សិក្ខាសាលាស្តីពីការធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា ឆ្ពោះទៅរកភាពធន និងនិរន្តរភាពរវាងកម្ពុជា-ជប៉ុន បានរៀបចំឡើងនៅថ្ងៃទី១៦ ខែមីនា ឆ្នាំ២០២៦ ក្រោមវត្តមាន លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន ដោយមានការអញ្ជើញចូលរួមពី លោក SANUI Kazumasa ប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុនប្រចាំនៅកម្ពុជា (JICA) ក្រសួងស្ថាប័នពាក់ព័ន្ធ និងវិស័យឯកជន ព្រមទាំងវាគ្មិនកិត្តិយសជាច្រើនរូបទៀត។

សិក្ខាសាលានេះ ត្រូវបានរៀបចំឡើង ជាវេទិកាសម្រាប់ការពិភាក្សាអំពីបញ្ហាប្រឈម និងកាលានុវឌ្ឍភាពក្នុងវិស័យភស្តុភារកម្មនៅកម្ពុជា ព្រមទាំងបង្ហាញអំពីទស្សនវិស័យនៃដំណើរឆ្ពោះទៅរកភាពធន់ និងនិរន្តរភាព ក្នុងការធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា ទាំងក្នុងវិស័យសាធារណៈ និងវិស័យឯកជន។

តាមរយៈសិក្ខាសាលានេះក៏មានគោលបំណងចែករំលែកនូវឧត្តមានុវត្តន៍ សម្រាប់ការបង្កើនប្រសិទ្ធភាពភស្តុភារកម្ម និងភាពធន់នៃខ្សែសង្វាក់ផ្គត់ផ្គង់ក្នុងតំបន់ ព្រមទាំងចែករំលែកអំពីវឌ្ឍនភាពនៃវិស័យភស្តុភារកម្មនៅកម្ពុជាផងដែរ។

គួរបញ្ជាក់ថា រាជរដ្ឋាភិបាលកម្ពុជាបានដាក់ចេញនូវផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ដែលក្នុងនោះចក្ខុវិស័យនៃផែនការមេគឺឈានទៅសម្រេចគោលបំណងធំចំនួន៤ រួមមាន៖ ១. ពង្រីក និងធ្វើឱ្យកាន់តែប្រសើរឡើងនូវវិសាលភាពគ្របដណ្តប់ និងសមត្ថភាពនៃប្រព័ន្ធហេដ្ឋារចនាសម្ព័ន្ធដឹកជញ្ជូន ២. ធ្វើឱ្យប្រសើរឡើងនូវប្រសិទ្ធភាព និងស័ក្តិសិទ្ធិភាពនៃសេវា និងហេដ្ឋារចនាសម្ព័ន្ធដឹកជញ្ជូន ៣. ជំរុញ និងលើកកម្ពស់ហេដ្ឋារចនាសម្ព័ន្ធដឹកជញ្ជូន សំដៅគាំទ្រគោលនយោបាយអភិវឌ្ឍន៍ជាតិ និង ៤. ពង្រឹងប្រសិទ្ធភាពសេវា និងចំណាយឡូជីស្ទីក។

ឆ្លើយតបនឹងផែនការមេខាងលើ ក្រសួងសាធារណការ និងដឹកជញ្ជូន ជាសេនាធិការរបស់រាជរដ្ឋាភិបាល បានខិតខំប្រឹងប្រែងកសាងហេដ្ឋារចនាសម្ព័ន្ធនានា ដើម្បីលើកកម្ពស់ការតភ្ជាប់ប្រព័ន្ធដឹកជញ្ជូនអន្តរមធ្យោបាយ និងឡូជីស្ទីក៕ អត្ថបទ៖ ហ្សាលីន

The post កម្ពុជា-ជប៉ុន ជំរុញធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា ឆ្ពោះទៅរកភាពធន់ និងនិរន្តរភាព appeared first on .

នាជំនួបនេះ សម្ដេចតេជោ ហ៊ុន សែន បានចែករំលែកនូវទស្សនៈទានមួយចំនួនដែលជាចក្ខុវិស័យ និងរំលឹកអំពីស្ថានភាពប្រវត្តិសាស្ត្រ និងការតស៊ូរបស់សម្ដេចក្នុងការរំដោះប្រទេសជាតិចេញពីរបបប្រល័យពូជសាសន៍ រួមទាំងការនាំកម្ពុជាមករកសន្តិភាពនៅចុងឆ្នាំ១៩៩៨ និងការអភិវឌ្ឍន៍ប្រទេសជាតិឱ្យមានការរីកចម្រើនជាបន្តបន្ទាប់។ ជាមួយគ្នានេះផងដែរ សម្ដេចតេជោក៏បានជម្រាបជូនប្រធានJICA ពីស្ថានភាពព្រំដែន កម្ពុជា-ថៃ ដែលជំហររបស់កម្ពុជា គឺធ្វើយ៉ាងណាចង់ឱ្យដោះស្រាយបញ្ហាដោយសន្តិវិធី និងការវិលត្រឡប់ទៅរកប្រក្រតីភាពឡើងវិញ។

ជុំវិញរឿងនេះ លោក TANAKA Akihiko បានសម្ដែងនូវក្តីរីករាយ និងអរគុណចំពោះសម្ដេចតេជោដែលបានមានប្រសាសន៍អំពីប្រវត្តិនៃការតស៊ូ នាំប្រទេសកម្ពុជាមករកសុខសន្តិភាព និងការរីកចម្រើន។ ឯកឧត្តមក៏បានរំលេចអំពីការពង្រីកកិច្ចសហប្រតិបត្តិការ ដែល JICA នឹងធ្វើបន្ថែមទៀត ជាមួយនឹងរាជរដ្ឋាភិបាលកម្ពុជា ហើយពាក់ព័ន្ធទៅនឹងបញ្ហាព្រំដែន លោកសង្ឃឹមថា ភាគីទាំងពីរ នឹងអាចឈានទៅរកការដោះស្រាយបញ្ហាដោយសន្តិវិធីនៅពេលខាងមុខ ហើយស្ថានភាពទំនាក់ទំនងរវាងប្រទេសទាំងពីរ នឹងវិលមករកប្រក្រតីភាពឡើងវិញ។

សូមជម្រាបដែរថា តាមរយៈជំនួបខាងលើ ភាគីទាំងពីរ ក៏បានលើកឡើងអំពីទំហំពាណិជ្ជកម្មរវាងប្រទេសទាំងពីរ កម្ពុជា-ជប៉ុន ដែលប្រទេសទាំងពីរគួរតែជំរុញបន្ថែមទៀត ក្នុងតួនាទីរបស់JICA ក្នុងការរួមចំណែកពង្រីកទំនាក់ទំនង នឹងទៅលើវិស័យសំខាន់ៗជាច្រើនទៀត រវាងកម្ពុជា និងជប៉ុនផងដែរ៕ អត្ថបទ៖ហ្សាលីន

The post JICA សង្ឃឹមថា កម្ពុជា-ថៃ នឹងអាចឈានទៅរកការដោះស្រាយបញ្ហាព្រំដែនដោយសន្តិវិធីឆាប់ៗនេះ appeared first on .

កិច្ចពិភាក្សានេះ បានធ្វើឡើងកាលពីថ្ងៃទី២៥ ខែមេសា ឆ្នាំ២០២២ ដោយមានការអញ្ចើញចូលរួមពីមន្ទីរ អង្គភាពជំនាញពាក់ព័ន្ធ ក្រុមការងារ JICA ដឹកនាំដោយឯកឧត្តម ហែម ពិសិដ្ឋ អភិបាលរងខេត្តស្វាយរៀង។

តាមរយៈកិច្ចពិភាក្សានេះ បានឲ្យដឹងថា គម្រោងនេះ គឺសាងសង់ឡើងក្រោមហិរញ្ញប្បទានឥតសំណងរបស់រដ្ឋាភិបាលជប៉ុន ។ ភាគីទាំងពីរ ក៏បានពិភាក្សារលើការងារពាក់ព័ន្ធនិងទីតាំងសំណង់ស្ថានីយ៍បូមទឹកឆៅ ដែលប្រើប្រាស់ប្រភពទឹកទន្លេវ៉ៃគោ ស្ថិតក្នុងសង្កាត់ព្រៃឆ្លាក់ ក្រុងស្វាយរៀង។​

កាលថ្ងៃទី ១១ ខែមីនា ឆ្នាំ២០២២ ជប៉ុនបានសម្រេចផ្ដល់ជំនួយឥតសំណងប្រមាណ ២៤លានដុល្លារ ដល់កម្ពុជា សម្រាប់ពង្រីកសមត្ថភាពប្រព័ន្ធផ្គត់ផ្គង់ទឹកស្អាត នៅខេត្តស្វាយរៀង។

កិច្ចព្រមព្រៀងជំនួយ ត្រូវបានចុះហត្ថលេខាដោយ​លោក​អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ និង លោកស្រី កាមេ ហារុកូ ប្រធានតំណាងទីភ្នាក់ងារសហប្រតិបតិ្តការអន្តរជាតិនៃប្រទេសជប៉ុន (JICA) ប្រចាំនៅកម្ពុជា។

គម្រោងនេះ នឹងបង្កើតសមត្ថភាពផ្គត់ផ្គង់ទឹកស្អាតរហូតដល់ ៦ ០០០ ម៉ែត្រគូបក្នុងមួយថ្ងៃ និងធ្វើអោយប្រសើរឡើងនូវការទទួលបានទឹកស្អាតក្នុងក្រុងស្វាយរៀង។

ការសាងសង់គម្រោងគម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាតខេត្តស្វាយរៀង នឹងត្រូវប្រើប្រាស់ពេល ចំនួន២៩ខែ ហើយគ្រោងនឹងបញ្ចប់នៅឆ្នាំ ២០២៤ខាងមុខ៕អត្ថបទ៖រង្សី

The post កម្ពុជានិងជប៉ុន ចាប់ផ្តើមសិក្សាប្លង់បច្ចេកទេសប្រព័ន្ធផ្គត់ផ្គង់ទឹកស្អាត តម្លៃ ២៤លានដុល្លារ ក្នុងខេត្តស្វាយរៀង appeared first on .

តាមរយៈកិច្ចសហប្រតិបត្តិការរវាងសាលារាជធានីភ្នំពេញ ជាមួយ​ទីភ្នាក់ងារសហប្រតិបត្តិការអន្តរជាតិជប៉ុន JICA ក្រោមជំនួយរបស់រាជរដ្ឋាភិបាលជប៉ុននោះ បានជួយឲ្យរាជធានីភ្នំពេញគេចផុតពីការគំរាមកំហែងដោយទឹកជំនន់ និងបានជួយកសាងប្រព័ន្ធលូកាន់តែល្អប្រសើរសម្រាប់រំដោះជំនន់ទឹកភ្លៀង។

ក្នុង​រយៈ​ពេល ២០ ឆ្នាំ​នេះ​តាំង​ពី​ឆ្នាំ​២០០២ រដ្ឋាភិបាល​ជប៉ុន​បានអនុវត្តន៍គម្រោងការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញចំនួន៤លើកហើយ។

គម្រោងការពារទឹកជំនន់ និងកែលម្អប្រព័ន្ធប្រឡាយ-លូទាំង ៤ លើកដែល​បាន​អនុវត្ត​ក្នុងរាជធានីភ្នំពេញ​ជា​បន្ត​បន្ទាប់​​តាម​រយៈ​ជំនួយ​រដ្ឋាភិបាល​ជប៉ុន​មាន​៖

-គម្រោងអទិភាពទី១៖ គឺគម្រោងការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញ ជំហានទី១ ក្រោមជំនួយឥតសំណងរបស់ប្រទេសជប៉ុន ពីខែធ្នូ ឆ្នាំ២០០២ ដល់ខែកញ្ញា ឆ្នាំ២០០៤។ ជាលទ្ធផលគម្រោងនេះបានជួយសម្រាល និងកាត់បន្ថយជំនន់ទឹកភ្លៀង ដែលធ្លាប់តែជន់លិចត្រាំត្រែងនៅប៉ែកខាងត្បូង រាជធានីភ្នំពេញ នៅផ្នែកខ្លះនៃខណ្ឌទួលគោក ខណ្ឌចំការមន និងខណ្ឌមានជ័យ ជាពិសេសបានការពារផ្នែកខាងត្បូងរាជធានីភ្នំពេញ ពីការគម្រាមកំហែងដោយទឹកជំនន់ពីប្រព័ន្ធទន្លេមេគង្គ ដោយទំនប់បឹងទំពុនត្រូវបានជួសជុល និងពង្រឹង និងជាបន្ទាប់មកទៀត ក៏បានក្លាយជាផ្លូវវាងមួយដ៏សំខាន់នៅប៉ែកខាងត្បូងរាជធានីភ្នំពេញ។

-គម្រោងអទិភាពទី២៖ ក្រោមជំនួយឥតសំណងរបស់ប្រទេសជប៉ុន គឺគម្រោងការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញ ជំហានទី២ ដែលបានអនុវត្តពីខែតុលា ឆ្នាំ២០០៧ ដល់ខែកុម្ភៈ ឆ្នាំ២០១០ ហើយដែលគម្រោងជំហានទី២នេះ បានជួយសម្រាល និងកាត់បន្ថយជំនន់ទឹកភ្លៀងនៅតំបន់កណ្តាល និងខាងកើតរាជធានីភ្នំពេញ ដូចជានៅជុំវិញតំបន់វត្តភ្នំ ជុំវិញផ្សារថ្មី ផ្សារកណ្តាល ជុំវិញព្រះបរមរាជវាំង និងសារមន្ទីរជាតិ ជាពិសេសមុខអតីតរដ្ឋសភាជាតិ ដែលឧស្សាហ៍ជន់លិចដោយទឹកភ្លៀងជារឿយៗក្នុងរដូវវស្សាកន្លងមក ដោយបានសាងសង់ស្ថានីយបូមទឹក និងអាងស្តុកទឹកក្រោមដីចំនួន៤កន្លែង ក្រោមសួនច្បារតាមដងទន្លេសាប និងជីកដាក់បណ្តាញ​លូ​មេសំខាន់ៗតាមដងផ្លូវមួយចំនួន ដើម្បីប្រមូលទឹកភ្លៀងឲ្យហូរបានលឿនមកអាងស្តុកទឹកក្រោមដីទាំងនោះ ដើម្បីបូមបញ្ចេញទៅទន្លេបានទាន់ពេលវេលា។

ដើម្បីលើកកំពស់សោភ័ណភាព និងបរិស្ថានតាមដងទន្លេសាប និងមុខព្រះបរមរាជវាំង កំណាត់ច្រាំងទន្លេសាបចំនួន២កន្លែង ដែលបានខូចខាត និងបាក់ស្រុត ក៏ត្រូវបានលើកបញ្ចូលក្នុងគម្រោងដើម្បីធ្វើការជួសជុល ហើយជាពិសេសទៅទៀត ទឹកប្រើប្រាស់ដែលធ្លាប់បង្ហូរចូលទន្លេសាបតាមលូរមួយចំនួននោះ ក៏ត្រូវបានពង្វាងឲ្យហូរទៅអាងស្តុកទឹកបឹងត្របែកវិញ ដើម្បីកុំឲ្យខូចបរិស្ថានទឹកទន្លេ និងកុំឲ្យមានក្លិនមិនល្អតាមសួនច្បារមាត់ទន្លេ ដែលជាទីរមណីយដ្ឋានរបស់ប្រជាពលរដ្ឋ និងភ្ញៀវទេសចរដែលមកកំសាន្តជាដើម។

-គម្រោងអទិភាពទី៣៖ ក្រោមជំនួយឥតសំណងរបស់ប្រទេសជប៉ុនជាបន្តមកទៀត គឺគម្រោងការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញ ជំហានទី៣ ដែលបានអនុវត្តពីខែមករា ឆ្នាំ២០១២ ដល់ខែតុលា ឆ្នាំ២០១៥។ គម្រោងជំហានទី៣នេះ បានជួយសម្រាល និងកាត់បន្ថយជំនន់ទឹកភ្លៀងនៅក្នុងតំបន់បឹងត្របែក ប៉ែកខាងត្បូងរាជធានីភ្នំពេញ ដោយបានជីកដាក់បណ្តាញលូមេ និងលូប្រអប់ធំៗ ប្រវែងប្រមាណ ២០,៦៥៤ម៉ែត្រ ក្នុង​ខណ្ឌចំការមន ខណ្ឌ៧មករា និងផ្នែកខ្លះនៃខណ្ឌដូនពេញ សាងសង់ឡើងវិញនូវអាងត្រងសម្រាមក្រោមដី នៅសួនច្បារក្បែរផ្លូវលេខ២៤០ ខាងត្បូងព្រះបរមរាជវាំង ដើម្បីបង្ហូរទឹកភ្លៀងឲ្យបានលឿនឆ្ពោះទៅអាងស្តុកទឹកបឹងត្របែក។ ជាមួយគ្នានេះដែរ ក៏មានការផ្គត់ផ្គង់រថយន្តបាញ់ទឹកលាងសម្អាតបណ្តាញលូចំនួន ០២គ្រឿង និងរថយន្តបូមសម្អាតបណ្តាញលូចំនួន ០២គ្រឿងផងដែរ។

ដោយឡែក​នៅ​ព្រឹកនេះ ប្រមុខ​រដ្ឋាភិបាល​​បាន​ដាក់​ឲ្យ​ដំណើរការ​គម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤។ គម្រោងនេះ​ប្រើរយៈពេលសាងសង់ប្រមាណជា ៣៦ខែ ដោយចាប់ផ្តើម​ពីថ្ងៃទី០១ ខែធ្នូ ឆ្នាំ២០១៨។ គម្រោងនេះ បានកំពុងដោះស្រាយបញ្ហាទឹកលិចនៅតំបន់ជុំវិញ និងខាងជើងរមណីយដ្ឋានប្រវត្តិសាស្ត្រវត្តភ្នំក្នុងខណ្ឌដូនពេញ និងតំបន់ភូមិសាស្ត្រសង្កាត់បឹងកក់ទី១ សង្កាត់បឹងកក់ទី២ ក្នុងខណ្ឌ​ទួលគោក។

តាមរយៈនៃការដាក់ឱ្យដំណើរការគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤ បានកាត់​បន្ថយ​ការ​លិចលង់ធ្ងន់ធ្ងរដូចជានៅ​តំបន់​ជុំវិញវត្តភ្នំ ផ្លូវលេខ៤៧ ផ្លូវលេខ៩០ ផ្លូវលេខ៩២ ផ្លូវលេខ៥៩៦ ផ្លូវលេខ៥៩២ ផ្លូវលេខ៣១៥ ផ្លូវលេខ២៨៩ ផ្លូវលេខ២៨៧ ផ្លូវលេខ៦០៨ ស្តុបផ្សារមាន់អាំង មុខវិទ្យាល័យឥន្ទ្រទេវី ស្តុបផ្ទះសំណាក់ស្រែលាប…មិនមានការលិចលង់ទៀតទេ៕

The post ជាង២០ឆ្នាំ ជប៉ុន​ផ្តល់​ថវិកា​​រយ​លាន​ដុល្លារ ​​ជួយ​គម្រោងការពារទឹកជំនន់​​នៅ​រាជធានី​ភ្នំពេញ​ appeared first on .

គម្រោងសាងសង់ហេដ្ឋារចនាសម្ព័ន្ធ​នៅ​ច្រកទ្វារព្រំដែន​អន្តរជាតិ​ថ្មី​ស្ទឹង​បត់គ្រោងនឹងបញ្ចប់ត្រឹមខែមេសា ឆ្នាំ២០២២ខាងមុខ ខណៈច្រកទ្វារអន្តរជាតិថ្មីមួយនេះ និងជួយសម្រួលដល់ការដឹកជញ្ជូនឆ្លងកាត់ កាន់តែមានភាពងាយស្រួលដែលជាសរសៃឈាម រួមចំណែកលើកស្ទួយដល់កំណើនសេដ្ឋកិច្ចដល់កម្ពុជា។

សូមចុច Subscribe Telegram oknha_news ដើម្បីទទួលបានព័ត៌មានគ្រប់​សកម្មភាព​ឧកញ៉ា​ អាជីវកម្ម ចែក​រំលែក ជោគជ័យ

ស្ថានទូតជប៉ុនប្រចាំនៅកម្ពុជា បានឲ្យដឹងថា គម្រោងទាំងនេះគឺជាជំនួយអភិវឌ្ឍផ្លូវការ (ODA) របស់ជប៉ុនក្រោមក្របខណ្ឌកម្ចីប្រាក់យេន និងជំនួយបច្ចេកទេស។ យើងជឿជាក់ថាស្ថានភាពភ័ស្តុភារកម្មរវាងកម្ពុជានិងថៃនឹងមានការរីកចម្រើនគួរឲ្យកត់សម្គាល់បន្ទាប់ពីគម្រោងទាំងនេះត្រូវបានបញ្ចប់។សូមអរគុណដល់មន្រ្តី និងបុគ្គលិកកម្ពុជានិងជប៉ុនទាំងអស់ដែលបានខិតខំប្រឹងប្រែងក្នុងគ្រាដ៏លំបាកនេះ។​

សូមបញ្ជាក់ថា ច្រកព្រំដែន​អន្តរជាតិ​ស្ទឹង​បត់ -​ណង​អៀន ជា​ច្រកព្រំដែន​ដឹកជញ្ជូន​ធុន​ធ្ងន់​និង​សេដ្ឋកិច្ច​ថ្មី​មួយទៀត ដើម្បី​ផ្លាស់ប្ដូរ​ទំនិញ គ្រប់​ប្រភេទ​រវាង​ប្រទេស​ទាំងពីរ​កម្ពុជា​-​ថៃ ក៏ដូចជា​ប្រទេស​ក្នុងតំបន់​អាស៊ាន ដើម្បី​សម្រួល​ដល់​ការដឹកជញ្ជូន​ទំនិញ​ឆ្លង កាត់​ច្រកព្រំដែន ដើម្បី​កាត់បន្ថយ​ការកកស្ទះ​ចរាចរណ៍ នៅឯ​ច្រកព្រំដែន​អន្តជាតិ​អន្តរជាតិ​ប៉ោយប៉ែត -​ខ្លង​លឹក ៕​

The post បន្ទាប់ពីគម្រោងបញ្ចប់ ស្ថានភាពភ័ស្តុភារកម្មរវាងកម្ពុជា-ថៃនឹងមានការរីកចំរើន ខណៈច្រកទ្វារអន្តរជាតិថ្មីនេះជាសរសៃឈាមសេដ្ឋកិច្ច appeared first on .