MrBeast

ស្ងាត់ៗ ស្តេច YouTuber MrBeast ឡើងងារជាមហាសេដ្ឋីវ័យក្មេងបំផុតមួយរបស់ពិភពលោក

ឧកញ៉ាសាមញ្ញ — Fri, 23 May 2025 06:10:37 +0000

Jimmy Donaldson ឬត្រូវបានស្គាល់ជាទូទៅថា MrBeast ដែលជាកំពូលតារា YouTuber ដ៏ល្បីល្បាញបំផុត បានវិវត្តន៍ខ្លួនក្លាយជាមហាសេដ្ឋីដ៏វ័យក្មេងបំផុតម្នាក់របស់ពិភពលោក ជាមួយនឹងទ្រព្យសម្បត្តិសរុបកើនឡើងដល់ខ្ទង់ពាន់លានដុល្លារ។

យោងតាមការចុះផ្សាយពីគេហទំព័រ Celebrity Net Worth បានបង្ហាញឲ្យដឹងថា MrBeast ត្រូវបានដាក់ឲ្យជាប់នៅក្នុងបញ្ជីឈ្មោះជាមហសេដ្ឋីវ័យក្មេងបំផុតលំដាប់ទី០៨ របស់ពិភពលោក ជាមួយនឹងវ័យក្រោម ៣០ឆ្នាំ បន្ទាប់ពីទ្រព្យសម្បត្តិរបស់គេ បានកើនឡើងដល់ប្រហែល ១ពាន់លានដុល្លារ។

គួរឲ្យដឹងថា MrBeast កើតនៅថ្ងៃទី៧ ខែឧសភា ឆ្នាំ១៩៩៨ នៅទីក្រុង Greenville រដ្ឋ North Carolina ហើយបានចាប់ផ្តើមដំណើរការ YouTube របស់ខ្លួន នៅក្នុងវ័យ ១២ឆ្នាំ ក្រោមឈ្មោះដំបូងថា “MrBeast6000″។ រូបគេគឺជាសិស្សបញ្ចប់ការសិក្សានៅសាលា Greenville Christian Academy ប៉ុន្តែក្រោយមកបានងាកមកផ្តោតលើការបង្កើតមាតិកាពេញម៉ោងវិញ បន្ទាប់ពីបានសម្រេចចិត្តឈប់រៀននៅមហាវិទ្យាល័យ។

បច្ចុប្បន្ន MrBeast ត្រូវបានចាត់ទុកថាជាបុគ្គលដ៏លេចធ្លោបំផុតម្នាក់នៅបណ្តាញសង្គម ដោយមានអ្នកតាមដានរាប់លាននាក់ តាមរយ:ការបង្កើតមាតិកាប្លែកៗ បង្ហោះលើ YouTube ក៏ជាតាមរយ:សកម្មភាពមនុស្សធម៌របស់ខ្លួនជាច្រើនផងដែរ។

ជម្រាបជូនថា Channel YouTube របស់ MrBeast មានអ្នកតាមដានរហូតដល់ទៅ ៣៩៧ លាននាក់ ដែលបានក្លាយជា Channel YouTube មាន Subscribers ច្រើនជាងគេនៅទូទាំងពិភពលោក។ ហើយក្រៅពីទទួលបានពី YouTube ប្រភពចំណូលធំៗផ្សេងទៀតរបស់ MrBeast មានដូចជាការបើកហាងលក់បឺហ្គឺ MrBeast Burger និងហាងលក់សូកូឡា Feastables ជាដើម៕

The post ស្ងាត់ៗ ស្តេច YouTuber MrBeast ឡើងងារជាមហាសេដ្ឋីវ័យក្មេងបំផុតមួយរបស់ពិភពលោក appeared first on .

YouTuber ល្បីឈ្មោះ MrBeast សំងំកើបលុយបានជាង ៨០លានដុល្លារ កាលពីឆ្នាំ២០២៣

ឧកញ៉ាសំពៅ — Thu, 01 Feb 2024 06:08:43 +0000

លោក Jimmy Donaldson ដែលគ្រប់គ្នាស្គាល់ថា MrBeast កំពុងមានឥទ្ធិពលខ្លាំងលើប្រព័ន្ធអនឡាញ ដោយរូបលោកបានកើបប្រាក់ចំណូលប្រហែល ៨២លានដុល្លារ ពីវិស័យឌីជីថល និងធ្វើឲ្យលោកក្លាយជាបុគ្គលមានចំណូលខ្ពស់បំផុតម្នាក់ និងមានឥទ្ធិពលមួយរូបនៅក្នុងវិស័យមួយនេះ។ នេះបើតាមការចុះផ្សាយពីសារព័ត៌មាន Forbes។

ប្រាក់ចំណូលដ៏ច្រើនសន្ធឹកមួយនេះ បានមកពីឆាណែល YouTube របស់លោកដែលមានអ្នក Subscribe រហូតដល់ ២៣៤លានគណនី ស្របពេលប្រភពចំណូលផ្សេងទៀតដូចជា បណ្ដាញសង្គម Facebook និង X ជាដើម។

ក្រៅពីការរកចំណូលពីប្រព័ន្ធអ៊ីនធឺណិត MrBeast ក៏មានអាជីវកម្មផ្ទាល់ខ្លួនជាច្រើនទៀតដូចជា ហាងលក់សម្លៀកបំពាក់ និងហាងលក់សូកូឡា Feastables ដែលកំពុងទទួលបានការគាំទ្រខ្លាំង។

សូមជម្រាបដែរថា បច្ចុប្បន្ននេះទ្រព្យសម្បត្តិរបស់ YouTuber ល្បីឈ្មោះម្នាក់នេះ ត្រូវបានគេប៉ាន់ប្រមាណថា មានប្រហែល ៥០០លានដុល្លារ និងមានក្ដីរំពឹងថា បើសិនជាជំនួញរបស់គេនៅបន្តបង្ហាញសញ្ញាវិជ្ជមានបែបនេះ នោះតំណែងជាមហាសេដ្ឋី គេច្បាស់ជាអាចទទួលវាបានជាមិនខាន៕

The post YouTuber ល្បីឈ្មោះ MrBeast សំងំកើបលុយបានជាង ៨០លានដុល្លារ កាលពីឆ្នាំ២០២៣ appeared first on .

MrBeast រំលេចមុខលើក្របទស្សនាវដ្តីអ្នកមាន Forbes រំពឹងអាចក្លាយជាមហាសេដ្ឋី YouTuber តំបូងបំផុត

ឧកញ៉ាសំពៅ — Mon, 05 Dec 2022 08:05:34 +0000

MrBeast គឺជា YouTuber ដ៏ល្បីល្បាញម្នាក់ដែលតែងតែបង្កើតមាតិកាថ្មីៗ ជាពិសេសផ្ដោតសំខាន់លើការធ្វើសប្បុរសធម៌ ដល់ប្រជាពលរដ្ឋអាមេរិកដែលមានជីវភាពខ្វះខាត ហើយលោកក៏មានមុខមាត់ខ្លាំងលើបណ្ដាញសង្គមនានាផងដែរ។

ថ្មីៗនេះ ទស្សនាវដ្តី Forbes បានផ្ដិតយករូបភាពរបស់ YouTuber អាមេរិករូបនេះ ដាក់លើក្របទស្សនាវដ្តី Forbes 30 Under 30 ដែលជាទូទៅ ពួកគេចុះផ្សាយតែពីបុគ្គលមានទ្រព្យស្ដុកស្ដម្ភប៉ុណ្ណោះ។

ហេតុនេះហើយទើបមានចចាមអារ៉ាមលើកឡើងថា MrBeast បានក្លាយជាមហាសេដ្ឋីប្រាក់ពាន់លានដុល្លារហើយ ប៉ុន្តែ Forbes អះអាងថា ទ្រព្យសម្បត្តិរបស់បុរសម្នាក់នេះបច្ចុប្បន្នមានប្រហែល ៥០០ លានដុល្លារ។

យ៉ាងណា Forbes នៅតែបញ្ជាក់ថា MrBeast កំពុងតែរំកិលខ្លួនបន្តិចម្ដងៗ ក្នុងការក្លាយជាមហាសេដ្ឋី YouTuber តំបូងបំផុតក្នុងលោកផងដែរ ដ្បិតស្ទូឌីយោរបស់លោកត្រូវគេសន្និដ្ឋានថា មានតម្លៃ ១,៥ ពាន់លានដុល្លារ ហើយលោកមានចំណែក ៩០% នៃស្ទូឌីយោទាំងមូល ដូច្នេះបើសិនជាគិតមើលទៅ លោកមានទ្រព្យប្រហែល ១,៤ ពាន់លានដុល្លារ បើសិនជាលក់ស្ទូឌីយោនេះចេញ៕

The post MrBeast រំលេចមុខលើក្របទស្សនាវដ្តីអ្នកមាន Forbes រំពឹងអាចក្លាយជាមហាសេដ្ឋី YouTuber តំបូងបំផុត appeared first on .