វគ្គបណ្តុះបណ្តាលនេះ រៀបចំឡើងក្នុងគោលបំណងផ្សព្វផ្សាយឱ្យកាន់តែទូលាយ និងជំរុញការប្រើប្រាស់នូវសេវាសាធារណៈតាមប្រព័ន្ធឌីជីថលនៅក្នុងវិស័យធានាគារនិងហិរញ្ញវត្ថុសំដៅលើកកម្ពស់ប្រសិទ្ធភាព តម្លាភាព និងភាពត្រឹមត្រូវក្នុងការធ្វើប្រតិបត្តិការផ្សងៗ ជាពិសេសរក្សាបាននូវជំនឿទុកចិត្តរបស់អតិថិជនក៏ដូចជាសាធារណៈមកលើវិស័យហិរញ្ញវត្ថុនៅកម្ពុជា។

ក្នុងឱកាសនោះ លោកជំទាវប្រធានក្រុមប្រឹក្សាភិបាលសមាគម ក៏បានចូលរួមថ្លែងសុន្ទរកថាស្វាគមន៍ព្រមទាំងបានលើកឡើងពីអត្ថប្រយោជន៍និងសារៈសំខាន់នៃការប្រើប្រាស់សេវាសាធារណៈតាមប្រព័ន្ធឌីជីថលរបស់ក្រសួង ដ.ន.ស នៅក្នុងវិស័យធនាគារ និងហិរញ្ញវត្ថុនៅកម្ពុជា ជាពិសេសក្នុងដំណើរការផ្ទៀងផ្ទាត់កម្មសិទ្ធិប្លង់ ព័ត៌មានសុរិយោដី ការផ្ទេរកម្មសិទ្ធិ ក៏ដូចជាការចុះបញ្ជីហ៊ីប៉ូតែក និងលក្ខខណ្ឌនីតិវិធីផ្សេងៗ។

លោកជំទាវបានមានប្រសាសន៍ថា តាមរយៈសេវាសាធារណៈតាមប្រព័ន្ធឌីជីថលរបស់ក្រសួង ដ.ន.ស រួមមាន សេវាសូរិយោដីនិងសំណង់តាមប្រពន្ធអេឡិចត្រូនិច សេវាហ៊ីប៉ូតែក និងបញ្ចាំ ក៏ដូចជាសេវាផ្សេងៗទៀត នឹងចូលរួមចំណែកកាត់បន្ថយពេលវេលាក្នុងការធ្វើប្រតិបត្តិការផ្សេងៗរបស់មន្ត្រីក្នុងវិស័យហិរញ្ញវត្ថុ ជាពិសេសពង្រឹងភាពត្រឹមត្រូវ ជំរុញប្រសិទ្ធភាពការងារ កាត់បន្ថយថ្លៃដើមនិងហានិភ័យក្នុងការផ្ទៀងផ្ទាត់ព័ត៌មានសុរិយោដីរបស់អតិថិជន ក៏ដូចជាចូលរួមលើកម្ពស់តម្លាភាពក្នុងការវាយតម្លៃហានិភ័យឥណទានក្នុងវិស័យធនាគារនិងហិរញ្ញវត្ថុ។

គួរបញ្ជាក់ដែរថា វគ្គបណ្តុះបណ្តាលនេះប្រព្រឹត្តិទៅក្រោមអធិបតីភាពរបស់ លោកជំទាវ សេង សុមេត្តា រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ និង លោកជំទាវ ឌិត នីតា ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា ព្រមទាំងមានការអញ្ជើញចូលរួមពីមន្ត្រីក្រសួង ថ្នាក់ដឹកនាំសមាគមទាំងពីរ និងតំណាងគ្រឹះស្ថានធនាគារនិងហិរញ្ញវត្ថុប្រមាណជាង ៣០០ នាក់ផងដែរ៕

The post សមាគមមីក្រូហិរញ្ញវត្ថុកម្ពុជា សហការជាមួយនឹង ក្រសួងរៀបចំដែនដី សមាគមធនាគារកម្ពុជា រៀបចំបើកវគ្គបណ្តុះបណ្តាល ស្តីពី  «ការប្រើប្រាស់សេវាសាធារណៈតាមប្រព័ន្ធឌីជីថល» appeared first on .

អ្នកជំនាញថ្លែងបែបនេះ នៅក្នុងកម្មវិធីបណ្ដុះបណ្ដាលអ្នកសារព័ត៌មាន និងអ្នកផលិតមាតិកា អំពីវិស័យធនាគារនិងហិរញ្ញវត្ថុ និងចំណេះដឹងផ្នែកហិរញ្ញវត្ថុ ឆ្នាំ២០២៥ កាលថ្ងៃទី១៥ ខែសីហា ឆ្នាំ ២០២៥។

នាឱកាសនោះ លោក​​ រ័ត្ន សោភ័ណ ប្រធានសមាគមធនាគារនៅកម្ពុជា បានលើកឡើងថា សារព័ត៌មានជាប្រភពមួយដែលចូលរួមផ្តល់នូវចំណេះដឹង និងព័ត៌មានផ្សេងៗ ដល់ប្រជាពលរដ្ឋ និងធុរជនដើម្បីជាធាតុចូលររបស់ពួកគាត់ក្នុងការសម្រេចចិត្តក្នុងជីវភាពរស់នៅប្រចាំថ្ងៃទាំងការងារ និងការប្រកបរបរទទួលទាន ព្រមទាំងការធ្វើធុរកិច្ច។

ទន្ទឹមនេះ លោកថា តួនាទីរបស់សារព័ត៌មានក្នុងវិស័យហិរញ្ញវត្ថុវិញ គឺរឹតតែមានសារៈសំខាន់មិនអាចកាត់ផ្តាច់បាន ពីព្រោះសារព័ត៌មានជាបណ្តាញដ៏សំខាន់សម្រាប់វិស័យហិរញ្ញវត្ថុក្នុងការបញ្ជូនព័ត៌មានទាក់ទងនឹងការអប់រំ និងការផ្សព្វផ្សាយអំពីវិស័យហិរញ្ញវត្ថុឱ្យកាន់តែទូលំទូលាយដល់ប្រជាពលរដ្ឋនៅទូទាំងប្រទេស ក្នុងគោលដៅធានា​​ឱ្យបាននូវស្ថិរភាព និរន្តរភាព និងទំនុកចិត្តពីសំណាក់បងប្អូនប្រជាពលរដ្ឋលើវិស័យធនាគារ និងហិរញ្ញវត្ថុទាំងមូល។

បន្ថែមពីនេះ លោកថា អ្នកសារព័ត៌មាន និងអ្នកផលិតមាតិកាតាមបណ្តាញសង្គម មានតួនាទីសំខាន់ណាស់ក្នុងការបង្កើតមាតិកា និងបញ្ជូនសារទាក់ទងនឹងវិស័យធនាគារ និងហិរញ្ញវត្ថុ ដែលត្រឹមត្រូវ ច្បាស់លាស់ មានការទុកចិត្ត និងអាចជួយលុបបំបាត់ព័ត៌មានក្លែងក្លាយ ឬព័ត៌មានមិនត្រឹមត្រូវ។ តាមរយៈវគ្គបណ្តុះបណ្តាលនេះ នឹងចូលរួមចំណែកបង្កើនការយល់ដឹងបន្ថែមទៀតរបស់បងប្អូនអ្នកសារព័ត៌មានពីវិស័យធនាគារ និងហិរញ្ញវត្ថុ ដែលអាចជួយឱ្យបងប្អូនអ្នកសារព័ត៌មានអាចផលិតមាតិកាអំពីវិស័យហិរញ្ញវត្ថុកាន់តែមានគុណភាព និងផ្តល់ការអប់រំ ដើម្បីជាឧត្តមប្រយោជន៍ដល់ប្រជាពលរដ្ឋនិងសាធារណជន។

ជាមួយគ្នានេះ លោក សុខ វឿន អនុប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា បានសារព័ត៌មាន ពិតជាមានតួនាទីយ៉ាងសំខាន់ក្នុងដំណើរជីវិតរស់នៅប្រចាំថ្ងៃរបស់យើង។ ដូច្នេះ ដើម្បីឱ្យចំណេះដឹងផ្នែកហិរញ្ញវត្ថុ និងព័ត៌មានអំពីវិស័យធនាគារ និងហិរញ្ញវត្ថុបានជ្រួតជ្រាបទៅដល់សាធារណជនប្រកបដោយភាពត្រឹមត្រូវ ច្បាស់លាស់ និងអាចទុកចិត្តបាន ចាំបាច់ណាស់យើងត្រូវការអ្នកផ្សព្វផ្សាយចំណេះដឹងដែលមានគុណភាព និងយល់ពីវិស័យរបស់យើង ពោលនោះគឺអ្នកសារព័ត៌មាន។

សូមជម្រាបដែរថា រយៈពេលជាង ២ទសវត្សចុងក្រោយនេះ វិស័យធនាគារ និងហិរញ្ញវត្ថុបានរីកចម្រើនគួរឱ្យកត់សម្គាល់ ដោយបានចូលរួមចំណែកជំរុញកំណើនសេដ្ឋកិច្ចជាតិ ជួយកាត់បន្ថយភាពក្រីក្រ លើកកម្ពស់ជីវភាពរស់នៅរបស់ប្រជាជនពលរដ្ឋ និងជំរុញកំណើនបរិយាបន្នហិរញ្ញវត្ថុនៅទូទាំងប្រទេស។ជាក់ស្តែង គិតត្រឹមដំណាច់ឆមាសទីមួយ ពោលចាប់ពីខែមករា-មិថុនា ឆ្នាំ២០២៥នេះ ទ្រព្យសកម្មរបស់គ្រឹះស្ថានធនាគារ និងហិរញ្ញវត្ថុ មានជាង ៩៧ប៊ីលានដុល្លារអាមេរិក កើនដល់៧%។ នេះបើយោងតាមរបាយការណ៍សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា កាលថ្ងៃទី១ ខែសីហា ឆ្នាំ ២០២៥៕ អត្ថបទ៖ ពិសី

The post អ្នកជំនាញ៖ តួនាទីរបស់សារព័ត៌មានក្នុងវិស័យហិរញ្ញវត្ថុ គឺមានសារៈសំខាន់មិនអាចកាត់ផ្តាច់បាន appeared first on .

នេះបើយោងតាមតាម  លោក ឌិត សុចល តំណាងសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ថ្លែងក្នុងកម្មវិធីបណ្តុះបណ្តាលអ្នកសារព័ត៌មាន និងអ្នកផលិតមាតិកា អំពីវិស័យធនាគារនិងហិរញ្ញវត្ថុ និងចំណេះដឹងផ្នែកហិរញ្ញវត្ថុ ឆ្នាំ ២០២៥ នាថ្ងៃទី១ ខែសីហា ឆ្នាំ ២០២៥។

នាឱកាសនោះ លោកថា រយៈពេលជាង ២ទសវត្សចុងក្រោយនេះ វិស័យធនាគារ និងហិរញ្ញវត្ថុបានរីកចម្រើនគួរឱ្យកត់សម្គាល់ ដោយបានចូលរួមចំណែកជំរុញកំណើនសេដ្ឋកិច្ចជាតិ ជួយកាត់បន្ថយភាពក្រីក្រ លើកកម្ពស ជីវភាពរស់នៅរបស់ប្រជាជនពលរដ្ឋ និងជំរុញកំណើនបរិយាបន្នហិរញ្ញវត្ថុនៅទូទាំងប្រទេស។

ជាក់ស្តែង លោកបានបញ្ជាក់ថា គិតត្រឹម ដំណាច់ឆមាសទីមួយឆ្នាំ២០២៥នេះ ទ្រព្យសកម្មរបស់គ្រឹះស្ថានធនាគារ និងហិរញ្ញវត្ថុ មានកំណើន ៧% ដល់ជាង ៩៧ប៊ីលានដុល្លារអាមេរិក។ ក្នុងនោះ ឥណទានអតិថិជនកើនឡើង ៤,៥% ដល់ជាង ៦២ ប៊ីលានដុល្លារអាមេរិក។ ប្រាក់បញ្ញើអតិថិជនមានកំណើនជាង ១៤% ដល់ប្រមាណជាង ៦១,៤ប៊ីលាន ដុល្លារអាមេរិក និងដើមទុនមានកំណើន ៥.៥% ដល់ ១០.៤ប៊ីលានដុល្លារអាមេរិក បើប្រៀបធៀបហ្នឹង ដំណាច់ឆមាសទីមួយឆ្នាំ២០២៤។

ស្របតាមយុទ្ធសាស្ត្របរិយាបន្នហិរញ្ញវត្ថុជាតិ គ្រឹះស្ថានធនាគារ និងហិរញ្ញវត្ថុ បានបន្តចូលរួមជំរុញ និងលើកកម្ពស់បរិយាបន្នហិរញ្ញវត្ថុ តាមរយៈការផ្តល់សេវាហិរញ្ញវត្ថុកាន់តែមានប្រសិទ្ធភាព រហ័ស និង ទូលំទូលាយជាងមុន។ ជាលទ្ធផល បានឆ្លុះបញ្ចាំងតាមរយៈកំណើនចំនួនគណនីប្រាក់បញ្ញើអតិថិជនដល់ ប្រមាណ២៧,៥លានគណនី និងគណនីឥណទានអតិថិជនដល់ ប្រមាណ៤,៣លានគណនី។

សូមជម្រាបដែរថា គិតត្រឹម ដំណាច់ខែមិថុនា ឆ្នាំ២០២៥នេះ សមាគមទាំងពីរមានសមាជិកសរុបចំនួន ២០៩គ្រឹះស្ថានដែលទទួល បានអាជ្ញាប័ណ្ណដំណើការអាជីវកម្មពីធនាគារជាតិនៃកម្ពុជា។

គ្រឹះស្ថានសមាជិករបស់សមាគមធនាគារនៅ កម្ពុជាមានចំនួន ៧៧ ក្នុងនោះរួមធនាគារពាណិជ្ជ ៦០ ធនាគារឯកទេស ៨ តំណាងការិយាល័យធនាគារ បរទេស ៥ និងសមាជិក៤ទៀតរួមមាន៖ សមាគមសហព័ន្ធហិរញ្ញវត្ថុ និងបច្ចេកវិទ្យានៃកម្ពុជា សមាគមមីក្រូ ហិរញ្ញវត្ថុកម្ពុជា គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ និងសាជីវកម្មធានាឥណទានកម្ពុជា។

ដោយ ឡែកសមាជិក សមាគមមីក្រូហិរញ្ញវត្ថុកម្ពុជាមានចំនួន ១៣២ ដែលរួមមានគ្រឹះស្ថានមីក្រូហិរញ្ញវត្ថុទទួល ប្រាក់បញ្ញើ ៤ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ ៨២ គ្រឹះស្ថានភតិសន្យាហិរញ្ញវត្ថុ ១២ គ្រឹះស្ថានឥណទានជនបទ ៣២ និងធនាគារពាណិជ្ជចំនួន២។ គ្រឹះស្ថានធនាគារ និងហិរញ្ញវត្ថុជាសមាជិក ទាំងអស់មានបុគ្គលិកបម្រើការសរុប ប្រមាណជាង ៨ម៉ឺននាក់នៅទូទាំងប្រទេស ហើយបានផ្តល់ជូនអតិថិជននូវសេវាហិរញ្ញវត្ថុច្រើនប្រភេទ ដែលសេវាចំបងៗរួមមាន៖ សេវាប្រាក់សន្សំ (បញ្ញើ) សេវាកម្ចី(ឥណ ទាន) និងសេវាទូទាត់។ អតិថិជនទាំងអស់ទទួលបានសេវាទាំងនេះ តាមរយៈបណ្តាញសំខាន់ៗដូចជា៖ បណ្តាញសាខាទូទាំងប្រទេសដែលមានចំនួន២.៧៥៨ទីតាំង ប្រព័ន្ធឌីជីថល (Mobile App) IATM (ម៉ាស៊ីនដកនិងដាក់ប្រាក់ស្វ័យប្រវត្តិ) ដែលមានចំនួនរហូតដល់៥.៨៩៩ម៉ាស៊ីន និងប្រព័ន្ធម៉ាស៊ីន POS និងKHQR ជាដើម៕ ​អត្ថបទ៖ ពិសី

The post ៦ខែ ឆ្នាំនេះ៖ ទ្រព្យសកម្មរបស់គ្រឹះស្ថានធនាគារ និងហិរញ្ញវត្ថុនៅកម្ពុជា មានជាង៩៧ប៊ីលានដុល្លារ កើន៧% appeared first on .

លោកស្រី ជា សិរី ទេសាភិបាលធនាគារជាតិនៃកម្ពុជា បានលើកឡើងថា កិច្ចប្រជុំពិភាក្សានេះ ត្រូវបានរៀបចំឡើងដើម្បីស្វែងយល់ពីសុខភាពប្រព័ន្ធធនាគារ និងប្រមូលធាតុចូលសំខាន់ៗពីភាគីពាក់ព័ន្ធ ក្នុងការរៀបចំយន្តការដោះស្រាយបញ្ហាប្រឈម ដើម្បីរក្សាស្ថិរភាពហិរញ្ញវត្ថុ និងចូលរួមគាំទ្រដល់យុទ្ធសាស្រ្ត និងការអនុវត្តគោលនយោបាយរបស់រាជរដ្ឋាភិបាល។

ជុំវិញសុខភាពគ្រឹះហិរញ្ញវត្ថុនេះដែរ លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា (CMA) បានលើកឡើងថា ក្រោយស្ថានភាពនៃវិបត្តិជំងឺកូវីដ-១៩ ស្របពេលភាពមិនទាន់ច្បាស់លាស់ទាំងក្នុង និងក្រៅប្រទេស ជាលទ្ធិផល កំណើនឥណទាន នៅក្នុងវិស័យក្រូហិរញ្ញវត្ថុនៅកម្ពុជា មិនសូវមានការកើនឡើងខ្លាំងនោះឡើយ ខណៈប្រាក់បញ្ញើនិងសេវាប្រាក់សន្សំ មានការកើនឡើងគួរកត់សម្គាល់ សម្រាប់អាចមានដើមទុនច្រើន សម្រាប់ចាក់សាច់ប្រាក់ចូលទៅក្នុងទីផ្សារ។ លោកបានបន្ថែមថា តែទោះបីយ៉ាងណា នៅក្នុងត្រីមាសទី១ ឆ្នាំ២០២៥ នេះ ឥណទានដែលផ្តល់ដោយគ្រឹះស្ថានមីក្រូហិរញ្ញវត្ថុ បានងើបឡើងគួរកត់សម្គាល់ ក្នុងនោះ ចំនួនអតិថិជនក៏បានមានកំណើនកើនឡើងខ្លាំងផងដែរ។

លោក កាំង តុងងី បានបញ្ជាក់ថា ជុំវិញឥណទាននេះ អ្វីដែលជាទីចាប់អារម្មណ៍ខ្លាំង នៅក្នុងត្រីមាសទី១នេះ ឆ្នាំ២០២៥ គ្រឹះស្ថានមីក្រូ ហិរញ្ញវត្ថុ ទទួលបានប្រាក់បញ្ញើររបស់ប្រជាពលរដ្ឋ មានការកើនឡើងខ្លាំង ក្នុងរង្វង់ប្រមាណ ៩,៦ ភាគរយ បើធៀបត្រីមាសទី១ និង ត្រីមាសទី៤ ឆ្នាំ២០២៤ គឺបានកើនឡើងដល់ប្រមាណ ២ ៧៨៨ លានដុល្លារអាមេរិកនៅក្នុងចំណោមគ្រឹះស្ថានចំនួន ៤ ប៉ុណ្ណោះ ដែលមានអាជ្ញាបណ្ណទទួលប្រាក់បញ្ញើ៕

The post ស្ថាប័នហិរញ្ញវត្ថុ ជួបជុំគ្នាប្រមូលធាតុចូលសំខាន់ៗ រៀបចំយន្តការដោះស្រាយបញ្ហាប្រឈម រក្សាស្ថិរភាពហិរញ្ញវត្ថុ appeared first on .

យោងតាមសេចក្តីជូនដំណឹងរបស់សមាគមមីក្រូហិរញ្ញវត្ថុកម្ពុជា នៅថ្ងៃទី៥ ខែកុម្ភៈនេះថា ចាប់តាំងពីឆ្នាំ២០២៤ ធនាគារជាតិនៃកម្ពុជា (NBC) និងអង្គការសហប្រជាជាតិ (UN) បានដឹកនាំការពិគ្រោះយោបល់ដ៏សំខាន់មួយ ដើម្បីដោះស្រាយបញ្ហា ប្រឈមសំខាន់ៗក្នុងវិស័យមីក្រូហិរញ្ញវត្ថុនៅកម្ពុជា ដូចជាបញ្ហាបំណុលច្រើនលើសលុប ហានិភ័យហិរញ្ញវត្ថុពាក់ព័ន្ធនឹងដីធ្លី និងកិច្ចការពារអតិថិជន។ បច្ចុប្បន្នគំនិតនេះ ស្ថិតក្នុងដំណាក់កាលកំពុងអនុវត្តយ៉ាងសកម្ម ដោយមានការចូលរួមពីភាគីពាក់ព័ន្ធជាង ១០០ ស្ថាប័ន មកពីផ្នែករាជរដ្ឋាភិបាល អង្គការសង្គមស៊ីវិល គ្រឹះស្ថានហិរញ្ញវត្ថុ និងដៃគូអភិវឌ្ឍន៍ ដើម្បីពង្រឹងប្រតិបត្តិ ការផ្តល់ប្រាក់កម្ចី និងធានានូវនិរន្តរភាពយូរអង្វែងរបស់វិស័យ។

លោកស្រី ឌិត នីតា ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា បានមានប្រសាសន៍ ថា៖ «សមាគមមីក្រូហិរញ្ញវត្ថុកម្ពុជាប្តេជ្ញាធ្វើការជិតស្និតជាមួយដៃគូរបស់យើងដើម្បីធានាឱ្យបានថា វិស័យមីក្រូហិរញ្ញវត្ថុនៅកម្ពុជា នឹងនៅតែបន្តផ្តល់សេវាដល់ពលរដ្ឋដែលមានតម្រូវការ។ យើងបានដឹងនូវបញ្ហាប្រឈមដែលអ្នកខ្ចីប្រាក់កំពុងជួបប្រទះ ហើយយើងកំពុងខិតខំប្រឹងប្រែងយ៉ាងសកម្ម ដើម្បីកែលម្អ ប្រតិបត្តិការផ្តល់ឥណទាន និងពង្រឹងកិច្ចគាំពារអតិថិជន។ កិច្ចខិតខំប្រឹងប្រែងរបស់យើង មានគោលបំណងលើកកម្ពស់អតិថិជនឱ្យអាចមានលទ្ធភាពធ្វើការសម្រេចចិត្តប្រកបដោយ ការទទួលបានព័ត៌មានច្បាស់លាស់ និងការការពារសិទ្ធិរបស់ពួកគាត់»។

លើសពីនេះ សមាគមមីក្រូហិរញ្ញវត្ថុកម្ពុជាកំពុងធ្វើកិច្ចការសំខាន់ៗមួយចំនួន រួមទាំងការពង្រឹងស្តង់ដារប្រតិបត្តិ ការឥណទានផងដែរ។ ក្នុងកិច្ចសហការជាមួយធនាគារជាតិនៃកម្ពុជា និងអង្គការសហប្រជាជាតិ សមាគមកំពុងគាំទ្រដល់ការធ្វើកំណែទម្រង់នានា ដើម្បីធានាថាការផ្តល់ឥណទានត្រូវបានធ្វើឡើង ដោយផ្អែកលើសមត្ថភាពសងត្រលប់របស់អតិថិជន ជាជាងការពឹងផ្អែកតែលើទ្រព្យធានា។ វិធានការដ៏សំខាន់មួយទៀត គឺការហាមឃាត់ ការប្រើប្រាស់ដីសហគមន៍របស់ជនជាតិដើម (ICLTs) មកធ្វើជាទ្រព្យធានា ដែលនឹងជួយការពារសហគមន៍ងាយរងគ្រោះពីហានិភ័យនៃការបាត់បង់ដីធ្លី។ លើសពីនេះទៀត សមាគមមីក្រូហិរញ្ញវត្ថុកម្ពុជាកំពុងគាំទ្រការបង្កើតមជ្ឈមណ្ឌលអតិថិជនក្នុងវិស័យហិរញ្ញវត្ថុ (FCC) ដែលស្ថិតក្រោមសមាគមធនាគារនៅកម្ពុជា (ABC)។ មជ្ឈមណ្ឌលនេះ ផ្តល់សេវាដោះស្រាយបណ្តឹងអតិថិជនក្នុងវិស័យហិរញ្ញវត្ថុ និងពង្រឹងកិច្ចការពារអតិថិជន។ សមាគមក៏កំពុងពង្រឹងកម្មវិធីអប់រំចំណេះដឹងហិរញ្ញវត្ថុផងដែរ ដោយផ្តោតលើស្ត្រី និងសហគមន៍ជនបទ តាមរយៈគម្រោងសុវត្ថិភាពហិរញ្ញវត្ថុនៅសហគមន៍ ដើម្បីជួយអតិថិជនក្នុងវិស័យហិរញ្ញវត្ថុឱ្យធ្វើការសម្រេចចិត្តផ្នែកហិរញ្ញវត្ថុ ប្រកបដោយការយល់ដឹងច្បាស់លាស់ ព្រមទាំងកាត់បន្ថយហានិភ័យនៃ ការជំពាក់បំណុលច្រើនលើសលុប។

លោកស្រី បានបន្ថែមថា៖ «តាមរយៈកិច្ចសហការជាមួយដៃគូ យើងកំពុងប្រឹងប្រែង កសាងវិស័យហិរញ្ញវត្ថុប្រកបដោយបរិយាបន្ន និងផ្តល់ ឱកាស ជូនប្រជាពលរដ្ឋដែលងាយរងគ្រោះ បំផុតនៅកម្ពុជា។ គោលដៅរបស់យើង គឺផ្តល់ជូនអតិថិជននូវសេវា និងផលិតផលហិរញ្ញវត្ថុផ្លូវការ ដែលមានភាពចាំបាច់តាមតម្រូវការ ដើម្បីពួកគាត់ទទួលបានភាពជោគជ័យផ្នែកហិរញ្ញវត្ថុ និង ការពារពួកគាត់ពីហានិភ័យហិរញ្ញវត្ថុ»។ កិច្ចខិតខំប្រឹងប្រែងទាំងនេះ ស្របគ្នាទៅនឹងគោលដៅអភិវឌ្ឍន៍ប្រកបដោយនិរន្តរភាព (SDGs) របស់អង្គការសហប្រជាជាតិ ជាពិសេសក្នុងការកាត់បន្ថយភាពក្រីក្រ សមភាពយេនឌ័រ និងបរិយាបន្នហិរញ្ញវត្ថុ ដោយធានាថា វិស័យមីក្រូហិរញ្ញវត្ថុកម្ពុជា នៅតែជាចលករដ៏សំខាន់ សម្រាប់ជំរុញកំណើនសេដ្ឋកិច្ច និងបង្កើតឱកាសអាជីវកម្ម៕

The post CMA សហការជាមួយដៃគូជាតិ និងអន្តរជាតិ ការពារអតិថិជន និងពង្រឹងប្រតិបត្តិការផ្តល់ប្រាក់កម្ចី appeared first on .

យោងតាមសេចក្តីប្រកាសព័ត៌មានរួមនៅថ្ងៃទី២៤ខែមករាឆ្នាំ២០២៥នេះ បានឱ្យដឹងថាភាពជាដៃគូជាផ្លូវការនេះត្រូវបានប្រកាស នៅក្នុងសន្និបាតប្រចាំឆ្នាំរបស់ CGCC ស្តីពី «ការធ្វើនវានុវត្តន៍យន្តការធានាឥណទាន ដើម្បីគាំទ្រហិរញ្ញប្បទានបៃតង» ក្រោមអធិបតីភាព ឯកឧត្តម រស់ សីលវ៉ា រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល CGCC ។ ភាពជាដៃគូយុទ្ធសាស្ត្រនេះមានគោលបំណងជំរុញដល់ការអភិវឌ្ឍគ្រឹះស្ថានធនាគារ និងហិរញ្ញវត្ថុនិងគាំទ្រសហគ្រាសធុនមីក្រូ ខ្នាតតូច និងមធ្យម តាមរយៈការអភិវឌ្ឍសមត្ថភាព សេវាហិរញ្ញវត្ថុឌីជីថល និងការលើកកម្ពស់ចំណេះដឹងផ្នែកហិរញ្ញវត្ថុ។

តាមរយៈអនុស្សរណៈនៃការយោគយល់គ្នានេះ CMA និង CGCC នឹងធ្វើការរួមគ្នា ដើម្បីពង្រឹង និងអភិវឌ្ឍសមត្ថភាព MSMEs, BFIs និងភាគីពាក់ព័ន្ធនានា ដោយ រៀបចំវគ្គបណ្តុះបណ្តាល សិក្ខាសាលា និងធ្វើការសិក្សាស្រាវជ្រាវនានា ក្នុងគោលដៅលើកកំពស់ចំណេះដឹងផ្នែកហិរញ្ញវត្ថុ ជម្រុញសេវាហិញ្ញវត្ថុឌីជីថល និងការគាំទ្រគំនិតផ្តួចផ្តើមវិស័យបៃតងនៅកម្ពុជា ។ ស្ថាប័នទាំងពីរប្តេជ្ញាចិត្ត ក្នុងការប្រើធនធានដែលខ្លួនមានដើម្បីធានាឱ្យបាននូវការអនុវត្តប្រកបដោយជោគជ័យនូវគំនិតផ្តួចផ្តើមផ្សេងៗក្នុងគោលបំណងជំរុញការរួមចំណែករបស់វិស័យហិរញ្ញវត្ថុដល់ការអភិវឌ្ឍសេដ្ឋកិច្ចរបស’ប្រទេសកម្ពុជា។

ឧកញ៉ា ហួត អៀងតុង តំណាង សមាគមមីក្រូហិរញ្ញវត្ថុកម្ពុជាបានមានប្រសាសន៍ថា «កិច្ចសហប្រតិបត្តិការនេះ  គឺជាជំហ៊ានដ៏សំខាន់មួយក្នុងការលើកកម្ពស់បរិយាបន្នហិរញ្ញវត្ថុនៅកម្ពុជា។ តាមរយៈការរួមបញ្ចូលគ្នាទាំងធនធាន និងជំនាញ យើងអាចបង្កើតនូវប្រព័ន្ធហិរញ្ញវត្ថុដ៏រឹងមាំ ដែលគាំទ្រការលូតលាស់នៃអាជីវកម្មធុនមីក្រូ តូច និងមធ្យម ព្រមទាំងចូលរួមក្នុងការអភិវឌ្ឍនៅប្រទេសកម្ពុជាប្រកបដោយនិរន្តរភាព»។

លោក ណូ លីដា អគ្គនាយក CGCC បានមានប្រសាសន៍ថា «CGCC មានសេចក្តីសោមនស្សក្នុងការសហការជាមួយ CMA ដើម្បីពង្រឹងចំណេះដឹងផ្នែកហិរញ្ញវត្ថុ និងផ្តល់លទ្ធភាពទទួលបានសេវាហិរញ្ញវត្ថុកាន់តែប្រសើរឡើង។ CGCC និង CMA ក៏ដូចជាសមាជិករបស់ CMA នឹងមានឱកាសជាច្រើន ក្នុងការប្រើប្រាស់ការធានាឥណទាន ដើម្បីបង្កើនការផ្តល់ប្រាក់កម្ចីចាំបាច់ដល់អាជីវកម្ម ដែលមិនមានលទ្ធភាពទទួលបានសេវាហិរញ្ញវត្ថុនៅទូទាំងប្រទេស។ អនុស្សរណៈនៃការយោគយល់គ្នានេះ គឺជាសក្ខីភាពមួយ ចំពោះការប្តេជ្ញាចិត្តរួមគ្នារបស់យើងក្នុងការជំរុញកំណើនសេដ្ឋកិច្ច និងនិរន្តរភាពនៅកម្ពុជា»។

អនុស្សរណៈនៃការយោគយល់គ្នានេះនឹងមានប្រសិទ្ធភាពរយៈពេលបីឆ្នាំ គិតចាប់ពីថ្ងៃចុះហត្ថលេខានេះតទៅ ហើយអនុស្សរណៈនេះមានចែងអំពីក្របខ័ណ្ឌសម្រាប់កិច្ចសហប្រតិបត្តិការទៅវិញទៅមកក្នុងការសម្រេចបានគោលបំណងរួមគ្នា។ ភាគីទាំងពីរប្តេជ្ញាធានានូវភាពសម្ងាត់នៃព័ត៌មានដែលបានចែករំលែក និងការអនុវត្តប្រកបដោយជោគជ័យនូវគំនិតផ្តួចផ្តើមដែលបានព្រមព្រៀងគ្នា។SL

The post CMA និង CGCC បង្កើតភាពជាដៃគូយុទ្ធសាស្ត្រ ដើម្បីពង្រឹងបរិយាបន្នហិរញ្ញវត្ថុនៅកម្ពុជា appeared first on .

នេះជាថ្លែងឱ្យដឹងរបស់លោកស្រី ឌិត នីតា ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជាក្នុងសន្និសីទមីក្រូហិរញ្ញវត្ថុប្រចាំឆ្នាំ២០២៤ ស្តីពីនិរន្តរភាពនិងបរិយាបន្នមីក្រូហិរញ្ញវត្ថុនៅមជ្ឈមណ្ឌលសន្និបាត និង សណ្ឋាគារ សុខា ខេត្តសៀមរាប នៅថ្ងៃទី៤ ខែវិច្ឆិកា ឆ្នាំ២០២៤។

លោកស្រី បានមានប្រសាសន៍ទៀតថា៖ គ្រឹះស្ថានទទួលប្រាក់បញ្ញើទាំង៤របស់សមាគម មានប្រាក់បញ្ញើសរុបប្រមាណ ២.២ប៊ីលានដុល្លាអាមេរិក (កំណើន ៤,៨%) និងមានអ្នកដាក់ប្រាកបញ្ញើរសរុបប្រមាណ ២លាននាក់ ក្នុងនោះ៦៧%ជាស្រ្តី។

លោកស្រី បានគូសបញ្ជាក់ថា៖«ភាពរីកចម្រើននេះបានបង្ហាញពីតួនាទីរបស់សមាជិកសមាគម ដែលជាវិស័យទាំងមូល ក្នុងការលើកម្ពស់សេដ្ឋកិច្ចគ្រួសាររបស់ប្រជាជនកម្ពុជា ប៉ុន្តែភាពរីកចម្រើននេះក៍នាំមកផងដែរនូវបញ្ហាប្រឈម និងឧិកាសជាបន្តបន្ទាប់»។

លោកស្រីបានលើកឡើងថា៖ សម្រាប់បញ្ហាប្រឈម វិស័យមីក្រូហិរញ្ញវត្ថុហាក់កំពុងរងសំពាធនៃបរិយាកាសសេដ្ឋកិច្ចពិភពលោកមិនអំណោយផល ដែលបង្កផលប៉ះពាល់មកលើសេដ្ឋកិច្ចកម្ពុជា និងប៉ះពាល់ដល់ប្រាក់ចំណូលរបស់ពលរដ្ឋ ដែលជាអតិថិជនរបស់គ្រឹះស្ថានមីក្រូហិរញ្ញវត្ថុ។

យោងតាមរបាយការណ៏របស់សមាគម ក្នុងត្រីមាសទី៣ ឆ្នាំ២០២៤ យើងឃើញថា ឥណទានប្រឈមហានិភ័យលើសពី៣០ថ្ងៃ (PAR 30+) ក្នុងវិស័យមីក្រូហិរញ្ញវត្ថុ បានកើនឡើងពី ៥,៩% ដល់ ៨,៧%, ការរៀបចំឥណទានឡើងវិញកើនឡើងពី ២,០% ដល់ ៣,៨%, កម្ចីដែលលុបចោលកើនឡើងពី ០,៨% ដល់ ១,២% ធៀបនឹងត្រីមាសទី៤ឆ្នាំ២០២៣។ ក្រៅពីនេះ ផលប័ត្រឥណទានមានកំណើនត្រឹម១%ប៉ុណ្ណោះ ដោយមានកំណើនពី ៥១០៣លានដុល្លារ មកដល់ ៥១៥៣លានដុល្លារ។

បញ្ហាប្រឈមនេះនឹងបង្កើតជាភាពតានតឹងផ្នែកហិរញ្ញវត្ថុសម្រាប់ប្រជាជនក្នុងសហគមន៍ និងគ្រឹះស្ថានហិរញ្ញវត្ថុផងដែរ ប្រសិនបើមិនមានដំណោះស្រាយ ឬការគ្រប់គ្រងប្រកបដោយភាពប្រុងប្រយ័ត្ន។ គួរំលឹកផងដែរថានាពេលកន្លងមក រាជរដ្ឋាភិបាលកម្ពុជា និងធនាគាជាតិនៃកម្ពុជាបានផ្តល់ការលើកទឹកចិត្តនិងសម្រួលផ្នែកបទបញ្ញាត្តិផ្សេងៗ ដើម្បីគ្រឹះស្ថានផ្តល់នូវការរៀបចំឥណទានទ្បើងវិញជូនអតិថជនដែលមានបញ្ហាផ្នែកហិរញ្ញវត្ថុ។

ទន្ទឹមនឹងការសម្រួលខ្លះៗនូវបទបញ្ញាត្តិ តម្រូវការនៃការធ្វើប្រតិបត្តការ ប្រកបដោយ តម្លាភាព គណនេយ្យភាព កិច្ចការពារអតិថិជន និងទំនួលខុសត្រូវ ក៍កំពុងមានការកើនឡើងកាន់តែខ្លាំង។ សមាគមមីក្រូហិរញ្ញវត្ថុកម្ពុជា បាននិងកំពុងធ្វើការយ៉ាងជិតស្និទ្ធជាមួយធនាគាជាតិកម្ពុជា គ្រឹះស្ថានជាសមាជិក និងភាគីដែលពាក់ព័ន្ធដើម្បីដោះស្រាយនូវបញ្ហាប្រឈមទាំងនេះ សំដៅរក្សានូវនិរន្ដរភាពនៃកំណើនក្នុងវិស័យ ប្រកបដោយតម្លាភាព ទំនួលខុសត្រូវ និងបរិយាបន្ន។

សម្រាប់ផ្នែកឌីជីថល ប្រជាជនកម្ពុជា កំពុងចាប់យកបទពិសោធថ្មីនៃការប្រើប្រាស់ឌីជីថល តាមរយៈស្មាតហ្វូន ដែលមានអត្រានៃការប្រើប្រាស់រហូតដល់ ១១៧%។ ការងាកមកប្រើប្រាស់ឌីជីថលនេះបានបើកច្រកថ្មីសម្រាប់សេវាធនាគាចល័ត (Mobile banking) និង បច្ចេកវិទ្យាហិរញ្ញវត្ថុ(Fintec)ដែលធ្វើឲ្យមានភាពងាយស្រួល មានប្រសិទ្ធភាព និងកាន់តែខិតទៅជិតអតិថិជន។

ចំណុចដែលគួរឱ្យកត់សម្គាល់មួយនៅក្នុងការវិវត្តន៍ផ្នែឌីជីថលរបស់ប្រទេសកម្ពុជា គឺប្រព័ន្ធទូទាត់ប្រាក់បាគង ដែលបង្កើតឡើងដោយធនាគារជាតិនៃកម្ពុជា(NBC)។ ប្រព័ន្ធទូទាត់ប្រាក់បាគង ត្រូវបានដាក់ឱ្យប្រើប្រាស់ក្នុងឆ្នាំ២០២០ គឺជាប្រព័ន្ធមួយដែលមានមូលដ្ឋានគ្រឹះលើបច្ចេកវិទ្យា blockchain សម្រាប់ការទូទាត់ប្រាក់នានាតាមរយៈទូរស័ព្ទ និងការផ្ទេរប្រាក់ ដែលបច្ចុប្បន្នបានផ្តល់អត្ថប្រយោជន៍ដល់ប្រជាជនប្រមាណ ៥,៩លាននាក់តាមរយៈកម្មវិធីដែលបានផ្សារភ្ជាប់។

ប្រព័ន្ធនេះបានផ្សារភ្ជាប់នូវគម្លាតរវាងសេវាហិរញ្ញវត្ថុបែបប្រពៃណី និងប្រជាជនដែលមិនអាចធ្វើប្រតិបត្តការធនាគារ តាមរយៈការអនុញ្ញាតឱ្យមានប្រតិបត្តិការយ៉ាងរលូនរវាងគ្នានិងគ្នា ក្នុងតម្លៃទាបទាំងគណនីប្រាក់ដុល្លារ និងប្រាក់រៀល។ កត្តានេះមិនត្រឹមតែជួយដល់ប្រជាជននៅតាមជនបទប៉ុណ្ណោះទេ ថែមទាំងបានចូលរួមចំណែកក្នុងការពង្រឹងបរិយាបន្នហិរញ្ញេវត្ថុ និងរូបិយប័ណ្ណជាតិរបស់យើងផងដែរ។

សម្រាប់ផ្នែកហិរញ្ញប្បទានបៃតង វាជានិន្នាការសកលដ៍សំខាន់នាពេលអនាគតក្នុងការបន្ស៊ាំទៅនឹងការបំរែបំរួលអាកាសធាតុ ក្នុងដំណើរឆ្ពោះទៅរកការទទួលខុសត្រូវផ្នែកបរិស្ថាន និងការអភវិឌ្ឍន៍ប្រកបដោយចីរភាព។ សមាគមមីក្រូហិរញ្ញវត្ថុបាននឹងកំពុងធ្វើកិច្ចសហការជាមួយ អង្គការ Oxfam ដើម្បីជំរុញគំនិតផ្តួចផ្តើមហិរញ្ញវត្ថុបៃតង និងធ្វើការជាមួយ Water.org ដើម្បីផ្តល់ជំនួយបច្ចេកទេសក្នុងការអភិវឌ្ឍន៍ផលិតផលទឹកស្អាត និងអនាម័យ (WASH)។ ថ្វីត្បិតតែកិច្ចការនេះទើបនឹងចាប់ផ្តើមប៉ុន្តែវាជាការត្រួសត្រាយផ្លូវ ក្នុងដំណើរឆ្ពោះទៅរកប្រតិបត្តការប្រកបដោយចីរភាពដែលផ្តល់អត្ថប្រយោជន៍ដល់អតិថិជន សហគមន៍ និងបរិស្ថាន។ សមាគមមានការប្តេជ្ញាចិត្តខ្ពស់ក្នុងការលើកកម្ពស់បរិយាបន្នហិរញ្ញវត្ថបៃតងហើយក្នុងន័យនេះសមាគមក៍សូមលើកទឹកចិត្តឲ្យសមាជិកចាប់ផ្តើមពិនិត្យមើលលទ្ធភាពក្នុងការអភវឌ្ឍន៍និងវិនិយោគលើផលិតផលនេះដើម្បីអាចដើរទន្ទឹមនឹងនិន្ននាការសកល៕

The post សមាគមមីក្រូហិរញ្ញវត្ថុមានសមាជិកប្រមាណ១៣២គ្រឹះស្ថាន មានផលប័ត្រឥណទានសរុបម្រាណ ៥.១១ ប៊ីលានដុល្លាអាមេរិក appeared first on .

គម្រោងការពង្រឹងសុវត្ថិភាពហិរញ្ញវត្ថុក្នុងសហគមន៍ ត្រូវបានបង្កើតឡើងក្នុងគោលបំណងចូលរួមចំណែកលើកកម្ពស់ការប្រើប្រាស់សេវាហិរញ្ញវត្ថុផ្លូវការ ប្រកបដោយសុវត្ថិភាពនៅក្នុងសហគមន៍ ដោយផ្តោតលើការលើកកម្ពស់ចំណេះដឹងផ្នែកហិរញ្ញវត្ថុ សិទ្ធិ និងកិច្ចការពារអតិថិជន។

លោក រ័ត្ន សោភ័ណ ប្រធានសមាគមធនាគារនៅកម្ពុជា បានថ្លែងថា៖ ការលើកកម្ពស់ធុរកិច្ចធនាគារប្រកបដោយការទទួលខុសត្រូវ និងការលើកកម្ពស់កិច្ចការពារអ្នកប្រើប្រាស់ ព្រមទាំងការអបរំផ្នែកចំណេះដឹងហិរញ្ញវត្ថុ គឺជារបៀបវារៈស្នូលរបស់សមាគមធនាគារនៅកម្ពុជា ព្រមទាំងសមាជិករបស់ខ្លួនផងដែរ។

លោកស្រី ឌិត នីតា ប្រធានសមាគមមីក្រូហិរញ្ញវត្ថុកម្ពុជាថ្លែងបញ្ជាក់ថា គម្រោង ការពង្រឹងសុវត្ថិភាពហិរញ្ញវត្ថុក្នុងសហគមន៍នេះ ត្រូវបានបង្កើតទ្បើងស្របតាមយុទ្ធសាស្រ្តជាតិស្តីពី បរិយាបន្នហិរញ្ញវត្ថុ ឆ្នាំ២០១៩-២០២៥ និងឆ្លើយតបទៅនឹងតម្រូវការជាក់ស្តែងតាមមូលដ្ឋាន ដោយផ្តោតទៅលើ ការលើកកម្ពស់ចំណេះដឹងហិរញ្ញវត្ថុ ក៏ដូចជាសិទ្ធិ និងកិច្ចការពារអតិថិជន តាមរយៈការកសាងសមត្ថភាពភាគីពាក់ព័ន្ធ ជាពិសេសអាជ្ញាធរភូមិ ឃុំ ដែលជាជនបង្គោលក្នុងការបញ្ជ្រាបចំណេះដឹងទាំងនេះជូនប្រជាជនក្នុងសហគមរបស់ពួកគាត់។

លោកស្រីបន្តថា៖ «គម្រោងនេះ នឹងចូលរួមចំណែកយ៉ាងសំខាន់ក្នុងការបង្កើនបំណិនជីវិតក្នុងការគ្រប់គ្រងចាត់ ចែងលុយកាក់ក្នុងក្រុមគ្រួសារ ជួយឱ្យពលរដ្ឋនៅមូលដ្ឋានយល់ដឹងពីសិទ្ធិនិងកាតព្វកិច្ចរបស់ខ្លួនពាក់ព័ន្ធនឹងកម្ចី និងចៀសផុតពីការចាញ់បោកផ្នែកហិរញ្ញវត្ថុក្នុងប្រការណាមួយ ឬជួយបញ្ចៀសនូវបំណុលច្រើនលើសលប់។»

លោក យឹម លាត ទេសាភិបាលរងធនាគារជាតិកម្ពុជា បានស្នើកិច្ចសហការ និងការចូលរួមពីភាគីពាក់ព័ន្ធទាំងអស់ចូលរួមលើកកម្ពស់ចំណេះដឹងផ្នែកហិរញ្ញវត្ថុ និងប្រើប្រាស់ប្រាក់រៀលដើម្បីសេដ្ឋកិច្ចជាតិ ព្រមទាំងបញ្ជ្រាបការយល់ដឹងហិរញ្ញវត្ថុ សិទ្ធិ កាតព្វកិច្ច និងលើកកម្ពស់ការប្រើប្រាស់សេវាហិរញ្ញវត្ថុប្រកបដោយការប្រុងប្រយ័ត្ន និងបង្ការខ្លួនពីការឆបោកផ្នែកហិរញ្ញវត្ថុ និងទទួលខុសត្រូវដល់ប្រជាពលរដ្ឋគ្រប់រូប ជាពិសេសប្រជាពលរដ្ឋរស់នៅតំបន់ដាច់ស្រយាល ឆ្ងាយពីទីប្រជុំជន កុមារ និងស្រ្តី។

គួរបញ្ជាក់ថាគម្រោង ការពង្រឹងសុវត្ថិភាពហិរញ្ញវត្ថុក្នុងសហគមន៍ បានដាក់ឱ្យដំណើរការជាផ្លូវការកាលពីថ្ងៃទី២៤ ខែកុម្ភៈ ឆ្នាំ២០២៣ ដោយបាននិងកំពុងអនុវត្តសាកល្បងនៅក្នុងខេត្តចំនួន៤ រួមមាន ខេត្តកំពង់ធំ ខេត្តកំពង់ស្ពឺ ខេត្តស្វាយរៀង និងខេត្តបាត់ដំបង។ ក្នុងអំឡុងពេលសាកល្បងនេះ គម្រោងសម្រេចបាននូវលទ្ធផលសំខាន់ៗ រួមមាន បណ្តុះបណ្តាលគ្រូបង្គោលថា្នក់ឃុំបាន 0២វគ្គ ដែលមានអ្នកចូលរួមចំនួន៥៩រូប ក្នុងនោះមានស្រ្តីចំនួន ១៦នាក់។ គ្រូបង្គោលថ្នាក់ឃុំមានសមាសភាពមកពី  ឃុំត្បូងក្រពើ ស្រុកសន្ទុក ខេត្តកំពង់ធំ ឃុំវត្តតាមឹម ស្រុកសង្កែ ខេត្តបាត់ដំបង ឃុំស្នំក្រពើ ស្រុកគងពិសី ខេត្តកំពង់ស្ពឺ និងឃុំពោធិរាជ ស្រុកស្វាយជ្រុំ ខេត្តស្វាយរៀង។

គម្រោងក៏បានបង្កើតសៀវភៅកម្រងមេរៀន សុវត្ថិភាពហិរញ្ញវត្ថុក្នុងសហគមន៍ ចំនួន០៥ ព្រមទាំងធ្វើការបោះពុម្ពបានចំនួន២ដង សរុបសៀវភៅបោះពុម្ភទាំងពីរលើកបានចំនួន ៧ ៥០០ក្បាល។ គម្រោងក៏បានផលិតសម្ភារៈសម្រាប់បម្រើដល់ការអនុវត្តគម្រោងថ្នាក់មូលដ្ឋាន ការអង្កេត baseline នៅមូលដ្ឋានអនុវត្តគម្រោងដែលមានសំណាកសរុបចំនួន៤០០ ការចុះអប់រំប្រជាពលរដ្ឋតាមមូលដ្ឋានចំណេះដឹងផ្នែកហិរញ្ញវត្ថុ តាមរយៈគ្រូបង្គោល សរុបចំនួន ៤៨ដង ដោយក្នុងនោះមានអ្នកចូលរួមសរុបចំនួន ១៥ ០៣៣ នាក់ ស្រីចំនួន ១១ ១៧២នាក់។ ព្រមទាំងធ្វើការបញ្រ្ជាបសារអំពីចំណេះដឹងផ្នែកហិរញ្ញវត្ថុដល់អាជ្ញាធរមូលដ្ឋាន ដល់គ្រូបង្គោល និងប្រជាពលរដ្ឋនៅពេលមានការជួបជុំនានាសរុបចំនួន ៣.៤៣៩នាក់ ស្រីចំនួន ១.០៤៩នាក់៕

The post គម្រោងការពង្រឹងសុវត្ថិភាពហិរញ្ញវត្ថុក្នុងសហគមន៍ ជួយលើកកម្ពស់ការប្រើប្រាស់សេវាហិរញ្ញវត្ថុផ្លូវការ appeared first on .

យោងតាមការព្យាករណ៍របស់ក្រសួងសេដ្ឋកិច្ច និងហិរញ្ញវត្ថុ កំណើនសេដ្ឋកិច្ចកម្ពុជាត្រូវបានប៉ាន់ប្រមាណថា មានកំណើនក្នុងរង្វង់ ៦ភាគរយក្នុងឆ្នាំ២០២៤ ប៉ុន្តែក្នុងបរិការណ៍នៃការងើបឡើងវិញនៃ      សេដ្ឋកិច្ចកម្ពុជានេះ អតិថិជន ជួបបញ្ហាប្រឈមមួយចំនួន ក្នុងការសងឥណទាន មកកាន់គ្រឹះស្ថានហិរញ្ញវត្ថុ។ ក្នុងន័យនេះដើម្បីជួយសម្រួលអតិថិជនដែលមានបញ្ហាលំហូរសាច់ប្រាក់ និងមានការយឺតយ៉ាវក្នុងការបង់សង ឥណទានមកគ្រឹះស្ថានធនាគារ និងហិរញ្ញវត្ថុ សមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA) លើកទឹកចិត្តដល់គ្រឹះស្ថានសមាជិកទាំងអស់នៃសមាគមទាំងពីរ ចូលរួមអនុវត្តតាមសេចក្តីណែនាំរបស់ធនាគារជាតិនៃកម្ពុជា ចេញថ្ងៃទី២១ ខែសីហា ឆ្នាំ២០២៤ អំពីករណីអនុវត្តកម្រិតអនុបាតទ្រនាប់ដើមទុនខនស៊ើវេសិន អត្រាប្រាក់បម្រុងកាតព្វកិច្ចជារូបិយបណ្ណ និងអនុញ្ញាតិឱ្យមានការរៀបចំឥណទានឡើងវិញជូនអតិថិជនស្របតាមលក្ខខណ្ឌកំណត់ក្នុងសារចរណែនាំដាច់ដោយឡែករបស់ធនាគារជាតិនៃកម្ពុជា។ តាមរយៈស្មារតីអនុគ្រោះរបស់ធនាគារជាតិនៃកម្ពុជា មានដូចជា៖

១.  ពិនិត្យឱ្យអស់លទ្ធភាពក្នុងការរៀបចំឥណទានទ្បើងវិញតាមសំណើរបស់អតិថិជន ដោយឈរលើគោលការណ៍បន្ធូបន្ថយប្រាក់ពិន័យ ឬឈានទៅដល់ការលុបចោលប្រាក់ពិន័យ។ ទន្ទឹមនេះការ  សម្រួបសម្រួលត្រូវធ្វើឡើងតាមស្ថានភាពជាក់ស្តែង និងលទ្ធភាពរបស់គ្រឹះស្ថានហិរញ្ញវត្ថុដើម្បីបន្តរក្សាស្ថិរភាព និងនិរន្តភាពរបស់ស្ថាប័នហិរញ្ញវត្ថុ និងប្រព័ន្ធធនាគារទាំងមូល។

២.   រៀបចំឥណទានទ្បើងវិញដោយមិនយកកម្រៃសេវាផ្សេងៗ។ 

៣.  មិនបញ្ចូលការប្រាក់យឺតយ៉ាវដែលអតិថិជនមិនទាន់បានបង់សងទៅជាប្រាក់ដើម។ ប៉ុន្តែអតិថិជននៅមានកាតព្វកិច្ចសងការប្រាក់ដែរជំពាក់ទៅតាមវិធាននៃការរៀបចំឥណទានឡើងវិញ។

៤.  ក្នុងករណីអតិថិជនមានបញ្ហាប្រឈមផ្នែកហិរញ្ញវត្ថុ និងមានការបង់សងយឺតយ៉ាវ ហើយចង់បង់   ផ្តាច់ឥណទានមិនដំណើរការ គ្រឹះស្ថានធនាគារនិងហិរញ្ញវត្ថុ ត្រូវលុបចោលប្រាក់ពិន័យ។ ដោយទ្បែកសម្រាប់ការប្រាក់ គ្រឹះស្ថានអាចពិចារណាលើកលែងមួយផ្នែក ឬទាំងស្រុងទៅតាមស្ថានភាពជាក់ស្តែងរបស់គ្រឹះស្ថាន ឬគោលការណ៍របស់គ្រឹះស្ថាន។

៥.  ព័ត៌មានអតិថិជន ដែលធ្លាប់រៀបចំឥណទានទ្បើងវិញក្នុងប្រព័ន្ធគ្រប់គ្រងឥណទាននៃការិយាល័យឥណទានកម្ពុជា គឺជាព័ត៌មានដែលបង្ហាញពីប្រវត្តិរបស់អតិថិជន។ ព័ត៌មាននេះមិនមែនជាលក្ខ- ខណ្ឌស្វ័យប្រវត្តិក្នុងការបដិសេធឥណទានថ្មីរបស់អតិថិជននោះទេ។

៦.  សហការជិតស្និទ្ធជាមួយសាជីវកម្មធានាឥណទានកម្ពុជា (CGCC) និងធនាគារសហគ្រាសធុនតូច និងមធ្យមកម្ពុជា (SME Bank Cambodia) ដើម្បីបញ្ចេញឥណទានដល់គ្រប់វិស័យទាំងអស់ដែលមានតម្រូវការឥណទាន។

សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ក៏បានលើកទឹកចិត្តគ្រឹះស្ថានសមាជិក រួមមានគ្រឹះស្ថានធនាគារ និងមីក្រូហិរញ្ញវត្ថុ គ្រឹះស្ថានភតិសន្យាហិរញ្ញវត្ថុ និងគ្រឹះស្ថានឥណទានជនបទ ចូលរួមអនុវត្តស្មារតីរួមខាងលើ ឱ្យបានខ្ជាប់ខ្ជួន ដើម្បីបន្តជួយសម្រាលបន្ទុករបស់អតិថិជនដែលកំពុងជួបការលំបាកដូចជាបញ្ហាលំហូរសាច់ប្រាក់ និងមានការយឺតយ៉ាវក្នុងការបង់សងឥណទានមកគ្រឹះស្ថានធនាគារ និងហិរញ្ញ- វត្ថុ។ សមាគមទាំងពីរនឹងតាមដានស្ថានភាព ការអនុវត្តតាមស្មារតីខាងលើដោយយកចិត្តទុកដាក់បំផុត និងបន្តធ្វើបច្ចុប្បន្នភាពដល់សមាជិកទាំងអស់ក្នុងករណីចាំបាច់៕

The post សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ដាក់ចេញស្មារតីរួមសម្រួលដល់អតិថិជនជួបប្រទះស្ថានភាពលំបាកក្នុងការបង់សង ឥណទាន appeared first on .

ថ្លែងក្នុងសិក្ខាសាលា លោកស្រី ឌិត នីតា ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា បានមានប្រសាសន៍ថា៖ «ឆ្នាំ២០២៤នេះគឺជាឆ្នាំទី៣ របស់សមាគមមីក្រូហិរញ្ញវត្ថុកម្ពុជា ចំពោះការរៀបចំសិក្ខាសាលាថ្នាក់តំបន់។ កាលពីឆ្នាំ២០២២ និង ២០២៣ ការរៀបចំគឺផ្តោតទៅលើស្ថាប័នដែលជាសមាជិករបស់របស់សមាគមមីក្រូហិរញ្ញវត្ថុប៉ុណ្ណោះ។ប៉ុន្តែសម្រាប់ឆ្នាំ២០២៤ សិក្ខាសាលារបស់យើងគឺផ្តោតទៅលើសមាជិកដែលមកពីសមាគមទាំង២ ដោយពង្រឹងទៅលើប្រតិបត្តិការអាជីវកម្មប្រកបដោយក្រមសីលធម៌ វិជ្ជាជីវៈ លើកកម្ពស់កិច្ចការពារអតិថិជន ដើម្បីចូលរួមចំណែកធានាបាននៅនិរន្តរភាពនិងភាពធន់របស់វិស័យ ស្របតាមយុទ្ធសាស្រ្តជាតិស្តីពីបរិយាបន្នហិរញ្ញវត្ថុឆ្នាំ២០១៩-២០២៥»។

លោកស្រី បានបន្ថែមថា៖ «សមត្ថភាពគ្រប់គ្រង និងដឹកនាំរបស់ប្រធានសាខា គឺជាកត្តាចាំបាច់ក្នុងការជំរុញប្រសិទ្ធភាពប្រតិបត្តិការសាខា និរន្តភាពរបស់គ្រឹះស្ថាន និងអតិថិជន។ លើសពីនេះទៅទៀត ប្រធានសាខានីមួយៗ ជាអ្នកដឹកនាំធ្វើឲ្យគ្រឹះស្ថានមានកេរិ៍តឈ្មោះល្អ តាមរយៈការដឹកនាំក្រុមការងាររបស់ខ្លួនដោយផ្ទាល់ ក្នុងប្រតិបត្តិការផ្តល់សេវាហិរញ្ញវត្ថុ ប្រាស្រ័យទាក់ទង និងបម្រើសេវាជូនអតិថិជនផ្ទាល់ដោយក្រមសីលធម៌ វិជ្ជាជីវៈ។

លោកស្រីប្រធានក្រុមប្រឹក្សាភិបាល បានគូសបញ្ជាក់ថា ដើម្បីបំពេញតួនាទីនិងភារកិច្ចនេះប្រកបដោយប្រសិទ្ធភាព ប្រធានសាខាឬថ្នាក់ដឹកនាំសាខាត្រូវស្វែងយល់ឲ្យបានទូលំទូលាយនូវបទដ្ឋានគតិយុត្ត ច្បាប់ និងបទបញ្ញត្តិផ្សេងៗដែលពាក់ព័ន្ធ ការវិវត្ត ឱកាស និងកត្តាគំរាមកំហែងផ្សេងៗក្នុងការធ្វើប្រតិបត្តិការអាជីវកម្ម។

សូមជម្រាបជូនថា សិក្ខាសាលាទាំងនេះរៀបចំឡើងក្នុងគោលបំណងបញ្ជ្រាបចំណេះដឹងជូនប្រធានសាខា អំពីការទទួលខុសត្រូវសំខាន់ៗ ក្នុងការធ្វើប្រតិបត្តិការធនាគារប្រកបដោយក្រមសីលធម៌ និងវិជ្ជាជីវៈសំដៅពង្រឹងភាពធន់នៃវិស័យធនាគារនិងហិរញ្ញវត្ថុ និងកិច្ចការពារអតិថិជន។

លទ្ធផល និងដំណោះស្រាយសំខាន់ៗមួយចំនួន ដែលទទួលបានពីអង្គសិក្ខាសាលា សមាគមទាំងពីរនឹងយកទៅពិភាក្សាបន្ត ដើម្បីដាក់ចេញជាវិធានការក្នុងការចូលរួម ពង្រឹងប្រសិទ្ធភាពប្រតិបត្តិការនិងការផ្តល់សេវាហិរញ្ញវត្ថុរបស់គ្រឹះស្ថានប្រកបដោយចីរភាពនិងបរិយាបន្ននិងជាធាតុចូលសម្រាប់ទិសដៅខាងមុខរបស់សមាគមទាំងពីរ៕ អត្ថបទ៖វិបុល

The post សមាគមមីក្រូហិរញ្ញវត្ថុកម្ពុជា រៀបចំសិក្ខាសាលាថ្នាក់តំបន់លើកទី៣ ដើម្បីពង្រឹងភាពធន់នៃវិស័យធនាគារនិងហិរញ្ញវត្ថុ និងកិច្ចការពារអតិថិជន appeared first on .