អ្នកឧកញ៉ា សំ សុខនឿន

អ្នកឧកញ៉ា បណ្ឌិត សំ សុខនឿន ចូលរួមពិធីបើកសិក្ខាសាលា ស្តីពី ការការពារសិទ្ធិអ្នកប្រើប្រាស់៖ ការអនុវត្តធុរកិច្ចប្រកបដោយបរិយាបន្ន

រ៉េត សុកធា — Sun, 15 Mar 2026 07:38:24 +0000

អ្នកឧកញ៉ា បណ្ឌិត សំ សុខនឿន សមាជិក សភាពាណិជ្ជកម្មកម្ពុជា បានចូលរួមពិធីបើកសិក្ខាសាលា ស្តីពី «ការការពារសិទ្ធិអ្នកប្រើប្រាស់៖ ការអនុវត្តធុរកិច្ចប្រកបដោយបរិយាបន្ន» និងការចូលរួមអបអរសាទរទិវាសិទ្ធិអ្នកប្រើប្រាស់ពិភពលោកឆ្នាំ២០២៦ ក្រោមប្រធានបទ «ផលិតផលមានសុវត្ថិភាព អ្នកប្រើប្រាស់មានទំនុកចិត្ត»។

ពិធីនេះធ្វើឡើង ក្រោមអធិបតីភាព លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មកម្ពុជា ប្រធានគណៈកម្មាធិការជាតិការពារអ្នកប្រើប្រាស់ «គ.ជ.ក.ប.» និងជាប្រធានគណៈកម្មាធិការប្រកួតប្រជែងកម្ពុជា «គ.ប.ក.» នៅព្រឹកថ្ងៃទី១៥ ខែមីនា ឆ្នាំ២០២៦។

បើយោងតាមក្រសួងពាណិជ្ជកម្ម បានឱ្យដឹងថា សិក្ខាសាលានេះ រៀបចំឡើងក្នុងគោលបំណងដើម្បីលើកកម្ពស់ការយល់ដឹងអំពីការការពារសិទ្ធិរបស់អ្នកប្រើប្រាស់ ពិសេសអ្នកប្រើប្រាស់ដែលជាជនងាយរងគ្រោះ ជនមានពិការភាព ក្នុងការជំរុញ និងពង្រឹងអំណាចរបស់អ្នកប្រើប្រាស់ (Consumer Empowerment) តាមរយៈការអនុវត្តធុរកិច្ចប្រកបដោយបរិយាបន្ន (Inclusive Business Practices) ដែលនឹងប្រើប្រាស់សិក្ខាសាលានេះជាវេទិកាសាធារណៈ ផ្តល់កិច្ចសន្ទនា (Public Private Dialogue) រវាងស្ថាប័នរដ្ឋ វិស័យឯកជន និងអ្នកប្រើប្រាស់ ព្រមទាំងបញ្ជ្រាបខ្លឹមសារចូលរួមអបអរសាទរ ទិវាសិទ្ធិអ្នកប្រើប្រាស់ពិភពលោកឆ្នាំ២០២៦៕

The post អ្នកឧកញ៉ា បណ្ឌិត សំ សុខនឿន ចូលរួមពិធីបើកសិក្ខាសាលា ស្តីពី ការការពារសិទ្ធិអ្នកប្រើប្រាស់៖ ការអនុវត្តធុរកិច្ចប្រកបដោយបរិយាបន្ន appeared first on .

គ្រាន់តែសៀវភៅអ្នកជំនួញល្បីឈ្មោះ សំ សុខនឿន ចេញភ្លាម ទទួលបានការគាំទ្រខ្លាំងទាំងអ្នករកស៊ី បុគ្គលល្បីឈ្មោះ និងឧកញ៉ារកស៊ីជំនួញធំៗ

monyokn — Sun, 24 Nov 2024 02:30:27 +0000

ក្រោយបញ្ចេញសៀវភៅ ១ម៉ឺនច្បាប់ «គ្រឹះនៃជីវិតអ្នកឧកញ៉ា សំ សុខនឿន ក្នុងមាគ៌ាអចលនទ្រព្យ» ជាផ្លូវការរួចមក ឃើញថាកំពុងទទួលបានការគាំទ្រយ៉ាងខ្លាំងពីអ្នកជំនួញ បុគ្គលល្បីៗ និងឧកញ៉ាលំដាប់កំពូលៗក្នុងស្រុក។

សៀវភៅរបស់អ្នកឧកញ៉ាបណ្ឌិត សំ សុខនឿន ប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP បានបោះពុម្ពសៀវភៅ «គ្រឹះនៃជីវិតអ្នកឧកញ៉ា សំ សុខនឿន ក្នុងមាគ៌ាអចលនទ្រព្យ» កាលពីអំឡុងដើមខែវិច្ឆិកា កន្លងទៅ។

គ្រាន់តែសៀវភៅអ្នកជំនួញល្បីឈ្មោះរូបនេះចេញភ្លាម ទទួលបានការគាំទ្រយ៉ាងខ្លាំងមិនថា អ្នកធ្វើការធម្មតាៗក្នុងក្រុមហ៊ុន អ្នករកស៊ី បុគ្គលល្បីឈ្មោះ ព្រមជាមួយឧកញ៉ាដែលរកស៊ីជំនួញធំៗដូចគ្នា ក៏ចាប់អារម្មណ៍ជាវសៀវភៅនោះដែរ។ ក្នុងនោះរួមមានលោក នៅ ស៊ីនិត ដែលមហាជនបានស្គាល់ហើយថា ជាវិស្វករ និងជាអ្នកម៉ៅការសំណង់ដ៏ល្បីល្បាញ និងជោគជ័យលើវិថីស្ថាបត្យកម្មនៅកម្ពុជាក៏បានជាវសៀវភៅដល់ទៅ ៥ក្បាលឯណោះ។

លោក នៅ ស៊ីនិត មានប្រសាសន៍ថា៖ «ខ្ញុំជាអ្នកគ្រាំទ្រម្នាក់របស់អ្នកឧកញ៉ាជាយូរមកហើយ នៅពេលដែលខ្ញុំដឹងថាអ្នកឧកញ៉ានិពន្ធសៀវភៅនេះ ខ្ញុំពិតជាចាប់អារម្មណ៍យ៉ាងខ្លាំងមែនទែន ដោយសារតែខ្ញុំចង់ដឹងនិងស្វែងយល់បន្ថែមអំពីគ្រឹះនៃជីវិតរបស់អ្នកឧកញ៉ា និងចង់រៀនសូត្រពីការវិនិយោគអចលនទ្រព្យ»។

មិនទាន់អស់ឡើយ នៅមានលោក ហួន លីហួរ ដែលជាបុគ្គលជោគជ័យប្រឡូកក្នុងវិស័យសំណង់ និងអចលនទ្រព្យដែរនោះ បានចាប់អារម្មណ៍ ហើយបានបញ្ជាក់ពីការគោរព កោតសរសើរការខិតខំតស៊ូរបស់អ្នកឧកញ៉ា ទាល់តែទទួលបានជោគជ័យក្លាយជាអ្នកជំនាញល្បីល្បាញម្នាក់ក្នុងវិស័យអចលនទ្រព្យ។ លោក ហួន លីហួរ បានជាវសៀវភៅ «គ្រឹះនៃជីវិតអ្នកឧកញ៉ា សំ សុខនឿន ក្នុងមាគ៌ាអចលនទ្រព្យ» មកសិក្សាស្វែងយល់បន្ថែម និងរៀនអំពីគន្លឹះជោគជ័យពីអ្នកឧកញ៉ា បន្ថែមទៀត ហើយក៏ជាការចូលរួមចំណែកសើកស្ទួយស្នាដៃតាក់តែងដោយកូនខ្មែរ ក៏ដូចលើកកម្ពស់ការអាននៅកម្ពុជា។

រីឯអ្នកឧកញ៉ា គឹម សុខអេង ម្ចាស់បុរី KK The Residence 598 និងបុរី KC ព្រែកព្នៅ ក៏បានជាវសៀវភៅ «គ្រឹះនៃជីវិតអ្នកឧកញ៉ា សំ សុខនឿន ក្នុងមាគ៌ាអចលនទ្រព្យ» ដោយថ្លែងបញ្ជាក់ថា អ្នកឧកញ៉ាចូលចិត្តអាននៅពេលទំនេរ ហើយជាពិសេសចូលចិត្តសិក្សាស្វែងយល់អំពីអចលនទ្រព្យ ដូចដែលមានក្នុងសៀវភៅនេះ ដូច្នេះហើយទើបអ្នកឧកញ៉ាសម្រេចជាវសៀវភៅដ៏ពិសិដ្ឋនេះ។

ចំណែកឧកញ៉ា អ៉ឹង លីហួត ដែលជាអ្នកជំនួញជោគជ័យ និងចាស់វស្សាម្នាក់នៅកម្ពុជា បានចូលរួមអំពាវនាវឲ្យមហាជនចូលរួមគាំទ្រស្នាដៃនិពន្ធរបស់កូនខ្មែរ ដ៏ឆ្នើមរូបនេះមកអាន ដើម្បីស្វែងយល់ពីបន្ថែម ជួយឲ្យមានគំនិតថ្មីៗក្នុងកិច្ចការងារប្រចាំថ្ងៃ។

សេដ្ឋីនីវ័យក្មេង ឡេង ដាវី ប្រធានក្រុមហ៊ុន Rithy Granite Cambodia ដែលជាកូនស្រីឧកញ៉ា ឡេង ឬទ្ធី អគ្គនាយកក្រុមហ៊ុន ឡេង ឬទ្ធី គ្រុប ក៏បានជាវសៀវភៅរបស់អ្នកឧកញ៉ាបណ្ឌិត សំ សុខនឿន ផងដែរ។ CEO ស្រីរូបនេះបញ្ជាទិញរហូតទៅដល់៥ ក្បាល ដាក់តាមសាខា និងក្រុមហ៊ុនរបស់លោកស្រី មិត្តភ័ក្តិ និងបុគ្គលិកបានអាន ដើម្បីកាន់តែច្បាស់ពីវិស័យជំនួញ។ បើទោះជាប្រឡូកក្នុងវិស័យជំនួញច្រើនឆ្នាំ តែសេដ្ឋីនី ឡេង ដាវី នៅតែត្រូវការអានសៀវភៅ ដើម្បីច្បិចយកចំណុចល្អមានក្នុងនោះ មកបង្គ្រប់បន្ថែមការអាជីពឲ្យកាន់តែប្រសើរ។

អ្នកជំនាញ និងអ្នកវិនិយោគក្នុងវិស័យអប់រំ ឧកញ៉ា ជា ដាណា អគ្គនាយកសាលាអន្តរជាតិ Westland International School និងអគ្គនាយកនៃក្រុមហ៊ុន Ritaro D&P Capital ក៏បានជាវសៀវភៅ «គ្រឹះនៃជីវិតអ្នកឧកញ៉ា សំ សុខនឿន ក្នុងមាគ៌ាអចលនទ្រព្យ»។ លោកឧកញ៉ាចាប់អារម្មណ៍លេីវិស័យអចលនទ្រព្យ ក៏ព្រោះថា បើទោះបីលោកបើកសាលាជាច្រើនសាខាក៏ពិតមែន ប៉ុន្តែភាពមានបានពិតប្រាកដកើតចេញពីអចលនទ្រព្យ។

សៀវភៅ «គ្រឹះនៃជីវិតអ្នកឧកញ៉ា សំ សុខនឿន ក្នុងមាគ៌ាអចលនទ្រព្យ» ជាសៀវភៅដែលយើងគួរតែអាន ដើម្បីបង្កើនចំណេះដឹងផ្នែកអចលនទ្រព្យ ហើយសៀវភៅនោះប្រៀបដូចជាទុនសំខាន់ ដែលអាចឲ្យមនុស្សម្នាក់ៗស្វែងយល់យ៉ាងត្រឹមត្រូវលើការវិនិយោគផ្សេងៗ៕

The post គ្រាន់តែសៀវភៅអ្នកជំនួញល្បីឈ្មោះ សំ សុខនឿន ចេញភ្លាម ទទួលបានការគាំទ្រខ្លាំងទាំងអ្នករកស៊ី បុគ្គលល្បីឈ្មោះ និងឧកញ៉ារកស៊ីជំនួញធំៗ appeared first on .

អ្នកឧកញ៉ា សំ សុខនឿន៖ ការដាក់លុយវិនិយោគជាមួយក្រុមហ៊ុនណាមួយ យកការប្រាក់ មិនមែនជាការវិនិយោគក្នុងវិស័យអចលនទ្រព្យនោះទេ

រ៉េត សុកធា — Thu, 03 Oct 2024 05:00:00 +0000

មួយរយៈចុងក្រោយនេះ នៅពេលដែលវិស័យអចលនទ្រព្យរងនូវផលប៉ះពាល់ មានព័ត៌មានជាច្រើន បានលេចចេញជាបន្ដបន្ទាប់ ជាពិសេសព័ត៌មាននៃការទិញដីខ្យល់ ឬការទិញដីមិនបានដី ទិញអចលនទ្រព្យមិនបានអចលនទ្រព្យ។ ត្រង់បញ្ហានេះ អ្នកឧកញ៉ា សំ សុខនឿន បានបញ្ជាក់ថា ទាំងនេះមិនមែនការវិនិយោគលើវិស័យអចលនទ្រព្យនោះទេ គឺជាការដាក់លុយដើម្បីទទួលបានការប្រាក់។

ផ្ដល់បទសម្ភាសន៍ពិសេសជាមួយឧកញ៉ាញូស៍ កាលពីពេលថ្មីៗនេះ អ្នកឧកញ៉ា សំ សុខនឿន ប្រធានក្រុមហ៊ុន SAM SN Realty និងជាអ្នកជំនាញអចលនទ្រព្យមួយរូបនៅកម្ពុជា បានលើកឡើងថា បងប្អូនមួយចំនួនតែងមានការយល់ច្រឡំថា ការដាក់លុយវិនិយោគជាមួយក្រុមហ៊ុនណាមួយ ដើម្បីបានការប្រាក់ច្រើន ជាការវិនិយោគក្នុងវិស័យអចលនទ្រព្យ ប៉ុន្ដែនេះមិនមែនជាការវិនិយោគលើវិស័យអចលនទ្រព្យនោះទេ។

អ្នកឧកញ៉ា បានបន្ដថា ក្រុមហ៊ុនមួយចំនួនបានរងនៅផលប៉ះពាល់ជាច្រើន នៅពេលដែលវិបត្តិអចលនទ្រព្យបានកើតមានឡើងនៅក្នុងប្រទេស បណ្ដាលឱ្យក្រុមហ៊ុនទាំងនោះ គ្មានចលនានៃការទិញលក់ បាត់បង់ហិរញ្ញវត្ថុ គ្មានលុយសម្រាប់ផ្ដល់ជាការប្រាក់ដល់ប្រជាពលរដ្ឋ ឬអ្នកវិនិយោគជាមួយគាត់វិញ។

អ្នកជំនាញរូបនេះ បានបន្ថែមថា វិបត្ដិលើវិស័យអចលនទ្រព្យរបស់ក្រុមហ៊ុនណាមួយ បានជះឥទ្ធិពលមិនល្អនោះទេ ដល់អ្នករកស៊ីលើវិស័យនេះក្នុងប្រទេសទាំងមូល ព្រោះថា នៅពេលដែលមានលេចលឺព័ត៌មានមិនល្អពីវិស័យអចលនទ្រព្យក្នុងប្រទេស ធ្វើឱ្យអ្នកវិនិយោគមកពីក្រៅប្រទេសមានការព្រួយបារម្ភ ហើយគិតអវិជ្ជមានទៅលើវិស័យអចលនទ្រព្យ ក៏ដូចជាការវិនិយោគនៅក្នុងប្រទេសកម្ពុជារបស់យើង។ ម្យ៉ាងវិញទៀតដោយសារតែព័ត៌មានមិនល្អទាំងនេះ បានក្លាយជាកត្ដាលីករជំរុញបង្អាក់សកម្មភាពនៃការចង់ចូលមកវិនិយោគ របស់វិនិយោគគិនក្រៅស្រុក។

លោកឧកញ៉ាគូសបញ្ជាក់ថា ប្រសិនបើសមាជិកណាមួយនៅក្នុងគ្រួសារជួបនៅបញ្ហា គឺនឹងអាចធ្វើឱ្យមានផលប៉ះពាល់ទៅលើក្រុមគ្រួសារទាំងមូល យ៉ាងណាមិញនៅក្នុងប្រទេសមួយ កាលណាក្រុមហ៊ុនណាមួយជួបនៅបញ្ហា ជួបនៅផលលំបាកផ្នែកហិរញ្ញវត្ថុ ឬជួបនឹងបញ្ហាប្រឈមទៅលើផ្លូវច្បាប់ដែលនាំឱ្យមានការជាប់ពន្ធធនាគារ ឬគ្មានលទ្ធភាពសងប្រាក់ ឬការប្រាក់ឱ្យអ្នកវិនិយោគ គឺនឹងរងផលប៉ះពាល់ដល់វិស័យអចលនទ្រព្យរបស់កម្ពុជាទាំងមូល ទោះបីមិនប៉ះពាល់ដោយផ្ទាល់ ក៏ប៉ះពាល់ដោយប្រយោលដែរ។

ជាមួយនឹងការព្រួយបារម្ភ លោកឧកញ៉ា សំ សុខនឿនថា ខ្ញុំតែងតែចែករំលែកចំណេះដឹងលើវិស័យអចលនទ្រព្យនេះលើបណ្ដាញសង្គមជាច្រើនហូរហែមកហើយ ហើយខ្ញុំមិនចង់ឱ្យក្រុមហ៊ុនណាមួយ អ្នកវិនិយោគណាមួយ រងផលប៉ះពាល់ ឬជួបវិបត្តិ ជាមួយនឹងវិស័យអចលទ្រព្យនោះទេ៕

The post អ្នកឧកញ៉ា សំ សុខនឿន៖ ការដាក់លុយវិនិយោគជាមួយក្រុមហ៊ុនណាមួយ យកការប្រាក់ មិនមែនជាការវិនិយោគក្នុងវិស័យអចលនទ្រព្យនោះទេ appeared first on .

អ្នកឧកញ៉ាបណ្ឌិត សំ សុខនឿន ចាប់ផ្តើមបោះពុម្ពសៀវភៅនិយាយពីជីវិតតស៊ូផ្ទាល់ខ្លួន ចេញលក់ជាផ្លូវការ

ឧកញ៉ាដែនដី — Wed, 18 Sep 2024 02:41:21 +0000

អ្នកឧកញ៉ាបណ្ឌិត សំ សុខនឿន ប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP បានប្រកាសបោះពុម្ពសៀវភៅ «គ្រឹះនៃជីវិត អ្នកឧកញ៉ា សំ សុខនឿន ក្នុងមាគ៌ាអចលនទ្រព្យ» ដែលនិយាយពីជីវិតតស៊ូរបស់ខ្លួន ចេញលក់ជាផ្លូវការហើយ ក្នុងតម្លៃមួយក្បាលត្រឹម ៥០ដុល្លារប៉ុណ្ណោះ។

អ្នកឧកញ៉ាបណ្ឌិត បានលើកឡើងលើទំព័រហ្វេសប៊ុក កាលពីថ្ងៃទី១៧ ខែកញ្ញា ម្សិលមិញ យ៉ាងដូច្នេះថា៖ “សៀវភៅ «គ្រឹះនៃជីវិត អ្នកឧកញ៉ា សំ សុខនឿន ក្នុងមាគ៌ាអចលនទ្រព្យ» ដែលមាន ២៣២ ទំព័រ ចាប់ផ្តើមបោះពុម្ពលក់ហើយ”។

តាមការបញ្ជាក់នាពេលកន្លងមក អ្នកឧកញ៉ាបណ្ឌិត សំ សុខនឿន ធ្លាប់បានឱ្យដឹងថា សៀវភៅមួយក្បាលនេះជាការឆ្លៀតពេលខិតខំសរសេរពីបទពិសោធន៍ជីវិតរបស់លោក ហើយលោកធ្វើឡើងមិនមែនដើម្បីប្រាក់ចំណេញនោះទេ តែដើម្បីចែករំលែកឱ្យសាធារណៈជនបានសិក្សាស្វែងយល់ជាប្រយោជន៍។

អ្នកឧកញ៉ាបណ្ឌិត ក៏ធ្លាប់បានបញ្ជាក់ផងដែរថា អត្ថន័យក្នុងសៀវភៅ ដែលត្រូវបានសម្រិតសម្រាំងនេះ គឺផ្អែកទាំងស្រុងលើការពិត និងការអនុវត្តជាក់ស្ដែងនាពេលកន្លងមក និងបានចំណាយពេលដ៏មមាញឹកពីការធ្វើជំនួញសរសេរសៀវភៅនេះឡើងជិតមួយឆ្នាំ ទុកគ្រាន់ជាស្នាដៃ និងបទពិសោធន៍ សម្រាប់យុវជនជំនាន់ក្រោយឈ្វេងយល់ក្នុងវិថីជំនួញអចលនទ្រព្យឱ្យទទួលបានភាពជោគជ័យ ពិសេសដើម្បីលើកកម្ពស់ការអាននៅក្នុងប្រទេសកម្ពុជាផងដែរ។

សូមជម្រាបថា សៀវភៅ «គ្រឹះនៃជីវិត អ្នកឧកញ៉ា សំ សុខនឿន ក្នុងមាគ៌ាអចលនទ្រព្យ» មានកម្រាស់ជាង ២៣០ទំព័រ។ ខ្លឹមសារសៀវភៅរៀបរាប់ពីជីវិតតស៊ូ ការកសាងសមត្ថភាព ផែនការអាជីវកម្ម ប្រមូលផ្តុំទស្សនៈ និងផ្នត់គំនិតវិជ្ជមាន ពិសេសយុទ្ធសាស្ត្រក្នុងការធ្វើជំនួញក្នុងវិស័យអចលនទ្រព្យ៕

The post អ្នកឧកញ៉ាបណ្ឌិត សំ សុខនឿន ចាប់ផ្តើមបោះពុម្ពសៀវភៅនិយាយពីជីវិតតស៊ូផ្ទាល់ខ្លួន ចេញលក់ជាផ្លូវការ appeared first on .

អ្នកឧកញ៉ា សំ សុខនឿន សូមផ្ញើសារជូនពរ និងអបអរសាទរ សម្តេចតេជោ ហ៊ុន សែន ដែលទទួលបានសញ្ញាបត្របណ្ឌិតកិត្តិយសផ្នែក «ភាពជាអ្នកដឹកនាំ និងការកសាងសន្តិភាព» ពីប្រទេសកូរ៉េ

រ៉េត សុកធា — Fri, 13 Sep 2024 05:43:29 +0000

អ្នកឧកញ៉ា សំ សុខនឿន សូមផ្ញើសារជូនពរ និងអបអរសាទរ សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ដែលទទួលបានសញ្ញាបត្របណ្ឌិតកិត្តិយសលើផ្នែក «ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យដុងហ្គុកវ៉ាយស៍ (Dongguk University WISE) នៅខេត្តឃ្យុងសាងបុកដូ សាធារណរដ្ឋកូរ៉េ នៅថ្ងៃទី១២ ខែកញ្ញា ឆ្នាំ២០២៤។

ពិធីប្រគល់ និងទទួលសញ្ញាបត្របណ្ឌិតកិត្តិយសរបស់សម្តេចតេជោ ហ៊ុន សែន ត្រូវបានធ្វើឡើងនៅខេត្តឃ្យុងសាងបុកដូ សាធារណរដ្ឋកូរ៉េ ក្នុងឱកាសសម្តេចតេជោ អញ្ជើញធ្វើបាឋកថា ស្តីពី «បទពិសោធន៍របស់កម្ពុជា ក្នុងការរំដោះជាតិ ការកសាងសន្តិភាព ការផ្សះផ្សា និងកសាងជាតិឡើងវិញ» ចន្លោះថ្ងៃទី១១-១៣ ខែកញ្ញា ឆ្នាំ២០២៤។

ការផ្តល់សញ្ញាបត្របណ្ឌិតកិត្តិយសដល់សម្តេចតេជោនៅពេលនេះ ជាការទទួលស្គាល់អំពីការលះបង់បូជាគ្រប់បែបយ៉ាង រួមទាំងការដាក់ទុនអាយុជីវិតរបស់សម្តេច ដើម្បីរំដោះជាតិពីក្រញ៉ាំនៃរបបប្រល័យពូជសាសន៍ និងការខិតខំកសាងជាតិឡើងវិញពីបាតដៃទទេ ទន្ទឹមនឹងការខិតខំកសាងសន្តិភាព ផ្សះផ្សា និងបង្រួបបង្រួមជាតិ ទម្រាំប្រទេសកម្ពុជាទទួលបានសុខសន្តិភាពពេញបរិបូរណ៍ មានឯកភាពទឹកដី មានកម្លាំងប្រដាប់អាវុធតែមួយនៅក្រោមដំបូលនៃរដ្ឋធម្មនុញ្ញតែមួយ។ សុខសន្តិភាពបច្ចុប្បន្ននេះ គឺជាសន្តិភាពពេញលេញ និងឯកភាពទឹកដី ដែលប្រជាជាតិកម្ពុជាពុំដែលបានស្គាល់ក្នុងប្រវត្តិសាស្ត្រ៥០០ឆ្នាំចុងក្រោយ។

សម្ដេចតេជោ ហ៊ុន សែន បានចាត់ទុកថា កិត្តិយសដ៏ឧត្តុង្គឧត្តមនេះជាសមិទ្ធផល និងកុសលរបស់ប្រជាពលរដ្ឋខ្មែរគ្រប់រូប ពិសេសកម្លាំងប្រដាប់អាវុធទាំងអស់គ្នា ដែលបានពលីជីវិតក្នុងបុព្វហេតុសន្តិភាព ឯករាជ្យ បូរណភាពទឹកដី និងភាពសុខសាន្តនៃប្រជាជាតិកម្ពុជា។

ឆ្លៀតក្នុងឱកាសដ៏ប្រពៃថ្លៃថ្លានេះ យើងខ្ញុំសូមបួងសួងដល់គុណបុណ្យ ព្រះរតនត្រ័យ កែវទាំងបី វត្ថុស័ក្ដិសិទ្ធិក្នុងលោក និងទេវតាឆ្នាំថ្មី សូមប្រោសប្រទានពរជ័យជូនចំពោះ សម្ដេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ព្រមទាំងបុត្រា-បុត្រី ចៅប្រុស-ចៅស្រីជាទីស្រឡាញ់ សូមបានសមប្រកបដោយពុទ្ធពរ និងពរទាំងប្រាំប្រការគឺ អាយុ វណ្ណៈ សុខៈ ពលៈ និងបដិភាណ កុំបីឃ្លៀងឃ្លាតឡើយ៕

The post អ្នកឧកញ៉ា សំ សុខនឿន សូមផ្ញើសារជូនពរ និងអបអរសាទរ សម្តេចតេជោ ហ៊ុន សែន ដែលទទួលបានសញ្ញាបត្របណ្ឌិតកិត្តិយសផ្នែក «ភាពជាអ្នកដឹកនាំ និងការកសាងសន្តិភាព» ពីប្រទេសកូរ៉េ appeared first on .

អ្នកឧកញ៉ាបណ្ឌិត សំ សុខនឿន បរិច្ចាគថវិកា ៥ពាន់ដុល្លារ ដល់ «មូលនិធិកសាងហេដ្ឋារចនាសម្ព័ន្ធតាមព្រំដែន»

ឧកញ៉ាដែនដី — Tue, 27 Aug 2024 01:11:36 +0000

អ្នកឧកញ៉ាបណ្ឌិត សំ សុខនឿន ប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP ចូលរួមបរិច្ចាគទឹកប្រាក់ចំនួន ៥,០០០ដុល្លារ ដល់ «មូលនិធិកសាងហេដ្ឋា រចនាសម្ព័ន្ធតាមព្រំដែន» ដើម្បីចូលរួមជាមួយរាជរដ្ឋាភិបាល សម្រាប់កសាងហេដ្ឋារចនាសម្ព័ន្ធនានា នៅតាម បណ្តោយព្រំដែន ដោយផ្ដោតលើការកសាងផ្លូវក្រវាត់ព្រំដែន។

ការចូលរួមបរិច្ចាគថវិការបស់ អ្នកឧកញ៉ា សំ សុខនឿន តបតាមការ ប្រកាសរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា សម្រេចបង្កើត «មូលនិធិកសាង ហេដ្ឋា រចនាសម្ព័ន្ធតាមព្រំដែន» ក្នុងគោលបំណងដើម្បី កៀរគរថវិកាបន្ថែម សម្រាប់កសាងហេដ្ឋារចនាសម្ព័ន្ធ នានា នៅតាមបណ្តោយព្រំដែន ព្រមទាំងបានផ្តល់ឱកាស ឱ្យប្រជាពលរដ្ឋខ្មែរគ្រប់មជ្ឈដ្ឋាន ទាំងក្នុង និងក្រៅ ប្រទេស បានចូលរួមចំណែកដោយផ្ទាល់ជាមួយ រាជរដ្ឋាភិបាល នៅក្នុងបុព្វហេតុការពារ និងអភិវឌ្ឍជាតិ ក្នុងស្មារតី មហាសាមគ្គីជាតិខ្មែរ ដើម្បីថែរក្សា សុខ សន្តិភាព អធិបតេយ្យ និងបូរណភាពទឹកដី ក៏ដូចជាការ ជំរុញ ការអភិវឌ្ឍ នៅតាមតំបន់ព្រំដែនឱ្យ បានកាន់តែ រឹងមាំ និងប្រកបដោយចីរភាព។

យោងតាមការជូនដំណឹងរបស់ខុទ្ធកាល័យសម្តេចធិបតី ហ៊ុន ម៉ាណែត នាព្រឹកថ្ងៃទី២៦ ខែសីហា ឆ្នាំ២០២៤ បានឱ្យដឹងថា ការបង្កើតមូលនិធិកសាងហេដ្ឋារចនាសម្ព័ន្ធតាមព្រំដែន ធ្វើឡើងក្នុងគោលបំណងដើម្បីកៀរគរ ថវិកា បន្ថែម សម្រាប់ កសាងហេដ្ឋារចនាសម្ព័ន្ធនានានៅតាមបណ្តោយព្រំដែន ព្រមទាំងបានផ្តល់ឱកាសឱ្យ ប្រជាពលរដ្ឋ ខ្មែរគ្រប់មជ្ឈដ្ឋាន ទាំងក្នុង និងក្រៅប្រទេស បានចូលរួមចំណែកដោយផ្ទាល់ជាមួយរាជរដ្ឋាភិបាល នៅក្នុងបុព្វហេតុរួមគ្នាកសាងនិងការពារមាតុភូមិរបស់យើង។

ជាមួយនឹងការជូនដំណឹងនេះ សម្តេចធិបតី ហ៊ុន ម៉ាណែត ក៏បានអំពាវនាវដល់បងប្អូនប្រជាពលរដ្ឋខ្មែរទាំង ក្នុងនិង ក្រៅប្រទេស មេត្តាចូលរួមបរិច្ចាគវិភាគទានឱ្យបានផុលផុសតាមការស្ម័គ្រចិត្តក្នុង «មូលនិធិកសាង ហេដ្ឋារចនាសម្ព័ន្ធ តាមព្រំដែន» សំដៅរួមគ្នាក្នុងធ្លុងមហាសាមគ្គីជាតិខ្មែរដើម្បីថែរក្សាសុខសន្តិភាព អធិបតេយ្យ ភាពជាតិ និងបូរណភាពទឹកដី ក៏ដូចជាការជំរុញការអភិវឌ្ឍតាមតំបន់ព្រំដែនឱ្យបានកាន់តែរឹងមាំ និងប្រកប ដោយ ចីរភាព។

សម្រាប់ការចង់ចូលរួមតាមរយៈសាច់ប្រាក់ គឺចូលរួមតាម លោក សេង ទៀង នាយករងខុទ្ទកាល័យ សម្តេច ធិបតីនាយករដ្ឋមន្ត្រី ទូរស័ព្ទលេខ 012 961 971។ ទីតាំង៖ នៅទីស្តីការគណៈរដ្ឋមន្ត្រី “អគារជាប់ ផ្លូវកម្ពុជា ក្រោម បន្ទប់លេខ ២០៦ ជាន់ទី២” ឬអាចបរិច្ចាគតាមរយៈគណនីធនាគារឈ្មោះ៖ «Foundation for Border Infrastructure Development»៕

The post អ្នកឧកញ៉ាបណ្ឌិត សំ សុខនឿន បរិច្ចាគថវិកា ៥ពាន់ដុល្លារ ដល់ «មូលនិធិកសាងហេដ្ឋារចនាសម្ព័ន្ធតាមព្រំដែន» appeared first on .

ឧកញ៉ា អាន ឌីណា ផ្ញើសារជូនឧកញ៉ា សំ សុខនឿន ក្នុងឱកាសដែល ព្រះមហាក្សត្រព្រះរាជទានគោរមងារ ជា «អ្នកឧកញ៉ា»

ឧកញ៉ាដែនដី — Wed, 03 Jul 2024 02:57:23 +0000

ឧកញ៉ា អាន ឌីណា អគ្គនាយក FSC Group បានផ្ញើសារ អបអរសាទរ ចំពោះលោកឧកញ៉ា សំ សុខនឿន ក្នុងឱកាស ដែលលោកឧកញ៉ាត្រូវបានព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះ រាជា ណាចក្រកម្ពុជា សព្វព្រះរាជហរទ័យព្រះរាជទាននូវគោរមងារជា «អ្នកឧកញ៉ា» នៅថ្ងៃទី២៦ ខែមិថុនា ឆ្នាំ២០២៤។

ឧកញ៉ា អាន ឌីណា និងបុគ្គលិក ព្រមទាំងសហការគ្រប់ជាន់ថ្នាក់ មានសេចក្តីសោមនស្សរីករាយ សូមបួងសួងជូនពរជ័យ សិរីមង្គល ប្រាជ្ញាឈ្លាសវៃ វិបុលសុខមហាប្រសើរ ថ្លៃថ្លា គ្រប់ប្រការ ជូនចំពោះ អ្នកឧកញ៉ា សំ សុខនឿន និង ក្រុមគ្រួសារ សូមមាន សុខភាពល្អបរិបូរណ៍ ពលានុភាពមាំមួន ជន្មាយុយឺនយូរ និង ទទួលបាន នូវ ជោគជ័យ រីកចម្រើន រុងរឿង ជានិរន្តរ៍៕

The post ឧកញ៉ា អាន ឌីណា ផ្ញើសារជូនឧកញ៉ា សំ សុខនឿន ក្នុងឱកាសដែល ព្រះមហាក្សត្រព្រះរាជទានគោរមងារ ជា «អ្នកឧកញ៉ា» appeared first on .

ព្រះមហាក្សត្រ ត្រាស់បង្គាប់ផ្តល់គោរមងារ «អ្នកឧកញ៉ា» ជូនឧកញ៉ាបណ្ឌិត សំ សុខនឿន

ឧកញ៉ាដែនដី — Sun, 30 Jun 2024 07:27:02 +0000

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានប្រោសព្រះរាជទានត្រាស់បង្គាប់ផ្តល់គោរមងារ ឧកញ៉ាបណ្ឌិត សំ សុខនឿន ជា «អ្នកឧកញ៉ា» នៅថ្ងៃទី២៦ ខែមិថុនា ឆ្នាំ២០២៤ តាមសេចក្តីក្រាបបង្គំទូលថ្វាយរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

ឧកញ៉ាបណ្ឌិត សំ សុខនឿន គឺជាប្រធានក្រុមប្រឹក្សាភិបាលក្រុមហ៊ុន SAM SN Group និងជាសមាជិកសមាគមឧកញ៉ាកម្ពុជា។ កាលចុងខែកុម្ភៈ ឆ្នាំ២០២៤ កន្លងទៅ លោកឧកញ៉ាបណ្ឌិត ក៏ទើបទទួលបានការតែងតាំងជា ទីប្រឹក្សារបស់ សម្តេចតេជោ ហ៊ុន សែន ប្រធានគណៈបក្សប្រជាជនកម្ពុជា។

អ្នកឧកញ៉ាបណ្ឌិត សំ សុខនឿន ជានិច្ចកាលតែងតែបង្ហាញវត្តមានក្នុងដំណើរទស្សនកិច្ចទៅកាន់បរទេសជាមួយថ្នាក់ដឹកនាំរាជរដ្ឋាភិបាល ក្នុងពេលបំពេញបេសកកម្មការទូត ពាណិជ្ជកម្ម និងវិនិយោគ។ អ្នកឧកញ៉ាបណ្ឌិត និងភរិយា ជាសប្បុរសជនដ៏សកម្មមួយរូប ដែលតែងតែបរិច្ចាគធនធានផ្ទាល់ខ្លួនជាច្រើន រួមចំណែកជាមួយសកម្មភាពរបស់រាជរដ្ឋាភិបាលក្នុងការជួយដល់សង្គម ដូចជា ការបរិច្ចាគថវិកាជូនដល់មន្ទីរពេទ្យគន្ធបុប្ផា និងការបរិច្ចាគថវិកាជូនដល់កាកបាទក្រហមកម្ពុជា ព្រមទាំងសកម្មភាពមនុស្សធម៌ជាច្រើនទៀត៕

The post ព្រះមហាក្សត្រ ត្រាស់បង្គាប់ផ្តល់គោរមងារ «អ្នកឧកញ៉ា» ជូនឧកញ៉ាបណ្ឌិត សំ សុខនឿន appeared first on .