

លោក លី ឡាវីល សង្កត់ធ្ងន់ថា «ដូចនេះនៅក្នុងរយៈ៦ខែ នៃការបិទបណ្តោះអាសន្នមិនឱ្យនាំចូលសាច់បង្កកពីខាងក្រៅនេះ បានជំរុញឱ្យតម្លៃសត្វក្នុងស្រុកជួយឱ្យកសិករមានសង្ឃឹមឡើងវិញ។ ពោលបើគិតត្រឹមចុងខែមីនានេះតម្លៃជ្រូករស់បានកើនឡើងពីថ្លៃក្រោម៨ ០០០រៀល មកនៅតម្លៃ៨៤០០ទៅ៨៨០០រៀលក្នុងមួយគីឡូក្រាម។ ប៉ុន្តែតម្លៃនេះ សម្រាប់អ្នកចិញ្ចឹមជ្រូកក្នុងស្រុកនៅមិនទាន់អាចទទួលបានប្រាក់ចំណេញត្រឡប់មកវិញទេ បានត្រឹមតែកាត់បន្ថយការខាត់បង់ ហើយទម្រាំដល់រដូវចូលឆ្នាំខ្មែរ តម្រូវការជ្រូករស់ខ្ពស់យើងសង្ឃឹមថាតម្លៃអាចឡើងដល់ថ្លៃដើមផលិត៩៤០០រៀលទៅ៩៥០០រៀលក្នុងមួយគីឡូក្រាម»។

ប្រធានក្រុមប្រឹក្សាភិបាលសមាគមអ្នកចិញ្ចឹមសត្វលើកឡើងថា វិស័យចិញ្ចឹមសត្វ នៅតែជាវិស័យអាទិភាពសម្រាប់រាជរដ្ឋាភិបាលគិតគូយូរអង្វែង ក៏ប៉ុន្តែត្រូវការថ្លឹងថ្លែងទៅលើថ្លៃដើមផលិតសត្វ។ ដូចនេះអ្នកចិញ្ចឹមសត្វលក្ខណៈគ្រួសារ គាត់ត្រូវប្រកាន់គោលជំហរ ត្រូវធ្វើឱ្យខ្លួនឯងឱ្យជាកសិករពិតប្រាកដ បើចង់ចិញ្ចឹមសត្វទទួលបានប្រាក់ចំណេញ ត្រូវចេះរកកាកសំណល់ផ្ទះបាយផ្សេងៗយកមកចិញ្ចឹមសត្វរបស់ខ្លួនទើបអាចរស់បានសម្រាប់បរិបទទៅថ្ងៃខាងមុខ។ តែបើធ្វើលើសពីលក្ខណៈគ្រួសារ ឬធ្វើជាកសិដ្ឋានចិញ្ចឹមសត្វខ្នាតតូចគឺគាត់មិនអាចរស់បានទេ ព្រោះត្រូវការទិញចំណីនៅតាមរោងចក្រដែលមានថ្លៃដើមខ្ពស់ វាប្រឈមការខាតបង់ប្រាក់ច្រើន ព្រោះត្រូវគិតអំពីអតិផរណានៃតម្លៃចំណី អ៊ីចឹងតម្លៃសត្វមិនអាចឡើងថ្លៃខ្ពស់លើសពី១ម៉ឺនរៀលក្នុងមួយគីឡូក្រាមបានទេ៕ តាកែវ

The post អ្នកជំនាញ៖ តម្លៃជ្រូករស់បង្ហាញសញ្ញាងើបឡើងវិញ ហើយ កសិករអាចលក់បានតម្លៃស្មើថ្លៃដើមផលិតក្នុងរដូវចូលឆ្នាំខ្មែរ appeared first on .

វិធានការនៃការផ្អាកជាបណ្តុះអាសន្នលើការនាំចូលគ្រឿងក្នុងនិងបំណែកសាច់បង្កកដែលមានរយៈ៦ខែនេះកន្លងមកមិនថាអ្នកចិញ្ចឹមសត្វខ្នាតតូចឬធំនោះទេ សូម្បីតែសមាគមអ្នកចិញ្ចឹមសត្វកម្ពុជាក៏ធ្លាប់បានបង្ហាញក្តីសង្ឃឹមហើយក៏ចង់ឃើញជារឿយៗផងដែរថា បន្ទាប់ពីបិទរយៈពេល៦ខែ តម្រូវការជ្រូករស់នៅលើទីផ្សាររួមនិងតម្លៃ នឹងមានការប្រែប្រួល។ តែទោះជាយ៉ាងនេះក្តីនៅមិនទាន់មានអ្នកជំនាញក្នុងវិស័យចិញ្ចឹមសត្វណាមួយហ៊ានសន្និដ្ឋានថាការផ្អាកជាបណ្តុះអាសន្នលើការនាំចូលគ្រឿងក្នុងនិងបំណែកសាច់បង្កកនេះវាជះឥទ្ធិពលកម្រឹតណានោះទេ ព្រោះការនាំចូលសាច់បង្កកនៅពេលកន្លងមកមានច្រើនទុកសម្រាប់ផ្គត់ផ្គង់តម្រូវការក្នុងស្រុក។

លោក លី ឡាវីល ប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជា ធ្លាប់បានឱ្យដឹងថា កន្លងមកការនាំចូលសាច់បង្កកខូចគុណនិងការនាំចូលដោយខុសច្បាប់ត្រូវបានមន្ត្រីជំនាញចាប់បានហើយយកទៅដុតកំម្ទេចចោលជាបន្តបន្ទាប់។រូបភាពនៃការដុតកំម្ទេសចោលនេះ សម្រាប់អ្នកចិញ្ចឹមសត្វក្នុងស្រុកមិនមានក្តីរំពឹងថាវានឹងល្អប្រសើរ ដោយសារការចាប់បាននេះទេ លើកលែងតែមានចំណាត់ការណាមួយច្បាស់លាស់ ថានឹងអាចគ្រប់គ្រងច្រកព្រំដែនមានភាពប្រសើរឬអត់នៅពេលខាងមុខ។

អគ្គនាយកដ្ឋានគយនិងរដ្ឋាករកម្ពុជា កាលថ្ងៃទី២៣ខែកុម្ភៈ ឆ្នាំ២០២៤ បានបញ្ជាក់ថា រាជរដ្ឋាភិបាលបានសម្រេចផ្អាកជាបណ្តុះអាសន្នសម្រាប់រយៈពេល៦ខែគិតចាប់ពីថ្ងៃទី១២ ខែមីនា ឆ្នាំ២០២៤រហូតដល់ថ្ងៃទី១២ ខែកញ្ញាឆ្នាំ២០២៤ នូវការនាំចូលមុខទំនិញគ្រឿងក្នុងនិងបំណែកសាច់បង្កកដូចជា៖(១) អណ្តានៃសត្វគោក្របី បង្កក,(២)ថ្លើមនៃសត្វគោក្របី បង្កក, (៣) គ្រឿងក្នុងបង្កកផ្សេងៗនៃសត្វគោក្របីដែលអាចបរិភោគបានក្រៅពីអណ្តាតនិងថ្លើម, (៤) ថ្លើមនៃសត្វជ្រូក បង្កក, (៥) ភាគបំណែកសាច់និងគ្រឿងក្នុងផ្សេងទៀតក្រៅពីថ្លើមនៃសត្វជ្រូកដែលអាចបរិភោគបាន បង្កក, (៦) ថ្លើមនៃសត្វមាន់ បង្កក, (៧) សាច់និងគ្រឿងក្នុង បង្កកផ្សេងទៀតនៃសត្វមាន់ដែលអាចបរិភោគបាន ក្រៅពីស្លាបទំាងមូល ភ្លៅ ថ្លើម និងសាច់ដែលត្រូវបានយកឆ្អឹងចេញ និង(៨) ពោះវៀន ប្លោកនិងក្រពះ ទំាងមូលឬជាផ្នែកនៃសត្វ លើកលែងត្រី ស្រស់ ក្លាស្សេ បង្កក ប្រឡាក់អំបិល ត្រំាទឹកអំបិល សម្ងួតឬឆ្អើរួច។

ការផ្អាកជាបណ្តុះអាសន្ននូវការនាំចូលខាងលើ ត្រូវបានលើកលែងចំពោះការនាំចូលរបស់គម្រោងវិនិយោគមានលក្ខណៈសម្បត្តិគ្រប់គ្រាន់សម្រាប់ប្រើប្រាស់ជាធាតុចូលផលិតកម្មសម្រាប់ការនាំចេញ៕ តាកែវ

The post ១២មីនាជាថ្ងៃដែលអ្នកចិញ្ចឹមសត្វក្នុងស្រុកដាក់ក្តីរំពឹងជាថ្មីទៅលើមុខរបររបស់ខ្លួន appeared first on .

មកដល់ចុងឆ្នាំ២០២៣ បើយោងតាមប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជា វត្ថុធាតុក្នុងស្រុករបស់កសិករមិនទាន់ស្រុតចុះតម្លៃនោះទេ ដោយសារអ្នកចិញ្ចឹមទោះបីជួបការខាតបង់ កសិករនៅតែតស៊ូមិនចង់បោះបង់នៅមុខរបររបស់ខ្លួន ដោយរំពឹងថាក្នុងឆ្នាំ២០២៣នឹងអាចឆ្លងផុតគ្រោះដ៏លំបាកនៃតម្លៃផលិតផលដែលមានដើមកំណើតពីសត្វ។

លោក លី ឡាវីល មានប្រសាសន៍ថា «ទោះបីជាយើងរងការខាតបង់ប្រាក់ក៏យើងនៅតែប្រឹងប្រែងទប់ ប្រសិនបើជាឆ្លងឆ្នាំ២០២៣នេះហើយតម្លៃសត្វក្នុងស្រុកនៅតែមិនប្រសើឡើងវិញនោះ បានន័យថាចូលដល់ឆ្នាំ២០២៤ប្រាកដជាត្រូវកាត់បន្ថយផលិតកម្ម ព្រោះអ្នកចិញ្ចឹមសត្វមិនអាចផលិតលក់ ក្រោមថ្លៃដើមយូរទេ ហើយខាតបង់ប្រាក់ជារៀងរាល់ឆ្នំាទេ ។ដូចនេះត្រូវតែនាំគ្នាកាត់បន្ថយការផលិតរបស់ខ្លួនឯង ហើយដល់ពេលនោះតម្រូវការទិញកសិផលឬវត្ថុធាតុផលិតចំណីសត្វនឹងថយចុះ បានន័យថាការទិញកសិផលនៅឆ្នាំ២០២៤នឹងថយចុះ» ។

លោកលើកឡើងថា បើតម្លៃសត្វរបស់ប្រជាកសិករ អាចលក់បានត្រឹមរួចខ្លួន ឬមិនខាតបង់ អ្នកចិញ្ចឹមនឹងបន្តផលិតកម្មរបស់ខ្លួន ។ប៉ុន្តែបើនៅតែជួបការខាតបង់ កសិករទំាងអស់មិនថាក្រុមហ៊ុនធំៗត្រូវការពិចារណាជម្រុះផលិតកម្មឬកាត់បន្ថយការផលិតរបស់ខ្លួនដើម្បីឱ្យថ្លៃដើមឡើងមកវិញ៕ តាកែវ

The post អ្នកជំនាញ៖ ឆ្នាំ២០២៤នឹងមានកាត់បន្ថយផលិតកម្មសត្វ ដើម្បីជំរុញឱ្យថ្លៃដើមផលិតរបស់កសិករងើបឡើងវិញ appeared first on .

យោងតាមប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជា បានឱ្យដឹងថា ចំពោះសាច់បង្កកជាទូទៅកម្ពុជាមាននាំចូលស្រាប់ហើយ តែនៅពេលនាំចូលទៅប្រទេសថៃមិនរួច គេរំពឹងថាប្រទេសដែលមានការខ្វះខាត សេដ្ឋកិច្ចទន់ខ្សោយមួយចំនួនធំនឹងទទួលរងផលប៉ះពាល់ដូចជាវៀតណាមនិងកម្ពុជា។

លោក លី ឡាវីល ប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជា មានប្រសាសន៍ថា «ប្រទេសថៃគេមានវិធានការហើយគឺមិនអាចនាំចូលស្រុកថៃបានទេ ដូចនេះសាច់បង្កកទំាងនោះវានិងរកកន្លែងដែលត្រូវទៅ បើគេមិនចាក់ឱ្យត្រីឆា្លមស៊ីទេ ប្រាកដជារកប្រទេសដែលត្រូវបញ្ជូនទៅ បន្ទាប់មានតែកម្ពុជានិងវៀតណាម។យើងមិនគិតថាវាមកស្រុកខ្មែរទំាងអស់នោះទេ តែយើងមានការព្រួយបារម្ភ ហើយយើងរំពឹងថារាជរដ្ឋាភិបាលនិងមានចំណាប់អារម្មណ៍លើរឿងនេះនិងមានវិធានការដើម្បីទប់ស្កាត់ ពីព្រោះនៅប្រទេសថៃគេរកឃើញថាសាច់ដែលខូចគុណភាពនិងប៉ះពាល់សុខភាពមានជាង១៤០កុងតឺន័រទៅហើយ»។

បើតាមលោក លី ឡាវីល នៅក្នុងបរិមាណសាច់បង្កក៤លានគីឡូក្រាមដែលថៃរកឃើញនេះ គេយកមកសម្រាប់ផ្គត់ផ្គង់នៅក្នុងប្រទេសថៃក្នុងរយៈពេល២ខែ តែបើសម្រាប់កម្ពុជាអាចហូបជិតមួយឆ្នំាទើបអស់។
លោក សង្កត់ធ្ងន់ថា«ដើម្បីចូលរួមទប់ស្កាត់ សមាគមអ្នកចិញ្ចឹមសត្វកម្ពុជាយើងគ្រោងធ្វើសន្និសីទកាសែតមួយ ព្រោះយើងមិនដឹងថាមានវិធីណាឱ្យព័ត៌មាននេះលឺដល់សម្តេចតេជោហ៊ុនសែននោះទេ ជួយធ្វើការអន្តរាគមន៍ ព្រោះការងារនេះមានតែសម្តេចទេដែលអាចជួយការងារនេះបាន ដែលជាប្រមុខរាជរដ្ឋាភិបាល។

លើសពីនេះ ដើម្បីប្រកោគប្រកាសដល់មន្ត្រីរាជរដ្ឋាភិបាលគ្រប់លំដាប់ថ្នាក់ អាជ្ញាធរពាក់ព័ន្ធ ជួយគិតគូរដល់កសិករដែលជាអ្នកចិញ្ចឹមសត្វនៅទូទំាងប្រទេសផង។អ្វីដែលសមាគមយើងអាចធ្វើបាន គឺមានតែប្រកោគប្រកាសបង្កាទុកឱ្យហើយកុំឱ្យនាំចូលមកហើយកម្ពុជាក្លាយជាកន្លែងដែលគេចាក់សំរាម(សាច់បង្កក)នៅពេលស្រុកគេអត់ទទួលយក»។

លោកបញ្ជាក់ថា «យើងកំពុងតែពិភាក្សាគ្នាជាមួយក្រុមប្រឹក្សាភិបាលសមាគមអ្នកចិញ្ចឹមសត្វដើម្បីរើសពេលវេលាសមស្រប ព្រោះបច្ចុប្បន្នយើងកំពុងជួបផលលំបាកគ្រប់គ្នា អ៊ីចឹងយើងគ្រោងរៀបចំសន្និសីទកាសែននៅចុងខែមេសាឬនៅដើមខែក្រោយ»។

លោកលើកឡើងថា យើងធ្វើនេះគំរូដូចនៅស្រុកថៃ។ស្រុកថៃគ្រាន់តែមានសភាពការបែបនេះភ្លាមសមាគមអ្នកចិញ្ចឹមសត្វទូទំាងប្រទេសថៃគេមកសុំជួបជាមួយរាជរដ្ឋាភិបាល គេមកប្រជុំគ្នាដើម្បីស្តាប់ពីដំណោះស្រាយរបស់រដ្ឋាភិបាល តើរាជរដ្ឋាភិបាលធ្វើយ៉ាងម៉េចចំពោះសាច់បង្កកទំាងអស់ដែលនាំចូលមកដោយខុសច្បាប់?សម្រាប់កម្ពុជា យើងរំពឹងថាសម្តេចដែលជាប្រមុខរាជរដ្ឋាភិបាល សម្តេចប្រាកដជាគិតគូរទៅដល់វិស័យទំាងមូល ហើយទាក់ទងសុខភាពប្រជាជន។

យោងតាមប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជា ថាបច្ចុប្បន្នតម្លៃជ្រូករស់នៅលើទីផ្សារបានរើបឡើងវិញបន្តិច ក្រោយពីជួបវិបត្តិរយៈពេល៨ខែមកនេះ វាមានពីរកក្តា៖១) រាជរដ្ឋាភិបាលសហការជាមួយក្រសួងកសិកម្មរុក្ខាប្រមាញ់និងនេសាទ ក្រសួងពាណិជ្ជកម្ម និងក្រសួងសេដ្ឋកិច្ចនិងហិរញ្ញវត្ថុ បានគ្រប់គ្រងសាច់បង្កកមិនឱ្យមានបរិមាណលើសលុបពេកនៅលើទីផ្សារ អ៊ីចឹងធ្វើឱ្យកសិករអាចលក់ជ្រូកខ្លួនឯងបានថ្លៃខ្លះនិង២)ក្នុងរយៈពេល៨ខែដែលជ្រូកធ្លាក់ថ្លៃនេះ ធ្វើឱ្យប្រជាជនខ្នាតតូចមួយចំនួនធំបានបោះបង់ការចិញ្ចឹម និងកសិដ្ឋានមួយបានក្ស័យធន់ អ៊ីចឹងធ្វើឱ្យការផ្គត់ផ្គង់សាច់មានការថយចុះបន្តិច ទើបធ្វើឱ្យតម្លៃជ្រូករស់បានហក់ឡើងវិញពីតម្លៃ៧៥០០រៀលដល់ជិត៩០០០រៀលក្នុងមួយគីឡូក្រាម។

លោក លី ឡាវីល មានប្រសាសន៍ថា «យើងរំពឹងថាបើរាជរដ្ឋាភិបាលមានការគ្រប់គ្រងសាច់បង្កកបានល្អប្រសើរនៅក្នុងរយៈពេលមួយខែពីរខែទៅមុខថែមទៀត យើងសង្ឃឹមថាអ្នកចិញ្ចឹមសត្វអាចរួចខ្លួន តម្លៃនិងឡើងមកដល់ថ្លៃដើមផលិតរបស់យើងវិញ។ដូចនេះបើសាច់បង្កកដែលនំាចូលមកប្រទេសថៃត្រូវកេបោះចោល បែរជាហូរ(នាំចូល)មកម្តងទៀតនោះវានិងធ្វើឱ្យវិស័យចិញ្ចឹមសត្វកម្ពុជាជួបបញ្ហាធ្ងន់ធ្ងរឡើងវិញ»៕
អត្ថបទ៖សារេត

The post សមាគមអ្នកចិញ្ចឹមសត្វកម្ពុជាចង់ឱ្យសម្តេចតេជោហ៊ុន សែន ជួយអន្តរាគមន៍ទប់ស្កាត់ការនាំចូលសាច់បង្កកពីខាងក្រៅ appeared first on .

លោក លី ឡាវីល ប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជាបានឱ្យដឹងថា បច្ចុប្បន្នឃើញថាមានបញ្ហាប្រឈមខ្លំាងសម្រាប់អ្នកចិញ្ចឹមសត្វរបស់យើង ហើយយើងបានធ្វើការច្រើនជាមួយក្រសួងពាក់ព័ន្ធ ពិសេសជាមួយក្រសួងកសិកម្មរុក្ខាប្រមាញ់និងនេសាទ និងក្រសួងសេដ្ឋកិច្ចនិងហិរញ្ញវត្ថុ។ យើងបានស្នើរសុំឱ្យមានដំណោះស្រាយនៅពេលពិភពលោកជួបនិងវិបត្តិអតិផរណានៃទំនិញឡើងថ្លៃស្ទើគ្រប់ទីកន្លែង។សម្រាប់កម្ពុជាយើងក៏ប្រឈមដូចគ្នាដែរ ឥលូវនេះតម្លៃសាច់ក៏បានធ្លាក់មកទាប រហូតធ្វើឱ្យអ្នកចិញ្ចឹមសត្វគ្រប់ប្រភេទនៅក្នុងប្រទេសជួបបញ្ហាដោយប្រឈមនិងការខាតបង់ធ្ងន់ធ្ងរ ជាពិសេសអ្នកចិញ្ចឹមសត្វជ្រូក។

លោក លីឡាវីល មានប្រសាសន៍ថា បច្ចុប្បន្នបើតាមការសិក្សាស្រាវជ្រាវនៅតាមកុងស៊ីផ្សេងៗ(សត្តឃាតដ្ឋាន)ឃើញថាការកាប់សត្វរស់ឬជ្រូករស់បានថយចុះប្រមាណ៣០% ហើយទៅមុខទៀតបើសិនសាច់បង្កកនៅតែមានទ្រង់ទ្រាយធំដូចនាពេលបច្ចុប្បន្នមានន័យថាវានឹងបន្ថយតម្លៃជ្រូរស់ធ្លាក់ចុះបន្តថែមទៀត។ទន្ទឹមនិងនេះម្ចាស់ក្រុមហ៊ុនធំៗដែលជាសមាជិកសមាគមយើងឃើញថា បានផ្អាកការលក់ជ្រូករស់របស់ខ្លួន ដោយទន្ទឹងរងចំាចំណាត់ការតែមកដល់ឥលូវនេះមិនទាន់ឃើញចំណាត់ការអ្វីល្អនោះទេ អីចឹងហើយយើងគិតថាវាប្រឈមធ្លាក់ថ្លៃបន្តទៅទៀត។

លោកគូសបញ្ជាក់ថា «បើយើងមើលទៅលើសភាពបច្ចុប្បន្នតម្លៃជ្រូករស់នៅលើទីផ្សារមានចន្លោះពី៧ពាន់ទៅ៨ពាន់រៀលក្នុងមួយគីឡូក្រាម ហើយតម្លៃនេះវាអាចធ្លាក់ចុះមកនៅត្រឹម៦ពាន់រៀលនារយៈពេល២ទៅ៣ខែខាងមុខនេះបើសភាពដូចនាពេលសព្វថ្ងៃនេះ។សម្រាប់តម្រូវការជ្រូករស់នៅទូទំាងប្រទេសនៅពេលបច្ចុប្បន្នគឺមានចន្លោះពី៨ពាន់ទៅ៩ពាន់ឬកើនឡើងដល់១ម៉ឺនក្បាលក្បាលក្នុងមួយថ្ងៃនៅពេលមានពិធីបុណ្យទាន។ប៉ុន្តែសព្វថ្ងៃនេះយើងអាចលក់បានត្រឹមតែ៦ពាន់ក្បាលក្នុងមួយថ្ងៃ ដោយឡែកនៅសល់ប្រមាណ២ពាន់ក្បាលដែលលក់មិនចេញគឺសាច់បង្កកដណ្តើមយកចំណែកទីផ្សារទៅហើយ»។

បើយោងតាមប្រធានក្រុមប្រឹក្សាភិបាលសមាគមថា ការបំពេញតម្រូវការនៅក្នុងស្រុកឱ្យតម្លៃសមរម្យនេះសមាគមគំាំទ្រទៅនិងគោលនយោបាយដើម្បីជួយកាត់បន្ថយការចំណាយរបស់ប្រជាជនទូទំាងប្រទេសឱ្យបានទទួលទាននៅសាច់សត្វដែលមានតម្លៃសមរម្យស្ថិតក្នុងវិបត្តិបាត់បង់ការងារដ៏ច្រើន ។ដូចនេះការដែលធ្វើឱ្យតម្លៃផលិតផលមានដើមកំណើតពីសាច់សត្វនេះទៀតវាជារឿងមួយល្អ។

លោកលីឡាវីលបន្តថាខាងសមាគមយើងគ្រាន់តែស្នើរសុំថាសូមឱ្យសម្លឹងមើលអ្នកចិញ្ចឹមដែលជាផ្នែមួយនៃសន្តិសុខស្បៀងមួយរបស់ប្រទេស បើគ្មានអ្នកចិញ្ចឹមក៏គ្មានសន្តិសុខស្បៀងសម្រាប់ផ្គត់ផ្គង់ត្រីសាច់គ្រប់ប្រភេទដែរ។ដូចនេះត្រូវធ្វើយ៉ាងណាខាងសមាគមអ្នកចិញ្ចឹមសត្វកម្ពុជាសុំតែម៉ារស់ទេស្ថិតក្នុងអន្តរកាលដ៏លំបាកនេះ ធ្វើម៉េចឱ្យយើងរស់បានផងកុំឱ្យវាខាតបង់ខ្លំាងពេក ព្រោះរយៈពេល៦ទៅ៧ខែកន្លងផុតទៅហើយកសិករជាច្រើនបានរអ៊ូរទំាមកខាងសមាគមឱ្យជួយរកដំណោះស្រាយ ហើយយើងក៏បានធ្វើដោយឃើញថាក្រសួងកសិកម្មរុក្ខាប្រមាញ់និងនេសាទនិងក្រសួងសេដ្ឋកិច្ចនិងហិរញ្ញវត្ថុក៏បានទទួលសំណើរនិងបានប្រជុំទប់ស្កាត់សាច់បង្កកនាំចូលមកកម្ពុជា។យើងឃើញសាច់បង្កកមានច្រើននៅលើទីផ្សារលើសលុបពេកធ្វើ ដែលធ្វើឱ្យអ្នកចិញ្ចឹមសត្វរស់លក់បានតិចបំផុតហើយលក់ក្រោមថ្លៃដើមផលិតប្រឈមខាតបង់ធ្ងន់ធ្ងរ។

លោកសង្កត់ធ្ងន់ថា «បច្ចុប្បន្ននេះអ្នកចិញ្ចឹមជ្រូកក្នុងស្រុកពិសេសក្រុមហ៊ុនធំលក់បានតែ៦០ទៅ៧០%នៃផលិតផលដែលខ្លួនបានផលិត ហើយ៤០%ផ្សេងទៀតលក់អត់ចេញទេ ដោយសារតែទីផ្សារអត់មានតម្រូវការ ព្រោះសាច់បង្កកបានដណ្តើមយកចំណែកទីផ្សារនេះបាត់ទៅហើយ ជាហេតុធ្វើឱ្យយើងមិនអាចលក់ផលិតផលបាន»៕ អត្ថបទ៖សារេត

The post តម្រូវការជ្រូករស់នៅទូទំាងប្រទេសបានធ្លាក់ចុះនៅត្រឹម៦ពាន់ក្បាលក្នុងមួយថ្ងៃ ខណៈចំណែកទីផ្សារ២០%ត្រូវបានសាច់បង្កកដណ្តើមយក appeared first on .