លោក អួន ស៊ីឡុត ប្រធានសមាគមស្វាយចន្ទីកម្ពុជា មានប្រសាសាន៍ថា «នៅក្នុងវិស័យស្វាយចន្ទីយើងត្រូវការប្រាក់កម្ចីយ៉ាងតិច៣០០លានដុល្លារអាមេរិកក្នុង១ឆ្នំាសម្រាប់ធ្វើជាទុនបង្វិលនៅលើវិស័យស្វាយចន្ទី។ប៉ុន្តែយើងគិតថាបើសិនយើងបានកម្ចី១០០លានដុល្លារអាមេរិកពីធនាគារ SME ដែលមានអត្រាការប្រាក់អនុគ្រោះនេះខ្ញុំគិតថាវាជួយដោះទល់យើងបានច្រើន»។

លោកបន្តថា ប្រាក់កម្ចីដែលមានការប្រាក់អនុគ្រោះនេះវាផ្តល់សារសំខាន់យ៉ាងច្រើនទៅដល់ការកែច្នៃគ្រាប់ស្វាយចន្ទីកម្ពុជា ហើយកន្លងមកយើងមានច្រើនណាស់ដែលកំពុងចាក់ស្រេះដោយសារបញ្ហាខ្វះដើមទុននេះ។កាលណាយើងមិនមានទុនបង្វិលសម្រាប់ទិញគ្រាប់ស្វាយចន្ទីឆៅ វានឹងធ្វើឱ្យលំហូរគ្រាប់ស្វាយចន្ទីយ៉ាងច្រើនទៅក្រៅប្រទេស អ៊ីចឹងហើយវិនិយោគិនក្នុងស្រុក អត់អាចប្រជែងទិញបានដោយសារតែគាត់ខ្វះទុន ជាហេតុធ្វើឱ្យខ្សែច្រវាក់ផលិតកម្មក្នុងរោងចក្ររបស់គាត់ដំណើរការមិនបានពេញបាន១ឆ្នំាទេ។

លោកសង្កត់ធ្ងន់ថា «ដូច្នេះការផ្តល់នៅកម្ចីដែលមានអត្រាការប្រាក់អនុគ្រោះនេះវាមានសារសំខាន់ណាស់ក្នុងការទិញគ្រាប់ស្វាយចន្ទីស្តុកទុក និងការកែច្នៃនិងការនាំចេញ ព្រោះសមាគមស្វាយចន្ទីកម្ពុជាមានសមាជិកទំាងកសិករ សហគ្រិន និងទំាងពាណិជ្ជករដែលពួកគាត់បានកំពុងប្រកបអាជីវកម្មនៅក្នុងឧស្សាហកម្មស្វាយចន្ទី។បើសិនរាជរដ្ឋាភិបាល តាមរយៈធនាគារSMEដែលគាត់ត្រៀមបញ្ចេញថវិកាចំនួន១០០លានដុល្លារអាមេរិកនេះ យើងគិតថាចំនួននេះវាមិនច្រើនណាស់ណាទេ ប៉ុន្តែយើងអាចដោះទល់បាននៅពេលខាងមុខ ហើយយើងសង្ឃឹមថាអាចជួយកសិករបានច្រើន និងជួយទប់ការទម្លាក់តម្លៃតាមតែចិត្តពីឈ្មួញបរទេសជិតខាង»។

លោក អួន ស៊ីឡុត លើកឡើងថាបើសិនជាកម្ពុជាមានរោងចក្រឧស្សាហកម្មប្រហែល៣០នឹងអាចស្តុកទុកគ្រាប់ស្វាយចន្ទីឆៅបាន៣០%ទៅ៤០% ហើយធ្វើការកែច្នៃគ្រាប់ស្វាយចន្ទីទំាងនោះអាចចំណេញរហូតដល់៣០០លានដុល្លារអាមេរិកក្នុងមួយឆ្នំា ហើយបង្កើតការងារបានប្រហែល១ម៉ឺនកន្លែងជូនដល់ពលករក្នុងស្រុក។

ប៉ុន្តែទោះជាយ៉ាងនេះក្តីបើតាមប្រធានសមាគមស្វាយចន្ទីកម្ពុជា មកដល់ពេលនេះខាងសមាគមមិនទាន់បានធ្វើការវាយតម្លៃនៃការហូរចេញគ្រាប់ស្វាយចន្ទីឆៅទៅក្រៅស្រុកថាមានចំនួនប៉ុន្មានឱ្យបានច្បាស់នៅឡើយទេ ប៉ុន្តែនៅក្នុងរយៈពេល៥ឆ្នំាបើសិនជាធនាគារនៅតែបន្តជួយឬបន្តតម្លើងទំហំទឹកប្រាក់កម្ចីថែមទៀត យើងអាចទប់បាន៤០%នៃលំហូរចេញគ្រាប់ស្វាយចន្ទីឆៅទៅក្រៅប្រទេស។

លោកគូសបញ្ជាក់ថា «ក្នុងរយៈពេល៤ខែដើមឆ្នំា២០២៣នេះយើងផលិតបានគ្រាប់ស្វាយចន្ទីប្រមាណ៥១ម៉ឺនតោន ហើយនាំចេញទៅប្រទេសវៀតណាមប្រហែល៤៨ម៉ឺនតោនគិតជាទឹកប្រាក់ប្រមាណ៦៦០លានដុល្លារអាមេរិក»៕ អត្ថបទ៖សារេត

The post សមាគមស្វាយចន្ទីកម្ពុជា ត្រូវការប្រាក់កម្ចី ៣០០លានដុល្លារក្នុង១ឆ្នំាសម្រាប់ធ្វើជាទុនបង្វិល appeared first on .

ថ្លែងក្នុងពិធីបើកវេទិកាហិរញ្ញវត្ថុសហគ្រាសធុនតូចនិងមធ្យមសកលប្រចាំឆ្នាំ២០២២ កាលពីថ្ងៃទី២១ កញ្ញាម្សិលមិញ ទេសាភិបាលធនាគារជាតិនៃកម្ពុជា លោក ជា ចាន់តូ បានបញ្ជាក់ថា សហគ្រាសធុនតូចនិងមធ្យម ដើរតួនាទីយ៉ាងសំខាន់ក្នុងការបង្កើតឱកាសការងារ បង្កើនប្រាក់ចំណូលដើម្បីកាត់បន្ថយភាពក្រីក្រ និងជំរុញកំណើនសេដ្ឋកិច្ចជាតិ សម្រាប់ប្រទេសកំពុងអភិវឌ្ឍន៍។

លោកថា ទន្ទឹមនឹងសារៈសំខាន់នេះ សហគ្រាសធុនតូចនិងមធ្យមតែងជួបបញ្ហាប្រឈមជាច្រើន ជាពិសេសបញ្ហាប្រឈមចម្បងជាងគេគឺការទទួលបានសេវាហិរញ្ញវត្ថុផ្លូវការ។

ជាមួយគ្នានេះ លោកក៏លើកឡើងពីនិន្នាការសកលទាក់ទងនឹងការវិវត្តនូវបច្ចេកវិទ្យាហិរញ្ញវត្ថុដែលកំពុងក្លាយជាដំណោះស្រាយយ៉ាងមានប្រសិទ្ធភាពក្នុងការពង្រីកវិសាលភាពនៃការផ្តល់សេវាហិរញ្ញវត្ថុទៅដល់ម្ចាស់សហគ្រាសធុនតូចនិងមធ្យម។ ជាក់ស្តែង ការអភិវឌ្ឍយ៉ាងជោគជ័យនៃប្រព័ន្ធទូទាត់បាគងរបស់ធនាគារជាតិនៃកម្ពុជា បានសម្រួលដល់ការរស់នៅប្រចាំថ្ងៃរបស់អ្នកប្រើប្រាស់ទូទៅ និងអាជីវកម្មខ្នាតតូចនៅកម្ពុជា តាមរយៈការផ្តល់សេវាទូទាត់ងាយស្រួល ឆាប់រហ័ស មានសុវត្ថិភាពខ្ពស់ និងចំណាយទាប ដែលជាកត្តារួមចំណែកយ៉ាងសំខាន់ធ្វើឱ្យសហគ្រាសធុនតូចនិងមធ្យមជាច្រើននៅកម្ពុជា បន្តសកម្មភាពអាជីវកម្មជាប្រក្រតី ទោះបីអំឡុងពេលមានការរាលដាលជំងឺកូវីដ-១៩ ក៏ដោយ។

ធនាគារអភិវឌ្ឍន៍អាស៊ី (ADB) បានបង្ហាញរបាយការណ៍ថា សហគ្រាសធុនតូចនិងមធ្យម នៅកម្ពុជា ត្រូវបានប៉ាន់ស្មានថា មានប្រមាណ៩៩% នៃសហគ្រាសសរុប ដែលបានរួមចំណែកជិត៦០% នៃផលិតផលក្នុងស្រុក និងបង្កើតការងារជាង៧០% នៃកម្លាំងពលកម្ម។ ក៏ប៉ុន្តែ វិស័យ SME នៅកម្ពុជា បច្ចុប្បន្ន ហាក់នៅមានកម្រិត និងមានបញ្ហាប្រឈមជាច្រើន ដែលអាចជាឧបសគ្គក្នុងការអភិវឌ្ឍន៍ប្រកបដោយចីរភាពក៏ថាបាន៕

The post លោក ជា ចាន់តូ៖ វិស័យSME តែងជួបបញ្ហាប្រឈមជាច្រើន ពិសេសការទទួលបានសេវាហិរញ្ញវត្ថុផ្លូវការ appeared first on .

លោក កឹម អឿន អគ្គនាយកសហគ្រាសអប់រំហូមឌូខេសិន នៅក្នុងសន្និសីទសារព័ត៌មានស្តីពីវេទិកាម្ចាស់អាជីវកម្មកម្ពុជា នាព្រឹកថ្ងៃចន្ទទី២៩សីហានេះ បានឲ្យដឹងថា វេទិកានេះ ដើម្បីផ្តល់ព័ត៌មានដល់អាជីវកទៅថ្ងៃអនាគត SMEមានដំណើរអភិវឌ្ឍន៍ទៅណា? សេដ្ឋកិច្ចពិភពលោកទៅណា? សេដ្ឋកិច្ចតំបន់ សេដ្ឋកិច្ចប្រទេសកម្ពុជាកំពុងតម្រង់ទៅណា? ហើយបានជះឥទ្ធិពលអ្វីខ្លះទាំងវិជ្ជមានទាំងអវិជ្ជមានមកលើម្ចាស់អាជីវកម្ម។

បើតាមលោក កឹម អឿន វេទិកានេះគ្រោងនឹងធ្វើឡើងពេញមួយថ្ងៃ នៅថ្ងៃទី៣ ខែកញ្ញាខាងមុខនេះ ហើយរំពឹងថានឹងមានអ្នកចូលរួមមកពីសមាគមអាជីវកម្ម អ្នករៀបចំគោលនយោបាយ ធនាគារ អ្នករកស៊ីម្ចាស់អាជីវកម្ម ម្ចាស់ជំនួយ ស្ថាប័នពាក់ព័ន្ធ និងមានអ្នកជំនាញប្រហែលជា ១០រូបនិងមកធ្វើការចែក រំលែក និងមានការជជែកវែកញែកច្រើនដោយមានប្រធានបទផ្សេងៗគ្នា។

លោកបន្ថែមថា ក្នុងនោះវេទិកាក៏មាន ក៏មានការចែករំលែកបទពិសោធ ចំណេះដឹង ជំនាញក្នុងការជំរុញអោយអាជីវកម្មខ្នាតតូច និងមធ្យមឱ្យកាន់តែរីកចម្រើនទៅមុខ៕

The post ម្ចាស់អាជីវកម្ម និងអ្នកជំនាញនឹងជួបជជែកគ្នាលើរឿងរ៉ាវការអភិវឌ្ឍវិស័យSMEនៅកម្ពុជា ក្រោយសម័យកូវីដ appeared first on .

“គេហទំព័រ KhmerSME” គឺជា ថ្នាល​ព័ត៌មាន​ឌីជីថល (Digital Information Platform) ដែល​ផ្តល់ឱកាស​ឲ្យ​សហគ្រាស​ធុន​មីក្រូ តូច និង​មធ្យម​ទាំងអស់​ទទួលបាន​នូវ​ព័ត៌មាន​នៅនឹងកន្លែង ដូចជា ផ្នែក​ច្បាប់ បទប្បញ្ញត្តិ លិខិតបទដ្ឋាន​គតិយុត្តិ ការបណ្តុះបណ្តាល បច្ចេកទេស ការផ្ទេរ បច្ចេកវិទ្យា វិទ្យាសាស្ត្រ នវានុវត្តន៍ ហិរញ្ញប្បទាន ទីផ្សារ ការចាប់ផ្តើម​អាជីវកម្ម​ថ្មី ការលើកទឹកចិត្ត សម្រាប់​ការធ្វើ​ធុរកិច្ច​ឲ្យ​កាន់​តែមាន​ប្រសិទ្ធភាព​ខ្ពស់ ការប្រកួតប្រជែង​មាន​លក្ខណៈ​ជា​យុទ្ធសាស្ត្រ និង​ប្រកបដោយ​បរិ​យា​ប័ន្ន​។

ការប្រកាសដាក់ឲ្យប្រើគេហទំព័រ KhmerSME នេះក្រោម​ជំនួយ​ឧបត្ថម្ភ​របស់​រដ្ឋាភិបាល​អាល្លឺម៉ង់ ទីភ្នាក់ងារ​សហប្រតិបត្តិ​ការ​អន្តរជាតិ​អាល្លឺម៉ង់ GIZ សហការ​ជាមួយ​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍។

បើតាមលោក ​ចម ប្រសិទ្ធ​ រដ្ឋមន្រ្តីក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ បានឲ្យដឹងថា៖ រាជរដ្ឋាភិបាល ​បាន​លើកកម្ពស់​សហគ្រាស​ក្នុងស្រុក គឺ​សហគ្រាស​ធុន​តូច​និង​មធ្យម ជា​វិស័យ​អាទិភាព ដែលមាន​លទ្ធភាព​ជួយ​ស្តារ​ស្ថានភាព​សេដ្ឋកិច្ចជាតិ​ឲ្យ​មាន​ភាពប្រសើរ​ឡើងវិញ ដោយបាន​កំណត់​នូវមុខ​ផលិតផល​មួយចំនួន​ជា​ទំនិញ​យុទ្ធសាស្ត្រ​របស់​រាជរដ្ឋាភិបាល សម្រាប់​ផ្គត់ផ្គង់​សេចក្តី​ត្រូវ​របស់​ប្រជាពលរដ្ឋ​ប្រចាំថ្ងៃ​។

លោកបន្តថា តាមរយៈ​នេះ ផលិតផល​ទាំងអស់ ទាមទារ​ចាំបាច់​ត្រូវមាន​គុណភាព និង​សុវត្ថិភាព​ដល់​អ្នកប្រើប្រាស់ ដូចនេះ “គេហទំព័រ Khmer SME” ដែលជា ថ្នាល​ព័ត៌មាន​ឌីជីថល ពិត​ជាមាន​សារៈសំខាន់​ណាស់​សម្រាប់​សហគ្រាស​ធុន​មីក្រូ តូច និង​មធ្យម ក្នុង​ការទាញយក​ព័ត៌មាន​ចាំបាច់​និង​សំខាន់ៗ តាម​តម្រូវការ ដើម្បី​អភិវឌ្ឍន៍​ផលិតផល​ឲ្យ​គុណភាព និង​សុវត្ថិភាព ស្របតាម​ស្តង់ដារ​កម្ពុជា​។​

បន្ថែមលើនេះ ការដាក់ឱ្យ​ដំណើរការ​នូវ “ គេហទំព័រ Khmer SME” គឺមាន​លក្ខណៈ​ស្រប និង​ការគាំទ្រ​ដល់​ផែនការ​យុទ្ធសាស្ត្រ និង​គោលនយោបាយ​នានា​របស់​រាជរដ្ឋាភិបាល ដូចជា៖ យុទ្ធសាស្ត្រ​ចតុកោណ​-​ដំណាក់កាល​ទី​៤ ផែនការ​យុទ្ធសាស្ត្រ​អភិវឌ្ឍន៍​ជាតិ​ឆ្នាំ​២០១៩-២០២៣ គោលនយោបាយ​អភិវឌ្ឍ​ន៍​ឧស្សាហកម្ម​ឆ្នាំ​២០១៥-២០២៥ សេចក្តីព្រាង​គោលនយោបាយ​អភិវឌ្ឍន៍​សហគ្រាស​ធុន​តូច និង​មធ្យម​ឆ្នាំ​២០២២-២០២៦ ផែនទី​បង្ហាញផ្លូវ​វិទ្យាសាស្ត្រ បច្ចេកវិទ្យា និង នវានុវត្តន៍​កម្ពុជា​ឆ្នាំ​២០៣០ និង​ផែនទី​បង្ហាញផ្លូវ សេដ្ឋកិច្ច ឌីជីថល ពាណិជ្ជកម្ម អេឡិចត្រូនិក ជាដើម ដែលមាន​គោលដៅ បន្ត​និង​ពង្រឹង​ការអភិវឌ្ឍ​ធនធានមនុស្ស ការធ្វើ​ធុរកិច្ច​ការលើកកម្ពស់ ផលិតភាព គំនិត​ច្នៃប្រឌិត ស្របតាម​និន្នាការ​នៃ​ការអភិវឌ្ឍ​សេដ្ឋកិច្ច សង្គម និង​បច្ចេកវិទ្យា​សកល និង​ក្នុង​បរិបទ​បដិវត្តន៍​ឧស្សាហកម្ម​ជំនា​ន់ទី​៤ ដើម្បី​ចូលរួមចំណែក​ជំរុញ​កំណើនសេដ្ឋកិច្ច​ប្រកប ដោយ​ចីរភាព និង​បរិ​យា​ប័ន្ន​៕

The post រដ្ឋដាក់ដំណើរការគេហទំព័រ KhmerSME សម្រាប់ដោះស្រាយបញ្ហារបស់សហគ្រាស​ធុន​មីក្រូ តូច និង​មធ្យម​ទាំងអស់ appeared first on .