លោក ហ្សង់-ហ្វ្រង់ស័រ តាន់ បានលើកឡើងថា សម្រាប់ប្រមុខរាជរដ្ឋាភិបាលថ្មីនៃកម្ពុជាវិញទាំងនេះ គឺជាឱកាស​មួយពោរពេញទៅដោយនិមិត្តរូប​នយោបាយ។ ម្យ៉ាងពីព្រោះជាលើកទី​មួយ​បង្អស់ហើយ ដែលឯកឧត្តមបណ្ឌិត, ក្នុងនាមជានាយករដ្ឋមន្ត្រីថ្មី នៃ​ប្រទេសកម្ពុជាតាំងពីថ្ងៃទី២២ សីហា មកម្ល៉េះ, នឹងបង្ហាញមុខជាផ្លូវ​ការលើឆាកអន្តរជាតិ។ ម្យ៉ាងទៀត ពីព្រោះនៅថ្ងៃទី៥ កញ្ញា ខាងមុខនេះ នៅទីក្រុងចាកាតា ឯកឧត្តមបណ្ឌិតនឹងមានឈ្មោះជាមេដឹកនាំ​កំពូល​ក្មេងជាងគេបង្អស់ក្នុងចំណោម​មេ​ដឹក​នាំកំពូលបច្ចុប្បន្នទាំង១០ រូប របស់ អាស៊ាន។ ម្យ៉ាងចុងក្រោយពីព្រោះពីថ្ងៃទី៥ ដល់ថ្ងៃទី ៧ កញ្ញាក្នុងរយៈ​ពេលតែ២ថ្ងៃប៉ុណ្ណោះ នៅទីក្រុងចាកាតា​ដដែល, ឯកឧត្តមបណ្ឌិត ហ៊ុន ម៉ាណែត នឹងឃើញ, នឹងចាប់ដៃ, នឹងជួបជាផ្លូវការ ឬក្រៅផ្លូវការ, ប្រមុខ​រដ្ឋ ឬប្រមុខរដ្ឋាភិបាល ឬក៏ថ្នាក់ដឹកនាំជាន់ខ្ពស់ ចំនួន១៧ នាក់ យ៉ាងតិច​ដែលមកពីបណ្តាប្រទេសអាស៊ីអាគ្នេយ៍, ចិន, ជប៉ុន, កូរ៉េ ខាង ត្បូង, ឥណ្ឌា, អាមេរិក, រុស្ស៊ី, អូស្ត្រាលី, និងនូវែលសេឡង់។

បើតាមលោក ហ្សង់-ហ្វ្រង់ស័រ តាន់ ប្រជាជាតិកម្ពុជាទាំងមូលគួរតែនិងត្រូវតែមានមោទនភាព ពីព្រោះ​ឯកឧត្តមកិត្តិទេសាភិបាល បណ្ឌិត ហ៊ុន ម៉ាណែត ត្រៀមរួចរាល់អស់​ហើយ ទាំងកម្លាំងប្រាជ្ញា ទាំងកម្លាំងកាយ និងទាំងកម្លាំងចិត្ត ដើម្បី​ការពារឧត្តមប្រយោជន៍ជាតិយើង​នៅចំពោះមុខសមាជិកអាស៊ាន៩ ដទៃ​ផ្សេងទៀតនិង​ដើម្បី​ការពារផល​ប្រយោជន៍រួមរបស់អាស៊ាន នៅ​ចំពោះ​មុខ​បណ្តាប្រទេសដៃគូ​សន្ទនារបស់ អាស៊ាន។ បញ្ហាតំបន់​និងបញ្ហា អន្តរជាតិ ដែល​ប្រមុខ​រាជរដ្ឋាភិបាលវ័យក្មេងរបស់​យើង ត្រូវ​ចូលរួម​ដោះស្រាយមានច្រើនណាស់ ជាអាទិ៍ វិបត្តិរ៉ាំរ៉ៃ នៅមីយ៉ាន់ម៉ា, ការប្រជែង ឥទ្ធិពលគ្នា​​រវាង​កំពូល​មហាអំណាចពិភពលោក និងរវាង​មហាអំណាចតំបន់នៅក្នុងលំហ នៃដែនអាស៊ី-ប៉ាស៊ីហ្វិក, និងជា​ពិសេស វិបត្តិសេដ្ឋកិច្ចសកល ដែលបាននិងកំពុង​បន្តជះផល អវិជ្ជមាន​មកលើជាតិមាតុភូមិយើង។

លើសពីនេះទៅទៀត ឯកឧត្តមកិត្តិទេសាភិបាល បណ្ឌិត ហ៊ុន ម៉ាណែត មាន​សមត្ថភាព​ហួសពីគ្រប់គ្រាន់ និង​មាន​ឆន្ទៈ មោះមុតខ្លាំងណាស់ ដើម្បីលើកតម្កើង​មុខមាត់កិត្តិយស នៃព្រះរាជាណាចក្រកម្ពុជា នៅលើឆាកអន្តរជាតិ។ម្ល៉ោះហើយប្រជាជាតិកម្ពុជាទាំងមូល គួរតែនិង​ត្រូវតែរួបរួមគ្នា​ជាធ្លុង​មួយនៅ​ពីក្រោយមេដឹក​នាំប្រកបដោយថាមពល របស់យើងរូប នេះ​ដែលអាស៊ាន និង​ពិភពលោក​នឹងសម្លឹងមើល ហើយវាយ​តម្លៃ នៅទីក្រុងចាកាតា ប្រទេស​ឥណ្ឌូណេស៊ី សប្តាហ៍ក្រោយនេះ៕

The post មេដឹកនាំវ័យក្មេងបង្អស់ក្នុងតំបន់អាស៊ាន ឯកឧត្តម ហ៊ុន ម៉ាណែត នឹងបង្ហាញមុខជាលើកទីមួយលើឆាកអន្តរជាតិនាសប្តាហ៍ក្រោយ appeared first on .

ឯកឧត្តមបណ្ឌិត ហ៊ុន ម៉ាណែត មានប្រសាសន៍ថា គម្រោងដាក់ពង្រាយមន្ត្រីកសិកម្មនៅគ្រប់ឃុំទូទំាងប្រទេសដែលមានអាទិភាពទៅលើជំនាញវិស័យកសិកម្ម។យើងពង្រាយមន្ត្រីកសិកម្មនៅតាមឃុំដែលមានតម្រូវការ ព្រោះប្រជាពលរដ្ឋត្រូវការជួយ។ដូចនេះដាក់បញ្ជូនមន្ត្រីកសិកម្មទៅធ្វើការជាមួយគាត់តែម្តង។

ឯកឧត្តមសង្កត់ធ្ងន់ថា «ខ្ញុំសុំឱ្យធ្វើការជ្រើសរើសឱ្យច្បាស់ កុំឱ្យរើសមន្ត្រីកសិកម្មប្រយ័ត្នបានមកវិស្វរករសំណង់។យកអ្នកជំនាញកសិកម្ម ឱ្យអាទិភាពទៅលើអ្នកដែលមានមូលដ្ឋានចំណេះដឹងកសិកម្ម។ យើងប្រឡងជ្រើសរើសឱ្យមានតម្លាភាព យុត្តិធម៌សម្រាប់អ្នកប្រកួតប្រជែង ព្រោះកំណែទម្រង់មុខងារសាធារណៈគឺជាអាទិភាពចំាបាច់ដែលយើងត្រូវធ្វើ»។

ឯកឧត្តមបន្តថា និស្សិតខ្លះគាត់អត់មានមូលដ្ឋាន គាត់ប្រឡងចូល ត្រូវមានកម្មវិធីបណ្តុះបណ្តាលពួកគាត់មុនបញ្ជូនទៅធ្វើការជាមួយកសិករ។ខ្ញុំសុំកុំពង្រាយមន្ត្រីកសិកម្មចំនួន៥០០នាក់បានត្រឹមតែ៦ខែអស់៣០០នាក់សុំធ្វើការគ្រប់គ្រងឱ្យច្បាស់។

ឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រីមានប្រសាសន៍សង្កត់ធ្ងន់ថា«ដូចនេះការពង្រឹងមន្ត្រីកសិកម្មទៅតាមឃុំនៅទូទំាងប្រទេសសូមរើសឱ្យបានត្រូវ តម្លាភាព យុត្តិធម៌ ឱ្យត្រូវចំជំនាញ ហើយការពង្រាយត្រូវមានផែនការច្បាស់លាស់ និងត្រូវធានាឱ្យបាននូវប្រសិទ្ធភាពការងារឱ្យបងប្អូន ធានាក្របខណ្ឌថវិកាដើម្បីជួយដល់ជំនាញបន្តទៀត»៕ អត្ថបទ៖សារេត

The post នាយករដ្ឋមន្ត្រីចង់ឃើញការដាក់ពង្រាយមន្ត្រីកសិកម្មនៅតាមឃុំមានការជ្រើសរើសចំជំនាញ តម្លភាពនិងយុត្តិធម៌ appeared first on .

តាមរយៈសំណេរនៅលើទំព័រហ្វេសប៊ុកផ្ទាល់ខ្លួន នៅរសៀលថ្ងៃពុធ ទី៣០ ខែសីហា ឆ្នាំ២០២៣នេះ ហើយត្រូវបានបណ្តាញសង្គមតេឡក្រាមឯកឧត្តមបណ្ឌិត ហ៊ុន ម៉ាណែត និងសម្តេចតេជោ ហ៊ុន សែន ចែករំលែកបន្ត លោក តាន់ ហ្សង់ ហ្វ្រង់ស័រ បង្ហាញនូវទស្សនៈចំនួន ៥ ដែលជាយុទ្ធសាស្រ្តសម្រាប់ដឹកនាំអាណត្តិទី៧នេះ រួមមាន៖

១.មានតិចណាស់ ប្រជាជនដែលចាប់អារម្មណ៍ទៅលើពាក្យ«យុទ្ធសាស្ត្រត្រីកោណ» «យុទ្ធសាស្ត្រចតុកោណ» និង ចាប់ពីពេលនេះតទៅ«យុទ្ធសាស្ត្របញ្ចកោណ»ដែលជាផែនទីចង្អុលផ្លូវរបស់រាជរដ្ឋាភិបាលថ្មីដឹកនាំដោយនាយករដ្ឋមន្ត្រីថ្មី ឯកឧត្តមបណ្ឌិត ហ៊ុន ម៉ាណែត។

២.ជាសង្ខេប គេអាចនិយាយបានថា សមិទ្ធផលធំៗបច្ចុប្បន្ន(កម្ពុជាអធិបតេយ្យនិងឯករាជ្យ, កម្ពុជាក្នុងសមាហរណកម្មតំបន់និងសកល, សុខសន្តិភាព, ការចាកផុតពីភាពក្រីក្រសម្រាប់ខ្មែររាប់លាននាក់បើប្រៀបធៀបទៅនឹងស្ថានភាពកាលពី២៥ឆ្នាំមុន…) សុទ្ធតែបានមកពីការអនុវត្តយុទ្ធសាស្ត្រត្រីកោណ និងយុទ្ធសាស្ត្រចតុកោណ ព្រមទាំងការអនុវត្តនយោបាយឈ្នះ-ឈ្នះរបស់ សម្តេចតេជោ ហ៊ុន សែន។ ក្នុងន័យនេះ, យុទ្ធសាស្ត្របញ្ចកោណ គឺជា«គម្ពី»ទី៣ ដែលតាមគោលការណ៍និងតាមទ្រឹស្តី ត្រូវនាំកម្ពុជាទៅកាន់ដំណាក់កាលថ្មី នៅក្នុងអភិក្រមនៃការកសាងជាតិ។

៣.រហូតដល់ឆ្នាំ២០៥០ យុទ្ធសាស្ត្របញ្ចកោណនេះ នឹងត្រូវឆ្លងកាត់ ៥ដំណាក់កាល។ គោលដៅចុងក្រោយសម្រាប់រយៈកាលវែង គឺ «លើកស្ទួយមោទនភាពជាតិឲ្យឈានកាន់តែខ្ពស់ឡើង (…)តាមរយៈការកសាងជាតិមួយឲ្យរឹងមាំ, រស់រវើក, រុងរឿង(…) ក្លាយជាប្រទេសមានចំណូលខ្ពស់ នៅត្រឹមឆ្នាំ២០៥០។»

៤.រីឯដំណាក់កាលទី១វិញ គឺជាអ្វីដែលរាជរដ្ឋាភិបាល«ជំនាន់ថ្មី ឈាមថ្មី និងថាមពលថ្មី» ក្រោមការដឹកនាំរបស់ ឯកឧត្តមបណ្ឌិត ហ៊ុន ម៉ាណែត ត្រូវអនុវត្ត ពីពេលនេះតទៅ និងសម្រាប់រយៈកាលខ្លី ពី៥ទៅ៧ឆ្នាំខាងមុខ។ នៅក្នុងចំណោម វិធានការគន្លឹះនៃយុទ្ធសាស្ត្របញ្ចកោណដំណាក់កាលទី១នេះ, ការយកចិត្តទុកដាក់ទៅលើប្រជាជន«អ្នកលំបាក»ជាងគេ គឺជាអាទិភាពចំបង។ ជាក់ស្តែង ដូចដែលឯកឧត្តមបណ្ឌិត នាយករដ្ឋមន្ត្រី បានលើកឡើងនៅថ្ងៃទី២៤សីហាសប្តាហ៍មុន និងកាលពីម្សិលមិញថ្ងៃទី២៨សីហា រួចហើយថា រាជរដ្ឋាភិបាលនឹងប្រឹងប្រែងតាមរយ:គ្រប់មធ្យោបាយ និងគ្រប់លទ្ធភាព ដើម្បីពង្រឹងកំណើនសេដ្ឋកិច្ច, ពង្រឹងសន្ទុះនៃការបង្កើតការងារឲ្យបានច្រើន, ពង្រឹងសមធម៌សង្គម, ពង្រឹង គុណភាពនៃវិស័យអប់រំនិងសុខាភិបាល ពិសេសនៅតាមទីជនបទដាច់ស្រយាល…។ ទាំងនេះ ស្តែងឱ្យឃើញនូវនយោបាយដែលមានលក្ខណៈសង្គមខ្លាំង នៃរាជរដ្ឋាភិបាលរបស់ឯកឧត្តមបណ្ឌិត ហ៊ុន ម៉ាណែត។ ទាំងនេះក៏ស្តែងឱ្យឃើញប្រកែកមិនបានដែរ នូវសន្តានចិត្តពិតជាល្អរបស់ប្រមុខរាជរដ្ឋាភិបាលថ្មីរូបនេះ ចំពោះ អ្នកដែលនៅក្នុងសង្គមយើង មានជីវភាពលំបាកជាងគេ រួមមានដូចជាកម្មករ-កម្មការិនី បណ្តាអាជីវករនៃសេដ្ឋកិច្ចក្រៅប្រព័ន្ធ និងអ្នករស់នៅតាមស្រុកស្រែចំការ។

៥.ក្នុងគ្រាបច្ចុប្បន្ន នៅក្នុងស្ថានការណ៍មួយដុនដាបខ្លាំងនៃសេដ្ឋកិច្ចពិភពលោក តំបន់ និងជាតិ, រាជរដ្ឋាភិបាលដឹកនាំដោយ ឯកឧត្តមបណ្ឌិត ហ៊ុន ម៉ាណែត នៅតែបន្តដាក់ចេញនូវ«គោលដៅកាត់បន្ថយភាពក្រីក្រក្នុងអត្រាទាបជាង១០%» បង្រួមវិសមភាព សេដ្ឋកិច្ចនិងសង្គម, រក្សាកំណើនសេដ្ឋកិច្ច និងទន្ទឹមនេះ ពង្រឹង ប្រព័ន្ធសន្តិសុខសង្គម ដោយគិតគូរជាពិសេស ដល់អ្នកដែលមានជីវភាពលំបាកលំបិនជាងគេ។ ដើម្បីសម្រេចគោលដៅនេះ និងបន្តនាំមកនូវសមិទ្ធផលធំៗសម្រាប់ជាតិមាតុភូមិយើង, សុទិដ្ឋិនិយម ទំនុកចិត្ត និង ក្តីសង្ឃឹម របស់ពលរដ្ឋម្នាក់ៗ បូករួមនឹងឆន្ទៈមោះមុតនៃរាជរដ្ឋាភិបាលរបស់ ឯកឧត្តមបណ្ឌិត ហ៊ុន ម៉ាណែត ជាការចាំបាច់បំផុត៕

The post ជួយប្រជាជនដែលមានជីវភាពលំបាកជាងគេ គឺជាអាទិភាពរបស់ឯកឧត្តមបណ្ឌិត ហ៊ុន ម៉ាណែត appeared first on .

ការប្រកាសឲ្យលោក ម៉ៅ សុផាន់ ចូលកាន់តំណែងអគ្គមេបញ្ជាការរង និងជាមេបញ្ជាការកងទ័ពជើងគោក ក្រោយតំណែងមួយនេះទំនេរមួយរយៈបន្ទាប់ពីនាយឧត្តមសេនីយ៍ផ្កាយមាស ៤ ហ៊ុន ម៉ាណែត ឡើងកាន់តំណែងនាយករដ្ឋមន្រ្តីបន្តពីសម្តេចតេជោ ហ៊ុន សែន សម្រាប់អាណត្តិទី៧ ខណៈសម្តេចតេជោត្រូវបានតែងតាំងជាប្រធានឧត្តមប្រឹក្សាផ្ទាល់ព្រះមហាក្សត្រ។

ឧត្តមសេនីយ៍ឯក ម៉ៅ សុផាន់ ធ្លាប់ទទួលបានសិទ្ធិធ្វើជាមេបញ្ជាការស្តីទីនៃកងទ័ពជើងគោក ដើម្បីដឹកនាំបញ្ជាគ្រប់គ្រង និងដោះស្រាយរាល់ការងារនៃកងទ័ពជើងគោក។ នេះបើតាមលិខិតនាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក បានប្រគល់សិទ្ធិនេះជូនលោក ម៉ៅ សុផាន់ កាលពីថ្ងៃទី២១ ខែមេសា ឆ្នាំ២០២៣។ 

សម្តេចតេជោ ហ៊ុន សែន កាលណោះជានាយករដ្ឋមន្រ្តី ប្រកាសចេញពីកម្មវិធីសាធារណៈមួយអំឡុងខែមីនា ឆ្នាំ២០២៣ ថា នៅពេលឯកឧត្តម ហ៊ុន ម៉ាណែត ចេញធ្វើនយោបាយ អ្នកដែលនឹងក្លាយជាមេបញ្ជាការកងទ័ពជើងគោក គឺលោក ម៉ៅ សុផាន់ មិនមែនលោក ហ៊ុន ម៉ានិត នោះទេ។ 

បច្ចុប្បន្ន លោក ម៉ៅ សុផាន់ ជាមេបញ្ជាការរងកងទ័ពជើងគោកស្រាប់ និងជាមេបញ្ជាការកងពលតូចលេខ៧០ ឯលោក ហ៊ុន ម៉ានិត ក៏ជាមេបញ្ជាការរងកងទ័ពជើងដែរ ដែលទើបទទួលការតែងតាំង បន្ថែមពីតួនាទីជាអគ្គនាយក នៃអគ្គនាយកដ្ឋានស្រាវជ្រាវ-ចារកិច្ចនៃក្រសួងការពារជាតិ៕

The post ឧត្តមសេនីយ៍ឯក ម៉ៅ សុផាន់ ចូលកាន់តំណែងអគ្គមេបញ្ជាការរង និងជាមេបញ្ជាការកងទ័ពជើងគោក បន្តពីឯកឧត្តមបណ្ឌិត ហ៊ុន ម៉ាណែត appeared first on .

ការបំពេញទស្សនកិច្ចរបស់គណៈប្រតិភូមន្រ្តីព្រឹទ្ធសភាអាមេរិកមកកាន់កម្ពុជា ឯកឧត្តមបណ្ឌិត ហ៊ុន ម៉ាណែត នាយករដ្ឋមន្រ្តី បានលើកឡើងថា ឆ្លុះបញ្ចាំងអំពីទំនាក់ទំនងល្អប្រសើររវាងកម្ពុជា-អាមេរិក។

ជាមួយគ្នានេះ ឯកឧត្តមបានថ្លែងអំណរគុណដល់ចំពោះរដ្ឋាភិបាល និងប្រជាជនសហរដ្ឋអាមេរិក ដែលកន្លងមកនេះបានដើរតួនាទីចូលរួមចំណែកក្នុងការកសាង និងអភិវឌ្ឍកម្ពុជា តាមរយៈការជួយដល់ដំណើរប្រជាធិបតេយ្យសេរីពហុបក្ស, ការបណ្តុះបណ្តាលធនធានមនុស្ស, ការបោសសម្អាតមីន និងការផ្តល់នូវទីផ្សារដ៏ទូលំទូលាយសម្រាប់ផលិតផលវាយនភណ្ឌ និងកាត់ដេររបស់កម្ពុជា តាមរយៈប្រព័ន្ធ GSP, ការផ្ដល់វ៉ាក់សាំងប្រឆាំងនឹងជំងឺកូវីដ-១៩, ការផ្តល់ជំនួយថវិកាសម្រាប់វិស័យសុខាភិបាល និងការស្តារសេដ្ឋកិច្ចឡើងវិញ។

ក្នុងជំនួបនោះ លោក អាឡិច ខានស៍ បានអបអរសាទរជូនចំពោះឯកឧត្តមបណ្ឌិត ហ៊ុន ម៉ាណែត ដែលត្រូវបានជ្រើសតាំងជានាយករដ្ឋមន្រ្តីនៃកម្ពុជា ដែលជាការបើកទំព័រថ្មីមួយឈានទៅរកការធ្វើឱ្យប្រសើរឡើងនៃទំនាក់ទំនងកម្ពុជា-អាមេរិក។

មន្រ្តីនៃព្រឹទ្ធសភាសហរដ្ឋអាមេរិករូបនេះ បានវាយតម្លៃខ្ពស់ទៅលើកិច្ចសហប្រតិបត្តិការអាមេរិក-កម្ពុជា ដែលមានចំណងការទូតដ៏យូរអង្វែងមកហើយ និងការចូលរួមរបស់សហរដ្ឋអាមេរិក តាមរយៈកម្មវិធីជំនួយអភិវឌ្ឍសង្គម, ការលើកកម្ពស់ផ្នែកសុខាភិបាល និងការអប់រំនៅកម្ពុជា។

ជាការឆ្លើយតប ឯកឧត្តមបណ្ឌិតនាយករដ្ឋមន្រ្តី បានគូសបញ្ជាក់ថា កម្ពុជាបើកទ្វារចំហ និងទទួលស្វាគមន៍ជានិច្ចនូវរាល់គំនិតផ្តួចផ្តើម និងកិច្ចសហប្រតិបត្តិការនានា ដែលធ្វើឱ្យកាន់តែប្រសើរឡើងនូវទំនាក់ទំនងកម្ពុជា-អាមេរិក។ កម្ពុជាពិតជាចង់បានទំនាក់ទំនងល្អជាមួយសហរដ្ឋអាមេរិក ដោយឈរលើមូលដ្ឋាននៃការគោរពគ្នា និងការផ្ដល់ផលប្រយោជន៍ឱ្យគ្នាទៅវិញទៅមក ដោយសំលឹងទៅមុខឱ្យលើសពីផលប្រយោជន៍នយោបាយតែមួយមុខ ។

ជាមួយគ្នានេះ ឯកឧត្តមបណ្ឌិត បានបន្ថែមថា គណៈរដ្ឋមន្ត្រីរបស់រាជរដ្ឋាភិបាល នីតិកាលទី៧ នៃរដ្ឋសភា ត្រៀមខ្លួនជាស្រេចក្នុងធ្វើការជាមួយសហរដ្ឋអាមេរិក ដើម្បីពង្រឹង និងពង្រីកបន្ថែមទៀតនូវទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ទាំងក្នុងក្របខណ្ឌទ្វេភាគី និងវេទិកាពហុភាគី ដើម្បីផលប្រយោជន៍រួមសម្រាប់ប្រជាជាតិទាំងពីរ។

ក្នុងជំនួបដែលធ្វើឡើងក្រោយឯកឧត្តមបណ្ឌិតឡើងកាន់តំណែងនាយករដ្ឋមន្រ្តីកម្ពុជាមិនដល់មួយខែផងនោះ ភាគីទាំងពីរ ក៏បានពិភាក្សាគ្នាបន្ថែមទៅលើកិច្ចការងារមួយចំនួនទៀត ពាក់ព័ន្ធទៅនឹងការពង្រឹងលទ្ធិប្រជាធិបតេយ្យ សេរីពហុបក្ស, បញ្ហាសិទ្ធិមនុស្ស, សន្តិសុខ, សុវត្ថិភាព និងការអភិវឌ្ឍសង្គម-សេដ្ឋកិច្ច៕

The post តើជំនួបរវាងឯកឧត្តម ហ៊ុន ម៉ាណែត និងមន្រ្តីព្រឹទ្ធសភាសហរដ្ឋអាមេរិក ជជែកអ្វីខ្លះ? appeared first on .

សកម្មភាពចុះជួបកម្មករតាមរោងចក្រជាលើកដំបូងនេះ បានធ្វើឡើងនៅរោងចក្រ ដែលមានមូលដ្ឋាននៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នៅព្រឹកថ្ងៃទី២៩ ខែសីហា ឆ្នាំ២០២៣។

ថ្លែងទៅកាន់ កម្មករ-កម្មការិនី និយោជិត តាមរោងចក្រ សហគ្រាស ជិត២ម៉ឺននាក់ ឯកឧត្តមបណ្ឌិត ហ៊ុន ម៉ាណែត នាយករដ្ឋមន្រ្តី បានឱ្យដឹងថា គោលបំណងចំនួន២ ដែលជួបជាមួយបងប្អូនកម្មករនិយោជិតនាថ្ងៃនេះ ក្នុងនោះទីមួយ គឺអរគុណចំពោះបងប្អូនកម្មករនិយោជិត និងម្ចាស់រោងចក្រនានា ដែលបានគាំទ្រ​គណបក្សប្រជាជនកម្ពុជា ក៏ដូចជារាជរដ្ឋាភិបាល និងបានចូលរួមជាផ្នែក​មួយយ៉ាងសំខាន់​ក្នុងការ​បង្កើតការងារ និងបំពេញការងារក្នុងវិស័យកាត់ដេរនៅក្នុងប្រទេស​កម្ពុជាឱ្យមានការ​រីកចម្រើន។ ចំណែកទី២ រាជរដ្ឋាភិបាលអាណត្តិថ្មីប្ដេជ្ញាចិត្ត​ចំពោះបងប្អូនប្រជាពលរដ្ឋ អំពីកម្មវិធីគោល​នយោបាយនានា​ដែលរាជរដ្ឋាភិបាលបានដាក់ចេញ។

នាឱកាសនោះ ឯកឧត្តមបណ្ឌិត ហ៊ុន ម៉ាណែត ក៏បានចាត់ទុកថា វិស័យឧស្សាហកម្មដើរទៅមុខ ដោយមានតួរអង្គ ៣ សំខាន់ គឺកម្មករនិយោជិត ម្ចាស់រោងចក្រ និងរាជរដ្ឋាភិបាល ខណៈឯកឧត្តមអះអាងថា បើគ្មានតួរអង្គទាំង៣នេះ គឺវិស័យរោងចក្រកាត់ដេរ និងវាយនភណ្ឌមិនអាចរីកចម្រើន​ទៅមុខបានទេ។

ហេតុនេះ តាមរយៈពិធីជួបសំណេះសំណាលនេះ ឯកឧត្តមបណ្ឌិត ហ៊ុន ម៉ាណែត ក៏បញ្ជាក់ថា រាជរដ្ឋាភិបាលអាណត្តិថ្មីគោលដៅ​ទី១សំខាន់ គឺថែរក្សាឱ្យបានដាច់ខាតនូវសមិទ្ធផល​ដែលគណបក្សប្រជាជនខិតខំកសាងជាង៤០ ឆ្នាំកន្លងមកនេះ ជាពិសេស ​គឺសន្ដិភាព និងស្ថិរភាពរបស់កម្ពុជា៕ អត្ថបទ៖ ពិសី

The post ឯកឧត្តម ហ៊ុន ម៉ាណែត ចុះជួបកម្មកររោងចក្រជាលើកដំបូង ក្រោយកាន់តំណែងជានាយរដ្ឋមន្រ្តីថ្មី appeared first on .

ឯកឧត្តម ហ៊ុន ម៉ាណែត បានបញ្ជាក់ថា រាជរដ្ឋាភិបាលអាណត្តិថ្មីគោលដៅទី១សំខាន់ គឺថែរក្សាឱ្យបានដាច់ខាតនូវសមិទ្ធផលដែលគណបក្សប្រជាជនខិតខំកសាងជាង៤០ ឆ្នាំកន្លងមកនេះ ជាពិសេស គឺសន្ដិភាព និងស្ថិរភាពរបស់កម្ពុជា។

ជាមួយគ្នានេះ ឯកឧត្តមបណ្ឌិត ហ៊ុន ម៉ាណែត បានបញ្ជាក់ថា គោលនយោបាយរបស់រាជរដ្ឋាភិបាល ដឹកនាំដោយគណបក្សប្រជាជនកម្ពុជា គឺមិនមែនជាគោលនយោបាយឆក់កណ្ដៀត ដូចគណបក្សនយោបាយមួយចំនួនដែលមានភាពមិនច្បាស់លាស់នោះទេ។ ប៉ុន្ដែគោលនយោបាយរបស់គណបក្សប្រជាជន គឺជាគោលនយោបាយច្បាស់លាស់ គ្រប់ជ្រុងជ្រោយ មាននិរន្តរភាព និងមានរយៈពេលយូរអង្វែងសម្រាប់អភិវឌ្ឍជាតិ មាតុភូមិ។

ដោយឯកឧត្តមបន្តថា៖« គោលនយោបាយរបស់គណបក្សប្រជាជន គឺជាគោលនយោបាយដើរ ដែលបានជំរុញនិរន្តរភាពសេដ្ឋកិច្ចដល់ប្រជាពលរដ្ឋ ពោលគឺជាគោលនយោបាយដែលមានគោលដៅវែងឆ្ងាយ មានមូលដ្ឋានច្បាស់លាស់ និងឆ្លងកាត់ការពិភាក្សា និងកំណែទម្រង់ល្អិតល្អន់ ហេតុនេះរាជរដ្ឋាភិបាល និងខិតខំពង្រីក និងអនុវត្តន៍គោលនយោបាយរបស់យើងឱ្យបានប្រសើរថែមទៀត»។

គួរបញ្ជាក់ថា ឯកឧត្តមបណ្ឌិត ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា មានប្រសាសន៍ដូច្នេះ នាឱកាសជួបសំណេះសំណាលជាមួយនឹងកម្មករប្រមាណ ១ម៉ឺន៨ពាន់នាក់ នៅក្នុងខណ្ឌពោធិ៍សែនជ័យរាជធានីភ្នំពេញ នៅព្រឹកថ្ងៃទី២៩ ខែសីហា ឆ្នាំ២០២៣៕ អត្ថបទ៖ ពិសី

The post ឯកឧត្តម ហ៊ុន ម៉ាណែត៖ គោលនយោបាយរបស់រដ្ឋាភិបាលថ្មី គឺជាគោលនយោបាយរឹងមាំ និងមានមូលដ្ឋានច្បាស់លាស់ appeared first on .

នាឱកាសនោះ ឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា ពេលនេះ ដំណើរការកសាងជាតិរបស់កម្ពុជា បានឈានដល់ដំណាក់កាលថ្មីមួយ នៅក្នុងបរិការណ៍នៃពិភពលោក ដែលកាន់តែប្រែប្រួល លំបាក និងមិនប្រាកដប្រជា។

ទន្ទឹមគ្នានេះ ឯកឧត្តមបណ្ឌិតបន្តថា៖«កម្ពុជាត្រូវ ប្រឈមនឹងបញ្ហាថ្មី ក្នុងអន្តរកាលឆ្ពោះទៅសម្រេចឋានៈជាប្រទេសមានចំណូលខ្ពស់ និងត្រូវសម្របជាប្រចាំ តាមនិន្នាការប្រែប្រួលសកល ដែលទាមទារនូវការយកចិត្តទុកដាក់ខ្ពស់ ចំពោះការលើកកម្ពស់ភាពជាអ្នកដឹកនាំ និងសមត្ថភាពស្ថាប័នគ្រប់កម្រិត ដោយផ្សារភ្ជាប់នឹងការធានា បាននូវគោលនយោបាយសមស្រប និងសមត្ថភាពអនុវត្តជាក់ស្ដែង, លទ្ធផលការងារ និង ការទទួលខុសត្រូវ»។

ឯកឧត្តម បណ្ឌិត បានលើកឡើងទៀតថា ឈរលើមូលដ្ឋាននេះ, ការគិតគូរអំពីរបៀបវារៈអភិវឌ្ឍសង្គម-សេដ្ឋកិច្ច សម្រាប់ដំណាក់កាលបន្ទាប់ គឺជាការសម្លឹងឆ្ពោះទៅសម្រេចបាននូវចក្ខុវិស័យកម្ពុជា ឆ្នាំ ២០៥០ ដោយ ផ្អែកលើបទពិសោធន៍ និងសមិទ្ធផល ២៥ ឆ្នាំកន្លងមក និងការវាយតម្លៃប្រមើលសម្រាប់ ២៥ ឆ្នាំទៅមុខ, ហើយរៀបចំឡើងនូវយុទ្ធសាស្ត្រ សម្រាប់អនុវត្ត ជាដំណាក់កាលៗ។

ជាងនេះទៀត ឯកឧត្តមបណ្ឌិតបន្តថា៖«សម្រាប់រយៈ ពេល២៥ ឆ្នាំបន្ទាប់ ដែលជាវដ្តថ្មី គឺកម្ពុជាមានមហិច្ឆតាចង់លើកស្ទួយមោទនភាពជាតិ ឱ្យឈានកាន់តែខ្ពស់ឡើង ដូចសម័យអង្គរ តាមរយៈការកសាងជាតិមួយឱ្យរឹងមាំ រស់រវើក, រុងរឿង និងមានវិបុលភាព ក្លាយជាប្រទេសមានចំណូលខ្ពស់ នៅត្រឹមឆ្នាំ២០៥០»។

គួរបញ្ជាក់ដែរថា តាមរយៈកិច្ចប្រជុំខាងលើ នាយរដ្ឋមន្រ្តីនៃកម្ពុជា ឯកឧត្តម បណ្ឌិត ហ៊ុន ម៉ាណែត ក៏បានអះអាងដែរថា ឈរលើមូលដ្ឋាននៃសមិទ្ធផល ដែលសម្រេចបានក្នុងរយៈពេល ២៥ ឆ្នាំ កន្លងមក និងការពិនិត្យវាយតម្លៃនិន្នាការតំបន់ និងសកល ជាមួយនឹងការប្រមើលទៅមុខ ២៥ ឆ្នាំទៀត គឺសំដៅឆ្លើយតបនឹងបំណងប្រាថ្នាប្រជាជន ឆ្ពោះទៅសម្រេចបាននូវ ចក្ខុវិស័យកម្ពុជា ឆ្នាំ ២០៥០ រាជរដ្ឋាភិបាលក៏បានដាក់ចេញ “យុទ្ធសាស្ត្របញ្ចកោណ” ដើម្បីជំរុញកំណើនសេដ្ឋកិច្ច, បង្កើតការងារ, ធានាសមធម៌, បង្កើនប្រសិទ្ធភាព និងរក្សាចីរភាពជាដើម៕  អត្ដបទ ៖ ពិសី

The post ឯកឧត្តម ហ៊ុន ម៉ាណែត៖ កម្ពុជាត្រូវប្រឈមនឹងបញ្ហាថ្មី ក្នុងអន្តរកាលឆ្ពោះទៅសម្រេចឋានៈជាប្រទេសមានចំណូលខ្ពស់ appeared first on .

សេចក្តីសម្រេចរបស់រាជរដ្ឋាភិបាលកម្ពុជា ដែលចុះហត្ថលេខាដោយឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត បានកំណត់របៀបរបបការងារ និងបែងចែកភារកិច្ចរបស់ថ្នាក់ដឹកនាំរាជរដ្ឋាភិបាល ក្នុងនោះតួនាទីឧបនាយករដ្ឋមន្រ្តី លោក នេត សាវឿន ទទួលបន្ទុកជានាយករដ្ឋមន្រ្តីស្តីទីពេលនាយករដ្ឋមន្រ្តីអវត្តមាន, ជួយនាយករដ្ឋមន្រ្តីលើវិស័យសន្តិសុខជាតិ និងសណ្តាប់ធ្នាប់សាធារណៈ, ក្នុងក្របខណ្ឌអន្តរក្រសួងជួយនាយករដ្ឋមន្រ្តីក្នុងការសម្របសម្រួលដឹកនាំកម្លាំងគ្រប់ប្រភេទ ដើម្បីការងារសន្តិសុខជាតិ និងសណ្តាប់ធ្នាប់សាធារណៈ និងទទួលសិទ្ធិពីនាយករដ្ឋមន្រ្តីក្នុងការបញ្ជាកងរាជអាវុធហត្ថលើផ្ទៃប្រទេសក្នុងពេលនាយករដ្ឋមន្រ្តីអវត្តមាន។

លើសពីនេះ លោក នេត សាវឿន ក៏ជួយតម្រង់ទិសដល់អាជ្ញាធរ គណៈកម្មាធិការក្រុមប្រឹក្សាដែលចំណុះឲ្យរាជរដ្ឋាភិបាលតាមការប្រគល់សិទ្ធិរបស់នាយករដ្ឋមន្រ្តី ព្រមទាំងទទួលបន្ទុកអនុវត្តការងារពិសេស ឬបេសកកម្មពិសេសផ្សេងទៀតដែលនាយករដ្ឋមន្រ្តីប្រគល់ជូន។

មានវ័យ ៦៣ឆ្នាំ លោក នេត សាវឿន គឺជាអតីតអគ្គស្នងការនគរបាលជាតិ នឹងធ្លាប់កាន់តំណែងអគ្គស្នងការរង បន្ទាប់មកឡើងកាន់តំណែងអគ្គស្នងការនគរបាលជាតិ ជំនួសលោក ហុក ឡង់ នៅក្នុងឆ្នាំ២០០៨៕

The post តើតួនាទីឧបនាយករដ្ឋមន្រ្តីលោក នេត សាវឿន បំពេញភារកិច្ចអ្វីខ្លះ? appeared first on .

ជុំវិញការទទួលបាននាយករដ្ឋមន្រ្តីថ្មីនៃប្រទេសទាំងពីរ សម្តេចតេជោ ហ៊ុន សែន ប្រធានឧត្តមក្រុមប្រឹក្សាផ្ទាល់ព្រះមហាក្សត្រ បានគូសបញ្ជាក់ថា ថ្ងៃនេះជាការគាប់ជួនខ្លាំងណាស់ដោយប្រទេសពីរកាន់របបរាជានិយមដូចគ្នានៅជិតខាងគ្នា កម្ពុជា និងថៃ ទទួលបាននាយករដ្ឋមន្រ្តីថ្មីក្នុងថ្ងៃតែមួយ។

ក្នុងបណ្តាញសង្គមតេឡក្រាមនាល្ងាចថ្ងៃទី២២ខែសីហា សម្តេចតេជោ ហ៊ុន សែន បានសរសេរយ៉ាងដូច្នេះថា «បើទោះបីខ្ញុំឈប់ធ្វើជានាយករដ្ឋមន្រ្តីកម្ពុជាចាប់ពីថ្ងៃនេះតទៅក៏ដោយ ខ្ញុំសូមផ្ញើសារអបអរសាទរជូនចំពោះឯកឧត្តម Srettha Thavisin ដែលត្រូវបានរដ្ឋសភា បោះឆ្នោតជ្រើសរើសជានាយករដ្ឋមន្រ្តីថ្មីរបស់ប្រទេសថៃ»។

បន្ថែមពីលើនេះសម្តេចតេជោអតីតនាយករដ្ឋមន្រ្តីកម្ពុជា ក៏បានបង្ហាញនូវក្តីសង្ឃឹមថា នាយករដ្ឋមន្រ្តីថ្មីទាំងពីរ នឹងធ្វើទំនាក់ទំនងជាមួយគ្នាដើម្បីជំរុញកិច្ចសហប្រតិបត្តិការរវាងប្រទសទាំងពីរឲ្យរីកចម្រើនទ្វេដងបន្ថែមទៀត៕

The post សម្តេចតេជោ ហ៊ុន សែន៖ នាយករដ្ឋមន្រ្តីថ្មីកម្ពុជា-ថៃ ទើបទទួលតំណែងថ្ងៃនេះនឹងជំរុញទំនាក់ទំនងទ្វេភាគីឲ្យកាន់តែរីកចម្រើនទ្វេដង appeared first on .