ថ្លែងក្នុងសុន្ទរកថាគន្លឹះនៅឯទិវាជាតិសហគ្រាសធុនមីក្រូ តូច និងមធ្យម លើកទី២ ក្រោមមូលបទ “ការត្រៀមលក្ខណៈរបស់សហគ្រាសធុនមីក្រូ តូច និងមធ្យម សម្រាប់ការចាកចេញពីប្រទេសដែលមានការអភិវឌ្ឍតិចតួច” នាព្រឹកថ្ងៃទី២៦ខែមិថុនា លោកឧបនាយករដ្ឋមន្ត្រីបានមានប្រសាសន៍ថា កម្ពុជាបន្តទទួលកំណើនវិនិយោគពីបរទេសខ្ពស់ ហើយវិស័យឧស្សាហកម្មត្រូវបានព្យាករថានឹងមានកំណើនខ្ពស់ជាងគេ ក្នុងអត្រា ៧,៨% នៅឆ្នាំ២០២៥។ និន្នាការនេះបានផ្តល់នូវកាលានុវត្តភាពថ្មីៗ សម្រាប់សហគ្រាសធុនមីក្រូ តូចនិងមធ្យម ក្នុងការចូលរួមពង្រីកពិពិធកម្មសេដ្ឋកិច្ច និងផ្សារភ្ជាប់ខ្លួនទៅនឹងខ្សែច្រវាក់ផ្គត់ផ្គង់ ដែលកំពុងត្រូវការធាតុចូលពីក្នុងស្រុកកាន់តែច្រើននិងការបង្កើនតម្លៃបន្ថែមដែលកាន់តែមានសក្តានុពល។

យោងតាមជំរឿនឆ្នាំ២០២២ របស់វិទ្យាស្ថានជាតិស្ថិតិនៃក្រសួងផែនការ កម្ពុជាមានសហគ្រាសធុនមីក្រូ តូច និងមធ្យមចំនួន ៧៥៣,៦៧០ មូលដ្ឋាន មានកម្លាំងពលកម្មសរុបជិត៣លាននាក់ ក្នុងនោះមានស្រ្តី ៦០%។  វិស័យនេះរួមចំណែក ៦៣% នៃផលិតផលក្នុងស្រុកសរុប និងនៅតែជាវិស័យស្នូលសម្រាប់មហិច្ឆតារបស់កម្ពុជា ក្នុងការកសាងសេដ្ឋកិច្ចដែលកាន់តែមានពិពិធកម្មខ្ពស់ និងផ្អែកលើនវានុវត្តន៍។

ព្រឹត្តិការណ៍នេះមានកម្មវីធីសំខាន់ៗចំនួន៣គឺ ការតាំងបង្ហាញផលិតផលរបស់សហគ្រាសធុនមីក្រូ តូច និងមធ្យម កិច្ចពិភាក្សាលើប្រធានបទគន្លឹះចំនួន៤ និង “វេទិកាវេចខ្ចប់នៅកម្ពុជា” ដែលជាព្រឹត្តិការណ៍អម។ ទិវានេះត្រូវបានរៀបចំដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សហការជាមួយសហគ្រិនខ្មែរ អង្គការ GIZ អង្គការ UNIDO ធនាគារសហគ្រាសធុនតូច និងមធ្យម កម្ពុជា ក្រសួង-ស្ថាប័នពាក់ព័ន្ធ និងវិស័យឯកជន។

យោងតាមសារលិខិត សម្តេចធិបតី នាយករដ្ឋមន្ត្រី ក្នុងឱកាសប្រារព្ធទិវាជាតិ “សហគ្រាសធុនមីក្រូ តូច និងមធ្យម ពិតជាបានរួមចំណែកយ៉ាងសកម្ម ហើយនឹងត្រូវមានតួនាទីកាន់តែធំធេង និងគន្លឹះ ក្នុងដំណើរឆ្ពោះទៅការចាកចេញពីឋានៈជាប្រទេសដែលមានការអភិវឌ្ឍតិចតួចនៅចុងឆ្នាំ២០២៩។”

សារលិខិតក៏បានរំលេចពីការវិវត្តរបស់សហគ្រាសធុនមីក្រូ តូច និងមធ្យម ថាបានធ្វើសមាហរណកម្មចូលក្នុងប្រព័ន្ធហិរញ្ញវត្ថុផ្លូវការកាន់តែច្រើន ដោយក្នុងនោះមានបុគ្គលស្វ័យនិយោជន៍ជាង ១,៥លាននាក់ បានបើកគណនីប្រើប្រាស់ QR និងម្ចាស់សហគ្រាសធុនមីក្រូ តូច និងមធ្យមជាង ៨២០.០០០ នាក់ បានទទួលសេវាឥណទាន ស្មើនឹងជាងមួយភាគបីនៃប្រាក់កម្ចីសរុបក្នុងប្រព័ន្ធធនាគារ៕

The post ឧបនាយករដ្ឋមន្ត្រី អូន ព័ន្ធមុនីរ័ត្ន៖ សហគ្រាសធុនមីក្រូ តូច និងមធ្យម ជាឆ្អឹងខ្នងដ៏រឹងមាំនៃសង្គម-សេដ្ឋកិច្ចជាតិ appeared first on .

ក្នុងពិធីប្រកាសនេះ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការសេដ្ឋកិច្ចនិងធុរកិច្ចឌីជីថល បានថ្លែងថា បច្ចេកវិទ្យាឌីជីថលបានចាក់ស្រេះគ្រប់សកម្មភាពសង្គមសេដ្ឋកិច្ច ហើយបានក្លាយជាកត្តាលីករ ក្នុងការជំរុញកំណើន និងការពង្រឹងភាពធន់ នៃសេដ្ឋកិច្ច ដែលមិនអាចមើលរំលងបាន។

លោក អូន ព័ន្ធមុនីរ័ត្ន បានលើកឡើងថា សម្រាប់វិស័យឯកជន ការចាប់យក និងការប្រើប្រាស់ បច្ចេកវិទ្យាឌីជីថលគឺជាឧត្តមភាពមួយថ្មី ដែលជួយលើកកម្ពស់ប្រសិទ្ធភាពការងារ កាត់បន្ថយថ្លៃដើម តភ្ជាប់ខ្សែច្រវាក់ផលិតកម្ម និងធានានូវភាពប្រកួតប្រជែងក្នុងទីផ្សារ។ ចំពោះវិស័យសារធារណៈវិញ បច្ចេកវិទ្យាឌីជីថលក៏បាននឹងកំពុងដើរតួនាទីជាគន្លឹះយ៉ាងសំខាន់ ក្នុងការជំរុញការកែទម្រង់នានានៅកម្ពុជា ជាពិសេសពាក់ព័ន្ធនឹងការផ្ដល់សេវាសាធារណៈសម្រាប់ធុរកិច្ចដើម្បីកាត់បន្ថយភាពស្មុគស្មាញ នៃការិយាធិបតេយ្យ បង្កើនប្រសិទ្ធភាពនៃរដ្ឋបាលសាធារណៈ ពង្រឹងអនុលោមភាព និងកែលម្អបរិយាកាសធុរកិច្ចនៅកម្ពុជាឱ្យកាន់តែប្រសើរឡើង សំដៅឆ្លើយតបទៅនឹងតម្រូវការ សំណូមពរ និងបំណងប្រាថ្នារបស់ប្រជាជន និងធុរជន»។

លោកបានគូសរំលេចថា ការរៀបចំ «យុទ្ធសាស្ត្រ ស្តីពីការអភិវឌ្ឍសេវាអេឡិចត្រូនិកសម្រាប់ធុរកិច្ចឆ្នាំ២០២៥-២០២៨»នេះគឺជាការឆ្លើយតបទៅនឹងការណែនាំដ៏ខ្ពង់ខ្ពស់របស់សម្តេចមហាបវរធិបតី នាយករដ្ឋមន្ត្រី ក្នុងវេទិការាជរដ្ឋាភិបាល-ផ្នែកឯកជន លើកទី១៩កាលពីថ្ងៃទី១៣ខែ វិច្ឆិកា ឆ្នាំ២០២៣, ហើយក៏ជាការបង្ហាញពីការប្តេជ្ញាចិត្តខ្ពស់ របស់រាជរដ្ឋាភិបាលក្នុងការបន្តគាំទ្រ, ការជំរុញ និង ការអភិវឌ្ឍវិស័យឯកជននៅកម្ពុជាតាមរយៈការបង្កើត «ប្រព័ន្ធអេកូឡូស៊ីឌីជីថលសម្រាប់ធុរកិច្ច» មួយដ៏រឹងមាំ ដែលបំពេញគ្នាទៅវិញទៅមក និង មានលក្ខណៈរស់រវើកសម្រាប់ការផ្តល់សេវាអេឡិចត្រូនិកសម្រាប់ធុរកិច្ច សំដៅគាំទ្រ ដល់ការបង្កើតបរិយាកាសអំណោយផល ក្នុងការធ្វើធុរកិច្ចនៅកម្ពុជា ស្របតាម យុទ្ធសាស្ត្រ បញ្ចកោណ ដំណាក់កាលទី ១, ក្របខណ្ឌគោលនយោបាយសេដ្ឋកិច្ច និង សង្គមឌីជីថលកម្ពុជា ២០២១-២០៣៥, និង គោលនយោបាយរដ្ឋាភិបាលឌីជីថលកម្ពុជា ២០២២-២០៣៥ ៕

The post រាជរដ្ឋាភិបាលកម្ពុជា ប្រកាសដាក់ឱ្យអនុវត្តជាផ្លូវការនូវ«យុទ្ធសាស្ត្រស្ដីពីការអភិវឌ្ឍសេវាអេឡិកត្រូនិកសម្រាប់ធុរកិច្ចឆ្នាំ ២០២៥-២០២៨» appeared first on .

នៅក្នុងកិច្ចប្រជុំនេះ ទទួលបានការអញ្ជើញចូលរួមជាអធិបតីភាពដ៏ខ្ពង់ខ្ពស់ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការសេដ្ឋកិច្ច និងធុរកិច្ចឌីជីថល, លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន, លោក ជា សុមេធី រដ្ឋមន្រ្ដីក្រសួងសង្គមកិច្ច អតីតយុទ្ធជន និងយុវនីតិសម្បទា, លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ ព្រមទាំងថ្នាក់ដឹកនាំតំណាងក្រសួងស្ថាប័នពាក់ព័ន្ធ ក៏ដូចជាតំណាងពីវិស័យឯកជន រួមមាន សមាគមធុរកិច្ច ដៃគូអភិវឌ្ឍន៍ និងភ្នាក់ងារចុះបញ្ជីអាជីវកម្ម ជាច្រើនជាច្រើនរូបទៀត។

កិច្ចប្រជុំនេះប្រារព្ធឡើងក្នុងគោលបំណង ដើម្បីពិនិត្យពិភាក្សាលើខ្លឹមសារសេចក្តីព្រាង “យុទ្ធសាស្រ្តស្តីពីការរៀបចំសេវាអេឡិចត្រូនិកសម្រាប់ធុរកិច្ច ២០២៥-២០២៨” ដែលបានរៀបចំដោយក្រុមការងារអន្តរក្រសួងរៀបចំសេវាអេឡិចត្រូនិកសម្រាប់ធុរកិច្ច។

សូមជម្រាបថា “យុទ្ធសាស្ត្រស្តីពីការរៀបចំសេវាអេឡិចត្រូនិកសម្រាប់ធុរកិច្ច ២០២៥-២០២៨” ត្រូវបានរៀបចំឡើងក្នុងគោលដៅជំរុញកិច្ចសហការរវាងក្រសួង ស្ថាប័នពាក់ព័ន្ធ ក្នុងការលើកកម្ពស់ប្រសិទ្ធភាពនៃការផ្តល់សេវាអេឡិចត្រូនិកសម្រាប់ធុរកិច្ច តាមរយៈការសម្រួលនីតិវិធី កម្រៃសេវា និងលក្ខខណ្ឌតម្រូវ នៃសេវាសម្រាប់ធុរកិច្ច៕

The post រដ្ឋមន្រ្ដី៥រូប បើកកិច្ចប្រជុំលើសេចក្តីព្រាង “យុទ្ធសាស្ត្រស្តីពីការរៀបចំសេវាអេឡិចត្រូនិកសម្រាប់ធុរកិច្ច ២០២៥-២០២៨” appeared first on .

ក្នុងសន្និសីទជាតិស្តីពីសមិទ្ធផលនៃកិច្ចគាំពារសង្គមនៅកម្ពុជាកាលពីថ្ងៃទី១៩ ខែវិច្ឆិកា លោក ចន ណារិទ្ធ អគ្គលេខាធិការក្រុមប្រឹក្សាជាតិគាំពារសង្គម បានមានប្រសាសន៍ថា កម្មវិធីគាំពារសង្គមបានកើនឡើងដល់៨កម្មវិធីនៅឆ្នាំ២០២៤ ដែលគ្របដណ្តប់ប្រជាជនចំនួន ៤,៨លាននាក់ ស្មើនឹង ២៨ភាគរយនៃប្រជាជនសរុបដោយចំណាយប្រហែល ២៨៥លានដុល្លារពីថវិកាជាតិ។

លោកបានបន្តថា របបសន្តិសុខសង្គមមានកម្មវិធីចំនួន៣ក្នុងឆ្នាំនេះ បម្រើប្រជាពលរដ្ឋក្នុងវិស័យសាធារណៈ និងឯកជនចំនួន ២,៥លាននាក់ ចំណាយថវិកាប្រមាណ៥៧៤លានដុល្លារ ដែលក្នុងនោះមាន១៦៨លានដុល្លារ បានមកពីថវិកាវិភាគទាន និងថវិកាជាតិចំនួន៤០៦លានដុល្លារ។

លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ការទទួលបានប្រាក់ឧបត្ថម្ភនេះជួយលើកកម្ពស់សុខភាពគ្រួសារ និងការអប់រំ ក៏ដូចជាការលើកកម្ពស់ និងថែរក្សាសុខុមាលភាពរបស់ប្រជាពលរដ្ឋទាំងក្នុងស្ថានភាពទូទៅ និងអាសន្នផងដែរ។

លោកបានមានប្រសាសន៍ថា៖«ការវិនិយោគដ៏សំខាន់ ជះឥទ្ធិពលវិជ្ជមានលើមីក្រូសេដ្ឋកិច្ច និងការអភិវឌ្ឍន៍មនុស្ស និងកាត់បន្ថយភាពក្រីក្រដោយធ្វើឱ្យការការពារសង្គមទៅជាគោលនយោបាយដ៏សំខាន់មួយជាមួយនឹងការកំណត់ច្បាស់លាស់នៅក្នុងយុទ្ធសាស្ត្របញ្ចកោណ ជំហានទី១»។

លោកឧបនាយករដ្ឋមន្ត្រីក៏បានជំរុញឱ្យមន្ទីរសុខាភិបាលរាជធានី-ខេត្ត យកចិត្តទុកដាក់បន្ថែមទៀតលើការផ្តល់សេវាថែទាំសុខភាពដល់ប្រជាពលរដ្ឋ ជាពិសេសអ្នកដែលប្រើប្រាស់បណ្ណបេឡាជាតិរបបសន្តិសុខសង្គម (ប.ស.ស) បណ្ណសមធម៌ និងបណ្ណងាយរងគ្រោះ។

គួររំលឹកថាថ្មីៗនេះ នាយករដ្ឋមន្ត្រី ហ៊ុន ម៉ាណែត បានសន្យាថានឹងបន្ថែមថវិកាចំនួន ៤៥០ លានដុល្លារបន្ថែមទៀតទៅក្នុងប្រព័ន្ធសន្តិសុខសង្គមរបស់ប្រទេសដែលនឹងជួយដល់ប្រជាពលរដ្ឋចំនួន ៩លាននាក់៕

The post ឆ្នាំ២០២៤ កម្ពុជាចំណាយថវិកា៨៥៩លានដុល្លារលើកិច្ចគាំពារ និងសន្តិសុខសង្គម appeared first on .

ក្នុងពិធីបើកទិវាប្រព័ន្ធអេកូឡូស៊ី សហគ្រិនភាព២០២៤ កាលថ្ងៃទី២៤ ខែវិច្ឆិកាឆ្នាំ២០២៤, លោក អូន ព័ន្ធមុនីរ័ត្ន អគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុមានប្រសាសន៍ថា សហគ្រិនភាពមានឥទ្ធិពលគ្របដណ្តប់សកម្មភាពសេដ្ឋកិច្ចគ្រប់ប្រភេទ និងមានអត្ថប្រយោជន៍ជាច្រើន ចំពោះប្រជាជននិងជាឆ្អឹងខ្នងដ៏រឹងមាំនៃសង្គមសេដ្ឋកិច្ចដែលបាននិងកំពុងចូលរួមចំណែកយ៉ាងសំខាន់ក្នុងការបង្កើតការងារ និងមុខរបរ ការបង្កើនប្រាក់ចំណូល ការកាត់បន្ថយភាពក្រីក្រ និងជំរុញការអភិវឌ្ឍប្រកបដោយចីរភាព បរិយាបន្ន និងភាពធន់ ។ ហេតុដូចនេះ ទើបរាជរដ្ឋាភិបាល តែងផ្តោតការយកចិត្តទុកដាក់លើការអភិវឌ្ឍសហគ្រិនភាព ពិសេសធុរកិច្ចថ្មីនិងសហគ្រាសធុនមីក្រូ តូច និងមធ្យមតាមរយៈការកសាងប្រព័ន្ធអេកូឡូស៊ី រស់រវើក និងគ្រប់ជ្រុងជ្រោយដើម្បីផ្តល់ការគាំទ្រលើទិដ្ឋភាពសំខាន់ៗ ។

លោកគូសបញ្ជាក់ថា ដើម្បីការកសាងប្រព័ន្ធអេកូឡូស៊ីឱ្យរស់រវើកនិងគ្រប់ជ្រុងជ្រោយរាជរដ្ឋាភិបាលផ្តល់ការគាំទ្រលើទិដ្ឋភាពសំខាន់ៗចំនួន៦។ ទី១)- ការរៀបចំគោលនយោបាយ និងយុទ្ធសាស្ត្រគាំទ្រ៖ ក្នុងអំឡុងនៃវិបត្តិជំងឺកូវីដ១៩ រាជរដ្ឋាភិបាលកម្ពុជាបានដាក់ចេញនូវ ក្របខណ្ឌយុទ្ធសាស្ត្រនិងកម្មវិធីស្តារនិងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ១៩ តាមគន្លងប្រក្រតីភាពថ្មីសម្រាប់ឆ្នាំ២០២១ -២០២៣ ដោយបានចាត់ទុកការអភិវឌ្ឍសហគ្រិនភាព ជាអាទិភាពចម្បងមួយក្នុងការបង្រឹងភាពធន់នៃសង្គម សេដ្ឋកិច្ចកម្ពុជាប្រកបដោយចីរភាព និងបរិយាបន្ន។

បន្ថែមលើសពីនេះក្នុងនីតិកាលទី៧នៃរដ្ឋសភា, ជាផ្នែកមួយនៃយុទ្ធសាស្ត្របញ្ចកោណដំណាក់កាលតី១ រាជរដ្ឋាភិបាលក៏បានរៀបចំ យុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣- ២០២៨ ដែលជាកម្មវិធីគោលនយោបាយអាទិភាព១ក្នុងចំណោមកម្មវិធីគោលនយោបាយអាទិភាពទាំង៦។

ទី២)- ការលើកកម្ពស់ការទទួលហិរញ្ញប្បទាននិងឥណទាន តាមរយៈការបង្កើតធនាគារសហគ្រាសធុនតូចនិងមធ្យមកម្ពុជា, ធនាគារអភិវឌ្ឍន៍ជនបទនិងកសិកម្ម និងសាជីវកម្មធានាឥណទានកម្ពុជា។ ដើម្បីគោលដៅនេះ ក្នុងពេលកន្លងមក រាជរដ្ឋាភិបាលបានប្រឹងប្រែងបង្កើនថវិកាជូនធនាគារសហគ្រាសធុនតូច និងមធ្យមកម្ពុជា និងធនាគារអភិវឌ្ឍន៍ជនបទនិងកសិកម្មជាបន្តបន្ទាប់ ហើយតទៅមុខនឹងបន្តពិនិត្យលទ្ធភាព វិភាជកញ្ចប់ថវិកាជូនធនាគារទាំងពីរបន្ថែមទៀត ដើម្បីផ្តល់ឱកាសកាន់តែទូលាយ ដល់សហគ្រិនធុនមីក្រូ តូច និងធម្យមក្នុងការទទួលបានកម្ចីក្នុងទំហំនិងលក្ខខណ្ឌសមស្របសម្រាប់អភិវឌ្ឍខ្លួន។

ទី៣)- ការលើកកម្ពស់សហគ្រិនភាព និងការចាប់យកបច្ចេកវិទ្យាឌីជីថល តាមរយៈការបង្កើតមជ្ឈមណ្ឌលបណ្តុះធុរកិច្ចថ្មី តេជោ មូលនិធិអភិវឌ្ឍន៍សហគ្រិនភាព និងសហគ្រិនខ្មែរ ព្រមទាំងការដាក់ឱ្យដំណើរការនូវគេហទំព័រព័ត៌មានសម្រាប់សហគ្រាសធុនតូចនិងមធ្យម ដែលបាននិងកំពុងដើរតួនាទីយ៉ាងសំខាន់ក្នុងការកសាងប្រព័ន្ធអេកូឡូស៊ីសហគ្រិនភាពនៅកម្ពុជា តាមរយៈការផ្តល់នូវការគាំទ្រផ្នែកហិរញ្ញវត្ថុនិងមិនមែនហិរញ្ញវត្ថុដល់ធុរកិច្ចដថ្មី សហគ្រាសធុនតូចនិងមធ្យមដែលមានសក្តានុពលខ្ពស់ ការបង្កើនផលិតភាព ការបង្កើតសេវាឬ ផលិតផលថ្មីនិងការផ្គូរផ្គង់អាជីវកម្ម។ជាងនេះទៀត គណៈកម្មាធិការសេដ្ឋកិច្ចនិងធុរកិច្ចឌីជីថលក៏បានដាក់ចេញនូវ កម្មវិធីបរិវត្តកម្មឌីជីថលសហគ្រាស សម្រាប់ជំរុញការចាប់យកឌីជីថលដល់សហគ្រាសធុនមីក្រូ តូច និងមធ្យមតាមរយៈការរៀបចំវគ្គចាប់យកឌីជីថល ការផ្គូរផ្គងរវាងម្ចាស់សហគ្រាសនិងក្រុមហ៊ុនផ្តល់សេវាឌីជីថល និងការផ្តល់ការលើកទឹកចិត្តដល់ការប្រើប្រាស់សេវាឌីជីថល។

ទី៤)- ការគាំទ្រដល់ការអភិវឌ្ឍជំនាញ៖ កាលពីខែមករា ឆ្នាំ២០២៤កន្លងទៅ ក្រសួងសេដ្ឋកិច្ចនិងហិរញ្ញវត្ថុបានសម្ពោធជាផ្លូវការនូវ មូលនិធិអភិវឌ្ឍជំនាញដែលមានបេសកកម្មជំរុញភាពជាដៃគូជិតស្និទ្ធរវាងវិស័យឯកជន និងគ្រឹះស្ថានបណ្តុះបណ្តាលតាមរយៈការផ្តល់ហិរញ្ញប្បទានដល់ការបណ្តុះបណ្តាលជំនាញ ដើម្បីឆ្លើយតបទៅនឹងតម្រូវការរបស់វិស័យឯកជន រួមទាំងសហគ្រាសធុនមីក្រូ តូច និងមធ្យម។

ទី៥)- ការលើកកម្ពស់ស្តង់ដាផលិតផល៖ ក្នុងផ្នែកនេះ រាជរដ្ឋាភិបាលបាន ៖១- កសាងហេដ្ឋារចនាសម្ព័ន្ធគុណភាពជាតិ ដើម្បីលើកកម្ពស់សមត្ថភាពជាតិ ក្នុងការផ្តល់សេវានៃការធ្វើតេស្តពិសោធន៍ ស្តង់ដានីយកម្ម ការវាយតម្លៃភាពអនុលោមមាត្រាសាស្ត្រ និងការវាយតម្លៃទទួលស្គាល់ ក្នុងគោលបំណងអភិវឌ្ឍវិស័យឧស្សាហកម្មនិងសហគ្រាសគ្រប់ប្រភេទ ទាំងមីក្រូ តូច មធ្យមនិងធំ , ២-ដាក់ចេញនូវវិធានការជាក់ស្តែងជាច្រើន សំដៅកាត់បន្ថយនូវរបាំងបច្ចេកទេស និង ៣- ជំរុញការធ្វើពាណិជ្ជកម្ម របស់វិស័យឯកជន ។ ហេដ្ឋារចនាសម្ព័ន្ធគុណភាពជាតិ មានភាពប្រទាក់ក្រឡាគ្នា រវាងអង្គភាពគោលចំនួន៤ មានមន្ទីរពិសោធន៍ជាតិ វិទ្យាស្ថានស្តង់ដាជាតិកម្ពុជា មជ្ឈមណ្ដលមាត្រាសាស្ត្រជាតិ និងអង្គភាពវាយតម្លៃទទួលស្គាល់កម្ពុជា។ ការណ៍នេះនឹងជំរុញឱ្យប្រតិបត្តិការលើទីផ្សារ ក្នុងស្រុកកាន់តែមានប្រសិទ្ធភាព ស័ក្តិសិទ្ធភាព និងគុណភាព ព្រមទាំងផ្តល់កាលានុវត្តភាពបន្ថែមដល់សហគ្រាសគ្រប់ប្រភេទ ដែលមានអនុលោមភាព ណិងស្តង់ដាពិបប្រាកដក្នុងការពង្រីកទីផ្សារ ទាំងក្នុងស្រុក ក្នុងតំបន់ និងលើសកលលោក តាមរយៈការពង្រឹងប្រសិទ្ធភាព និងសមត្ថភាពនៃអង្គភាពវាយតម្លៃអនុលោមភាព ។

ទី៦)- ការកែលម្អបរិយាកាសធុរកិច្ច៖ រាជរដ្ឋាភិបាលបានដាក់ចេញជាបន្តបន្ទាប់នូវវិធានការកែទម្រង់មុតស្រួច ចំទិសដៅដើម្បីដោះស្រាយបញ្ហាជារចនាសម្ព័ន្ធនិងបង្កើតបរិយាកាសអំណោយផល ជាពិសេសកាត់បន្ថយបន្ទុកចំណាយរបស់សហគ្រាស។ ជាក់ស្តែង រាជរដ្ឋាភិបាលបានផ្តល់ការលើកទឹកចិត្តផ្នែកពន្ធដារ បានបង្កើតយន្តការធ្វើអធិការកិច្ចរួម និងបានរៀបចំប្រព័ន្ធបច្ចេកវិទ្យាព័ត៌មានសម្រាប់ការចុះបញ្ជីអាជិវកម្ម និងការស្នើសុំអាជ្ញាបណ្ណ លិខិតអនុញ្ញាតប្រកបអាជីវកម្មតាមថ្នាលផ្លាស់ប្តូរទិន្នន័យកម្ពុជា ដែលហៅកាត់ជាភាសាអង់គ្លេសថា CamDX។​ អត្ថបទ៖ SL

The post សហគ្រិនភាពដើរតួនាទីយ៉ាងសំខាន់សម្រាប់ការអភិវឌ្ឍសង្គម-សេដ្ឋកិច្ចកម្ពុជា appeared first on .

លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងដូច្នេះក្នុងសិក្ខាសាលាសភាស្ដីពី ការកសាងក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈក្នុងការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥នាវិមានរដ្ឋសភា នាព្រឹកថ្ងៃទី៦ខែវិច្ឆិកា ។

លោកបានបញ្ជាក់បន្ថែមថា៖ តួលេខកំណើនរួម និងតាមវិស័យ ជាការគិតគូរមាននិន្នាការប្រហាក់ប្រហែលទៅនឹងការវាយតម្លៃរបស់ស្ថាប័នហិរញ្ញវត្ថុអន្តរជាតិធំៗ ប៉ុន្តែអាចខុសគ្នាជាទំហំតួលេខ ដូចជា៖ តាមការវាយតម្លៃចុងក្រោយថ្មីៗនេះ, IMF បានសន្និដ្ឋានថា សេដ្ឋកិច្ចកម្ពុជាអាចសម្រេចបានកំណើន ៥,៥% ក្នុងឆ្នាំ ២០២៤, ធនាគារពិភពលោក(World Bank) ថា ៥,៣%, ADB ថា ៥,៨% និង AMRO ថា ៥,៦% ។

លោកឧបនាយករដ្ឋមន្រ្តីបានថ្លែងទៀតថា៖ សម្រាប់ឆ្នាំ ២០២៥ ផ្អែកលើការវាយតម្លៃក្នុង«ក្របខណ្ឌហិរញ្ញវត្ថុសាធារណៈរយៈពេលមធ្យម (MTFF) ឆ្នាំ ២០២៥-២០២៧» សេដ្ឋកិច្ចកម្ពុជា ត្រូវបានព្យាករថាអាចនឹងសម្រេចបានកំណើន ៦,៣% ដែលធ្វើឱ្យផសស(GDP) ថ្លៃបច្ចុប្បន្នស្ថិតក្នុងរង្វង់២០៩ ១៦៣ ប៊ីលានរៀល សមមូលនឹងប្រមាណ ៥១ ៣៩៨ លានដុល្លារអាម៉េរិក ខណៈដែល ផសស សម្រាប់មនុស្សម្នាក់ ត្រូវបានរំពឹងថានឹងកើនដល់ ២ ៩២៤ដុល្លារ។

លទ្ធផលនៃការព្យាករកំណើននេះ គាំទ្រដោយទិដ្ឋភាពវិជ្ជមាននៃវិស័យសេដ្ឋកិច្ចសំខាន់ៗ ដូចជា៖ វិស័យកាត់ដេរ, វិស័យកម្មន្តសាលមិនមែនកាត់ដេរ, និងវិស័យផលិតកម្មម្ហូបអាហារ និង ភេសជ្ជៈ, ព្រមទាំងវិស័យទេសចរណ៍ និង សេវាកម្មគាំទ្រផ្សេងទៀត, ដែលវិស័យទាំងអស់នេះ ត្រូវបានព្យាករថា នឹងបន្តរក្សាបានកំណើនរឹងមាំ និងមានចលនការល្អ, ក្នុងខណៈដែលតម្រូវការសកល និងកំណើនទំនុកចិត្តវិនិយោគិនបរទេស ត្រូវបានរំពឹងទុកថា នឹងមានសភាពកាន់តែប្រសើរឡើង៕

The post លោក អូន ព័ន្ធមុនីរ័ត្ន៖ ឆ្នាំ២០២៤ សេដ្ឋកិច្ចកម្ពុជា ត្រូវបានវាយតម្លៃថានឹងអាចសម្រេចបានកំណើនក្នុងរង្វង់ ៦%និងឆ្នាំ២០២៥ រង្វង់៦,៣% appeared first on .

ជាលទ្ធផលអង្គប្រជុំ បានសម្រេចបាននូវសេចក្តីព្រាងគោលនយោបាយជាតិស្តីពីការផ្តល់អាហារតាមសាលារៀន និងរបាយការណ៍បិទបញ្ចប់កម្មវិធីឧបត្ថម្ភសាច់ប្រាក់ជូនគ្រួសារក្រីក្រនិងងាយរងគ្រោះ។

យោងតាមក្រសួងសេដ្ឋកិច្ច និងហិរញ្ញវត្ថុ បានឱ្យដឹងថាក្រសួងអប់រំ យុវជន និងកីឡា បានរៀបចំ “សេចក្តីព្រាងគោលនយោបាយជាតិស្តីពីការផ្តល់អាហារតាមសាលារៀនឆ្នាំ២០២៤-២០៣៥” ដែលជាឯកសារកម្រិតគោលនយោបាយដើម្បីសម្រេចបានចក្ខុវិស័យ របស់រាជរដ្ឋាភិបាលក្នុងការលើកកម្ពស់ស្ថានភាពអាហារូបត្ថម្ភ សុខភាពនិងការអប់រំកុមារ ព្រមទាំងរួមចំណែកអភិវឌ្ឍសេដ្ឋកិច្ចមូលដ្ឋាន។ អង្គប្រជុំបានពិនិត្យនិងពិភាក្សាយ៉ាងយកចិត្តទុកដាក់លើចំណុចសំខាន់ៗ និងបានផ្តល់មតិយោបល់កែសម្រួលដើម្បីឱ្យ “សេចក្តីព្រាងគោលនយោបាយ” នេះ កាន់តែមានភាពពេញលេញ និងសង្គតិភាព មុននឹងដាក់សេចក្តីព្រាងនេះ គោរពសុំការអនុម័តដ៏ខ្ពង់ខ្ពស់ពីប្រមុខរាជរដ្ឋាភិបាល នាពេលខាងមុខ ។

រាជរដ្ឋាភិបាលកម្ពុជាបានដាក់ឱ្យអនុវត្ត “កម្មវិធីឧបត្ថម្ភសាច់ប្រាក់ជាតិ ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩” នៅថ្ងៃទី ២៤ ខែមីនា ឆ្នាំ ២០២០។“ការអនុវត្តកម្មវិធីឧបត្ថម្ភសាច់ប្រាក់” នេះ មានរយៈពេល ៤៦ ខែ ដែលក្នុងនោះការអនុវត្តពេញលេញរយៈពេល៤៣ ខែ (ខែមិថុនា ឆ្នាំ២០២០ ដល់ ខែធ្នូ ឆ្នាំ២០២៣) និងការអនុវត្តយុទ្ធសាស្ត្រចាកចេញពីកម្មវិធីមានរយៈពេល ៣ ខែ (ខែ មករា ដល់ខែ មីនា ឆ្នាំ ២០២៤) ដោយបានផ្តល់សាច់ប្រាក់ឧបត្ថម្ភប្រចាំខែដល់គ្រួសារក្រីក្រ និងងាយរងគ្រោះចំនួនប្រមាណ ៧០ ម៉ឺនគ្រួសារ ស្មើនឹង ២,៨ លាននាក់ ដោយបានចំណាយថវិការដ្ឋសរុបចំនួន ៥ ៤៣៨ ៤៨៦ ៤១៩ ០០០ រៀល ឬស្មើនឹង ១ ៣៥៩,៦២ លានដុល្លារអាម៉េរិក ។

កន្លងមក, ក្នុងគោលបំណងលើកកម្ពស់ប្រសិទ្ធភាព និងប្រតិតុល្យការនៃការអនុវត្តកម្មវិធី ក្រុមប្រឹក្សាជាតិគាំពារសង្គម បានរៀបចំការវាយតម្លៃជាប្រចាំសម្រាប់ “កម្មវិធីឧបត្ថម្ភសាច់ប្រាក់” នេះ រួមមានទាំងការវាយតម្លៃកម្មវិបាករបស់កម្មវិធីលើសង្គម-សេដ្ឋកិច្ច និងជីវភាពរស់នៅរបស់ប្រជាជន និងការវាយតម្លៃលើដំណើរការនៃការអនុវត្តកម្មវិធីផងដែរ។ ក្រោយពីបានបិទបញ្ចប់ការអនុវត្ត “កម្មវិធីឧបត្ថម្ភសាច់ប្រាក់” នេះ រាជរដ្ឋាភិបាល ក៏បានសម្រេចដាក់ឱ្យអនុវត្ត “កម្មវិធីជាតិជំនួយសង្គមក្នុងកញ្ចប់គ្រួសារ” តាមរយៈការធ្វើស្ថាប័នូបនីយកម្ម និងសមាហរណកម្មកម្មវិធីជាតិជំនួយសង្គមទាំងអស់ ដើម្បីពង្រីកការគ្របដណ្តប់ បង្កើនប្រសិទ្ធភាព និងការវិនិយោគហិរញ្ញវត្ថុ ជាមួយនឹងវឌ្ឍនភាពនៃការអនុវត្តកម្មវិធីនេះ។

គិតត្រឹមដំណាច់ ខែមិថុនា ឆ្នាំ ២០២៤នេះ, ក្នុងចំណោមគ្រួសារគោលដៅដែលមានបណ្ណសមធម៌ចំនួន ៧០ ម៉ឺនគ្រួសារ ឬស្មើនឹង ២,៨ លាននាក់ មានគ្រួសារចំនួន ៥៧ ម៉ឺនគ្រួសារ (ប្រមាណ ៨៤ %) បានចុះឈ្មោះចូលកម្មវិធីរួចរាល់ និងទទួលផលពីកម្មវិធី ដោយរាជរដ្ឋាភិបាលបានចំណាយថវិកាសរុប ប្រមាណ ៧២,៥ ប៊ីលានរៀល (ប្រមាណ ១៨ លានដុល្លារអាម៉េរិក)។

ដោយឡែក សម្រាប់ក្រុមគោលដៅនៅសេសសស់ចំនួនប្រមាណ ១៦%, ក្រុមការងារអន្តរក្រសួងពាក់ព័ន្ធ ដោយមានការសម្របសម្រួលពីអគ្គលេខាធិការដ្ឋានក្រុមប្រឹក្សាជាតិគាំពារសង្គម បាន និងកំពុងរៀបចំយុទ្ធនាការដើម្បីជំរុញការចុះបញ្ជីឱ្យបានទាន់ពេល ស្របតាមគោលនយោបាយរបស់រាជរដ្ឋាភិបាលនីតិកាលទី ៧ នៃរដ្ឋសភា ៕

The post រាជរដ្ឋាភិបាលបានចំណាយថវិកាសរុបជាង១៣០០លានដុល្លារ ជួយប្រជាជនក្រីក្រ appeared first on .

កិច្ចប្រជុំចង្អៀតនេះ ដឹកនាំដោយលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និង ជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (គ.ស.ហ.) ។

គួរកត់សម្គាល់ថា បន្ទាប់ពីបានដាក់ចេញនូវ «ផែនការមេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣២» រាជរដ្ឋាភិបាល បានសម្រេចនូវកិច្ចការអាទិភាពពាក់ព័ន្ធនឹងវិស័យដឹកជញ្ជូនផ្លូវទឹកជាបន្តបន្ទាប់ ដែលក្នុងនោះ «ច្បាប់ស្តីពីការដឹកជញ្ជូនតាមផ្លូវទឹក» ត្រូវបានអនុម័ត និងដាក់ឱ្យប្រើប្រាស់នាពេលថ្មីៗនេះ ។

បន្ថែមពីនេះ «ក្របខណ្ឌនៃការអភិវឌ្ឍ និងការគ្រប់គ្រងអាជីវកម្មកំពង់ផែទន្លេ និងការតភ្ជាប់បណ្តាញ ប្រព័ន្ធដឹកជញ្ជូនតាមផ្លូវទឹកទន្លេជាមួយផ្លូវសមុទ្រនៅកម្ពុជា» ត្រូវបានរៀបចំឡើងជាផែនទីបង្ហាញផ្លូវសម្រាប់ក្រសួង ស្ថាប័នពាក់ព័ន្ធ ក្នុងការរៀបចំផែនការ និងអភិវឌ្ឍវិស័យដឹកជញ្ជូនតាមផ្លូវទឹកទន្លេឱ្យកាន់តែមានភាពរីកចម្រើននិងស្របតាមនិន្នាការសកល ។

ក្របខណ្ឌនេះ មានគោលបំណងពង្រីក និងបង្កើនការប្រើប្រាស់ប្រព័ន្ធដឹកជញ្ជូនតាមផ្លូវទឹកទន្លេ តាមរយៈការធ្វើឱ្យប្រសើរឡើងនូវហេដ្ឋារចនាសម្ព័ន្ធដឹកជញ្ជូនតាមផ្លូវទឹកលើកកម្ពស់ប្រសិទ្ធភាពសេវាកំពង់ផែដោយការប្រើប្រាស់បច្ចេកវិទ្យាទំនើប និង ការកាត់បន្ថយចំណាយឡូជីស្ទិក សំដៅរួមចំណែកទ្រទ្រង់ចីរភាពនៃកំណើនសេដ្ឋកិច្ចកម្ពុជាក្នុងរយៈពេលវែង និងបង្កើនសមត្ថភាពប្រកួតប្រជែងក្នុងតំបន់ និងសកល ។

ដើម្បីសម្រេចគោលបំណងនេះ ក្របខណ្ឌនេះ កំណត់គោលដៅក្នុងការបង្កើនការប្រើប្រាស់ មធ្យោបាយដឹកជញ្ជូនតាមផ្លូវទឹកទន្លេ តាមរយៈការដាក់ចេញនូវវិធានការជាយុទ្ធសាស្ត្រ ដែលគិតគូរទៅលើ៖ ១. ការកំណត់ទីតាំងកំពង់ផែទន្លេជាយុទ្ធសាស្ត្ររបស់រាជរដ្ឋាភិបាល និង២. ការដាក់ចេញនូវសសរស្ដម្ភចំនួន ៥ រួមមាន ការពង្រឹងក្របខណ្ឌគតិយុត្ត,ការពង្រឹងយន្តការស្ថាប័ន, ការកំណត់អាទិភាពលើយុទ្ធសាស្ត្រវិនិយោគ, ការកំណត់ប្រភពហិរញ្ញប្បទាន និងម៉ូឌែលអភិវឌ្ឍន៍ និងការអនុវត្តបញ្ជីគម្រោងនៃផែនការមេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ។

គួរបញ្ជាក់ថា លោក អូន ព័ន្ធមុនីរ័ត្ន ក៏បានស្នើសុំបន្តកិច្ចសហការពីថ្នាក់ដឹកនាំគ្រប់ក្រសួង-ស្ថាប័នពាក់ព័ន្ធ ពិសេស គណៈកម្មការអន្តរក្រសួងដើម្បីរៀបចំ «ក្របខណ្ឌនៃការអភិវឌ្ឍ និងការគ្រប់គ្រងអាជីវកម្មកំពង់ផែទន្លេនិងការតភ្ជាប់បណ្តាញប្រព័ន្ធដឹកជញ្ជូនតាមផ្លូវទឹកទន្លេជាមួយផ្លូវសមុទ្រនៅកម្ពុជា» ដើម្បីកែសម្រួលស្របតាមមតិយោបល់របស់ក្រសួង-ស្ថាប័នពាក់ព័ន្ធធ្វើឱ្យសេចក្ដីព្រាងក្របខណ្ឌនេះកាន់តែមានភាពច្បាស់លាស់,គ្រប់ជ្រុងជ្រោយនិងបញ្ចប់ក្នុងពេលឆាប់ៗខាងមុខនេះផងដែរ៕

The post សេចក្តីព្រាង «ក្របខណ្ឌនៃការអភិវឌ្ឍនិងការគ្រប់គ្រងអាជីវកម្មកំពង់ផែទន្លេ » លើកកម្ពស់ប្រសិទ្ធភាពសេវាកំពង់ផែ និងកាត់បន្ថយចំណាយឡូជីស្ទិក appeared first on .

ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី​៣១ ខែ មករា ឆ្នាំ ២០២៤ បានឱ្យដឹងថា «មូលនិធិអភិវឌ្ឍន៍ជំនាញ (SDF) ត្រូវបានសម្ពោធដាក់​ដំណើរការ បានសម្ពោធជាផ្លូវការក្រោមប្រធានបទ៖ “អភិវឌ្ឍជំនាញ, អភិវឌ្ឍ​អាជីវកម្ម, អភិវឌ្ឍខ្លួនយើងទាំងអស់គ្នា” ដោយមានការចូលរួមពីលោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួង​សេដ្ឋកិច្ច និងហិរញ្ញវត្ថុ ,អ្នកឧកញ៉ា, លោកឧកញ៉ា និងតំណាងក្រសួង-ស្ថាប័នពាក់ព័ន្ធ​របស់​រដ្ឋាភិបាល, ដៃគូអភិវឌ្ឍន៏, វិស័យឯកជន, និងគ្រឹះស្ថានបណ្តុះបណ្តាល។

ក្រសួងសេដ្ឋកិច្ច បានឱ្យដឹងថា កម្មវិធីនេះត្រូវបានរៀបចំឡើងក្នុងគោលបំណង​ប្រកាសជាផ្លូវការ​អំពីការ​ប្រែ​ក្លាយ​​គម្រោងសាកល្បងយន្តការគ្រប់គ្រងមូលនិធិអភិវឌ្ឍន៍ជំនាញទៅជាស្ថាប័នអចិន្រ្តៃយ៍ (Trust Fund) និងការបង្ហាញពីសមិទ្ធផល និងកម្មវិធីថ្មីៗរបស់មូលនិធិអភិវឌ្ឍន៍ជំនាញក្នុងគោលដៅពង្រឹង និងពង្រីកការ​អភិវឌ្ឍ​ជំនាញឱ្យត្រូវនឹងតម្រូវការវិស័យឯកជន ព្រមទាំងការចុះអនុស្សរណៈយោគ​យល់គ្នា​ជាមួយ​ដៃគូ​យុទ្ធសាស្រ្ត និងកម្មវិធីប្រគល់ពានរង្វាន់ដល់ដៃគូដែលបានចូលរួមយ៉ាងសកម្មក្នុងការអភិវឌ្ឍជំនាញ។

មូលនិធិអភិវឌ្ឍន៍ជំនាញ (SDF) ត្រូវបានផ្តួចផ្តើម និងបង្កើតឡើងដំបូង ជាគម្រោងសាកល្បង ដោយក្រសួង​សេដ្ឋកិច្ច និងហិរញ្ញវត្ថុ កាលពីខែមីនា ឆ្នាំ២០១៨ ក្នុងគោលបំណងធ្វើតេស្ដសាកល្បង យន្ដការថ្មី និងមាន​លក្ខណៈ​នវានុវត្តន៍ ដើម្បីកៀរគរ, គ្រប់គ្រង និងបែងចែកធនធាន ក្នុងគោលដៅពង្រឹង និងពង្រីក​ការអភិវឌ្ឍ​ជំនាញឱ្យត្រូវនឹងតម្រូវការវិស័យឯកជន និងការអភិវឌ្ឍសង្គមនិងសេដ្ឋកិច្ចជាតិ។

ជាងនេះទៀត គម្រោងមូលនិធិអភិវឌ្ឍន៍​ជំនាញ ក៏ចូលរួមដោះស្រាយបញ្ហាកង្វះខាតកម្លាំងពលកម្មជំនាញ​នៅកម្ពុជា តាមរយៈការផ្តល់​សហហិរញ្ញប្បទាន ដែលមានលក្ខណៈនវានុវត្តន៍ដល់គម្រោងបណ្តុះបណ្តាល ដែល ត្រូវនឹងតម្រូវការ​ឧស្សាហកម្ម (Demand-driven Skills Development) ដោយឈរលើ​គោលការណ៍​ ប្រកួតប្រជែង​ទាំង​គុណ​ភាព និងថ្លៃបណ្តុះបណ្តាល។

ជាលទ្ធផលក្នុងរយៈពេល ៥ឆ្នាំកន្លងមកនេះ ដោយគិតត្រឹមខែធ្នូ ឆ្នាំ២០២៣ មូលនិធិអភិវឌ្ឍន៍ជំនាញ (SDF) បានគាំទ្រថវិកាលើ “កម្មវិធីបណ្ដុះបណ្ដាលជំនាញ រួមគ្នា (Joint-Training Program), កម្មវិធីឆ្លើយ​តប​ជំងឺកូវីដ-១៩ (Covid-19 Response Program) និង កម្មវិធីជាមួយសាលា (Program with School)” ដែលមានថ្លៃបណ្តុះបណ្តាល ៨.៣ លានដុល្លារ សហរដ្ឋអាម៉េរិក (ឬ ៤៨% នៃថ្លៃបណ្តុះបណ្តាលសរុប ១៧.២ លានដុល្លារ សហរដ្ឋអាម៉េរិក) ។ ក្នុងនោះមានគម្រោងចំនួន ១២១ និង សិក្ខាកាមចំនួន ១៦,០៧៥នាក់ (ស្រ្ដី = ៣៥%) ដោយបានសហការជាមួយដៃគូចំនួន ៣៥៧ ស្ថាប័ន ក្នុងនោះរួមមាន៖ រោងចក្រ-សហគ្រាសចំនួន ២៩៧, គ្រឹះស្ថានបណ្តុះបណ្តាលចំនួន ៤៤ និង សមាគមធុរកិច្ចចំនួន ១៦ ។

ហើយនៅក្នុងឆ្នាំ២០២៤, SDF នឹងមានកម្មវិធីបណ្តុះបណ្តាលថ្មីៗបន្ថែមចំនួន ២ គឺកម្មវិធីផ្គូផ្គងជំនាញ (Skills Matching Program) និងថ្នាលនៃភាពជាដៃគូ (Partnership Platform) ដើម្បីពង្រីកបរិមាណ និង​លើក​កម្ពស់គុណភាពនៃការបណ្តុះបណ្តាលជំនាញឱ្យស្របទៅនឹងតម្រូវការរបស់វិស័យឯកជន ព្រមទាំងរៀបចំ​ថ្នាលបច្ចេកវិទ្យាថ្មីដែលនឹងបង្កើនប្រសិទ្ធភាព ក្នុងការផ្សារភ្ជាប់ទំនាក់ទំនងតួអង្គសំខាន់ៗ ក្នុងប្រព័ន្ធអេកូឡូស៊ី​ជំនាញ។

បន្ថែមពីនេះ នាឱកាសសម្ពោធនោះ ពិធីចុះអនុស្សរណៈយោគយល់គ្នាចំនួនបី ត្រូវបានរៀបចំឡើង ដែលក្នុងនោះរួមមាន ជាមួយ​សភាពាណិជ្ជកម្មកម្ពុជា (CCC), សហព័ន្ធនិយោជក និងសមាគមពាណិជ្ជកម្ម​កម្ពុជា (CAMFEBA) និង ជាមួយគណៈកម្មការគ្រប់គ្រងគម្រោង ហូកា (គ.គ.ហ.) នៃក្រសួង ទេសចរណ៍ និង SwissContact និងប្រគល់ពានរង្វាន់ដល់ដៃគូដែលបានចូលរួមយ៉ាងសកម្មក្នុងការអភិវឌ្ឍជំនាញ។

ជាមួយគ្នានេះផងដែរ លោក អូន ព័នមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានផ្តល់ អនុសាសន៍​ណែនាំ​ដល់ក្រសួងស្ថាប័ន, ដៃគូអភិវឌ្ឍន៍ និងវិស័យឯកជន ដែលមានសមត្ថកិច្ច​ពាក់ព័ន្ធ​នឹងការអភិវឌ្ឍជំនាញ ក្នុងការ ចូលរួម និងសហការឱ្យអស់ពីលទ្ធភាព ដើម្បីជាកម្លាំងចលកររួមដ៏ធំមួយ ដើម្បី​សម្រេចបានការអភិវឌ្ឍ​មូលធន​មនុស្សកម្ពុជា​ប្រកប ដោយចំណេះ, ជំនាញ, សមត្ថភាព, ឥរិយាបថ, និងក្រម​សីល​ធម៌វិជ្ជាជីវៈ ស្របតាម “យុទ្ធសាស្រ្តបញ្ចកោណដំណាក់កាលទី១” របស់រាជរដ្ឋាភិបាល៕ អត្ថបទ៖ រង្សី

The post កម្ពុជា ដាក់ដំណើរការមូលនិធិអភិវឌ្ឍន៍ជំនាញ (SDF) ដើម្បីពង្រឹងជំនាញឱ្យ​ចំ​តម្រូវ​ការវិស័យឯកជន appeared first on .

ក្នុងពិធីប្រកាសដាក់ឱ្យអនុវត្តជាផ្លូវការ «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ ២០២៤» នាព្រឹកថ្ងៃទី៣១ ខែមករា លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ចាប់ពីឆ្នាំ ២០១៦ មក ការវិនិយោគក្នុងខេត្តព្រះសីហនុមានសម្ទុះកើនឡើងយ៉ាងគំហុក ជាពិសេស មានការរីកដុះដាលយ៉ាងលឿនក្នុងចំនួនដ៏ច្រើននូវសំណង់អគារ។ ទោះជាយ៉ាងនេះក្តី ក្នុងដំណាក់កាលពីឆ្នាំ២០១៩តមកទៀតការផ្លាស់ប្តូរនៅក្នុងការវិវត្តនៃស្ថានភាពសង្គម-សេដ្ឋកិច្ច គួបផ្សំ និងការឆ្លងរាលដាលនៃជំងឺកូវីដ-១៩ និង បញ្ហាប្រឈមជាសកលផ្សេងទៀតបានបណ្តាលឱ្យសំណង់អគារជាច្រើន ត្រូវបានផ្អាក ឬបញ្ឈប់ដំណើរការសាងសង់។

លោកថ្លែងថា បច្ចុប្បន្នអគារដែលត្រូវបានផ្អាកដំណើរការសាងសង់នៅខេត្តព្រះសីហនុមានចំនួន ៣៦២ អាគារដែលត្រូវការទុនវិនិយោគបន្ថែម ប្រមាណ ១១៦១ លានដុល្លារអាម៉េរិក ដើម្បីបញ្ចប់ការសាងសង់, ខណៈអគារដែលត្រូវបានសាងសង់រួច, ប៉ុន្តែពុំទាន់បានដាក់ដំណើរការប្រើប្រាស់មានចំនួន ១៧៦ ។

ក្នុងពិធីប្រកាសដាក់ឱ្យអនុវត្តជាផ្លូវការកម្មវិធីពិសេសជំរុញការវិនិយោគនៅខេត្តព្រះសីហនុ នាព្រឹកនេះដែរ សម្តេចធិបតី ហ៊ុន ម៉ាណែត នាយករដ្ឋមន្រ្តី បានគូសបញ្ជាក់ថា កម្មវិធីពិសេសជំរុញការវិនិយោគ ក្នុងខេត្តព្រះសីហនុ ឆ្នាំ២០២៤នេះ ក្នុងគោលបំណងជំរុញសកម្មភាពការវិនិយោគ ក៏ដូចជាការដោះស្រាយបញ្ហានានា ដែលកំពុងប្រឈម និងកំពុងជាប់គាំង ដើម្បីប្រែក្លាយខេត្តព្រះសីហនុ ឱ្យទៅជាខេត្តឈានមុខ ក្នុងការបង្កើនកំណើនសេដ្ឋកិច្ចជាតិឱ្យកាន់តែប្រសើរ។

ទន្ទឹមនឹងនេះ សម្ដេចនាយករដ្ឋមន្រ្តី បានប្រកាសយកឆ្នាំ២០២៤ ជាឆ្នាំជំរុញសកម្មភាពងើបឡើងវិញនូវកំណើនសេដ្ឋកិច្ចរបស់កម្ពុជា ខណៈសន្ទុះនៃសេដ្ឋកិច្ចពិភពលោក កំពុងកើនឡើង៕

The post អាគារជាប់គាំងនៅខេត្តព្រះសីហនុ ត្រូវការទុនវិនិយោគ ១១៦១លានដុល្លារដើម្បីបញ្ចប់ការសាងសង់ appeared first on .