ស្រាបៀរ

បង្ហាញមុខថ្នាក់ដឹកនាំកំពូលក្រុមហ៊ុន អ៊ែតវូត ២រូបល្បីល្បាញនាំចូលនិងចែកចាយស្រាថ្លៃកប់ពពក

ឧកញ៉ាកោះក្របី — Tue, 26 Dec 2023 08:15:23 +0000

ក្រុមហ៊ុនដែលល្បីល្បាញរាប់ទស្សវត្សន៍ខាងនាំចូលប្រភេទស្រាវីស្គី និងស្រាបៀរថ្លៃៗមកកាន់ប្រទេសកម្ពុជាជាច្រើនមុខ អ៊ែតវូត អាហរ័ណ នីហរ័ណ បាននឹងនកំពុងក្តោបក្តាប់ចំណែកទីផ្សារកម្ពុជាយ៉ាងណាណែនជោគជ័យសម្បើមក្នុងពេលបច្ចុប្បន្ននេះ។

សប្តាហ៍នេះ គេហទំព័រសារព័ត៌មានឧកញ៉ាញូស៍ សូមបើកបង្ហាញនូវបញ្ជីឈ្មោះថ្នាក់ដឹកនាំកំពូលៗរបស់ក្រុមហ៊ុន អ៊ែតវូត ២រូបដែលជាអ្នកគ្រប់គ្រងនិងកាច់ចង្កូតដោយផ្ទាល់ គឺគ្មាននរណាក្រៅពីលោកស្រីឧកញ៉ា លឹម ឈីវហូរ និងលោក តាន់ សែឆាយ។ លោកស្រីជាស្ថាបនិក និងអគ្គនាយិកាក្រុមហ៊ុន អ៊ែតវូត អាហរ័ណ នីហរ័ណ ចំណែកលោក តាន់ សែឆាយ កំពុងកាន់តួនាទីជាអគ្គនាយកក្រុមហ៊ុន អ៊ែតវូត អាហរ័ណ នីហរ័ណ និងជាប្រធានសមាគមអ្នកនាំចូល និងចែកចាយស្រាបៀរ និងស្រា ។

ក្រុមហ៊ុន អ៊ែតវូត អាហរ័ណ នីហរ័ណ ( Attwood Import Export Co., Ltd. ) កើតចេញពីញើសឈាម និងគំនិតរបស់សេដ្ឋីនី លឹម ឈីវហូរ តាំងពីឆ្នាំ១៩៩៤មកម្លេះ ហើយធ្លាប់មានប្រវត្តិហែឆ្លងកាត់ស្ទើរគ្រប់សម័យកាល ទម្រាំអាចឈានជើងជ្រៀតជ្រែកចូលទីផ្សារកម្ពុជារហូតមកដល់ពេលបច្ចុប្បន្ន។

លើសពីក្រុមហ៊ុននាំចូល និងចែកចាយ ស្រាវីស្គី និងស្រាបៀរ ពាសពេញស្រុកខ្មែរហើយនោះ លោកស្រីក៏នៅមានក្រុមហ៊ុនជាច្រើនដូចជា តំបន់សេដ្ឋកិច្ចពិសេស, មជ្ឈមណ្ឌលពាណិជ្ជកម្ម, អចលនទ្រព្យ ហិរញ្ញវត្ថុ និងវិស័យអប់រំ។

លោកស្រីឧកញ៉ា លឹម ឈីវហូរ ត្រូវបានពាណិជ្ជករក្នុងស្រុកមួយចំនួនចាត់ទុកជាស្រ្តីខ្លាំងរបស់កម្ពុជាក្នុងពិភពជំនួញខណៈលេចលឺព័ត៌មានថា លោកស្រីមានទំនាក់ទំនងយ៉ាងជិតស្និទជាមួយអ្នកឧកញ៉ា ឧកញ៉ាគ្រាក់ៗ ព្រមទាំងមន្រ្តីធំៗនៅក្នុងស្រុក៕

The post បង្ហាញមុខថ្នាក់ដឹកនាំកំពូលក្រុមហ៊ុន អ៊ែតវូត ២រូបល្បីល្បាញនាំចូលនិងចែកចាយស្រាថ្លៃកប់ពពក appeared first on .

ក្រុមហ៊ុនស្រាបៀរ Heineken ប្រកាសដកខ្លួនពីទីផ្សាររុស្ស៊ី ទោះខាតលុយជិត ៣២០ លានដុល្លារ

ឧកញ៉ាសំពៅ — Thu, 23 Feb 2023 08:52:00 +0000

សង្គ្រាមរវាងរុស្ស៊ី និងអ៊ុយក្រែន បានធ្វើឲ្យក្រុមហ៊ុនធំៗជាច្រើនទូទាំងពិភពលោក ចាប់ផ្ដើមដកខ្លួនចេញពីទីផ្សាររុស្ស៊ី ដែលជាការបង្ហាញពីការដាក់ទណ្ឌកម្មសេដ្ឋកិច្ចលើមហាអំណាចមួយនេះ។

ក្នុងនោះ ក្រុមហ៊ុនស្រាបៀរ Heineken បានប្រកាសថា ពួកគេនឹងចាកចេញពីទីផ្សាររុស្ស៊ី ឲ្យបានមុនដាច់ឆមាសទី ១ នៃឆ្នាំ ២០២៣ បើទោះជាទទួលការខាតបង់ ៣០០ លានអឺរ៉ូ ឬប្រហែល ៣១៨ លានដុល្លារអាមេរិក។ នេះបើតាមការចុះផ្សាយពី Reuters។

ពួកគេបានបញ្ជាក់ទៀតថា មូលហេតុដែលពន្យារពេលការចាកចេញនោះគឺ ភាគីដែលសន្យាទិញក្រុមហ៊ុន Heineken នៅរុស្ស៊ី កំពុងមានបញ្ហា ដូច្នេះពួកគេត្រូវរង់ចាំរហូតដល់កិច្ចកុងត្រាលក់ត្រូវបញ្ចប់ ទើបអាចចាកចេញពីរុស្ស៊ីបាន។

សូមជម្រាបដែរថា ក្រុមហ៊ុន Heineken គឺជាក្រុមហ៊ុនលំដាប់អន្តរជាតិមួយដែលប្រកាសបោះបង់អាជីវកម្មនៅរុស្ស៊ី បន្ទាប់ពី Apple និង McDonald’s ក្រោយរុស្ស៊ីទទួលទណ្ឌកម្មសេដ្ឋកិច្ចពីលោកខាងលិច និងអឺរ៉ុបជាទំងន់៕

The post ក្រុមហ៊ុនស្រាបៀរ Heineken ប្រកាសដកខ្លួនពីទីផ្សាររុស្ស៊ី ទោះខាតលុយជិត ៣២០ លានដុល្លារ appeared first on .

ប្រជាជនឥណ្ឌាទាមទារឲ្យមានការកែប្រែឈ្មោះ និងឡូហ្គោស្រាបៀហនុមាន

ឧកញ៉ាសំពៅ — Fri, 10 Jun 2022 09:35:47 +0000

បច្ចុប្បន្ន ស្រាបៀហនុមានកំពុងមានវត្តមានយ៉ាងទូលំទូលាយនៅលើទីផ្សារអាស៊ីអាគ្នេយ៍ ប៉ុន្តែថ្មីៗនេះ ក្រុមហ៊ុនរបស់ប្រទេសកម្ពុជាបានទទួលរងនូវការវាយប្រហារពីសំណាក់ប្រជាជនឥណ្ឌា ដោយមានការសុំឲ្យផ្លាស់ប្ដូរឈ្មោះ និងឡូហ្គោហនុមានចេញ ដោយសារទាក់ទងនឹងសាសនារបស់ប្រទេសមួយនេះ។

យោងតាមការចុះផ្សាយពី SCMP បានឲ្យដឹងថា ការរិះគន់ខាងលើបានកើតឡើងកាលពីចុងខែឧសភា បន្ទាប់ពីប្រជាជនឥណ្ឌាប្រទះឃើញការបង្ហោះផ្សព្វផ្សាយស្រាបៀហនុមានលើបណ្ដាញសង្គម Twitter និងមានការទាមទារឲ្យមានការផ្លាស់ប្ដូររូបហនុមាន ដោយពួកគេអះអាងថា ហនុមានគឺជាព្រះនៃសាសនារបស់ពួកគេ ហើយការយករូបហនុមានមកប្រើប្រាស់បែបនេះ ប្រៀបដូចជា ការមើលស្រាលដល់សាសនានៃប្រទេសមួយនេះយ៉ាងដូច្នេះ។

ប្រជាជនមួយចំនួនបានស្នើដល់ស្ថានទូតឥណ្ឌាប្រចាំប្រទេសកម្ពុជា ចេញមុខអន្តរាគមន៍អំពីការសុំឲ្យមានការផ្លាស់ប្ដូរឈ្មោះ និងឡូហ្គោ ខណៈប្រជាជនមួយចំនួនទៀតបានប្រឆាំងនឹងមតិខាងលើ ដោយបានអះអាងថា វាមិនបានប៉ះពាល់អ្វីដល់សាសនាធ្ងន់ធ្ងរឡើយ ហើយបើទោះជាក្រុមហ៊ុន Hanuman Premium Lager យកព្រះនាមព្រះមកធ្វើជាអត្តសញ្ញាណផលិតផល ក៏សាសនារបស់ប្រទេសកម្ពុជាមានស្ថិរភាព ខុសពីនៅឥណ្ឌា។

“ហនុមានគឺជាតួអង្គទេវកថាមួយ ហើយខ្ញុំមិនយល់ឃើញថា មានបញ្ហាអ្វីចំពោះរឿងនេះឡើយ។ មានក្រុមហ៊ុនស្រាបៀជាច្រើនដែលយកតួអង្គទេវកថាក្រិកមកធ្វើជាអត្តសញ្ញាណ ដូច្នេះវាគឺជារឿងធម្មតាប៉ុណ្ណោះ”។ នេះបើតាមការសរសេរនៅលើបណ្ដាញសង្គម Twitter របស់ជនជាតិឥណ្ឌាម្នាក់”។

សូមជម្រាបដែរថា នេះមិនមែនជាលើកទី ១ ឡើយ ដែលប្រជាជនឥណ្ឌានាំគ្នាលើកទ័ពរិះគន់ទៅលើក្រុមហ៊ុនបរទេស អំពីបញ្ហាជំនឿសាសនា ពោលកាលពីឆ្នាំ ២០២០ ពួកគេក៏ធ្លាប់វាយប្រហារទៅលើក្រុមហ៊ុន Amazon ដោយមានការទាមទារឲ្យលុបនូវផលិតផលកម្រាលព្រំ ដែលមានរូបព្រះនៃទេវកថាហិណ្ឌូផងដែរ៕

The post ប្រជាជនឥណ្ឌាទាមទារឲ្យមានការកែប្រែឈ្មោះ និងឡូហ្គោស្រាបៀហនុមាន appeared first on .

គិតត្រឹមឆ្នាំ២០២១ កម្ពុជាមានក្រុមហ៊ុនផលិតស្រាបៀរ និងភេសជ្ជៈចុះបញ្ជីនៅក្រសួងចំនួន ១៣

ឧកញ៉ាមហាសម្បត្តិ — Sat, 07 May 2022 03:23:54 +0000

កាលពីឆ្នាំ ២០២១ រោងចក្រផលិតស្រាបៀរធំៗចំនួន ២ថែមទៀត បានចាប់ផ្តើមដំណើរការសង្វាក់ផលិតកម្ម។

របាយការណ៍ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កាលពីឆ្នាំ ២០២១ បង្ហាញថា នៅកម្ពុជាមានក្រុមហ៊ុនផលិតស្រាបៀរ និងភេសជ្ជៈចុះបញ្ជីនៅក្រសួងចំនួន ១៣ រួមមាន ក្រុមហ៊ុន Inter-Mattrid Beverage(Cambodia)Co Ltd, ក្រុមហ៊ុន Hanuman Beverages Co Ltd, ក្រុម-ហ៊ុន Vattanac Brewery Co Ltd, ក្រុមហ៊ុន Ana Water and Smiler Beverage Co Ltd, ក្រុមហ៊ុន Asian Sunrise Co Ltd, ក្រុមហ៊ុន Heineken (Cambodia)Co Ltd, ក្រុមហ៊ុន Cambrew Ltd,ក្រុមហ៊ុន Daun Penh Food and Beverage Co Ltd, ក្រុមហ៊ុន Khmer Beverage Co Ltd, ក្រុមហ៊ុន Far East Import Export Co Ltd, ក្រុមហ៊ុន Kingdom Breweries (Ca-mbodia) Ltd, ក្រុមហ៊ុន Media GB Enterprise Co Ltd, និងក្រុមហ៊ុន Phnom Penh Beer Co Ltd។

ឆ្នាំ ២០២១ រោងចក្រផលិតស្រាបៀរ Hanuman Beverages ដែលប្រើប្រាស់ទុនវិនិយោគជាង ១៦០ លានដុល្លារ បានបើកដំណើរការនៅស្រុកអង្គស្នួល ខេត្តកណ្តាល និងរោងចក្រផលិតស្រាបៀរក្រុមហ៊ុន Vattanac មានទុនវិនិយោគ ១៤០ លានដុល្លារ បានចាប់ដំណើរការផលិតស្ថិតក្នុងខណ្ឌច្បារអំពៅ រាជធានីភ្នំពេញ។

អគ្គនាយកដ្ឋានគយ និងរដ្ឋាករបានបញ្ជាក់ថា កម្ពុជាបានចំណាយប្រាក់ជាង ៧០ លានដុល្លារក្នុងត្រីមាសទី ១ ឆ្នាំ ២០២២ ទៅលើការនាំចូលភេសជ្ជៈ ស្រា និងទឹកខ្មេះ (Beverages, Spirits, Vinegar)។ ដោយឡែកសម្រាប់ខែមីនា ឆ្នាំ ២០២២ ការនាំចូលមានទឹកប្រាក់ចំនួន ២៦,២២ លានដុល្លារធ្លាក់ចុះ ១,៤ ភាគរយធៀបខែមីនា ឆ្នាំ ២០២១ ដែលមាន ២៦,៦ លានដុល្លារ៕

The post គិតត្រឹមឆ្នាំ២០២១ កម្ពុជាមានក្រុមហ៊ុនផលិតស្រាបៀរ និងភេសជ្ជៈចុះបញ្ជីនៅក្រសួងចំនួន ១៣ appeared first on .

លោកស្រី ខៀវ សស៊ីលៀប បោះទុន ១៦០ លានដុល្លារ វិនិយោគលើរោងចក្រផលិតស្រាបៀរ ហនុមាន

ឧកញ៉ាកោះក្របី — Fri, 05 Nov 2021 02:11:39 +0000

ថ្មីៗនេះ រោងចក្រផលិតស្រាបៀរ ហនុមាន ត្រូវបានប្រកាសដាក់ឲ្យលក់នៅលើទីផ្សារ ជាមួយនឹងយុទ្ធសាស្រ្តទីផ្សារផ្សព្វផ្សាយខ្លាំងមែនទែនទៅនៅតាមស្ថានីយ៍ទូរទស្សន៍ និងប្រព័ន្ធបច្ចេកវិទ្យាឌីជីថល។

ក្រុមហ៊ុន ហនុមាន ប៊ែវើរីជីស ឯ.ក ត្រូវបង្កើតឡើងដោយកូនខ្មែរសុទ្ធសាធ ជាមួយការបោះវិនិយោគទុនរហូតដល់ ១៦០ លានដុល្លារ ដោយមានច្ចេកវិទ្យាទំនើបចុងក្រោយពីអឺរ៉ុប ស្របទៅតាមបទដ្ឋានស្តង់ដារលំដាប់ពិភពលោក ព្រមទាំងមានសមត្ថភាពផលិតរហូតដល់ប្រមាណ ៣០លានកេស ក្នុងមួយឆ្នាំ ពោលគឺនឹងផ្តល់ឱកាសការងារប្រមាណជាង ១.៦០០កន្លែង។

បន្ថែមលើនេះ ក្រុមហ៊ុន មានការប្តេជ្ញាចិត្តដ៏មោះមុត ក្នុងការរួមចំណែកអភិវឌ្ឍសេដ្ឋកិច្ចនៃកម្ពុជា ខណៈទិសដៅរបស់រាជរដ្ឋាភិបាលបាននឹងកំពុងជំរុញដល់ការបង្កើនវិស័យឧស្សាហកម្មផលិតក្នុងស្រុក ដែលមានទីតាំងស្ថិតនៅ ផ្លូវជាតិលេខ ៤ ភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្តាល។

នាយកប្រតិបត្តិក្រុមហ៊ុន ហនុមាន ប៊ែវើរីជីស លោក Chas GESCHKE បានឲ្យដឹងថា៖ «បន្ទាប់ពីការសាងសង់អស់រយៈពេលជាងពីរឆ្នាំ យើងបានឆ្លងកាត់នូវឧបសគ្គជាច្រើន ក្នុងស្ថានភាពការរីករាលដាលនៃជំងឺ កូវីដ-១៩ ដែលបានជះឥទ្ធិពលដល់ល្បឿននៃការសាងសង់របស់យើង។ យ៉ាងណាមិញក្រុមហ៊ុនបានខិតខំស្វែងរក ដំណោះស្រាយក្នុងការជំរុញដំណាក់កាលនីមួយៗបន្តទៅមុខជានិច្ច»។

លោក Chas GESCHKE

លោកថា នៅទីបំផុតយើងសម្រេច បាននូវគោលដៅដំបូងរបស់ក្រុមហ៊ុន ហើយយើងពិតជាមោទកភាពក្នុងការទទួលបានជោគជ័យ នៃការផលិតនូវផលិតផលដំបូងរបស់យើង គឺស្រាបៀរហនុមាន-Hanuman Premium Lager ព្រមទាំងបានចែកចាយលើទីផ្សារកាលពីថ្មីៗនេះ។

ជាមួយគ្នានេះដែល លោកស្រី ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាលក្រុមហ៊ុន ហនុមាន ប៊ែវើរីជីស មានប្រសាសន៍ថា៖ «ផលិតផលដំបូងរបស់យើង ទទួលបានការគាំទ្រពេញចិត្ត និងកោតសរសើរមិនដាច់ពីមាត់ ពីសំណាក់បងប្អូនប្រជាជនកម្ពុជា និងភ្ញៀវអន្តរជាតិ អំពីរសជាតិដ៏ឆ្ងាញ់ គុណភាពល្អ និងមានរូបរាងគួរឲ្យទាក់ទាញ ដែលនេះជាសមិទ្ធផលផ្លែផ្កាដ៏វិសេសវិសាលដំបូងសម្រាប់ក្រុមហ៊ុន»។

លោកស្រី ខៀវ សស៊ីលៀប

បើតាមលោកស្រី ក្រុមហ៊ុនមានចក្ខុវិស័យវែងឆ្ងាយប្រកបដោយវិសាលភាព ដែលផ្តោតសំខាន់លើ ឧត្តមភាព នៃគុណតម្លៃ ក្នុងការផ្តល់បរិយាកាសការងារល្អដល់បុគ្គលិក ស្ថិរភាពលើគុណភាពផលិតផល ក៏ដូចជាការគាំទ្រលើយុទ្ធសាស្រ្តល្អៗ ដើម្បីនិរន្តរភាពដល់ការពង្រីកអាជីវកម្មជាចម្បង ជាពិសេសគឺជំរុញបន្ថែមលើការកសាងគុណភាពម៉ាកសញ្ញាកូនខ្មែរទៅកាន់សកលលោក៕

The post លោកស្រី ខៀវ សស៊ីលៀប បោះទុន ១៦០ លានដុល្លារ វិនិយោគលើរោងចក្រផលិតស្រាបៀរ ហនុមាន appeared first on .