គម្រោងសាងសង់រោងចក្រផលិតរថយន្តថាមពលថ្មីរបស់ Lexus ដែលមានទីតាំងនៅក្នុងតំបន់បច្ចេកវិទ្យាកម្រិតខ្ពស់ Shanghai Bay ដែលស្ថិតនៅក្នុងសង្កាត់ Jinshan នេះ គ្រោងនឹងបញ្ចប់ជាផ្លូវការនៅខែសីហា ឆ្នាំ២០២៦ ដោយការផលិតត្រូវបានគេរំពឹងទុកថានឹងចាប់ផ្តើម នៅដើមឆ្នាំ២០២៧។ រោងចក្រថ្មីនេះ ត្រូវបានគេរាយការណ៍ទៀតថា មានសមត្ថភាពផលិតប្រចាំឆ្នាំដល់ ១០០ ០០០​ គ្រឿង។ 

គួរឲ្យដឹងថា ក្រុមហ៊ុន Lexus (Shanghai) New Energy មានដើមទុនចុះបញ្ជីសរុបចំនួន ១០៧,១ពាន់លានយ៉េន (៧៤០លានដុល្លារ) ដោយរោងចក្រថ្មីរបស់ខ្លួននេះ នឹងគ្រប់ដណ្តប់នៅលើផ្ទៃដីសរុបប្រមាណ ១,១៣ លានម៉ែត្រការ៉េ ដែលមានទំហំធំជាងរោងចក្ររបស់ក្រុមហ៊ុនផលិតររថយន្ត EV ខ្នាតយក្សអាមេរិក Tesla នៅ Shanghai ដែលមានទំហំត្រឹម ៨៦០ ០០០ម៉ែត្រការ៉េ។ 

គួរឲ្យដឹងផងដែរថា វេលានៃគម្រោងដ៏ធំរបស់ Lexus នេះ មានភាពស្រដៀងគ្នាទៅនឹងការអភិវឌ្ឍយ៉ាងឆាប់រហ័សរបស់ក្រុមហ៊ុន​ Tesla នៅក្នុងទីក្រុងសៀងហៃដែរ។ Tesla បានចាប់ផ្តើមដំណើរការរោងចក្រ Shanghhai Gigafactory ដំបូងរបស់ខ្លួន នៅថ្ងៃទី៧ ខែមករា ឆ្នាំ២០១៩ ហើយបានចែកចាយរថយន្ត Model 3 ដំបូងបង្អស់របស់ខ្លួនដែលប្រទេសនៅក្នុងប្រទេសចិន នៅពេលតិចជាងមួយឆ្នាំក្រោយប៉ុណ្ណោះ ពោលគឺនៅថ្ងៃទី៣០ ខែធ្នូ ឆ្នាំ២០១៩។ 

តាមរយ:ការវិនិយោគនេះ Toyota ដែលជាក្រុមហ៊ុនមេគ្រប់គ្រងលើម៉ូដែលប្រណីត Lexus នេះ​ មានគោលបំណងធំក្នុងការពន្លឿនការផ្លាស់ប្តូរអគ្គិសនី និងឆ្លាតវៃរបស់ខ្លួន ដោយអភិវឌ្ឍម៉ាកយីហោរថយន្តអគ្គិសនីឲ្យកាន់តែប្រសើរឡើង សម្រាប់ទីផ្សារក្នុងស្រុក និងទីផ្សារអន្តជាតិ សម្រាប់ប្រទេសចិន។ 

ជម្រាបជូនផងដែរថា រោងចក្រ Lexus Shanghai គឺជារោងចក្រផលិតរថយន្តដែលគ្រប់គ្រងដោយក្រុមហ៊ុនបរទេស ១០០% ទីពីររបស់ប្រទេសចិន បន្ទាប់ពីក្រុមហ៊ុន Tesla របស់មហាសេដ្ឋីអាមេរិក Elon Musk។ តាមរយ:ការបំបែកចេញពីច្បាប់ចាស់ ក្រុមហ៊ុនបរទេស ចាំបាច់ត្រូវតែចាប់ដៃ​សហការ​ជាមួយក្រុមហ៊ុនក្នុងស្រុក ដើម្បីអាចផលិតរថយន្ត នៅក្នុងប្រទេសចិនបាន។ ហើយតាមរយ:ការផ្តល់ការគាំទ្រជាពិសេសពីសំណាក់អាជ្ញាធរក្នុងតំបន់ សម្រាប់គម្រោងរបស់ Lexus វាត្រូវបានគេប៉ាន់ស្មានថា រោងចក្ររបស់ក្រុមហ៊ុនខា្នតយក្សជប៉ុន អាចនឹងបើកដំណើរការលឿនជាងកាលកំណត់ បើទោះបីជាគម្រោងរំពឹងថានឹងត្រូវបញ្ចប់ នៅក្នុងឆ្នាំ២០២៧ ក្តី៕

The post Lexus ចាប់ផ្តើមអុកឡុកទីផ្សារប្រទេសចិន ដោយសង់រោងចក្រផលិតរថយន្តថាមពលថ្មី ប្រជែង Tesla  appeared first on .

ក្រុមហ៊ុនផលិតរថយន្តឈានមុខគេរបស់ជប៉ុនមួយនេះ កំពុងចរចាជាមួយអាជ្ញាធរមូលដ្ឋាន និងភាគីពាក់ព័ន្ធផ្សេងទៀត ដើម្បីធ្វើឲ្យរោងចក្រនេះក្លាយជាប្រតិបត្តិការរបស់ខ្លួនទាំងស្រុង ពោលគឺគ្មានការចាប់ដៃគូជាមួយក្រុមហ៊ុនក្នុងស្រុកណាមួយឡើយ បន្ទាប់ពីរដ្ឋាភិបាលចិន បានដាក់ចេញបទប្បញ្ញត្តិថ្មីស្តីពីការវិនិយោគដោយក្រុមហ៊ុនបរទេស។

គួរឲ្យដឹងផងដែរថា ក្រុមហ៊ុន Toyota កន្លងមកមានការបណ្តាក់ទុនរួមគ្នា នៅក្នុងប្រទេសចិនជាមួយនឹងក្រុមហ៊ុនផលិតរថយន្តក្នុងស្រុកដូចជា FAW និង GAC ដើម្បីផលិត និងចែកចាយរថយន្តសម្រាប់ម៉ាកយីហោ Toyota ។ ស្របពេលរថយន្ត Lexus ដែលលក់ក្នុងប្រទេសចិនបច្ចុប្បន្ន ត្រូវបាននាំចូលពីរោងចក្រផលិតរបស់ក្រុមហ៊ុន Toyota នៅក្នុងប្រទេសជប៉ុន។

យោងតាមរបាយការណ៍របស់ក្រុមហ៊ុន បានបង្ហាញឲ្យដឹងទៀតថា Toyota មានគម្រោងបើកដំណើរការរោងចក្រថ្មីរបស់ខ្លួននេះ នៅឆ្នាំ២០២៧ ក្នុងគោលបំណងដណ្តើមយកចំណែកនៅក្នុងទីផ្សាររថយន្តធំជាងគេបំផុតរបស់ពិភពលោក ក្រោយបានមើលឃើញពីការកើនឡើងយ៉ាងឆាប់រហ័សនៃរថយន្ត EV និង plug-in hybrid។

ប៉ុន្តែ​ទោះជាយ៉ា់ងណាក៏ដោយ អ្នក​ពាក់ព័ន្ធ​ក្នុង​ការ​ចរចានេះ ​បាន​និយាយ​ថា ​ក្រុមហ៊ុន​ផលិត​រថយន្តខ្នាតយក្សរបស់​ជប៉ុន​ ​នៅ​តែ​ត្រូវ​ការ​ចរចា​លក្ខខណ្ឌ​បន្ថែម​ទៀត​ជាមួយ​ភាគី​ចិន ដើម្បីឈានដល់ការអនុម័តកិច្ចព្រមព្រៀងជាផ្លូវការ៕

The post Toyota គ្រោងសាងសង់រោងចក្រដំបូងនៅក្នុងប្រទេសចិន សម្រាប់រថយន្តអគ្គិសនី Lexus របស់ខ្លួន appeared first on .

បើតាមការលើកឡើងរបស់លោក Takami Yokoo ប្រធានវិស្វកររបស់ក្រុមហ៊ុនផលិតរថយន្ត Lexus បានឲ្យដឹងថា ចាប់តាំងពីប្រកាសចេញ ដំបូង Lexus ឆ្នាំ 1989 មក រថយន្តម៉ូឌែល LX 7000h នេះជារថយន្តទីមួយទទួលបានកំណែប្រែអាប់ឌែតថ្មីលើដំណើរការដោយថាមពលបច្ចេកវិទ្យាកូនកាត់ Parallel Hybrid ជំនាន់ចុងក្រោយបង្អស់។

ក្រុមហ៊ុនបានអះអាងថា នេះជាការស្រាវជ្រាវគិតគូរលើបរិស្ថានយ៉ាងល្អិតល្អន់និងបានដាក់ឈ្មោះឲ្យថា «Lexus-first hybrid system» ដែលជាចំណុចលេចធ្លោនៃរថយន្តប្រភេទ SUV ខ្នាតធំ LX 700h ឆ្នាំ ២០២៥ ហើយវាធ្វើការរួមគ្នាជាមួយនឹងម៉ាស៊ីនសាំងចំណុះ ៣,៤ លីត្រ V6 ជំនួយពី Twin-turbo មានប្រអប់លេខអូតូ ១០វគ្គ ធ្វើឲ្យរថយន្តស្ទុះខ្លាំងនិងសន្សំសំចៃកាន់តែប្រសើរ។

ចំពោះគំនិតរក្សារសនិយមឲ្យ LX នៅតែផ្ដោតលើការបើកបរ Off-road ក្រុមហ៊ុនរចនាសំណុំម៉ាសុីនក្នុងទម្រង់ថ្មី រចនាសម្ព័ន្ធថ្មីការពារមិនជ្រាបទឹក មានគ្របការពារប្លុកថ្មអាគុយ និងការពារប្រព័ន្ធអគ្គិសនីក្នុងរថយន្ត។ រថយន្តនេះមានកម្ពស់ខ្ពស់ ទំហំធំទូលាយ ឯបាតក្រោមរឹងមាំ អាចឲ្យអ្នកបើកបរក្នុងជម្រៅទឹកដល់ ៧០០ ម.ម (ជម្រៅជិត១ម៉ែត្រ) ក៏ដូចជាការបន្ថែមប្រព័ន្ធចាក់សោរប៉ុងផ្នែកខាងមុខ-ក្រោយស្តង់ដារ រួមនឹងការបំពាក់ថាសកង់ស្ព័រទំហំ ១៨អ៉ីញ អាចបើកបរបានគ្រប់ស្ថានភាពផ្លូវផងដែរ។

ចំពោះនៅផ្នែកខាងក្នុងវិញ ទទួលបានកុងទ័របង្ហាញព័ត៌មានឌីជីថលទំហំ ១២,៣ អ៉ីញ រចនាឡើងគួរទាក់ទាញ មានប្រព័ន្ធតន្រ្តីកម្សាន្តដ៏សំបូរបែប មានកន្លែងសាកថ្មឥតប្រើខ្សែ មានប្រអប់លេខថ្មីប្រភេទ Electro-Shiftmatic system ដែលទើបនឹងមានលើកដំបូងលើ LX ។

ត្បិតរថយន្តនេះត្រូវបានគេដឹងថា គ្រោងនឹងលក់ជាផ្លូវការនៅចុងឆ្នាំ ២០២៤ នេះ នៅទីផ្សារសហរដ្ឋអាមេរិក តែគិតត្រឹមពេលនេះនៅមិនទាន់មានប្រភពណាមួយបញ្ចេញតម្លៃជាក់លាក់នៅឡើយទេ។ សូមរង់ចាំនៅអត្ថបទបន្ទាប់នឹងចេញផ្សាយឆាប់ៗនេះ៕

The post រថយន្ត Hybrid ខ្នាតយក្ស LX 700h ឆ្នាំ 2025 គ្រោងនឹង​ដាក់​លក់​នៅចុងឆ្នាំនេះ appeared first on .

ប្រភពខាងលើ បានបង្ហាញឲ្យដឹងទៀតថា ក្រុមហ៊ុនផលិតរថយន្តដែលលក់ដាច់បំផុតរបស់ពិភពលោកមួយនេះ គ្រោងនឹងជ្រើសរើសយកកោះ Kyushu ជាទីតាំងសាងសង់រោងចក្រអាគុយថ្មីរបស់ខ្លួន ដោយសារតែតំបន់នេះស្ថិតនៅផ្នែកកណ្តាលនៃខ្សែសង្វាក់ផ្គត់ផ្គង់ដ៏ធំរបស់ខ្លួន ទាំងរថយន្តដែលប្រើថាមពលអគ្គិសនី និងជាមូលដ្ឋាននាំចេញសម្រាប់ទីផ្សារអាស៊ីទាំងមូល។

ប៉ុន្តែទោះជាយ៉ាងណាក៏ដោយ ចំពោះចំនួនទឹកប្រាក់ដែលក្រុមហ៊ុន Toyota នឹងត្រូវចំណាយលើរោងចក្រអាគុយថ្មីនេះ និងកាលបរិច្ឆេទនៃការចាប់ផ្តើមសាងសង់ នៅមិនទាន់ត្រូវបានទម្លាយឲ្យដឹងនៅឡើយនោះទេ។

បើតាមសារព័ត៌មាន Nikkei បានឲ្យដឹងថារោងចក្រនេះ នឹងដំណើរការរួមគ្នាដោយក្រុមហ៊ុន Primearth EV Energy ដែលជាក្រុមហ៊ុនបុត្រសម្ព័ន្ធមួយផ្សេងទៀតរបស់ Toyota ដែលមានជំនាញក្នុងការផលិតអាគុយសម្រាប់រថយន្តកូនកាត់ Hybrids, Plug-in hybrid និងរថយន្តថាមពលអាគុយសុទ្ធ។

ជម្រាបជូនថា ក្រុមហ៊ុន Toyota ក្នុងរយ:ពេលប៉ុន្មានឆ្នាំចុងក្រោយនេះ បាននិងកំពុងចាប់ផ្តើមគំនិតផ្តួចផ្តើមផ្សេងៗ ដើម្បីពង្រឹងសមត្ថភាពកក្នុងការផលិតអាគុយរថយន្ត EV របស់ខ្លួន ខណ:ពួកគេកំពុងកំណត់គោលដៅលក់រថយន្ត EV ឲ្យបានចំនួន ៣,៥ លានគ្រឿងក្នុងមួយឆ្នាំ នៅឆ្នាំ២០៣០ ខាងមុខ៕

The post Toyota គ្រោងសាងសង់រោងចក្រអាគុយថ្មីមួយ ដើម្បីផ្គត់ផ្គង់ដល់ការផលិតរថយន្តប្រណីត Lexus appeared first on .

ក្នុងចំណោមរថយន្តរបស់ Lexus សេរីចុងក្រោយបំផុតទាំងអស់ ត្រកូល LX ហាក់ធ្វើឲ្យអ្នកស្រឡាញ់រថយន្តប្រណីតៗ តាមសម្លឹងមើលមិនដាក់ភ្នែក ដោយសារតែការរចនាដ៏ស៊ីវិល័យ គួបផ្សំជាមួយប្រណីតភាព ស្របពេលបច្ចេកវិទ្យានៃរថយន្តរឹតតែមិនបាច់បរិយាយថែមទៀត។

Lexus LX 600 ឆ្នាំ ២០២២ ផលិតមកជាមួយជម្រើសជាច្រើន ប៉ុន្តែអត្ថបទមួយនេះ ឧកញ៉ាញ៉ូវស៍សូមលើកយកតែម៉ូដែលពិសេសបំផុតមួយគឺ All New Lexus LX 600 F-Sport Launch Edition មករៀបរាប់ត្រួសៗប៉ុណ្ណោះ ដោយសាររថយន្តប្រភេទមួយនេះផលិតឡើងតែ ១០០ គ្រឿងប៉ុណ្ណោះលើពិភពលោក។

ខុសប្លែកពីសេរី LX 600 F-Sport ធម្មតាដែលមាន ៧ កៅអី F-Sport Launch Edition មានតែ ៥ កៅអីប៉ុណ្ណោះ ប៉ុន្តែកម្លាំងម៉ាស៊ីនគឺខ្លាំងដូចគ្នាពោល ដំណើរការដោយម៉ាស៊ីនសាំង V6 3,5L អាចផលិតកម្លាំងដល់ទៅ ៤០៩ Hp និងមានចង្កឹះលេខអូតូ ១០ វគ្គ។

លក្ខណៈពិសេសផ្សេងៗទៀតដែលបំពាក់មកជាមួយរថយន្តស្រាប់មានដូចជា កាមេរ៉ា ៣៦០ ដឺក្រេ ប្រព័ន្ធហ្វ្រាំង ABS ប្រព័ន្ធទប់លំនឹង ដំបូលអាចបញ្ជាបិទបើកបាន ហើយដៃចង្កូតបញ្ជាដោយប្រព័ន្ធអេឡិចត្រូនិក ងាយស្រួលដល់ការបើកបរទាំងលើផ្លូវធម្មតា និងផ្លូវបែប Off-road។

ដ្បិតតែផលិតមកតែ ១០០ គ្រឿងលើលោកក៏ពិតមែន ប៉ុន្តែរថយន្តដ៏ប្រណីតមួយនេះក៏មានវត្តមានលើទីផ្សាររថយន្តកម្ពុជាផងដែរ ដោយមានលក់នៅហាងរថយន្ត Deluxe AUTO ហើយរថយន្តដែលកំពុងបង្ហាញខ្លួននៅកម្ពុជាមួយនេះមានលេខរៀងទី ៧១។

ទាក់ទងនឹងតម្លៃ របស់កំពូលរថយន្ត LX 600 F-Sport ខ្នាតធំប្រចាំត្រកូល LX ដែលផលិតឡើងចំនួនតែ ១០០គ្រឿង លើពិភពលោកនេះ ហាងលក់រថយន្ត Deluxe AUTO បានទម្លាយឱ្យ Oknha News ដឹងថា ជាង ៣៥ម៉ឺនដុល្លារ។

តម្លៃនេះ បើប្រៀបធៀបជាមួយបងប្អូនរួមជំនាន់ត្រកូល Lexus LX600 VIP Kuro 2022 មាន ៤កៅអី គឺទាបជាងបន្តិចបន្ទួច ពោលរថយន្តលំដាប់អភិជន LX600 VIP Kuro ៤កៅអី តម្លៃជិត ៤០ម៉ឺនដុល្លារឯណោះ៕

The post Lexus LX600 F-Sport Launch Edition ផលិតតែ ១០០ គ្រឿងលើលោក នៅខ្មែរមានតែមួយគ្រឿងគត់ appeared first on .

All New 2023 Lexus RX បាន​បំបាត់​ចោល​ម៉ាស៊ីន​សាំង V6 និង​ជំនួស​មក​វិញ​នូវ​ជម្រើស​ជាច្រើន​រួមមាន​ដូចជា៖

• ម៉ាស៊ីន​សាំង ៤ ស៊ីឡាំង​ទំហំ ២,៤លីត្រ Turbo អាច​ផលិត​កម្លាំង​បាន​ដល់ 275Hp និង​មាន​កម្លាំង​រមួល 317 ផោន-ហ្វីត ដំណើរការ​ដោយ​ប្រព័ន្ធ​បញ្ជា​ប្រអប់​លេខ ៨ វគ្គ​អូតូ (សម្រាប់​ម៉ូដែល RX350) និង​មាន​ជម្រើស​នៃ​ការ​បើកបរ​ទាំង FWD និង AWD។ សន្ទុះ​ល្បឿន​ពី ០ ដល់ ១០០ ​គីឡូម៉ែត្រ/ម៉ោង ចំណាយពេល ៧,២ វិនាទី។
• ម៉ាស៊ីន​សាំង ៤ ស៊ីឡាំង​ទំហំ ២,៥លីត្រ Turbo អាច​ផលិត​កម្លាំង​បាន​ដល់ 246Hp និង​មាន​កម្លាំង​រមួល 233 ផោន-ហ្វីត ដំណើរការ​ដោយ​ប្រព័ន្ធ​បញ្ជា​ប្រអប់​លេខ CVT (ម៉ូដែល RX 350h) និង​មាន​ការ​បើកបរ​ជា​ AWD។ សន្ទុះ​ល្បឿន​ពី ០ ដល់ ១០០ ​គីឡូម៉ែត្រ/ម៉ោង ចំណាយពេល ៧,៤ វិនាទី។
• ម៉ាស៊ីន​សាំង ៤ ស៊ីឡាំង​ទំហំ ២,៥លីត្រ Turbo អាច​ផលិត​កម្លាំង​បាន​ដល់ 246Hp និង​មាន​កម្លាំង​រមួល 233 ផោន-ហ្វីត ដំណើរការ​ដោយ​ប្រព័ន្ធ​បញ្ជា​ប្រអប់​លេខ CVT (ម៉ូដែល RX 450h + Plug-in Hybrid) និង​មាន​ការ​បើកបរ​ជា​ AWD។ សន្ទុះ​ល្បឿន​ពី ០ ដល់ ១០០ ​គីឡូម៉ែត្រ/ម៉ោង ចំណាយពេល ៧,៤ វិនាទី។
• ម៉ាស៊ីន​សាំង ៤ ស៊ីឡាំង​ទំហំ ២,៤លីត្រ Turbo អាច​ផលិត​កម្លាំង​បាន​ដល់ 367Hp និង​មាន​កម្លាំង​រមួល 406 ផោន-ហ្វីត ដំណើរការ​ដោយ​ប្រព័ន្ធ​បញ្ជា​ប្រអប់​លេខអូតូ ៦ វគ្គ (ម៉ូដែល RX 500h F-Sport Performance) និង​មាន​ការ​បើកបរ​ជា​ AWD។ សន្ទុះ​ល្បឿន​ពី ០ ដល់ ១០០ ​គីឡូម៉ែត្រ/ម៉ោង ចំណាយពេល ៥,៩ វិនាទី។

ក្រៅពី​មាន​ជម្រើស​ម៉ាស៊ីន​ជាច្រើន​សម្រាប់​ជ្រើសរើស​ហើយ​នោះ RX ជំនាន់​ចុងក្រោយ​លើក​នេះ មាន​រូបរាង​កាន់តែ​កាច តែ​ក៏​កាន់តែ​ប្រណីត​ជាងមុន ស័ក្តិសម​បើកបរ​ទាំង​នៅ​ក្នុង​ទីប្រជុំជន និង​នៅ​ជនបទ ដោយសារ​តែ​រថយន្ត​ប្រភេទ Mid Size SUV មួយ​នេះ​ផលិត​ឡើង​ដើម្បី​បំពេញ​តម្រូវ​ការ​ដ៏​សំបូរបែប។

ផ្ទៃខាងក្នុង​របស់​រថយន្ត​វិញ មាន​សភាព​ធំ​ទូលាយ​ជាងមុន ដោយសារ All new 2023 Lexus RX មាន​តួ​វែង​ជាងមុន ៦០ mm ទទឹង​ធំជាងមុន ១៥ mm សម្រាប់​ផ្នែក​ខាងមុខ និង ៤៥ mm នៅ​ផ្នែក​ខាងក្រោយ ហើយ​កៅអី​របស់​រថយន្ត​ទាំងមូល​បាន​ផលិត​ចេញ​ពីស្បែក​គុណភាព​ខ្ពស់ ស្របពេល​គ្រឿងបរិក្ខារ​ក្នុង​រថយន្ត​សុទ្ធតែ​ផ្ចិតផ្ចង់​ដើម្បី​ប្រស៊ី​គ្នា​ នឹង​បច្ចេកវិទ្យា​ដ៏​ទំនើប​របស់​វា។

បន្ទាប់​ពី​បាន​ដឹង​ពី Options និង​រូបរាង​ដ៏​កាន់តែ​កាច និង​មាន​ប្រណីតភាព​របស់ RX ជំនាន់​ចុងក្រោយ​នេះ​ហើយ ទោះ​ជា​ប្រិយមិត្ត​ចង់​ទៅ​ទិញ​រថយន្ត​នេះ​ភ្លាមៗ​ក៏​វា​មិន​ទាន់​ដាក់​លក់​លើ​ទីផ្សារ​ផង​ដែរ ពោល​វា​អាច​នឹង​មាន​វត្តមាន​លើ​ទីផ្សារ​នៅ​ចុង​ឆ្នាំ ២០២២ ឬ​អាច​ដើម​ឆ្នាំ ២០២៣ ដូច្នេះ​ប្រិយមិត្ត​អាច​សន្សំ​ថវិកា​បណ្ដើរៗ ចាំថ្ងៃ​ប្រកាស​ចេញ​នឹង​អាល​លៃលក​វៃ​ចេញ​មួយ​គ្រឿង​តែ​ម្ដង៕

The post ប្រឡូក​ទីផ្សារ​ ២៤ឆ្នាំ Lexus ស្រាប់តែបញ្ចេញត្រកូល RX ប្ដូរ​រាង​ថ្មី ​អតិថិជន​កំពុងជញ្ជក់មាត់ពេញពិភពលោក appeared first on .