កាលថ្ងៃទី២ ខែមេសា ឆ្នាំ២០២៦ លោក ស៊ុន ចាន់ថុល បានចុះជំរុញការរៀបចំ និងការអនុវត្តគម្រោងព្រែកជីកហ្វូណនតេជោ ចុះពិនិត្យផ្ទៀងផ្ទាត់ ទីតាំងត្រៀម រៀបចំពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ដែលមានទីតាំងស្ថិតនៅ ភូមិត្រើយឃ្លោក ឃុំដូងខ្ពស់ ស្រុកបូរីជលសារ ខេត្តតាកែវ។ ពិធីនេះក៏មានការចួលរួមពី ថ្នាក់ដឹកនាំក្រសួង ក្រសួង-ស្ថាប័នពាក់ព័ន្ធ ក្រុមហ៊ុនសាងសង់ និងមន្រ្តីជំនាញពាក់ព័ន្ធផងដែរ។

គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ នេះ នឹងត្រូវបើកការដ្ឋានសាងសង់នៅខេត្តតាកែវ ថ្ងៃទី១១ ខែមេសា ឆ្នាំ២០២៦ ខាងមុខនេះ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។

គួររម្លឹកថា ព្រែកជីកហ្វូណនតេជោ មានប្រវែង ១៨០គីឡូម៉ែត្រ (ទទឹងមុខកាត់ផ្នែកខាងលើប្រវែង ១០០ម៉ែត្រ ផ្នែកខាងក្រោម ៨០ម៉ែត្រ) តភ្ជាប់ពីព្រែកតាកែវ នៃទន្លេមេគង្គ រួចចូលតាមបណ្តាព្រែក នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន ខេត្តកណ្តាល តាកែវ កំពត និងកែប។ គម្រោងនេះ ត្រូវបានរដ្ឋាភិបាល ថានឹងជួយលើកកម្ពស់ការតភ្ជាប់ផ្លូវទឹកក្នុងប្រទេសទៅសមុទ្រជាតិ និងអន្តរជាតិ កាត់បន្ថយចម្ងាយ និងតម្លៃដឹកជញ្ជូន ជំរុញវិស័យធនធានទឹក កសិកម្ម ទេសចរណ៍ និងរួមចំណែកដល់ចក្ខុវិស័យកម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០៕ អត្ថបទ៖ហ្សាលីន

The post ឧបនាយករដ្ឋមន្ត្រី ស៊ុន ចាន់ថុល ចុះពិនិត្យនិងជំរុញការរៀបចំ និងការអនុវត្តគម្រោងព្រែកជីកហ្វូណនតេជោ appeared first on .

ឯកឧត្តម ស៊ុន ចាន់ថុល ថ្លែងបែបនេះ នៅក្នុងឱកាសអញ្ជើញជាអធិបតីក្នុងពិធីទទួលទានអាហារពេលព្រឹកធុរកិច្ចលើកទី១ រវាងស្ថាប័នរដ្ឋនិងវិស័យឯកជន ដោយមាន ក.អ.ក. ក្នុងនាមស្ថាប័នរដ្ឋ ជាម្ចាស់ផ្ទះរៀបចំកម្មវិធី កាលទី២ ខែមេសា ឆ្នាំ២០២៦។វេទិកាដ៏មានសារៈសំខាន់នេះ ត្រូវបានរៀបចំឡើងដោយក្រុមប្រឹក្សាអភិវឌ្ឍន៍កម្ពុជា ក្នុងគោលបំណងបើកទំព័រថ្មីនៃកិច្ចសន្ទនាដោយត្រង់ទៅត្រង់មក និងស៊ីជម្រៅ ដើម្បីជំរុញបរិយាកាសវិនិយោគនៅកម្ពុជាឱ្យកាន់តែមានភាពទាក់ទាញ និងប្រកបដោយបរិយាបន្ន។

ពិធីនេះក៏មានការអញ្ជើញចូលរួមពី រដ្ឋមន្ត្រីក្រសួងរ៉ែ និងថាមពល អនុប្រធានទី៣ នៃ ក.អ.ក. រួមជាមួយវត្តមានអង្គទូតនានាប្រចាំព្រះរាជាណាចក្រកម្ពុជា រួមមាន៖ ជប៉ុន សហភាពអឺរ៉ុប សហរដ្ឋអាម៉េរិក ចិន និងកូរ៉េ។ ក្រៅពីថ្នាក់ដឹកនាំជាន់ខ្ពស់ និងតំណាងអង្គទូត វេទិកានេះក៏ចូលរួមពីថ្នាក់ដឹកនាំសភាពាណិជ្ជកម្ម និងសមាគមធុរកិច្ចអន្តរជាតិឈានមុខ ដែលជាតួអង្គសេដ្ឋកិច្ចដ៏សំខាន់ រួមមាន ប្រធានសភាពាណិជ្ជកម្មអាម៉េរិក (AmCham), អឺរ៉ុប (EuroCham), ចិន (CCCC), កូរ៉េ (KOCHAM) និងសមាគមធុរកិច្ចជប៉ុន (JBAC) ព្រមទាំងសមាជិក សមាជិកា នៃស្ថាប័នពាក់ព័ន្ធជាច្រើនរូបទៀត។

ក្នុងឱកាសនោះ ឯកឧត្តម ក៏ជំរុញដល់តំណាងវិស័យឯកជនទាំងអស់ “កុំមានការស្ទាក់ស្ទើរ” ក្នុងការលើកឡើងនូវរាល់បញ្ហាប្រឈម ឧបសគ្គ ឬកង្វល់នានាដែលកំពុងជួបប្រទះក្នុងការធ្វើធុរកិច្ចនៅកម្ពុជា។ ឯកឧត្តមបានសង្កត់ធ្ងន់ថា រាជរដ្ឋាភិបាលចាត់ទុកវិស័យឯកជនជាដៃគូអភិវឌ្ឍន៍ដ៏ពិតប្រាកដ ដូច្នេះការជជែកពិភាក្សាដោយស្មោះត្រង់ គឺជាគន្លឹះតែមួយគត់ក្នុងការស្វែងរកដំណោះស្រាយរួមប្រកបដោយប្រសិទ្ធភាព ដើម្បីពង្រឹងជំនឿទុកចិត្ត និងធានានូវភាពជោគជ័យនៃគម្រោងវិនិយោគទាំងឡាយ។

ជាមួយគ្នានេះ តំណាងអង្គទូត និងសហគមន៍ធុរកិច្ចអន្តរជាតិរបស់តំណាងប្រទេសមហាអំណាចសេដ្ឋកិច្ចទាំងក្នុងតំបន់ និងសកលលោក ក្នុងកម្មវិធីតែមួយនេះ បានបង្ហាញយ៉ាងច្បាស់ពីទំនុកចិត្តយ៉ាងរឹងមាំមកលើស្ថិរភាពនយោបាយ និងសក្តានុពលសេដ្ឋកិច្ចរបស់កម្ពុជា។

សូមជម្រាប់ថា តាមរយៈកម្មវិធីខាងលើ ភាគីពាក់ព័ន្ធបានចាត់ទុកថា គឺជាសញ្ញាណវិជ្ជមានថ្មីមួយទៀតក្នុងការប្តេជ្ញាចិត្តសម្រេចឱ្យបាននូវចក្ខុវិស័យសេដ្ឋកិច្ចកម្ពុជា ឱ្យកាន់តែរុងរឿង និងមានភាពធន់ក្នុងតំបន់ និងសកលលោក៕ អត្ថបទ៖ហ្សាលីន

The post ឧបនាយករដ្ឋមន្ត្រី ស៊ុន ចាន់ថុល៖ រាជរដ្ឋាភិបាល ចាត់ទុកវិស័យឯកជនជាដៃគូអភិវឌ្ឍន៍ដ៏ពិតប្រាកដ appeared first on .

ក្រុមប្រឹក្សាអភិវឌ្ឍន៍កម្ពុជា កាលពីចុងសប្តាហ៍បានឱ្យដឹងថា ឧបនាយករដ្ឋមន្ត្រី ស៊ុន ចាន់ថុល បានដឹកនាំគណៈប្រតិភូកម្ពុជា ទៅជំរុញ និងទាក់ទាញវិនិយោគចិន(Investment Roadshow) នៅខេត្តហ៊ឺណាន និងទីក្រុងសៀងហៃ នៃសាធារណរដ្ឋប្រជាមានិចិន ដែលបានធ្វើឡើងចាប់ពីថ្ងៃទី១៦ ដល់ថ្ងៃទី២១ ខែមីនា ឆ្នាំ២០២៥។

ជុំវិញការទាកទាញវិនិយោគចិននេះដែរ ក្នុងឱកាសស្វាគមន៍ដំណើរទស្សនកិច្ចស្វែងយល់ពីបរិយាកាសវិនិយោគនៅកម្ពុជារបស់ប្រតិភូចិន កាលពីដើមខែមីនា ឆ្នាំ២០២៥ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍ ធ្លាប់បានលើកឡើងថា ការជំរុញ និងទាក់ទាញវិនិយោគ គឺជាមុខសញ្ញាវិនិយោគអាទិភាពរបស់កម្ពុជា ដើម្បីជំរុញកំណើនសេដ្ឋកិច្ចកម្ពុជា។

សូមជម្រាប់ថា នៅក្នុងឆ្នាំ២០២៤ កន្លងទៅនេះ កម្ពុជាទទួលបានការស្នើសុំ និង​អនុម័ត​គម្រោងជាផ្លូវការបានចំនួន ៤១៤គម្រោង ស្មើនឹងទឹកប្រាក់ជាង ៦,៨ ប៊ីលានដុល្លារ ខណៈរាជរដ្ឋាភិបាល អះអាងថា នេះគឺជាឆ្នាំដែល​មាន​ការវិនិយោគច្រើន​ជាងគេមិនធ្លាប់មាននៅកម្ពុជា។

រាជរដ្ឋាភិបាលកម្ពុជា ក៏បានប្តេជ្ញាថា នឹងបន្តផ្តល់ការ​លើកទឹកចិត្ត និងបង្កលក្ខណៈងាយស្រួល​សម្រាប់វិស័យឯកជន ដែលវិនិយោគ​លើការវិនិ​យោគ​ផលិតផលគាំទ្រខ្សែច្រវាក់ផលិតកម្ម ដើម្បីធានាដល់និរន្តរភាព និងកម្លាំងនៃការផលិតក្នុងស្រុក​ឱ្យ​កាន់តែសកម្ម មានតម្លៃទាប និងប្រសិទ្ធភាពខ្ពស់សម្រាប់បំពេញសេចក្តីត្រូវការក្នុងស្រុកផង និងនាំចេញផងដែរ៕ អត្ថបទ៖​ហ្សាលីន

The post ឧបនាយករដ្ឋមន្ត្រី ស៊ុន ចាន់ថុល ដឹកនាំគណៈប្រតិភូកម្ពុជា ទៅជំរុញនិងទាក់ទាញវិនិយោគចិន appeared first on .

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានដឹកនាំគណៈប្រតិភូកម្ពុជារួមមានអគ្គកុងស៊ុលកិត្តិយសកម្ពុជាប្រចាំទីក្រុងម៉ុងរ៉េអាល់,តំណាងក្រសួង-ស្ថាប័នពាក់ព័ន្ធ, តំណាងសមាគមឧកញ៉ាកម្ពុជា,តំណាងសភាពាណិជ្ជកម្មកម្ពុជា បានចូលរួមក្នុងកិច្ចប្រជុំតុមូលជាមួយ តំណាងរដ្ឋបាលខេត្តកេបិច, លោក Allan DeSousa អភិបាលតំបន់ Saint Laurent នៃក្រុងម៉ុងរ៉េអាល់, និងធុរជនជាច្រើនរូប ក្រោមកិច្ចសហការរៀបចំពីសភាពាណិជ្ជកម្មកម្ពុជាប្រចាំក្រុងម៉ុងរ៉េអាល់ និងអង្គភាព Investissement Québec International របស់កាណាដា។

ជំនួបដ៏សំខាន់នេះ បានផ្ដល់លទ្ធភាពឱ្យវិនិយោគិនថ្មីៗជាច្រើន មកពីវិស័យជាអាទិភាពចំនួន៥ រួមមានកសិកម្មនិងកសិឧស្សាហកម្ម, ឱសថ, ថាមពលកកើតឡើងវិញ, ទេសចរណ៍, និងបច្ចេកវិទ្យា ព្រមទាំងថ្នាក់ដឹកនាំនៃខេត្តកេបិច បានជ្រាបកាន់តែច្បាស់បន្ថែមទៀតអំពីសក្ដានុពលវិនិយោគនៅកម្ពុជាតាមរយៈការធ្វើបទបង្ហាញពីលោកឧបនាយករដ្ឋមន្ត្រីផ្ទាល់ ព្រមទាំងការលើកទឹកចិត្តនានារបស់រាជរដ្ឋាភិបាលកម្ពុជាក្រោមបទបង្ហាញរបស់ថ្នាក់ដឹកនាំនៃក្រុមប្រឹក្សាអភិវឌ្ឍន៍កម្ពុជា។ ពិសេសជាងនេះ អ្នកចូលរួមក៏បានស្ដាប់អំពីបទពិសោធន៍ជោគជ័យនៃកិច្ចវិនិយោគនៅកម្ពុជា ដែលចែករំលែកដោយក្រុមហ៊ុនកាណាដាដែលកំពុងបណ្ដាក់ទុនវិនិយោគរាប់ពាន់លានដុល្លារអាម៉េរិកនៅកម្ពុជា។

បន្ទាប់ពីកិច្ចប្រជុំតុមូលដែលមានការចូលរួមចែករំលែកបទពិសោធន៍ពីវិស័យឯកជនរួចរាល់ តំណាងរដ្ឋបាលខេត្តកេបិចក្នុងនាមរដ្ឋាភិបាលកាណាដា និងតំណាងរដ្ឋាភិបាលកម្ពុជាបានបន្តកិច្ចពិភាក្សាទ្វេភាគី ដែលជាលទ្ធផលបានឯកភាពនឹងបន្តគាំទ្រគ្នាទៅវិញទៅមកលើការរៀបចំកិច្ចសហការនានាដើម្បីជំរុញកំណើនការវិនិយោគឯកជនរវាងប្រទេសទាំងពីរបានកាន់តែច្រើនបន្ថែមទៀត។

នៅក្នុងឱកាសនោះ លោកឧបនាយករដ្ឋមន្ត្រី ក៏បានអញ្ជើញជាអធិបតីភាពក្នុងពិធីចុះហត្ថលេខាលើអនុស្សារណៈនៃការយោគយល់គ្នារវាងសមគមឧកញ៉ាកម្ពុជា តំណាងដោយអ្នកឧកញ៉ា ហ៊ុន ឡាក់ ជាសមាជិកក្រុមប្រឹក្សាភិបាលនិងជាអគ្គលេខាធិការនៃសមាគម ជាមួយស្ថាប័ន Excellence Industrielle Saint-Laurent (FISL) របស់ខេត្តកេបិច តំណាងដោយលោក Allan DeSousa ជាអភិបាលតំបន់ Saint Laurent នៃក្រុងម៉ុងរ៉េអាល់ ដើម្បីបង្កើតលក្ខខណ្ឌអំណោយផលដល់កិច្ចសហប្រតិបត្តិការនានា ក្នុងគោលដៅពង្រឹងការវិនិយោគទ្វេភាគី សម្របសម្រួលការផ្លាស់ប្តូរសេដ្ឋកិច្ច និងជំរុញការអភិវឌ្ឍគម្រោងអាជីវកម្មរួមគ្នារវាងតំបន់ Saint-Laurent នៃក្រុងម៉ុងត្រេអាល់ ខេត្តកេបិច ប្រទេសកាណាដា និងប្រទេសកម្ពុជាជារួម។

សូមជម្រាបជូនផងដែរថា នេះគឺជាអនុស្សារណៈទី៤ហើយដែលត្រូវបានចុះក្រោមអធិបិតីភាពឯកឧត្តមឧបនាយករដ្ឋមន្ត្រីអំឡុងពេលបំពេញបេសកកម្មគោះទ្វារវិនិយោគក្នុងសហរដ្ឋអាម៉េរិក និងកាណាដានាឱកាសនេះ៕

The post វិនិយោគិនកម្ពុជា និងកាណាដា យល់ព្រមចាប់ដៃគ្នាជំរុញកំណើនការវិនិយោគ appeared first on .

ក្នុងឱកាសជួបសំណេះសំណាលជាមួយបងប្អូនខ្មែរនៅប្រទេសកាណាដាកាលពីថ្ងៃទី២៧ ខែកញ្ញា ឆ្នាំ២០២៤ លោក ស៊ុន ចាន់ថុល បានឱ្យដឹងថា កិច្ចសំណេះសំណាលនេះ គឺដើម្បីបន្តការទាក់ទាញ និងជំរុញវិនិយោគពីកាណាដាទៅកម្ពុជាបានកាន់តែច្រើន ដើម្បីបង្កើតការងារជូនប្រជាពលរដ្ឋខ្មែរ ជំរុញកំណើនសេដ្ឋកិច្ចជាតិបន្ថែមទៀត។

ជាមួយគ្នានេះ លោកឧបនាយករដ្ឋមន្រ្តី ក៏បានជម្រាបជូនអំពីកិច្ចខិតខំប្រឹងប្រែងរបស់រាជរដ្ឋាភិបាលក្នុងបន្តកសាងហេដ្ឋារចនាសម្ព័ន្ធទាំងផ្នែករឹង និងទន់ពាសពេញផ្ទៃប្រទេស ក៏ដូចជាហេដ្ឋារចនាសម្ព័ន្ធតាមបណ្តោយព្រំដែនជាដើម។ ទន្ទឹមគ្នានេះ លោកក៏បានបន្តអំពាវនាវឱ្យបងប្អូនពលរដ្ឋខ្មែរទាំងអស់សហការគ្នាផ្សព្វផ្សាយសមិទ្ធផលដែលកម្ពុជាសម្រេចបាននាពេលកន្លងមក និងនាពេលបច្ចុប្បន្នផងដែរ។

បើតាមក្រុមប្រឹក្សាអភិវឌ្ឍន៍កម្ពុជា (CDC) បានប្រកាសថា តាមរយៈជំនួនបងប្អូនពលរដ្ឋខ្មែរនៅកាណាដានាពេលនោះ ឃើញថា ពលរដ្ឋដែលបានចូលរួមទាំងអស់បានបង្ហាញភាពសប្បាយរីករាយចំពោះភាពរីកចម្រើនលូតលាស់នៃសង្គមជាតិកម្ពុជា ក្រោយពីបានស្ដាប់ប្រសាសន៍របស់ប្រតិភូកម្ពុជាដោយផ្ទាល់ ពិសេសជាងនេះបងប្អូនពលរដ្ឋខ្មែរក៏បានជូនពរឱ្យដំណើរបេសកកម្មរយៈពេលប្រមាណ ២សប្ដាហ៍នេះទទួលបានលទ្ធផលជោគជ័យថែមទៀត។

សូមរម្លឹកដែរថា គិតមកដល់ពេលនេះ ដំណើរចេញទៅគោះទ្វារវិនិយោគនៅប្រទេសពិសេសសហរដ្ឋអាមេរិក និងកាណាដា ពីសំណាកប្រតិភូកម្ពុជា ដែលដឹកនាំដោយ លោក ស៊ុន ចាន់ថុល ឃើញថាទទួលបានផ្លែផ្កាគួរឱ្យកត់សម្គាល់ផងដែរ៕ អត្ថបទ៖ រង្សី

The post លោក ស៊ុន ចាន់ថុល ជំរុញឱ្យពលរដ្ឋខ្មែរនៅក្រៅប្រទេស សហការគ្នាផ្សព្វផ្សាយពីសមិទ្ធផលកម្ពុជា appeared first on .

ទស្សនកិច្ចរបស់ប្រតិភូកម្ពុជា នាពេលនេះ តបតាមការគោរពអញ្ជើញរបស់ថ្នាក់ដឹកនាំ ក្រុមហ៊ុន SpaceX ដើម្បីសិក្សាស្វែងយល់បន្ថែមអំពីទំនើបកម្មបច្ចេកវិទ្យាទំនើបថ្មីៗ ប្រព័ន្ធប្រតិបត្តិការផ្កាយរណប ក៏ដូចជារបៀបរបបនៃការបង្កើនប្រសិទ្ធភាពការងារ តាមរយៈការប្រើប្រាស់បច្ចេកវិទ្យាថ្មីៗជាច្រើនរបស់ក្រុមហ៊ុន ជាពិសេស ប្រតិបត្តិការក្រុមផ្កាយរណប Starlink ជាដើម។

ក្នុងអញ្ជើញបំពេញទស្សនកិច្ចឈ្វេងយល់អំពីទំនើបកម្មបច្ចេកវិទ្យាឈានមុខ ដល់ទីស្នាក់ការកណ្តាលក្រុមហ៊ុន SpaceX របស់លោក Elon Musk នេះ គេក៏ឃើញមានវត្តមាន ឯកឧត្ដម បួន សារៈមុនី រដ្ឋលេខាធិការក្រសួងពាណិជ្ជកម្ម និង អ្នកឧកញ៉ា ហ៊ុន ឡាក់ តំណាងសមាគមឧកញ៉ាកម្ពុជា រួមទាំងគណៈប្រតិភូអមដំណើរជាច្រើនរូបផ្សេងទៀតផងដែរ។

Starlink គឺជាក្រុមផ្កាយរណបអុិនធឺណិត ដែលផ្គត់ផ្គង់សេវាអុិនធឺណិតល្បឿនលឿនចល័តជាសកល គ្របដណ្តប់ជាង ១០០ប្រទេសនៅលើពិភពលោក។ ប្រតិបត្តិការនេះដំណើរការដោយ Starlink Services, LLC ជាក្រុមហ៊ុនបុត្រសម្ព័ន្ធរបស់ក្រុមហ៊ុន SpaceX។

គួរបញ្ជាក់ថា ប្រតិភូកម្ពុជា ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា កំពុងបន្តដំណើរទស្សនៈកិច្ចផ្លូវការពីរដ្ឋមួយទៅរដ្ឋមួយ និងជួបផ្លាស់ប្ដូរយោបល់ ជាពិសេសបង្ហាញពីឱកាសនៃការវិនិយោគ, វិធីសាស្រ្តគាំទ្រអាជីវកម្ម, និងការត្រៀម​ខ្លួន ​ដើម្បី​បម្រើ​វិនិយោគិន​ឱ្យបានទាន់ពេល និងបានបង្ហាញពីទីតាំងយុទ្ធសាស្ត្រសម្រាប់ ឱកាសវិនិយោគជូន សភាពាណិជ្ជកម្មអាមេរិច និងភាគីអាមេរិច ដែលជាម្ចាស់ផ្ទះ រៀបចំបដិសណ្ឋារកិច្ចយ៉ាងកក់ក្ដៅជូនប្រតិភូកម្ពុជា៕

The post ឯកឧត្ដម ស៊ុន ចាន់ថុល ដឹកនាំប្រតិភូកម្ពុជាបំពេញទស្សនកិច្ចដល់ស្នាក់ការកណ្ដាលក្រុមហ៊ុន SpaceX លោក Elon Musk appeared first on .

លោកថ្លែងបែបនេះ នៅកិច្ចសន្ទនារវាងរដ្ឋ និងឯកជនកម្ពុជា-អាម៉េរិកលើកទី១ ក្រោមវត្តមានលោកស្រី Bridgette L. Walker ភារធារីស្ថានទូតសហរដ្ឋអាម៉េរិកប្រចាំកម្ពុជា កាល​ថ្ងៃទី១៩ ខែកញ្ញា ឆ្នាំ២០២៤នេះ។ ខណៈកិច្ចសន្ទនានេះ ក៏មានការចូលរួមពីតំណាងក្រសួង-ស្ថាប័នពាក់ព័ន្ធ, ប្រធានសភា​ពាណិជ្ជកម្ម​អាម៉េ​រិកនៅកម្ពុជា, ក្រុមប្រឹក្សាធុរកិច្ច​សហរដ្ឋអាម៉េរិក-អាស៊ាន និងមានវិស័យឯកជន និងមន្ត្រី​ជំនាញជាច្រើនរូបផងដែរ។

កិច្ចសន្ទនារវាងរដ្ឋ និងឯកជនកម្ពុជា-អាម៉េរិកលើកទី១នេះ បានក្លាយជារបៀបវារៈថ្មី​នៃកិច្ច​សន្ទ​នា​​​ផ្លូវការដើម្បីស្ដាប់ និងពិភាក្សាដោះស្រាយរាល់កង្វល់នានារបស់វិនិយោគិនអាម៉េរិក ដោយ​អនុវត្ត​ក្រោមស្មារតី​សហការ និងឯកភាពរួមគ្នា​រវាងប្រមុខថ្នាក់ដឹកនាំកម្ពុជា ក្រោមការចង្អុល​បង្ហាញពីសម្ដេចធិបតីនាយករដ្ឋមន្ត្រី និងថ្នាក់ដឹកនាំសហរដ្ឋអាម៉េរិក។

នាឱកាសនោះលោកឧបនាយករដ្ឋមន្ត្រី ស៊ុន ចាន់ថុល បានសម្តែងនូវការស្វាគមន៍ជូន​ចំពោះ​វត្ត​មានរបស់លោកស្រីភារធារីស្ថានទូតសហរដ្ឋអាម៉េរិកប្រចាំកម្ពុជា និងគ្រប់ភាគីពាក់ព័ន្ធទាំងអស់​ដែលបានចំណាយពេលវេលាដើម្បីចូលរួមក្នុងកិច្ចសន្ទនាឱកាសនេះ។តាមរយៈកិច្ចសន្ទនានេះ លោក ក៏បានរំពឹងថានឹងទទួល​បាន​សញ្ញាណល្អពីវិនិយោគិនអាម៉េរិក ក្នុងអំឡុងបេសកកម្មគោះទ្វារវិនិយោគិននៅសហរដ្ឋ​អាម៉េរិក​ប្រមាណ ២សប្ដាហ៍ របស់ក្រុមប្រឹក្សាអភិវឌ្ឍន៍កម្ពុជា នៅក្នុងខែកញ្ញា ឆ្នាំ២០២៤នេះ។

លើកឡើងនាឱកាសនេះដែរ លោកស្រី Bridgette L. Walker បានបង្ហាញភាពរីករាយដែល​បាន​សហការ​រៀបចំកិច្ចសន្ទនារវាងរដ្ឋ និងឯកជនលើកទី១នេះ ដែលអាចរួមគ្នាពិនិត្យពិភាក្សា លើបរិយាកាស​វិនិយោគនៅកម្ពុជា ខណៈសហរដ្ឋអាម៉េរិក នឹងបន្តខិតខំធ្វើការរួមគ្នា ដើម្បីពង្រីកពាណិជ្ជកម្ម និងការវិនិយោគរវាងប្រទេសទាំងពីរ។ ទន្ទឹមគ្នានេះ លោកស្រី ក៏បានបង្ហាញសុទិដ្ឋិនិយមខ្ពស់នូវកិច្ចខិតខំរបស់កម្ពុជាក្នុងការទាក់ទាញវិនិយោគិន និងបេសកកម្មការងាររបស់ក្រុមប្រឹក្សាអភិវឌ្ឍន៍កម្ពុជាទៅសហរដ្ឋអាម៉េរិកនាសប្ដាហ៍ក្រោយនេះផងដែរ។

សូមបញ្ជាក់ដែរថា តាមរយៈកិច្ចសន្ទនាខាងលើនោះដែរ ក្រុមប្រឹក្សា​អភិ​វឌ្ឍន៍កម្ពុជា ក៏បានលើកពីយន្តការថែទាំវិនិយោគរបស់​រាជ​រដ្ឋាភិបាលកម្ពុជា ក្នុងការពង្រឹងជំនឿចិត្តរបស់តួអង្គពាក់ព័ន្ធ រួមមានវិស័យឯកជនទាំងមាន​ស្រាប់ និងវិនិយោគិនថ្មីៗ តាមរយៈបង្កើនប្រសិទ្ធភាពយន្តការសន្ទនារវាងរដ្ឋ និងឯកជនទាំងក្នុង​កម្រិតគោលនយោបាយ និងបច្ចេកទេស ដើម្បីជំរុញការពិភាក្សាស្វែងរកដំណោះស្រាយចំពោះ​បញ្ហាប្រឈមនានា អនុវត្តស្របតាមកម្មវិធីនយោបាយរបស់រាជរដ្ឋាភិបាលនីតិកាលទី៧ នៃរដ្ឋ​សភា និងយុទ្ធសាស្រ្តបញ្ចកោណ-ដំណាក់កាលទី១ ដើម្បីសង្គម-សេដ្ឋកិច្ចកម្ពុជាជាដើម៕ អត្ថបទ៖ រង្សី  

The post ឧបនាយករដ្ឋមន្ត្រី ស៊ុន ចាន់ថុល រំពឹងថានឹងទទួល​បាន​សញ្ញាណល្អពីវិនិយោគិនអាម៉េរិក appeared first on .

កិច្ចពិភាក្សាខាងលើ ធ្វើឡើងរវាងលោក TSUKASA SAKURADAN អគ្គនាយកក្រុមហ៊ុន AMIDA POWER Inc.  ជាមួយលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី២៧ ខែមិថុនា ឆ្នាំ២០២៤។

យោងតាមសេចក្តីប្រកាសពីក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ជំនួបពិភាក្សានេះ ត្រូវបានរៀបចំឡើងដើម្បីពិនិត្យលទ្ធភាពលើការដាក់ទុនវិនិយោគរបស់ក្រុមហ៊ុន ក្រោយបានសិក្សាអំពីកាលានុវត្តភាព និងសក្តានុពលលើវិស័យមួយចំនួននៅកម្ពុជា រួមមានដូចជា រ៉ែ ហេដ្ឋារចនាសម្ព័ន្ធផ្លូវល្បឿនលឿន ការស្តារលទ្ធភាពបឹងទន្លេសាប និងការចូលរួមអភិវឌ្ឍមូលធនមនុស្សផងដែរ។

ឆ្លៀតក្នុងឱកាសនេះដែរ លោកឧបនាយករដ្ឋមន្ត្រី ស៊ុន ចាន់ថុល បានសម្តែងនូវអំណរគុណដល់រដ្ឋាភិបាល និងប្រជាជនជប៉ុន ដែលតែងតែផ្តល់ជំនួយដល់កម្ពុជាលើគ្រប់វិស័យនៅគ្រប់កាលៈទេសៈ ជាពិសេសឆ្នាំ២០២៤នេះ ទំនាក់ទំនងរវាងកម្ពុជា និងជប៉ុន មានលក្ខណៈពិសេសចំនួនពីរនោះគឺ ខួបលើកទី៧០ឆ្នាំនៃទំនាក់ទំនងកិច្ចសហប្រតិបត្តិការការទូត និងការលើកកម្ពស់ទំនាក់ទំនងការទូតកម្ពុជា-ជប៉ុន ឱ្យទៅជា “ដៃគូយុទ្ធសាស្ត្រគ្រប់ជ្រុងជ្រោយ” ដែលជាទំនាក់ទំនងខ្ពស់បំផុតមិនធ្លាប់មាននៅក្នុងប្រវត្តិសាស្ត្រនៃទំនាក់ទំនងប្រទេសទាំងពីរ។

បើតាមអគ្គនាយកដ្ឋាន​គយ និង​រដ្ឋាករ បានបង្ហាញរបាយការណ៍នៃការធ្វើពាណិជ្ជកម្មរវាងប្រទេសទាំង២ ដោយគិតពីខែមករា រហូតដល់ខែវិច្ឆិកា ឆ្នាំ២០២៣ កម្ពុជាបាននាំចេញទំនិញ សរុបជាទឹកប្រាក់ប្រហែល ១,០៦ពាន់លានដុល្លារ ទៅកាន់ប្រទេសជប៉ុន ថយចុះពីឆ្នាំមុន ០,៣% ខណៈការនាំចូលទំនិញពីជប៉ុន ថយចុះ ១៩,៣% មកនៅត្រឹម ៥៧៣លានដុល្លារប៉ុណ្ណោះ។

ដោយឡែក សម្រាប់ទំនិញដែលកម្ពុជានាំចេញទៅកាន់ប្រទេសជប៉ុនរួមមាន សម្លៀកបំពាក់ កាបូប ស្បែកជើង គ្រឿងសង្ហារឹម ក្រដាស និងផលិតផលស្បែក ខណៈការនាំចូលពីជប៉ុនវិញ មានដូចជា គ្រឿងម៉ាស៊ីន រថយន្ត គ្រឿងអេឡិចត្រូនិច គ្រឿងសង្ហារឹម ក្រណាត់ និងប្លាស្ទិក។

សូមជម្រាបដែរថា ប្រទេសជប៉ុន គឺជាដៃគូពាណិជ្ជកម្មធំបំផុតទី០៥ របស់កម្ពុជា បន្ទាប់ពីប្រទេសចិន សហរដ្ឋអាមេរិក វៀតណាម និងប្រទេសថៃ៕ អត្ថបទ៖ រង្សី

The post ក្រុមហ៊ុនជប៉ុនមួយ កំពុងពិនិត្យលទ្ធភាពលើការដាក់ទុនវិនិយោគហេដ្ឋារចនាសម្ព័ន្ធផ្លូវល្បឿនលឿននៅកម្ពុជា appeared first on .

លោកថ្លែងដូច្នេះ នៅក្នុងជំនួបសម្ដែងការគួរសម និងពិភាក្សាការងារជាមួយលោកស្រី Ping M. Kitnikone ឯកអគ្គរដ្ឋទូតនៃប្រទេសកាណាដាប្រចាំកម្ពុជា កាលថ្ងៃចន្ទ ទី១៣ ខែឧសភា ឆ្នាំ២០២៤។

នាឱកាសនោះ លោកស្រីឯកអគ្គរដ្ឋទូតកាណាដា បានបង្ហាញសុទិដ្ឋិនិយមចំពោះសុខសន្តិភាព ស្ថេរភាព និងភាពរីកចម្រើនរបស់កម្ពុជា ក៏ដូចជាកិច្ចសហប្រតិបត្តិការល្អ រវាងប្រទេសទាំងពីរ កាណាដា-កម្ពុជា ពិសេសលើវិស័យពាណិជ្ជកម្មដែលមានភាពសកម្ម និងការវិនិយោគល្អ ជាឧទាហរណ៍ជាក់ស្ដែងដូចជាធនាគារ ABA របស់ប្រទេសកាណាដាជាដើម។

បន្ថែមពីនេះ លោកស្រី ក៏បានលើកឡើងអំពីការខិតខំប្រឹងប្រែងបន្ថែមទៀត ដើម្បីបន្តរក្សាបានកិច្ចសហប្រតិបត្តិការល្អរវាងប្រទេសទាំងពីរ ជំរុញពាណិជ្ជកម្ម និងការវិនិយោគ ក៏ដូចជាតភ្ជាប់ទៅក្នុងក្របខណ្ឌតំបន់ ដូចជាការរៀបចំកិច្ចព្រមព្រៀងពាណិជ្ជកម្មសេរីអាស៊ាន-កាណាដាជាដើម។

ឆ្លើយតបលើការលើកឡើងនេះ ឧបនាយករដ្ឋមន្ត្រី ស៊ុន ចាន់ថុល បានថ្លែងអំណរគុណដល់ប្រទេសកាណាដាដែលបានរួមចំណែកជួយដល់កម្ពុជា ក្នុងការកសាងកំណើនសេដ្ឋកិច្ច និងការអភិវឌ្ឍសង្គមនាពេលកន្លងមក ពិសេសកិច្ចសហប្រតិបត្តិការលើការជំរុញការវិនិយោគ និងពាណិជ្ជកម្ម។

បន្ថែមពីនេះ លោកថា៖«ចក្ខុវិស័យឆ្នាំ២០៥០ របស់រាជរដ្ឋាភិបាលកម្ពុជា គឺប្រែក្លាយកម្ពុជាជាប្រទេសមានចំណូលខ្ពស់ ដោយចំណុចសំខាន់ៗដែលអាចឱ្យចក្ខុវិស័យនេះអាចសម្រេចទៅបាន អាស្រ័យលើកម្ពុជាត្រូវពង្រឹងធនធានមនុស្ស ក៏ដូចជាពង្រីកការវិនិយោគផ្ទាល់ពីបរទេសលើគ្រប់វិស័យ ពិសេសលើវិស័យឧស្សាហកម្ម ដូចជាយានយន្ត គ្រឿងអេឡិកត្រូនិក គ្រឿងបង្គុំ និងការកែច្នៃម្ហូបអាហារជាដើម ដើម្បីធ្វើពិពិធកម្មឧស្សាហកម្ម ពង្រឹងសមត្ថភាពជំនាញ ព្រមទាំងបង្កើតតម្លៃបន្ថែមសម្រាប់ប្រជាពលរដ្ឋ»។

បន្ថែមពីនេះ លោកថា ដើម្បីសម្រេចចក្ខុវិស័យខាងលើនេះ រដ្ឋាភិបាលកម្ពុជា ក៏បាននិងកំពុងអនុវត្តផែនការជាច្រើនលើគ្រប់វិស័យ រួមទាំងការរៀបចំបណ្តុះបណ្តាលជំនាញវិជ្ជាជីវៈដល់យុវជនចំនួន ១,៥លាននាក់ជាដើម និងសម្រាប់ក្របខណ្ឌក្រុមប្រឹក្សាអភិវឌ្ឍន៍កម្ពុជា កិច្ចការងារគោះទ្វារវិនិយោគ និងការទាក់ទាញក្រុមហ៊ុនដែលមានសក្ដានុពលក្នុងប្រទេសនានាលើសកលលោក គឺជាបេសកកម្មសំខាន់ដែលស្ថាប័នបាននិងកំពុងអនុវត្តផងដែរ។

សូមបញ្ជាក់ដែរថា រយៈពេល៤ខែ ឆ្នាំ២០២៤ ពោលគឺចាប់ពីខែមករា ដល់មេសា ក្រុមប្រឹក្សាអភិវឌ្ឍកម្ពុជា បានអនុម័តគ​ម្រោ​ង​​សរុបបានចំនួន១២៨ គម្រោង ក្នុងទំហំទុនវិនិយោគសរុបមាន១.៩ពាន់លានដុល្លារអាមេរិក ចំនួននេះកើនឡើង ៩៧ភាគរយ បើប្រៀបធៀបនឹងរយៈពេលដូ​ចគ្នាកាលពីឆ្នាំ២០២៣។ ដោយឡែក ក្នុងរយៈពេល៨ខែ នៃរាជរដ្ឋាភិបាលអាណត្តិទី៧ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងសរុបបានចំនួន២៣២ ដែលមានទំហំទុនវិនិយោគសរុបមានជាង៥ពាន់លានដុល្លារអាមេរិក៕ អត្ថបទ៖ រង្សី

The post កម្ពុជា ត្រូវការពង្រីកការវិនិយោគផ្ទាល់ពីបរទេសលើគ្រប់វិស័យ ដើម្បីសម្រេចចក្ខុវិស័យឆ្នាំ២០៥០ appeared first on .

សូមបញ្ជាក់ថា នៅក្នុងដំណើរបេសកកម្មនេះ លោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា បានចាត់តាំង អ្នកឧកញ៉ា ហ៊ុន ឡាក់ អគ្គលេខាធិការសមាគមឧកញ៉ាកម្ពុជា ធ្វើជាតំណាងប្រធាន និងដឹកនាំប្រតិភូសមាគមឧកញ៉ាកម្ពុជា ចំនួន ៥រូប ដើម្បីចូលរួមក្នុងកម្មវិធីសំខាន់ៗដូចជា វេទិកាជំរុញការវិនិយោគកម្ពុជា-ជប៉ុនក្រោមប្រធានបទ «សេដ្ឋកិច្ចឌីជីថល និងខ្សែច្រវាក់ផ្គត់ផ្គង់បៃតង»។

បន្ថែមពីនោះ ប្រតិភូសមាគមឧកញ៉ាកម្ពុជា ក៏នឹងចូលជួបសម្ដែងការគួរសម និងបំពេញទស្សនកិច្ចតាមក្រសួង និងស្ថាប័នរដ្ឋ/ឯកជន ក៏ដូចជាជំនួបពិភាក្សាការងារធុរកិច្ច និងផ្គូផ្គងដៃគូធុរកិច្ចជាមួយបណ្ដាក្រុមហ៊ុនធំៗរបស់ជប៉ុនមួយចំនួនទៀតផងដែរ៕

The post ប្រតិភូសមាគមឧកញ៉ាកម្ពុជា នឹងចូលរួមអមដំណើរ ឧបនាយករដ្ឋមន្ត្រី ស៊ុន ចាន់ថុល ទាក់ទាញ និងជំរុញវិនិយោគនៅទីក្រុងតូក្យូ ប្រទេសជប៉ុន ពីថ្ងៃទី៦-១០ ខែឧសភា ឆ្នាំ២០២៤ appeared first on .