លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា ក្រុមហ៊ុនជប៉ុនចង់បណ្តាក់ទុននៅក្នុងប្រទេសណាមួយ តែងមានភាពយឺតយាវបន្តិច ប៉ុន្តែការវិនិយោគរបស់គេមានភាពច្បាស់លាស់ និងបង្ហាញឱ្យឃើញថាប្រទេសទាំងនោះមានបរិយាកាសវិនិយោគល្អ ។ តួយ៉ាង ការវិនិយោគរបស់ក្រុមហ៊ុន Mirarth Holdings នៅក្នុងវិស័យស្វាយចន្ទីកម្ពុជា វាបង្ហាញឱ្យឃើញថាក្រុមហ៊ុនស្វែងរកប្រាក់ចំណេញបាន ហើយមានតម្លាភាពសង្គម។ លើសពីនេះធ្វើឱ្យវិនិយោគិននៅតាមបណ្តាប្រទេសផ្សេងទៀត និងចូលមកវិនិយោគតាមដែរ ព្រោះវិនិយោគិនបរទេសទំាងនោះគេជឿជាក់លើការសិក្សារបស់ក្រុមហ៊ុនជប៉ុន។

បើតាមប្រធានសមាគមស្វាយចន្ទីកម្ពុជាខាងលើ ក្រុមហ៊ុនជប៉ុនចូលមកបណ្តាក់ទុនវិនិយោគនៅក្នុងវិស័យស្វាយចន្ទីកម្ពុជាមិនត្រឹមតែចង់កែច្នៃគ្រាប់ស្វាយចន្ទីប៉ុណ្ណោះទេ ជប៉ុនថែមទាំងចង់ធ្វើការកែច្នៃសំបគ្រាប់ស្វាយចន្ទីគាបយកប្រេងថែមទៀត ដោយសារវាទទួលបានកម្រៃខ្ពស់។

ផ្អែកលើការវិនិយោគរបស់ក្រុមហ៊ុនជប៉ុនក្នុងវិស័យស្វាយចន្ទីនាពេលសព្វថ្ងៃ, លោក អួន ស៊ីឡុត ទទួលស្គាល់ថា “ច្បាស់ណាស់យើងត្រូវការ ការវិនិយោគបន្ថែមពីក្រុមហ៊ុនជប៉ុនសម្រាប់វិស័យស្វាយចន្ទី ព្រោះកាលណាមានការវិនិយោគរបស់ជប៉ុនមានច្រើន វាបង្ហាញអំពីបរិយាកាសវិនិយោគល្អនៅក្នុងប្រទេសកម្ពុជា ហើយមានតម្លាភាពដែលអាចទទួលយកបាន ដើម្បីបង្ហាញទៅដល់វិនិយោគិននៅតាមបណ្តាប្រទេសនានាឱ្យចាប់អារម្មណ៍មកលើកម្ពុជាថែមទៀត”។

លោក Taniguchi Kentaro ប្រធានក្រុមហ៊ុន Mirarth Holdingsថ្មីៗនេះបានបង្ហាញព័ត៌មានដល់លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីថា បច្ចុប្បន្នក្រុមហ៊ុន Mirarth Holdings មានសមត្ថភាពកែច្នៃគ្រប់ស្វាយចន្ទី ១៥០០ តោន ក្នុងមួយឆ្នាំ និងអាចឡើងដល់ប្រមាណ ៣០០០ តោននៅដើមឆ្នាំ២០២៥ ហើយក្រុមហ៊ុននឹងបន្តពង្រីកផលិតកម្មរបស់ខ្លួនរហូតដល់ប្រមាណ ២៥ ០០០ តោន ក្នុងរយៈពេល ៣ ទៅ ៤ ឆ្នាំទៀត។

លោកបញ្ជាក់ថា “ក្រុមហ៊ុនបានចាប់ដៃគូជាមួយក្រុមហ៊ុនមួយនៅប្រទេសហូឡង់ដ៍ ហើយគ្រោងនឹងនាំចេញគ្រាប់ស្វាយចន្ទីប្រមាណ ២៥០តោន ទៅកាន់ទីផ្សារអ៊ឺរ៉ុបក្នុងពេលខាងមុខនេះ។ លើសពីនេះក្រុមហ៊ុនក៏មានគម្រោងពង្រីកសកម្មភាពកែច្នៃគ្រាប់និងកសិផលស្វាយចន្ទីផងដែរ ដូចជាការកែច្នៃធ្វើជាប្រេង គ្រឿងសម្អាង និងផលិតថាមពលជីវម៉ាស ដែលសុទ្ធសឹងជាផលិតផលដែលមានតម្លៃបន្ថែមខ្ពស់”។

យោងតាមលោក អួន ស៊ីឡុត គិតត្រឹមរយៈពេល១០ខែក្នុងឆ្នាំ២០២៤ កម្ពុជាបានផលិតគ្រាប់ស្វាយចន្ទីឆៅបានប្រមាណ៨៤ម៉ឺនតោន ក្នុងនោះបាននាំចេញទៅប្រទេសវៀតណាមប្រមាណ៧៩ម៉ឺនតោន ដែលអាចឱ្យកម្ពុជារកបានប្រាក់ពីនាំចេញបានប្រមាណ ១១០០លានដុល្លារអាម៉េរិក៕ SL

The post អ្នកជំនាញ ចង់បានការបណ្តាក់ទុនពីវិនិយោគិនជប៉ុនបន្ថែម នៅក្នុងឧស្សាហកម្មស្វាយចន្ទីកម្ពុជា appeared first on .

លោក តូច ប៊ុនហួរ បានគូសបញ្ជាក់ថា គិតត្រឹមឆ្នាំ២០២៤នេះ ប្រទេសកម្ពុជាមានផ្ទៃដីដាំដុះដំណាំស្វាយចន្ទីជាង ៥៨ម៉ឺនហិកតា នៅទូទាំងប្រទេស ដែលអាចផ្ដល់ទិន្នផលជាមធ្យមប្រមាណ ១,៥តោន ក្នុង ១ហិកតា។ បើគិតត្រឹម៧ខែដើមឆ្នាំ២០២៤ កម្ពុជាផលិតគ្រាប់គ្រាប់ស្វាយចន្ទីឆៅបានជាង ៨៣ម៉ឺនតោន កើនឡើង ៣៦,៧% ដែលធ្វើឱ្យកម្ពុជា ជាប់ចំណាត់ថ្នាក់លេខ២ ជាប្រទេសនាំចេញស្វាយចន្ទីច្រើនជាងគេលើពិភពលោក។

លោកបន្តថា មកទល់ពេលនេះ កម្ពុជាមានលទ្ធភាពផលិត កែច្នៃដោយខ្លួនឯងត្រឹមតែ១០ភាគរយ ប៉ុណ្ណោះនៃគ្រាប់ស្វាយចន្ទីសរុប។ ក្រៅពីនេះ គឺជាង៨០ភាគរយ បាននាំចេញទៅកាន់ប្រទេសជិតខាងគឺប្រទេសវៀតណាម (គ្រាប់ឆៅ សើម ឬស្ងួត) ហើយមួយផ្នែកទៀត បាននាំចេញទៅប្រទេសឥណ្ឌា ចិន ម៉ាឡេស៊ី បង់ក្លាដែស។ល។

បើតាមលោក តូច ប៊ុនហួរ បានសំឡឹងឃើញ និងអះអាងថា នៅឆ្នាំ២០៣០ កម្ពុជានឹងក្លាយជាប្រទេសអធិរាជស្វាយចន្ទីលើពិភពលោកយ៉ាងពិតប្រាកដ។

ដោយលោកបានគូសបញ្ជាក់ថា ដោយសារ «កម្មវិធីគោលនយោបាយជាតិ ស្តីពីស្វាយចន្ទី២០២២-២០២៧ បានកំណត់ថាឆ្នាំ២០២៧ ឱ្យកែច្នៃស្វាយចន្ទីឱ្យបានយ៉ាងតិច២៥ភាគរយ ប៉ុន្តែបើក្រឡេកមើលរយៈពេល៣ឆ្នាំចុងក្រោយនេះ ២០២២, ២០២៣, ២០២៤ ឃើញថាមានការវិនិយោគទៅលើការកែច្នៃច្រើន រហូតមកដល់ពេលនេះគឺស្ទុះបាន១០ភាគរយ ។ដូច្នេះ ចន្លោះ៣ឆ្នាំទៀត ២៥ភាគរយ យើងនឹងឈានទៅដល់»។

ប្រធានសមាគមស្វាយចន្ទីកម្ពុជា លោក អួន ស៊ីឡុត ក៏បានធ្លាប់បានឱ្យដឹងផងដែរថា នៅឆ្នាំ២០២៤នេះ កម្ពុជាអាចបន្តឈរលេខ២បន្តទៀតជាប្រទេសនាំចេញស្វាយចន្ទីច្រើនជាងគេលើពិភពលោក ឬកម្ពុជាអាចឈានដល់លំដាប់លេខរៀងទី១ ក្នុងតារាង នៅឆ្នាំនេះ។

សូមបញ្ជាក់ថា នៅឆ្នាំ២០២៤នេះ សមាគមស្វាយចន្ទីកម្ពុជា បានព្យាករណ៍ថា កម្ពុជានឹងផលិតគ្រាប់ស្វាយចន្ទីឆៅបាន ៨៥០ ០០០តោន ក្នុងនោះនាំចេញទៅក្រៅប្រទេសប្រមាណ ៧៥០ ០០០តោន អាចរកចំណូលបានលើស ១ពាន់លានដុល្លារ។

សូមរំលឹកផងដែរថា កម្ពុជាបានដាក់ចេញ «គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» កាលពីថ្ងៃ ១៤ ខែមិថុនា ឆ្នាំ២០២៣ ដែលគោលនយោបាយនេះនឹងក្លាយជាកម្លាំងចលករដ៏មានប្រសិទ្ធភាពសម្រាប់ពង្រឹងផលិតភាពនៃផលិតកម្មដំណាំស្វាយចន្ទី ការនាំចេញ ដើម្បីជំរុញឱ្យកម្ពុជាឈានទៅជាអធិរាជស្វាយចន្ទី នៅលើពិភពលោក៕

The post លោក តូច ប៊ុនហួរ៖ កម្ពុជានឹងក្លាយជាប្រទេសអធិរាជស្វាយចន្ទីលើពិភពលោក នៅឆ្នាំ២០៣០ appeared first on .

នេះបើតាមកិច្ចប្រជុំស្តីពី “ការដាក់លក់គ្រាប់ស្វាយចន្ទីកែច្នៃរួចចូលទៅកាន់ផ្សារតាមអាកាសយានដ្ឋាន និងក្រុមហ៊ុនអាកាសចរណ៍ស៊ីវិល” ដឹកនាំដោយលោកស្រី តោ ពិឡា រដ្ឋលេខាធិការក្រសួងពាណិជ្ជកម្ម និង លោក វ៉ាន់ ចន្ទី អគ្គនាយកគោលនយោបាយដឹកជញ្ជូនតាមផ្លូវអាកាសនៃរដ្ឋលេខាធិការដ្ឋានអាកាសចរណ៍ស៊ីវិល កាលពីពេលចុងសប្តាហ៍កន្លងទៅ។

លោកស្រី តោ ពិឡា រដ្ឋលេខាធិការក្រសួងពាណិជ្ជកម្ម មានប្រសាសន៍ថា៖« ការដាក់លក់ស្វាយចន្ទី ដែលកែច្នៃរួចចូលទៅកាន់ផ្សារទំនើប ម៉ាត អាកាសយានដ្ឋាននិងក្រុមហ៊ុនអាកាសចរណ៍ស៊ីវិល គឺដើម្បីជួយលើកស្ទួយផលិតផលស្វាយចន្ទីកម្ពុជាឱ្យកាន់តែរីកចម្រើន និងទទួលបានទីផ្សារកាន់តែធំ ក៏ដូចជាជំរុញការគាំទ្រ ផ្សព្វផ្សាយ ចែកចាយ និងប្រើប្រាស់ផលិតផលគ្រាប់ស្វាយចន្ទីខ្មែរឱ្យកាន់តែទូលំទូលាយ។

ពាក់ព័ន្ធនឹងកិច្ចប្រជុំខាងលើនេះផងដែរ លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យឧកញ៉ាញូស៍ដឹងថា កន្លងមកការលក់ស្វាយចន្ទីនៅតាមយន្តហោះគឺមិនមាននោះទេ គឺមានតាមព្រលានប៉ុណ្ណោះ។ ក្រោយពីគោលនយោបាយជាតិស្តីពីស្វាយចន្ទីឆ្នាំ២០២២-២០២៧ ចេញជារូបរៀងមក ក្រសួងពាណិជ្ជកម្មបានប្រឹងប្រែងយ៉ាងច្រើនក្នុងការចែកចាយ លក់ផលិតផលស្វាយចន្ទីទៅកាន់ទីផ្សារក្នុងស្រុកក៏ដូចជាទីផ្សារអន្តរជាតិផងដែរ។

លោកបន្តថា កន្លងមកក្រសួងបានរៀបចំដាក់លក់នៅតាមផ្សារទំនើបក៏ដូចជាតាមសណ្ឋាគារ ហើយឥឡូវនេះយើងបានដល់យន្តហោះទៀត ដើម្បីចែកជូនដល់អ្នកធ្វើដំណើរ ហើយស្វាយចន្ទីចាំបាច់ណាស់ក្នុងស្រុកក្នុងការពង្រីក ព្រោះកម្ពុជាជាប្រទេសទេសចរណ៍មួយដែរ ដោយការប្រើប្រាស់ក្នុងស្រុកល្អជាងការនាំចេញ។

លោកបន្តទៀតថា ជារឿងល្អហើយពិតជាសំខាន់ពីព្រោះកម្ពុជាជាប្រទេសមួយដែលមានទេសចរច្រើនគួរសមដែរ ដូច្នេះបើកាលណាយើងអាចលក់នៅលើយន្តហោះឬក៏ក្រុមហ៊ុនអាកាសចរណ៍នានា គឺជាការជួយផ្សព្វផ្សាយ យើងនឹងអាចរកចំណែកទីផ្សារនៅក្នុងស្រុក ពង្រីកចំណែកទីផ្សារបានក្នុងស្រុកសម្រាប់ស្វាយចន្ទីឱ្យបានច្រើនជាងមុន។

បើតាមប្រធានសមាគមស្វាយចន្ទីកម្ពុជា បានគូសបញ្ជាក់ថា ការដាក់លក់ទាំងអស់នេះគឺពិតជាត្រូវការស្តង់ដារខ្ពស់ដូចការដាក់លក់តាមផ្សារទំនើបនានាដែរ ពោលត្រូវមានវិញ្ញានបត្របញ្ជាក់ពីសុវត្ថិភាពចំណីអាហារ អនាម័យ ការវេចខ្ចប់ជាដើម។

គួររំលឹកផងដែរថា នាពេលមកក្រសួងជំនាញ សហគ្រាស និងក្រុមហ៊ុន បានពិភាក្សា និងចរចាគ្នា ក្នុងការដាក់លក់ស្វាយចន្ទីកែច្នៃរួចទៅក្នុងទីផ្សារទំនើប និងម៉ាតនានានៅក្នុងប្រទេសកម្ពុជាដូចជា៖ អ៊ីអន, ម៉ាក្រូ, ឡាក់គី, ជីបម៉ុង,ថៃហួត, បាយ័ន, ប៊ីកស៊ី, តេលា ,7-Eleven និង Cambodian Superstore ជាដើម៕

The post កម្ពុជា ត្រៀមដាក់លក់គ្រាប់ស្វាយចន្ទីកែច្នៃរួចទៅតាមផ្សារអាកាសយានដ្ឋាន និងក្រុមហ៊ុនអាកាសចរណ៍ស៊ីវិលជាលើកដំបូង appeared first on .

លោក អួន ស៊ីឡុត បានឱ្យដឹងថា ក្នុងរយៈពេល៧ខែ ឆ្នាំ២០២៤នេះ កម្ពុជាផលិតគ្រាប់ឆៅបាន ៨៣០ ០០០តោន និងនាំចេញទៅវៀតណាមចំនួន ៧៨០ ០០០ តោនគិតជាទឹកប្រាក់ ១ ០៩២ ០០០ ០០០ដុល្លាកើនឡើង ៣៦.៧% (ជាទំហំ) ២៨.១% (ជាតម្លៃ) ។

លោកបន្តថា ការកើនឡើងនេះមិនមែនជារឿងចៃដន្យទេ ព្រោះតាំងពីខែឧសភាមក សមាគមស្វាយចន្ទី ឃើញថាស្វាយចន្ទីកម្ពុជាមានការកើនឡើងច្រើន ដោយសារតែយើងអាចទប់ទល់ អាចសម្របខ្លួនបានជាមួយបាតុភូតអែនីណូ ហើយផ្ទៃដីដាំដុះក៏បានការកើនឡើងផងដែរ។ម្យ៉ាងទៀត សមាគមស្វាយចន្ទីកម្ពុជា ក៏បានប្រកាសពីខែកញ្ញា ឆ្នាំ២០២៣អំពីបាតុភូតអែនីណូដែលកម្ពុជាបានប្រឈម ហើយយើងបានផ្តល់ដំណោះស្រាយមួយចំនួនដល់សមាជិកក៏ដូចជាកសិករទូទៅ ឱ្យត្រៀមខ្លួនក្នុងការរក្សាផលឱ្យនៅល្អ។

បើតាមប្រធានសមាគមស្វាយចន្ទីកម្ពុជា ប្រទេសកូតឌីវ័រ បានឈរលេខ១ជាប្រទេសផលិតស្វាយចន្ទីឆៅធំបំផុតលើពិភពលោក ខណៈកម្ពុជាបានវ៉ាឥណ្ឌាបានមកលេខ២ ហើយប្រទេសឥណ្ឌាធ្លាក់ទៅលេខ៣វិញដោយសារការប្រែប្រួលអាកាសធាតុ។

លោក អួន ស៊ីឡុត បានគូសបញ្ជាក់ថា លោកនៅតែរំពឹងខ្ពស់ថាកម្ពុជាអាចបន្តឈរលេខ២បន្តទៀត ដោយសារការប្រែប្រួលអាកាសធាតុលក្ខណៈសកល ដូច្នេះកម្ពុជានឹងបន្តឈរលេខ២ឬអាចលោតដល់លេខ១នៅក្នុងឆ្នាំ២០២៤នេះ ពីព្រោះឃើញថាទិន្នផលរបស់ប្រទេសកូតឌីវ័រ ក៏មានការស្រុតចុះដែរមិនទាន់អាចធ្វើការបូកសរុបបាននៅឡើយនោះទេ។

សូមជម្រាបជូនថា ក្នុងឆ្នាំ២០១៩ កម្ពុជានាំចេញគ្រាប់ស្វាយចន្ទីប្រហែល ៦០ ម៉ឺនតោន, ក្នុងឆ្នាំ២០២០ ចំនួន ៩៥ ម៉ឺនតោន ឆ្នាំ២០២១ ចំនួន ១,១ លានតោន ឬប្រមាណ២៤ ភាគរយនៃការនាំចេញសរុបលើពិភពលោក, ឆ្នាំ២០២២ ចំនួន ៦៧ ម៉ឺនតោន, នៅឆ្នាំ២០២៣ ជាង៦៥ម៉ឺនតោន ទទួលចំណូលប្រមាណ ៨៣៧លានដុល្លារ ថយចុះប្រមាណជាង១០ភាគរយ។

ដោយឡែកសម្រាប់ឆ្នាំ២០២៤នេះ ត្រូវបានព្យាករណ៍ថាកម្ពុជានឹងផលិតគ្រាប់ស្វាយចន្ទីឆៅបាន ៨៥០ ០០០តោន ក្នុងនោះនាំចេញទៅក្រៅប្រទេសប្រមាណ ៧៥០ ០០០តោន អាចរកចំណូលបានលើស ១ពាន់លានដុល្លារ។នេះបើតាមការបញ្ជាក់ពីសមាគមស្វាយចន្ទីកម្ពុជា។

សូមរំលឹកផងដែរថា កម្ពុជាបានដាក់ចេញ«គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» កាលពីថ្ងៃ ១៤ ខែមិថុនា ឆ្នាំ២០២៣ ដែលគោលនយោបាយនេះនឹងក្លាយជាកម្លាំងចលករដ៏មានប្រសិទ្ធភាពសម្រាប់ពង្រឹងផលិតភាពនៃផលិតកម្មដំណាំស្វាយចន្ទី ការនាំចេញ ដើម្បីជំរុញឱ្យកម្ពុជាឈានទៅជាអធិរាជស្វាយចន្ទី៕

The post កម្ពុជាវ៉ាដាច់ឥណ្ឌា ជាប្រទេសផលិតស្វាយចន្ទីឆៅធំបំផុតលើពិភពលោកទី២ appeared first on .

សមាគមស្វាយចន្ទីកម្ពុជា បានឱ្យដឹងបន្តថា នាំចេញទៅក្រៅប្រទេស ៧៥០ ០០០តោន ដែលអាចរកចំណូលបានលើស ១ពាន់លានដុល្លានេះ ខណៈផលិតកម្មស្វាយចន្ទីពិភពលោកបានធ្លាក់ចុះប្រមាណ​៣០ភាគរយ។

លើសពីនេះ ការនាំចេញទៅវៀតណាមច្រើនជាងការរំពឹងទុកប្រមាណ ៧២០ ៨០០ តោន គិតជាទឹកប្រាក់ ៩២១ ៥០០​ ០០០ ដុល្លារ​ នាដើមខែមិថុនា ឆ្នាំ២០២៤នេះ។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានបញ្ជាក់ថា ដោយយោងតាមការអង្កេតដោយយកចិត្តទុកដាក់របស់សមាគមស្វាយចន្ទីកម្ពុជា បានព្យាការណ៍ថា ២០២៤នេះ កម្ពុជានឹងផលិតគ្រាប់ឆៅបាន ៨៥ម៉ឺនតោន ក្នុងនោះនាំចេញទៅក្រៅប្រទេសប្រមាណ៧៥ម៉ឺនតោន ដែលអាចរកចំណូលបានលើស ១ពាន់លានដុល្លារ។

លោកបញ្ជាក់បន្ថែមថា ដោយសារកាលខែកញ្ញា ឆ្នាំ២០២៣កន្លងទៅ សមាគមបានចេញនៅសារជូនដំណឹងដល់សមាជិកសមាគមអំពីផលប៉ះពាល់នៃអែនីញូ បើសិនជាយើងមិនប្រឹងប្រែង មិនទប់ស្កាត់ទេ វានឹងអាចបាត់បង់ផល ចន្លោះពី១០ទៅ២០ ឬ៣០% ។ដូច្នេះ មកដល់ពេលនេះ ដំណោះស្រាយនេះប្រសិទ្ធភាពហួសពីការរំពឹងទុករបស់សមាគម ទើបមានការកើនឡើង។

បើតាមលោក អួន ស៊ីឡុត នៅក្នុងរយៈពេល៥ខែ ឆ្នាំ២០២៤ កម្ពុជាផលិតគ្រាប់ស្វាយចន្ទីឆៅសម្រេចបាន ៧១ ម៉ឺន ៦ ពាន់តោន ក្នុងនោះនាំចេញទៅប្រទេសវៀតណាមចំនួន ៦៦ ម៉ឺន ៧ ពាន់តោន កើនឡើង ៣៨ ភាគរយ បើប្រៀបធៀបរយៈពេលដូចគ្នា កាលពីឆ្នាំ២០២៣ ដែលគិតជាទឹកប្រាក់ប្រមាណ ៨៥១ លានដុល្លារ។

ពាក់ព័ន្ធនឹងរឿងនេះ កញ្ញា អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ក៏បានគូសបញ្ជាក់ឱ្យដឹងផងដែរថា សម្រាប់ដំណាំស្វាយចន្ទី ទីផ្សារធំជាងគេគឺប្រទេសវៀតណាម។តែពេលថ្មីៗនេះបានពិនិត្យវិភាគឃើញថា ការនាំចេញគ្រាប់ស្វាយចន្ទីស្រស់ទៅកាន់ប្រទេសវៀតណាម មានការថយចុះបន្តិច។

កញ្ញា បានបញ្ជាក់ថា កាលពីប៉ុន្មានឆ្នាំមុន គ្រាប់ស្វាយចន្ទីស្ទើរតែ៩៩ភាគរយ ហូរចេញទៅទីផ្សារបរទេសហើយភាគច្រើនទៅប្រទេសវៀតណាម។ រហូតមកដល់ពេលនេះ ការនាំចេញគ្រាប់ស្វាយចន្ទីស្រស់ទៅកាន់ទីផ្សារបរទេស ក៏ដូចជាប្រទេសវៀតណាមមានការថយចុះ តែយើងសង្កេតឃើញមាននិន្នាការកើនឡើងលើការកែច្នៃក្នុងស្រុក៕

The post ការនាំចេញគ្រាប់ស្វាយចន្ទីឆៅទៅក្រៅប្រទេសឆ្នាំ២០២៤នេះ ត្រូវបានព្យាការណ៍ថាកើនដល់៧៥ម៉ឺនតោន គិតជាទឹកប្រាក់លើស១ពាន់លានដុល្លារ appeared first on .

យោងតាមទិន្នន័យក្រៅផ្លូវការរបស់ សមាគមស្វាយចន្ទីកម្ពុជា (សសក) បានឲ្យដឹងថា ផលិតកម្មស្វាយចន្ទី៥ខែ ឆ្នាំ២០២៤ (មករា-ឧសភា) កម្ពុជាផលិតគ្រាប់ស្វាយចន្ទីឆៅ ៧១៦ ០០០ តោន (៧១ម៉ឺនតោន៦ពាន់តោន) ក្នុងនោះនាំចេញទៅវៀតណាមបានសរុប ៦៦៧ ០០០ តោន (៦សែន ៦ម៉ឺន៧ពាន់ តោន) ស្មើទឹកប្រាក់ ៨៥១ លានដុល្លារ មានការកើនឡើងជាង៣០%។

ជាមួយគ្នានោះ សមាគមស្វាយចន្ទីកម្ពុជា បានឲ្យដឹងទៀតថា គ្រាប់ស្វាយចន្ទីស្ងួតមានតម្លៃមធ្យម ១ ៧៣០ដុល្លារ ក្នុង១តោន។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានបញ្ជាក់ថា «ការនាំចេញទៅកាន់ប្រទេសវៀតណាមមានការកើនឡើងក្នុងរយៈពេល៥ខែមកនេះ គឺដោយសារទី១ ,ផ្ទៃដីរបស់យើងមានការកើនឡើង ទី២, បាតុភូតអែនីញូបានធ្វើឲ្យកសិករថយផល ប៉ុន្តែសមាជិកនៅក្នុងសមាគមយើងបានប្រកាសឲ្យពួកគាត់ត្រៀមខ្លួនតាំងពីខែកញ្ញា ឆ្នាំ២០២៣មកម្ល៉េះ។ក្នុងនោះ សមាជិកសមាគមចំនួន៦០% គាត់ក៏បានធ្វើតាមអ្វីដែលសមាគមបានប្រាប់ និងដំណោះស្រាយ ធ្វើឲ្យពួកគាត់គេចផុតពីឥទ្ធិពលអែនីញូ ជាហេតុធ្វើឲ្យពួកគាត់កើនផល ទី៣, ដោយសារតែសមាគមឲ្យសមាជិករបស់ខ្លួនផ្អាកការលក់កាលពីខែកុម្ភៈ និងមីនា ធ្វើឲ្យតម្លៃគ្រាប់ស្វាយចន្ទីនៅលើចរន្តទីផ្សារធ្លាក់ចុះ ហើយនិងធ្វើឲ្យតម្លៃគ្រាប់សើម និងគ្រាប់ស្ងួតបានហក់ឡើង»។

លោកបន្តថា «ការហក់ឡើងនេះមិនជារឿងចម្លែកទេ ពីពោះនៅលើទីផ្សារបច្ចុប្បន្នជាពិសេសនៅទ្វីបអាហ្វ្រិកក៏មានការជួបបែបនេះដែរ បានធ្វើឲ្យតម្លៃស្វាយចន្ទីថយចុះ និងទី៤, ដោយសារតែប្រទេសគុណវឌ្ឍ ដែលជាប្រទេសផលិតស្វាយចន្ទីលេខមួយនៅលើពិភពលោកបានផ្អាកការនាំចេញគ្រាប់ស្វាយចន្ទីបណ្តោះអាសន្ន ដើម្បីផ្គត់ផ្គង់រោងចក្រកែច្នៃនៅក្នុងស្រុក ដូច្នេះហើយធ្វើឲ្យតម្លៃរៀងហក់ឡើងបន្តិច»៕

The post ៥ខែមកនេះ វៀតណាមទិញគ្រាប់ស្វាយចន្ទីកម្ពុជាជាង៦៦ម៉ឺនតោន កើនឡើងជាង៣០% appeared first on .

លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា សមាគម រំពឹងទុកថានឹងមានការធ្លាក់ផលគ្រាប់ចន្ទី ដោយសារតែគ្រោះអែលនីណូ។ជាក់ស្តែងការនាំចេញគ្រាប់ឆៅទៅវៀតណាម ក្នុងខែកុម្ភៈ ២០២៤នេះ ធ្លាក់ចុះប្រមាណ ៣២ភាគរយ បើធៀបរយៈកាលដូចគ្នានឹងឆ្នាំកន្លងទៅ។នេះជាការធ្លាក់ចុះ ៣ឆ្នាំជាប់គ្នា។

បើតាមលោក អួន ស៊ីឡុត មូលហេតុនៃការធ្លាក់ចុះនៃការនាំចេញគ្រាប់ឆៅនាឆ្នាំ២០២៤នេះដោយសារកត្តាសំខាន់ៗចំនួន៣ ទី១, បាតុភូតុអែលនីណូបំផ្លាញផលចន្ទី ២,សហគ្រាសក្នុងស្រុកទិញគ្រាប់ទុកកែច្នៃ និង៣,កសិករហាលទុលលក់នាខែខាងមុខ (តាមការអំពាវនាវរបស់សមាគម)។

លោកបានបន្តថា តម្លៃគ្រាប់ស្វាយចន្ទីបច្ចុប្បន្នមានតម្លៃចន្លោះ ៤៨០០រៀល ទៅ៥០០០រៀលក្នុងមួយគីឡូក្រាម ខណៈមួយរយៈមុនគ្រាប់ស្វាយចន្ទីខ្នាតតូចឈ្មួញដើរប្រមូលទិញពីកសិករក្នុងតម្លៃ៣៦០០រៀល ហើយសម្រាប់គ្រាប់ពូជស្វាយចន្ទី M23 លក់បានថ្លៃតែ៤៤០០រៀលក្នុងមួយគីឡូក្រាមនៅតាមតំបន់។

ប្រធានសមាគមស្វាយចន្ទីកម្ពុជា ធ្លាប់បានរំពឹងទុកថា តម្លៃស្វាយគ្រាប់ចន្ទីនឹងឡើងថ្លៃមកវិញនៅក្នុងខែកក្កដា ឬខែកញ្ញាខាងមុខ៕

The post ការនាំចេញគ្រាប់ស្វាយចន្ទីទៅវៀតណាមនៅដើមឆ្នាំនេះ មានការធ្លាក់ចុះប្រមាណ៣២ភាគរយ ដោយសារកត្តា៣ appeared first on .

លោក អួន ស៊ីឡុត បានបន្តថា នៅឆ្នាំ២០២៤នេះ សមាគមស្វាយចន្ទីបានធ្វើការព្យាករទម្លាក់ទិន្នផលស្វាយចន្ទីឆ្នាំនេះនឹងបន្តធ្លាក់ចុះ១០% ទៅ៣០% ឬលើសនេះ បើធៀបនឹងឆ្នាំ ២០២៣ ក្រោយពីបានសង្កេតបាតុភូតអែលនីញ៉ូ និងផលប៉ះពាល់លើដំណាំស្វាយចន្ទី ហើយចន្ទីចាប់ផ្តើមគាំងក្តឹបនិងខូចផ្កា និងការកកើតសត្វល្អិតបំផ្លាញច្រើន។

ចំណែកឯការនាំចេញគ្រាប់ស្វាយចន្ទីជាទូទៅក៏មានការរំពឹងថានឹងធ្លាក់ចុះផងដែរ ដោយសារសហគ្រាសក្នុងស្រុកចាប់ផ្តើមកើនឡើង និងប្រជែងទិញច្រើន ពីព្រោះកន្លងមកធនាគារមួយចំនួនរបស់រដ្ឋដូចជា SME Bank, ARDB Bank និងធនាគារមីក្រូហិរញ្ញវត្ថុ AMK បានជួយជ្រោមជ្រែងលើវិស័យស្វាយចន្ទី។ហើយធនាគារមួយចំនួនទៀតក៏ចាប់ផ្តើមចាប់អារម្មណ៍ដែរ ដែលជាការផ្តល់ទុនបង្វិលជូនដល់រោងចក្រកែច្នៃសម្រាប់បង្វិលទិញគ្រាប់ស្វាយឆៅ។

បើតាមលោក អួន ស៊ីឡុត «ការរំពឹងនៃការនាំចេញធ្លាក់ចុះនេះមិនមែនជាការបង្ហាញពីភាពអវិជ្ជមានទេ ផ្ទុយមកវិញជាការបង្ហាញពីភាពវិជ្ជមានច្រើន ដោយសារតែមានការងើបឡើងពីសហគ្រាសក្នុងស្រុក។អ្វីដែលវិជ្ជមាននោះមានន័យថាសហគ្រាសនៅក្នុងស្រុក មានការរីកដុះដាល ដោយសារតែគោលនយោបាយជាតិស្តីពីស្វាយចន្ទីរបស់រាជរដ្ឋាភិបាល ដែលផ្តល់អាទិភាពលើស្វាយចន្ទី ដូច្នេះហើយបានជាធនាគារមួយចំនួនធំបានផ្តល់កម្ចីក្នុងអត្រាការប្រាក់អនុគ្រោះទៅដល់សហគ្រាស»។

លោកបន្ថែមថា ការលក់ចេញគ្រាប់ស្វាយចន្ទីឆៅក៏ល្អ យើងកែច្នៃក៏ល្អដែរ អ្វីដែលសំខាន់ឱ្យតែមានទីផ្សារ ប៉ុន្តែអ្វីដែលល្អជាងនេះនោះគឺយើងអាចកែច្នៃក្នុងស្រុករបស់យើង ហើយយើងអាចផ្តល់តម្លៃបន្ថែមដល់កសិករ និងជួយបង្កើតការងារដល់ពលករនៅក្នុងសហគមន៍។

លោកគូសបញ្ជាក់ថា ការដែលមានរោងចក្រកែច្នៃច្រើននៅក្នុងស្រុក ជាការបន្ថែមតម្លៃដល់កសិករ និងបង្កើតការងារនៅក្នុងស្រុកផងដែរ។ការកែច្នៃក្នុងស្រុកជារឿងល្អ ជាជាងការនាំគ្រាប់ឆៅទៅក្រៅប្រទេស៕

The post លោក អួន ស៊ីឡុត៖ ការនាំចេញគ្រាប់ស្វាយចន្ទីឆ្នាំនេះនឹងធ្លាក់ចុះ ដោយសារសហគ្រាសកែច្នៃក្នុងស្រុកមានការកើនឡើង appeared first on .

ប្រធានសមាគមស្វាយចន្ទីកម្ពុជាលោក អួន ស៊ីឡុត បានឱ្យដឹងថារោងចក្រទំាង២ដែលត្រៀមកើតឡើងក្នុងទឹកដីខេត្តព្រះវិហារខាងមុខនេះ ជាការវិនិយោគរបស់ក្រុមហ៊ុន Santana និងក្រុមហ៊ុន Mirarth Agri Teach។ សម្រាប់ក្រុមហ៊ុន Santana មកដល់ឥឡូវនេះ បានចាប់ផ្តើមតម្លើងម៉ាស៊ីនគាបប្រេងស្វាយចន្ទី ហើយប្រេងដែលគាបបានក្រុមហ៊ុននឹងនាំចេញទៅប្រទេសចិន ចំណែកក្រុមហ៊ុន Mirarth Agri Teach បាននិងកំពុងចាប់ផ្តើមបុកគ្រឹះសាងសង់ ហើយនៅពេលដាក់ដំណើរឬគាបប្រេងបានក្រុមហ៊ុននឹងនាំចេញទៅប្រទេសជប៉ុន។

លោក លោក អួន ស៊ីឡុតលើកឡើងថា សំបកគ្រាប់ស្វាយចន្ទីក្នុងមួយតោនអាចលក់បានថ្លៃ១២០ដុល្លារ ហើយនៅក្នុង សំបក៣គីឡូនៃគ្រាប់ស្វាយចន្ទីM-23 អាចគាបបានប្រេង១គីឡូ។ ប្រេងដែលបានមកពីសំបកគ្រាប់ស្វាយចន្ទីនេះ អាចយកទៅប្រើជំនួសប្រេងម៉ាស៊ូត និងមានការបំភាយឧស្ម័នកាបូនិកតិចបំផុតនៅក្នុងបរិយាកាស ដែលធ្វើឱ្យបណ្តាប្រទេសនានានៅអឺរ៉ុបដែលស្រលាញ់បរិស្ថានគឺគេចង់បានប្រេងស្វាយចន្ទីប្រើជំនួសឱ្យប្រេងម៉ាស៊ូតដែលយកចេញពីក្នុងដី។

គួរបញ្ជាក់ផងដែរថាកាលពីថ្ងៃទី២៥ ខែធ្នូ ឆ្នាំ២០២៣កន្លងទៅ លោក សាសាគី កូជី នាយកប្រតិបត្តិនៃក្រុមហ៊ុន Mirarth Agri Teach Co., Ltd.បានបង្ហាញទៅលោកបណ្ឌិត អ៊ាង សុផល្លែត អំពីគម្រោងការវិនិយោគខ្នាតមធ្យមកន្លងមកដែលសម្រេចបានប្រមាណជាង១ពាន់តោន ហើយជាគម្រោងក្រុមហ៊ុននឹងពង្រីករោងចក្រកែច្នៃស្វាយចន្ទីដែលរួមមានគ្រាប់ស្វាយចន្ទី និងសម្បកស្វាយចន្ទីឱ្យទៅជាប្រេង ដោយប្រើប្រាស់ថាមពលស្អាត បន្ថែមទៀតនៅក្នុងខេត្តព្រះវិហារ តាមរយៈការនាំយកបច្ចេកវិទ្យាពីប្រទេសជប៉ុន សំដៅដល់ការផលិតឱ្យបានជាង ២ម៉ឺនតោនក្នុងមួយឆ្នាំៗ ។

លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ក៏បានស្វាគមន៍យ៉ាងកក់ក្តៅចំពោះក្រុមMirarth Agri Teach ក្នុងការវិនិយោគ ដែលបានផ្តល់ជាប្រយោជន៍ដល់ប្រជាសហគមន៍ ជាពិសេសការលើកកម្ពស់ជីវភាពសហគមន៍តាមរយៈការដាំដើមស្វាយចន្ទី ហើយដើមស្វាយចន្ទីនេះទៀតសោតអាចជួយបង្កើននូវគម្របព្រៃឈើ និងផលរបស់ស្វាយចន្ទីផ្តល់ជាប្រាក់ចំណូលឱ្យប្រជាសហគមន៍មានជីវភាពល្អប្រសើរ កាត់បន្ថយការចូលព្រៃរកអនុផលព្រៃឈើ ឬសម្លាប់សត្វ ម្យ៉ាងវិញទៀតដើមស្វាយចន្ទីក៏ជាប្រភេទដើមឈើដែលជួយស្រូបយកឧស្ម័នកាបូនិច និងផលិតជាអុកស៊ីសែនទៅក្នុងបរិយាកាសវិញ។ ការវិនិយោគដែលផ្តល់ប្រយោជន៍ផ្ទាល់ទៅសហគមន៍បែបនេះ គឺស្របតាមយុទ្ធសាស្រ្តគន្លឹះ យុទ្ធសាស្រ្តចក្រាវិស័យបរិស្ថាន ២០២៣-២០២៨ គឺផ្តោតលើ ភាពស្អាត ភាពបៃតង និងចីរភាព។ កិច្ចសហប្រតិបត្តិការនេះ បានឆ្លើយតបទៅនឹងមុំទី៥នៃយុទ្ធសាស្រ្តស្នូលទី៤ ដែលបានផ្តោតលើ ការបន្តកសាងភាពជាដៃគូប្រកបដោយបរិយាបន្ន និងស័ក្តិសិទ្ធភាពនៃកិច្ចសហប្រតិបត្តិការអភិវឌ្ឍន៍៕ តាកែវ

The post រោងចក្រគាបប្រេងស្វាយចន្ទីចំនួន២ នឹងផុសឡើងក្នុងខេត្តព្រះវិហារក្នុងពេលដ៏ខ្លីខាងមុខនេះ appeared first on .

លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា ក្នុងខែមករា ឆ្នាំ២០២៤នេះ ក្រុមហ៊ុនជប៉ុន MIRATH Agri Tech Co.,Ltd កំពុងបុកគ្រឹះដំឡើងរោងចក្រកែច្នៃគ្រាប់ស្វាយចន្ទីនៅស្រុកកំពង់ស្វាយ ខេត្តកំពង់ធំ។រោងចក្រនេះ មានសមត្ថភាពផលិត ២០តោនក្នុង១ថ្ងៃ ដែលជារោងចក្រធុនមធ្យម ដើម្បីបំពេញតម្រូវការទីផ្សារជប៉ុន។

លោកបន្តថា ក្រុមហ៊ុននេះនឹងបន្តបើករោងចក្រកែច្នៃចន្ទីបន្តទៀតនៅឆ្នាំបន្តបន្ទាប់ដែលអាចស្រូបទាញគ្រាប់ឆៅប្រមាណ ២៥ ០០០តោនក្នុង១ឆ្នាំ ព្រមទាំងបើករោងចក្រគៀបប្រេងពីសំបកចន្ទីផងដែរ។ចំពោះតម្លៃរោងចក្រមិនត្រូវបានក្រុមហ៊ុនបញ្ចេញឲ្យដឹងនៅឡើយទេ ប៉ុន្តែក្រុមហ៊ុនមេ MIRATh holding ជាក្រុមហ៊ុនធំមួយនៅប្រទេសជប៉ុន។

លោកបានបន្តទៀតថា ចំណែកឯរោងចក្រដែលសិក្សាជាបន្តបន្ទាប់ទៀតនោះគឺក្រុមហ៊ុនចិន ដែលកម្ពុជាក៏កំពុងតែទាក់ទាញ ហើយបើសិនជាទាក់ទាញបាន គេនឹងមកទាំងសុំណុំ មានន័យថាមកទាំងរោងចក្រកែច្នៃស្វាយចន្ទី រោងចក្រគាបប្រេងពីសំបកស្វាយចន្ទី និងរោងចក្រកែប្រែកាកសំណល់ចុងក្រោយរបស់ស្វាយចន្ទីទៅជាធ្យូងឧស្សាហកម្មសម្រាប់ការធ្វើចំហេះរោងចក្រឧស្សាហកម្ម។

បើតាមលោក អួន ស៊ីឡុត ទោះបីជាមានវត្តមានរោងចក្រខាងលើនេះក៏ដោយ ក៏មិនទាន់គ្រប់គ្រាន់អាចកែច្នៃបំពេញតម្រូវការជប៉ុនបាននៅឡើយទេ ដោយក្រុមហ៊ុននេះនឹងបន្តបើករោងចក្រកែច្នៃចន្ទីបន្ថែមទៀតនៅឆ្នាំបន្តបន្ទាប់ ពីព្រោះតម្រូវការជប៉ុនមួយឆ្នាំ ១ម៉ឺនតោនឯណោះ។

លោកគូសបញ្ជាក់ថា សព្វថ្ងៃនេះ យើងមានរោងចក្រធុនមធ្យមអាចផលិតបានត្រឹមតែចន្លោះពី៧ពាន់ តោន ទៅ១ម៉ឺន៤ពាន់តោននោះ មានតែ៤កន្លែងប៉ុណ្ណោះ ដូច្នេះកម្ពុជាត្រូវការរោងចក្រធុនមធ្យមយ៉ាងតិច៣០ទៀត ដើម្បីកម្ពុជាអាចឱ្យតម្លៃគ្រាប់ស្វាយចន្ទីរបស់កសិករមានស្ថេរភាព អាចផ្តល់តម្លៃបន្ថែមដល់កសិករ អាចបង្កើតការងារក្នុងសហគមន៍បានច្រើនទាំងការងារផ្ទាល់ និងប្រយោល។ប៉ុន្តែសព្វថ្ងៃនេះ យើងមានរោងចក្រ៣ហើយកំពុងដំណើរការ រួមមាននៅកំពង់ចាម ត្បូងឃ្មុំ និងព្រះវិហារ។ហើយលោកសង្ឃឹមថានឹងមានរោងចក្រធុនមធ្យម២ឬ៣ទៀត នឹងកើតឡើងនៅឆ្នាំ២០២៤នេះ៕

The post រោងចក្រកែច្នៃគ្រាប់ស្វាយចន្ទីជប៉ុនមានសមត្ថភាពផលិតបាន២០តោនក្នុងមួយថ្ងៃ កំពុងដំឡើងនៅកម្ពុជា appeared first on .