ថ្លែងនៅក្នុងឱកាសអញ្ជើញជាអធិបតីក្នុងពិធីបើក «ការតាំងពិព័រណ៍ផលិតផលខ្មែរ លើកទី៣» ក្រោមប្រធានបទ «រួមគ្នាផលិត រួមគ្នាប្រើផលិតផលជាតិ» កាលពីល្ងាចថ្ងៃទី៩ ខែមេសា ឆ្នាំ២០២៦ ឧបនាយករដ្ឋមន្រ្តីប្រចាំការ វង្សី វិស្សុត បានឆ្លើយតបទៅនឹងបញ្ហាប្រឈមរបស់អ្នកផលិតក្នុងស្រុក ដោយឯកឧត្ដមថា ភាពមានកម្រិតនៃការប្រើប្រាស់វត្ថុធាតុដើមក្នុងស្រុកក្នុងផលិតកម្ម គឺជាបញ្ហាប្រឈមសំខាន់មួយសម្រាប់អ្នកនាំចេញ និងសេដ្ឋកិច្ចជាតិតែម្តង។ ប៉ុន្តែការណ៍នេះក៏អាចត្រូវបានចាត់ទុកជាឱកាសសម្រាប់អ្នកផលិតក្នុងស្រុក និងប្រជាជនដើម្បីបំពេញនូវចន្លោះនិងគម្លាតទាំងនោះ ដែលនឹងចូលរួមបង្កើនតម្លៃបន្ថែម តម្លៃសេដ្ឋកិច្ច ការងារ និងប្រាក់ចំណូលនៅក្នុងសេដ្ឋកិច្ច និងជាពិសេសប្រាក់ចំណូលសម្រាប់ប្រជាជនកម្ពុជា។

ឯកឧត្ដមឧបនាយករដ្ឋមន្រ្តីប្រចាំការ បន្ថែមថា អ្នកផលិតតែឯងមិនអាចដោះស្រាយបញ្ហាប្រឈមនេះបានទេ បើសិនជាមិនមានការចូលរួមពីអ្នកប្រើប្រាស់ អ្នកផ្តល់សេវាគាំទ្រផលិតកម្ម អ្នកផ្តល់ហិរញ្ញប្បទាន និងស្ថាប័នរដ្ឋ។

ដូចនេះ យើងត្រូវរួមគ្នាធ្វើកិច្ចការដ៏សំខាន់នេះ ដើម្បីលើកកម្ពស់ការផលិត និងដើម្បីបង្កើនធាតុចូលក្នុងស្រុកទៅក្នុងផលិតផលនានាឱ្យបានច្រើន ហើយជាពិសេសការផ្សារភ្ជាប់ទៅកាន់ក្រុមហ៊ុនបរទេស ដែលមានទីផ្សារ និងអេកូឡូស៊ីល្អស្រាប់ ដែលនឹងបង្កើនតម្លៃបន្ថែម តម្លៃសេដ្ឋកិច្ច ការងារ ប្រាក់ចំណូល ទៅកាន់សេដ្ឋកិច្ច និងជាពិសេសសម្រាប់ប្រជាជនកម្ពុជា។ នេះគឺ ជាកត្តាធ្វើឱ្យកម្ពុជាអាចរឹងខ្លួនឯងបាន បន្តអភិវឌ្ឍដោយខ្លួនឯងបាន និងអាចឈរជើងយូរបានលើឆាកអន្តរជាតិ ដែលជាតម្រូវការ និងជាភាពចាំបាច់របស់ប្រជាជននេះ និងរបស់ជាតិនេះ។

ជាមួយគ្នានេះ ក្នុងរយៈពេលវែង ដើម្បីបន្តអភិវឌ្ឍសង្គមសេដ្ឋកិច្ច កម្ពុជាត្រូវប្រែប្រួលរចនាសម្ព័ន្ធសេដ្ឋកិច្ចពីពឹងផ្អែកលើកម្លាំងពលកម្មនិងការប្រើប្រាស់ទុន ទៅពឹងផ្អែកលើការកើនឡើងនៃផលិតភាពការងារ និងផលិតភាពសេដ្ឋកិច្ច ដោយសារលំហនៃកម្លាំងពលកម្មនិងការប្រើប្រាស់ទុនកាន់តែតូចទៅៗ ហើយសេដ្ឋកិច្ចយើងក៏ពុំទាន់ទាញយកប្រយោជន៍ពេញលេញពីការកើនឡើងនៃផលិតភាពផងដែរ៕

The post ឯកឧត្ដម វង្សី វិស្សុត៖ ដើម្បីបន្តអភិវឌ្ឍសង្គមសេដ្ឋកិច្ចជាតិ ក្នុងរយៈពេលវែង កម្ពុជាត្រូវប្រែប្រួលរចនាសម្ព័ន្ធសេដ្ឋកិច្ច appeared first on .

ថ្លែងនៅក្នុងឱកាសអញ្ជើញជាអធិបតីក្នុងពិធីបើក «ការតាំងពិព័រណ៍ផលិតផលខ្មែរ លើកទី៣» ក្រោមប្រធានបទ «រួមគ្នាផលិត រួមគ្នាប្រើផលិតផលជាតិ» កាលពីល្ងាចថ្ងៃទី៩ ខែមេសា ឆ្នាំ២០២៦ ឧបនាយករដ្ឋមន្រ្តីប្រចាំការ វង្សី វិស្សុត បានលើកឡើងថា សហគ្រាសធុនតូច និងមធ្យមនៅកម្ពុជា នៅតែជួបប្រទះនឹងបញ្ហាប្រឈម ជាច្រើន ដែលមានលក្ខណៈជារចនាសម្ព័ន្ធ និងបន្តបន្ទុចបង្អាក់ដល់ការបង្កើនផលិតភាព និងសមត្ថភាពប្រកួតប្រជែងរបស់សហគ្រាសកម្ពុជា។ ទន្ទឹមនេះ ការផ្សារភ្ជាប់រវាងក្រុមហ៊ុនមានប្រភពទុនវិនិយោគផ្ទាល់បរទេស និងអ្នកផ្គត់ផ្គង់ក្នុងស្រុក នៅមិនទាន់មានលក្ខណៈស៊ីជម្រៅនៅឡើយ និងនៅពឹងផ្អែកលើការនាំចូលខ្ពស់។

ឯកឧត្ដមឧបនាយករដ្ឋមន្រ្តីប្រចាំការបានបន្តថា អ្នកផលិតតែឯងមិនអាចដោះស្រាយបញ្ហាប្រឈមនេះបានទេ បើសិនជាមិនមានការចូលរួមពីអ្នកប្រើប្រាស់ អ្នកផ្តល់សេវាគាំទ្រផលិតកម្ម អ្នកផ្តល់ហិរញ្ញប្បទាន និងស្ថាប័ន រដ្ឋ ដែលត្រូវរួមគ្នាបង្កើតជាអេកូស៊ីស្ទេមគាំទ្រគ្នាទៅវិញទៅមកក្នុងការអភិវឌ្ឍសហគ្រាសធុនតូច មធ្យម និងធំ ឱ្យរស់រវើកនិងរឹងមាំ។ ក្នុងនោះ ស្ថាប័នរដ្ឋត្រូវដើរតួជាយុទ្ធសាស្ត្រវិទូ និងអ្នកកសាងបរិយាកាសអនុគ្រោះ
វិស័យឯកជនជាអ្នកកសាងតម្លៃ និងតម្លៃបន្ថែមក្នុងសេដ្ឋកិច្ច និងត្រូវមានការគាំទ្រពីបច្ចេកវិទ្យាទំនើប មនុស្សពូកែនិងមានជំនាញនិងឥរិយាបថការងារល្អ និងប្រព័ន្ធការងារដែលមានប្រសិទ្ធភាព។

ដូចនេះ យើងត្រូវរួមគ្នាធ្វើកិច្ចការដ៏សំខាន់នេះ ដើម្បីលើកកម្ពស់ការផលិត និងដើម្បីបង្កើនធាតុចូលក្នុងស្រុកទៅក្នុងផលិតផលនានាឱ្យបានច្រើន ហើយជាពិសេសការផ្សារភ្ជាប់ទៅកាន់ក្រុមហ៊ុនបរទេស ដែលមានទីផ្សារ និងអេកូឡូស៊ីល្អស្រាប់ ដែលនឹងបង្កើនតម្លៃបន្ថែម តម្លៃសេដ្ឋកិច្ច ការងារ ប្រាក់ចំណូល ទៅកាន់សេដ្ឋកិច្ច និងជាពិសេសសម្រាប់ប្រជាជនកម្ពុជា៕

The post ឧបនាយករដ្ឋមន្រ្តីប្រចាំការ វង្សី វិស្សុត៖ ក្នុងបរិការណ៍កម្ពុជាពង្រឹងខ្លួនឱ្យកាន់តែខ្លាំង ការរួមគ្នាផលិត រួមគ្នាប្រើផលិតផលជាតិ ពិតជាមានសារៈសំខាន់ appeared first on .

ការរៀបចំវេចនំអន្សមក្នុងពិធីបុណ្យចូលឆ្នាំថ្មីប្រពៃណីជាតិខ្មែរ សម្រាប់ផ្ញើជូនវីរកងទ័ពនាពេលនេះ គឺដើម្បីផ្សារភ្ជាប់ការរៀបចំពិធីបុណ្យចូលឆ្នាំថ្មី ដែលជាទំនៀមទម្លាប់ប្រពៃណីខ្មែរ និងជាមូលដ្ឋាននៃការពង្រឹងអត្តសញ្ញាណជាតិ ទៅនឹងការតបស្នងដឹងគុណចំពោះវីរកងទ័ពដ៏អង់អាចក្លាហាន ដែលបានខិតខំតស៊ូ និងហ៊ានលះបង់គ្រប់បែបយ៉ាង ដើម្បីបុព្វហេតុការពារបូរណភាពទឹកដី និងអធិបតេយ្យជាតិកម្ពុជា។

គូសបញ្ជាក់ដែរថា លោក នួន ផារ័ត្ន អភិបាលខេត្តកំពង់ធំ នឹងដឹកនាំមន្រ្តីរដ្ឋបាលខេត្ត ដើម្បីយកនំអន្សមទៅប្រគល់ជូនវីរកងទ័ពដែលកំពុងឈរជើងនៅតាមបណ្តោយព្រំដែន នៅថ្ងៃទី១៣ ខែមេសា ឆ្នាំ២០២៦ ក្នុងស្មារតីស្នេហាជាតិ សាមគ្គីឯកភាពជាតិ និងក្នុងស្មារតីសមរភូមិក្រោយឈរនៅពីក្រោយសមរភូមិមុខ យ៉ាងរឹងមាំ និងជាធ្លុងមួយ។

The post ឧបនាយករដ្ឋមន្ត្រី វង្សី វិស្សុត អញ្ជើញចូលរួមវេចនំអន្សមជាមួយមន្រ្តីរដ្ឋបាលខេត្តកំពង់ធំ ប្រជាពលរដ្ឋ និងសិស្សានុសិស្សសម្រាប់ផ្ញើជូនវីរកងទ័ពដែលឈរជើងនៅតាមបណ្ដោយព្រំដែន appeared first on .

ក្រុមការងារនឹងជួយរៀបចំផែនការអភិវឌ្ឍសហគមន៍ទេសចរណ៍ផាត់សណ្តាយ ដើម្បីទាក់ទាញភៀវទេសចរណ៍ជាតិនិងអន្តរជាតិឱ្យមកទស្សនាឃុំផាត់សណ្តាយឱ្យបានច្រើន ដើម្បីបង្កើតមុខរបរថ្មី និងប្រាក់ចំណូលបន្ថែម ព្រោះការប្រកបមុខរបរនេសាទត្រីតែមួយមិនអាចជួយធ្វើឱ្យបងប្អូនមានជីវភាពកាន់តែធូរធារបានទេ។

ឯកឧត្តមមានប្រសាសន៍លើកឡើងថា នៅក្នុងរយៈពេល ២ឆ្នាំមកនេះក្រុមការងារចុះមូលដ្ឋានខេត្តកំពង់ធំបានខិតខំប្រឹងប្រែង ដោយទឹកចិត្តបរិសុទ្ធនិងស្មោះត្រង់ និងតែងបានភ្ជាប់ការគិតគូរអំពីជីវភាពរបស់ប្រជាជន សេដ្ឋកិច្ច មុខរបរ និងប្រាក់ចំណូលរបស់ប្រជាជនខេត្តកំពង់ធំ ដោយរួមទាំងឃុំផាត់សណ្តាយរបស់ផងដែរ ក្នុងគោលដៅ៖ (១)-លែងឱ្យខេត្តកំពង់ធំ ជាខេត្តទៅហួស មកហួសទៀត ទាំងគម្រោងអភិវឌ្ឍន៍ ការវិនិយោគ ពាណិជ្ជកម្ម និងទេសចរណ៍ និង (២)- ប្រែក្លាយខេត្តកំពង់ធំទៅជា មូលដ្ឋានគាំទ្រដ៏រឹងមាំរបស់គណបក្សប្រជាជនកម្ពុជា ជាពិសេសចង់ឃើញសន្ទុះនៃកំណើនគាំទ្រ និងការជឿជាក់របស់បងប្អូន តាមរយៈការខិតខំ ការធ្វើអំពើល្អ និងលទ្ធផលការងារជាក់ស្តែង ដែលមានផលជះទៅលើជីវភាព និងការរស់នៅរបស់បងប្អូន។

យោងតាមឯកឧត្តម វង្សី វិស្សុត ខេត្តកំពង់ធំ មានផ្ទៃដីធំជាងគេនៅកម្ពុជា និងមានប្រជាជនប្រមាណ៧៣% ប្រកបរបរកសិកម្ម ហើយអាចនិយាយបានថា គឺមានតែកសិកម្មនេះឯង ដែលអាចធ្វើឱ្យសេដ្ឋកិច្ចខេត្តកំពង់ធំរីកចម្រើន ហើយធ្វើឱ្យបងប្អូនមានជីវភាពធូរធារ មានមុខរបរ និងប្រាក់ចំណូលល្អជាងមុន។ តែវិស័យកសិកម្មនេះ មិនមែនសំដៅតែទៅលើការធ្វើស្រែ ធ្វើចម្ការតែមួយមុខនោះទេ៕

The post ឯកឧត្តម វង្សី វិស្សុត លើកទឹកចិត្តដល់ពលរដ្ឋឃុំផាត់សណ្តាយ ងាកមកចិញ្ចឹមត្រីបន្ថែម ក្រៅពីប្រកបមុខរបរនេសាទ appeared first on .

ឯកឧត្តមថ្លែងបែបនេះនៅក្នុងកម្មវិធីវគ្គបណ្តុះបណ្តាលស្តីពីការប្រើប្រាស់បញ្ញាសិប្បនិម្មិត (AI) ជូនដល់ថ្នាក់ដឹកនាំ និងមន្ត្រីជំនាញពាក់ព័ន្ធកាលថ្ងៃទី១៧ ខែកុម្ភៈ។

ឯកឧត្តម វង្សី វិស្សុត សង្កត់ធ្ងន់ថា ក្នុងបរិការណ៍នៃការប្រកួតប្រជែងសកល ប្រទេសនីមួយៗ រួមទាំងប្រទេសកម្ពុជាត្រូវវិនិយោគលើ AI ដើម្បីបង្កើននូវឧត្តមភាពប្រកួតប្រជែង ទាំងលើទិដ្ឋភាពសេដ្ឋកិច្ច បច្ចេកវិទ្យា យោធា និងសង្គម ។

ឯកឧត្តមមានប្រសាសន៍ថា “ទោះបីកម្ពុជាមិនទាន់អាចឈានដល់កម្រិតបង្កើតបច្ចេកវិទ្យាថ្មី ដោយខ្លួនឯង ប៉ុន្តែយើងត្រូវហ៊ានវិនិយោគ ដើម្បីមានសមត្ថភាពអាចចាប់យកបច្ចេកវិទ្យា ដែលមានស្រាប់មកប្រើប្រាស់ ឱ្យអស់លទ្ធភាព និងឱ្យត្រូវតាមតម្រូវការប្រើប្រាស់ជាក់ស្តែង បើពុំដូច្នោះទេយើងនឹងដើរក្រោយគេឆ្ងាយ។ លើសពីនេះ យើងត្រូវរៀនសូត្រដើម្បីធ្វើជាម្ចាស់លើ AI មិនមែនគ្រាន់តែជាអ្នកប្រើប្រាស់នោះទេ ដោយ AI គឺជាជំនួយការដ៏ល្អ ប៉ុន្តែការសម្រេចចិត្តចុងក្រោយត្រូវផ្អែកលើបញ្ញា ,បទពិសោធ និងប្រាជ្ញាវិនិច្ឆ័យ របស់មនុស្ស”។

ជាទិសដៅការងារបន្តសម្រាប់ទីស្តីការគណៈរដ្ឋមន្ត្រី ឯកឧត្តមបានណែនាំឱ្យបង្កើត ក្រុមការងារដឹកនាំកម្មវិធី AI Application នៅក្នុងទីស្តីការគណៈរដ្ឋមន្ត្រី ដើម្បីសិក្សាពីចន្លោះខ្វះខាត និងរៀបចំផែនការប្រើប្រាស់ AI ក្នុងកិច្ចការប្រចាំថ្ងៃ ទៅតាមមុខងារនិងអង្គភាពដែលមានការចាំបាច់ ដើម្បីបង្កើនផលិតភាព គុណភាព និងប្រសិទ្ធភាពការងារ និងវិនិយោគលើការបណ្តុះបណ្តាលសមត្ថភាពមន្ត្រីឱ្យដើរទាន់បច្ចេកវិទ្យា ដោយចាត់ទុកថាជាការវិនិយោគដើម្បីអនាគតរបស់ស្ថាប័នក៏ដូចជាសម្រាប់ប្រទេស៕

The post ឯកឧត្តម វង្សី វិស្សុត៖ បច្ចេកវិទ្យា AI ជាកម្លាំងចលករយ៉ាងសំខាន់នៃកំណើនសេដ្ឋកិច្ច appeared first on .

ពិធីអបអរសាទរការវិនិយោគរបស់ក្រុមហ៊ុនអាម៉េរិក CRL បានធ្វើឡើងនាព្រឹកថ្ងៃទី១៥ ខែមករា ឆ្នាំ២០២៦ ដោយមានការអញ្ជើញជាអធិបតី ពីឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តី ទទួលបន្ទុកទីស្ដីការគណៈរដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ។

ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានថ្លែងអំណរគុណចំពោះក្រុមហ៊ុន CRL ដែលបានសម្រេចចិត្តវិនិយោគក្នុងខេត្តកំពង់ធំ ដែលជាចំណុចកណ្តាល និងមានលក្ខណៈជាយុទ្ធសាស្រ្តនៅកម្ពុជា។ ឯកឧត្តមបន្តថា គម្រោងវិនិយោគចិញ្ចឹមស្វានេះ នឹងនាំមកនូវអត្ថប្រយោជន៍ជាច្រើនជូនប្រជាពលរដ្ឋក្នុងខេត្តកំពង់ធំ និងប្រទេសកម្ពុជាទាំងមូល តាមរយៈការបង្កើតការងារថ្មីសម្រាប់ប្រជាពលរដ្ឋក្នុងមូលដ្ឋាន, ការបណ្តុះបណ្តាលជំនាញ និងបច្ចេកទេស, ការបង្កើនប្រាក់ចំណូល និងការធ្វើពិពិធកម្មសេដ្ឋកិច្ចជនបទ, ការនាំចូលបច្ចេកវិទ្យាទំនើប និងចំណេះដឹងវិទ្យាសាស្ត្រ, ការផ្លាស់ប្តូរចំណេះដឹង និងបទពិសោធវិទ្យាសាស្ត្រ, ការកែលម្អស្តង់ដាសុខភាពសត្វ និងសុវត្ថិភាពជីវសាស្ត្រ និងជាពិសេសការពង្រឹងខ្សែច្រវាក់ផ្គត់ផ្គង់ និងឧស្សាហកម្មពាក់ព័ន្ធទៅក្នុងតំបន់ និងសកល ក្នុងវិស័យជីវសាស្រ្ត និងសុខាភិបាល ដែលផ្តល់ប្រយោជន៍យ៉ាងធំធេងសម្រាប់មនុស្សជាតិនៅលើពិភពលោក។ គម្រោងវិនិយោគដ៏ធំនេះ គឺជាសមិទ្ធផលថ្មីមួយទៀតសម្រាប់ប្រជាពលរដ្ឋខេត្តកំពង់ធំ និយាយដោយឡែក និងនិយាយជារួម សម្រាប់ប្រជាជនកម្ពុជាទាំងមូល។

ឯកឧត្តម បានបន្ថែមថា គម្រោងវិនិយោគរបស់ក្រុមហ៊ុន CRL នាពេលនេះ ក៏ដូចជាគម្រោងវិនិយោគផ្សេងៗទៀត ទាំងជាគម្រោងរបស់រដ្ឋ និងទាំងវិស័យឯកជន ដែលគម្រោងខ្លះបាននិងកំពុងអនុវត្ត ហើយគម្រោងខ្លះទៀតកំពុងស្ថិតក្នុងដំណាក់កាលរៀបចំ ដូចជា សួនឧស្សាហកម្មចន្ទី, សួនកសិ-ឧស្សាហកម្ម និងការចិញ្ចឹមខ្យង់គុជ ព្រមទាំងគម្រោងអភិវឌ្ឍទេសចរណ៍ វារីវប្បកម្ម ឧស្សាហកម្មកែច្នៃស្រូវ កៅស៊ូ និងដំឡូងមីជាដើម គឺជាការបង្ហាញឱ្យឃើញថា ខេត្តកំពង់ធំកំពុងស្ថិតក្នុងចលនការវិជ្ជមាន ស្របតាមចក្ខុវិស័យរបស់ សម្ដេចធិបតី ហ៊ុន ម៉ាណែត គឺលែងឱ្យខេត្តកំពង់ធំ ជាខេត្តទៅហួស មកហួសទៀត ទាំងគម្រោងអភិវឌ្ឍន៍ ការវិនិយោគ ពាណិជ្ជកម្ម និងទេសចរណ៍។

លើសពីនេះ គម្រោងវិនិយោគដ៏ធំនេះ ក៏ជាបង្គោលចរដ៏សំខាន់មួយ (Milestone) នៃកិច្ចសហប្រតិបត្តិការដ៏ល្អ រវាងកម្ពុជានិងសហរដ្ឋអាម៉េរិក ក្នុងវិស័យកសិកម្ម វិទ្យាសាស្ត្រ ការស្រាវជ្រាវ និងពាណិជ្ជកម្ម ប្រកបដោយការទទួលខុសត្រូវ និងដើម្បីជាប្រយោជន៍នៃប្រទេសទាំងពីរ ក្នុងភាពជាដៃគូយុទ្ធសាស្ត្ររយៈពេលវែង។ គម្រោងនេះក៏ជាសញ្ញា ឬ សារជូនទៅសមាគមវិនិយោគិនអន្តរជាតិថា កម្ពុជាស្វាគមន៍រាល់ការវិនិយោគល្អៗ ពីគ្រប់មជ្ឈដ្ឋានទាំងអស់ ព្រមទាំងផ្ដល់ប្រព្រឹត្តិកម្មស្មើៗគ្នា ដោយមិនរើសអើង។

វត្តមានក្រុមហ៊ុន CRL នៅកម្ពុជានាពេលនេះ គូសបញ្ជាក់ឱ្យឃើញថា ប្រទេសកម្ពុជាបានក្លាយជាគោលដៅដ៏ទាក់ទាញមួយសម្រាប់វិនិយោគិនអាម៉េរិក ក្នុងការវិនិយោគលើវិស័យកសិកម្ម ឧស្សាហកម្មដែលមានតម្លៃបន្ថែម និងបច្ចេកវិទ្យាខ្ពស់ ក្រៅពីវិស័យកាត់ដេរ និងទេសចរណ៍។

ឯកឧត្តមឧបនាយករដ្ឋមន្ត្រីប្រចាំការ ក៏បានលើកឡើងផងដែរថា សហរដ្ឋអាម៉េរិក គឺជាដៃគូពាណិជ្ជកម្ម និងវិនិយោគដ៏សំខាន់មួយរបស់កម្ពុជា។ ក្នុងន័យនេះ ឯកឧត្តម បានបង្ហាញនូវជំនឿយ៉ាងមុតមាំថា បន្ទាប់ពីវត្តមានរបស់ក្រុមហ៊ុន CRL នៅក្នុងទឹកដីខេត្តកំពង់ធំ គឺនឹងបន្តមានក្រុមហ៊ុនអាម៉េរិកផ្សេងៗទៀត នឹងធ្វើការសម្រេចចិត្តបណ្តាក់ទុនវិនិយោគនៅកម្ពុជាជាបន្តបន្ទាប់ទៀត ហើយខេត្តកំពង់ធំ ក៏ដូចជាប្រទេសកម្ពុជាទាំងមូល បានត្រៀមខ្លួនជាស្រេចក្នុងការបន្តស្វាគមន៍រាល់ការវិនិយោគរបស់ក្រុមហ៊ុនអាម៉េរិក និងជំរុញពាណិជ្ជកម្មទ្វេភាគីឱ្យកាន់តែខ្លាំងក្លា បន្ទាប់ពីកម្ពុជាបានចុះហត្ថលេខាលើកិច្ចព្រមព្រៀងពាណិជ្ជកម្មបដិការជាមួយអាមេរិក ក្នុងឆ្នាំ២០២៥ កន្លងទៅ។

ក្នុងឱកាសនោះផងដែរ ឯកឧត្តម វង្សី វិស្សុត ក៏បានស្នើដល់ក្រុមហ៊ុន CRL និងអំពាវនាវដល់កសិដ្ឋានផ្សេងទៀត ដែលកំពុងធ្វើប្រតិបត្តិការចិញ្ចឹមស្វានៅកម្ពុជាទាំងអស់ ត្រូវដំណើរការប្រកបដោយតម្លាភាព និងអនុលោមតាមច្បាប់ឱ្យបានពេញលេញ ព្រោះការចិញ្ចឹមស្វាសម្រាប់ការនាំចេញ ក្នុងគោលដៅបម្រើដល់ការស្រាវជ្រាវវេជ្ជសាស្ត្រ និងជីវសាស្ត្រដែលមានស្តង់ដាកម្រិតសកល ដែលចាំបាច់ត្រូវអនុវត្តដោយគោរពយ៉ាងតឹងរ៉ឹង តាមស្តង់ដាអន្តរជាតិ នៃសុខុមាលភាពសត្វ, ក្របខ័ណ្ឌសុវត្ថិភាពជីវសាស្ត្រ, ក្រមសីលធម៌វិទ្យាសាស្ត្រ, ការការពារបរិស្ថាន និងធនធានធម្មជាតិជាដើម។

រូបភាព៖ Press OCM 

The post ក្រុមហ៊ុនឈានមុខអាម៉េរិក បានសម្រេចបោះទុនប្រមាណ៥០០ លានដុល្លារ វិនិយោគលើគម្រោងចិញ្ចឹមស្វានៅកម្ពុជា appeared first on .