SEA Games

ក្រុមហ៊ុនសារព័ត៌មានល្បី The New York Times កោតសរសើរពីការតស៊ូដ៏មុតមាំរបស់កីឡាការិនី ប៊ូ សំណាង

ឧកញ៉ាសំពៅ — Sat, 27 May 2023 05:48:41 +0000

កីឡាការិនី ប៊ូ សំណាង បានធ្វើឲ្យមហាជនមិនថានៅប្រទេសកម្ពុជា និងទូទាំងសកលលោក មានការត្រេកអរសាទរជាមួយកញ្ញាជាខ្លាំង បើទោះជាកញ្ញារត់បញ្ចប់ទីចុងក្រោយគេ សម្រាប់វិញ្ញាសាររត់ចំងាយ ៥ ០០០ ម៉ែត្រ សម្រាប់ព្រឹត្តិការណ៍ប្រកួតកីឡាស៊ីហ្គេមលើកទី ៣២ ក្ដី។

ជាមួយគ្នានោះ សារព័ត៌មានដ៏ល្បីលំដាប់ពិភពលោកគឺ The New York Times ក៏បានចុះផ្សាយកោតសរសើរកញ្ញាផងដែរ ដោយបានចុះផ្សាយ និងដាក់ចំណងជើងថា “កីឡាការិនីម្នាក់នេះរត់បញ្ចប់ទីចុងក្រោយគេ ប៉ុន្តែការតស៊ូរបស់នាងយកឈ្នះទឹកចិត្តប្រជាជនទូទាំងប្រទេស”។

សារព័ត៌មានអាមេរិកាំងមួយនេះថែមទាំងបញ្ជាក់ទៀតថា យុវតីវ័យ ២០ឆ្នាំ មានសភាពហត់នឿយខ្លាំង ដោយសារសម្ពាធឈាមទាប គួបផ្សំនឹងអាកាសធាតុភ្លៀង ផ្គរ ខ្យល់កន្ទ្រាក់ផង ប៉ុន្តែកញ្ញានៅតែពុះពាររត់បញ្ចប់ទីឲ្យខាងតែបាន បើទោះជាទីលានប្រណាំងនៅសល់តែកញ្ញាម្នាក់ក៏ដោយ។

“ខ្ញុំដឹងថា ខ្ញុំមិនអាចឈ្នះទេ ប៉ុន្តែខ្ញុំបានប្រាប់ខ្លួនឯងថា ខ្ញុំមិនត្រូវបញ្ឈប់វាត្រឹមនេះទេ”។ នេះបើតាមសម្ដីរបស់កញ្ញា ប៊ូ សំណាង បានផ្ដល់បទសម្ភាសន៍ទៅកាន់សារព័ត៌មាន។

គួររំលឹកដែរថា បន្ទាប់ពីបំពេញតួនាទីជាកីឡាការិនីតំណាងកម្ពុជា កញ្ញា ប៊ូ សំណាងក៏ទទួលបានការកោតសរសើរពីព្រះមហាក្សត្រ នរោត្តម សីហមុនីជាសាធារណៈ និងទទួលបានការឧបត្ថម្ភពីនាយករដ្ឋមន្ត្រី ហ៊ុន សែន ១០ ០០០ ដុល្លារផងដែរ៕

The post ក្រុមហ៊ុនសារព័ត៌មានល្បី The New York Times កោតសរសើរពីការតស៊ូដ៏មុតមាំរបស់កីឡាការិនី ប៊ូ សំណាង appeared first on .

សារព័ត៌មានសិង្ហបុរី ចុះផ្សាយពីព្រឹត្តិការណ៍បិទស៊ីហ្គេមដ៏អស្ចារ្យរបស់កម្ពុជា

ឧកញ៉ាសំពៅ — Wed, 17 May 2023 16:12:32 +0000

ព្រឹត្តិការណ៍ប្រកួតកីឡាស៊ីហ្គេមលើកទី ៣២ ដែលកម្ពុជាធ្វើជាម្ចាស់ផ្ទះលើកដំបូងបានបិទបញ្ចប់ជាស្ថាពរនាល្ងាចថ្ងៃទី ១៧ ឧសភានេះ ដោយមានការចូលរួមយ៉ាងច្រើនកុះករពីមហាជនពេញកីឡដ្ឋានជាតិមរតកតេជោតែម្ដង។

ជាមួយគ្នានោះ សារព័ត៌មានអន្តរជាតិ Channelnewsasia ក៏បានចុះផ្សាយពីព្រឹត្តិការណ៍ដ៏ឱឡារិកមួយនេះផងដែរ ដោយបានកោតសរសើរពីទឹកចិត្តអ្នកគាំទ្រ ទោះជាមានភ្លៀងធ្លាក់ខ្លាំងបែបណា ក៏ពួកគេសុខចិត្តបាំងឆ័ត្រ និងពាក់អាវភ្លៀង ដើម្បីចូលរួមពិធីបិទស៊ីហ្គេមនេះផងដែរ។

ក្រុមហ៊ុនសារព័ត៌មានសិង្ហបុរីមួយនេះ ក៏បានសង្កត់ធ្ងន់ថា នេះគឺជាលើកទីមួយដែលកម្ពុជាទទួលបានការរៀបចំព្រឹត្តិការណ៍កីឡាស៊ីហ្គេម ហើយវាបានបញ្ចប់ទៅជាមួយនឹងភាពដ៏អស្ចារ្យមិនធ្លាប់មាន។

បន្ទាប់ពីការច្រៀងភ្លេងជាតិខ្មែរយ៉ាងរំជើបរំជួល និងការបាញ់កាំជ្រួច ការបង្ហាញភ្លើងដ៏គួរឱ្យចាប់អារម្មណ៍មួយត្រូវបានបន្លឺឡើងដោយសំឡេងគ្រហឹម ខណៈហ្វូងអ្នកទស្សនាយ៉ាងកក្រើកនៅលើទីលាន ជាមួយភ្លៀងស្រិចៗបានសម្ដែងការអបអរ ជាមួយក្បាច់គុនល្បុក្កតោដែលបានបង្ហាញខ្លួនជាលើកដំបូងក្នុងការប្រកួតស៊ីហ្គេមនៅកម្ពុជា។

សូមជម្រាបដែរថាបន្ទាប់ពីបិទបញ្ចប់កីឡាស៊ីហ្គេមជាផ្លូវការ ដោយពន្លត់ភ្លើងស៊ីហ្គេម ទង់សហព័ន្ធកីឡាស៊ីហ្គេមត្រូវបានប្រគល់ទៅឲ្យប្រទេសថៃដែល នឹងធ្វើជាម្ចាស់ផ្ទះលើកក្រោយនៃការប្រកួតកីឡាស៊ីហ្គេមនៅឆ្នាំ២០២៥៕

The post សារព័ត៌មានសិង្ហបុរី ចុះផ្សាយពីព្រឹត្តិការណ៍បិទស៊ីហ្គេមដ៏អស្ចារ្យរបស់កម្ពុជា appeared first on .

ក្រុមហ៊ុន Meta បង្ហោះវីដេអូ អបអរសាទរជាមួយកម្ពុជា សម្រាប់ព្រឹត្តិការណ៍កំពូលស៊ីហ្គេម

ឧកញ៉ាសំពៅ — Wed, 10 May 2023 08:52:36 +0000

នៅសល់តែ ៧ថ្ងៃទៀតប៉ុណ្ណោះ ព្រឹត្តិការណ៍ប្រកួតកីឡាស៊ីហ្គេមលើកទី ៣២ នឹងត្រូវបញ្ចប់ ហើយទន្ទឹមនឹងនោះ បណ្ដាញសង្គមខ្នាតយក្សក្រុមហ៊ុន Meta Platforms បានបង្ហោះវីដេអូខ្លីមួយ ជាការអបអរសាទរជាមួយកម្ពុជា ក្នុងការធ្វើជាម្ចាស់ផ្ទះសម្រាប់ព្រឹត្តិការណ៍ដ៏អស្ចារ្យមួយនេះ។

យោងតាមការបង្ហោះដោយផ្ទាល់លើផេកផ្លូវការរបស់ Meta បានបង្ហោះវីដេអូដែលមានរយៈពេល ១៩ វិនាទី ជាមួយនឹងការសរសេរថា “អបអរសាទរកម្ពុជាធ្វើជាម្ចាស់ផ្ទះកីឡាស៊ីហ្គេមលើកទី ៣២ និងកីឡាអាស៊ានប៉ារ៉ាហ្គេមលើកទី ១២ នៅឆ្នាំ ២០២៣ នេះ! យើងខ្ញុំសូមជូនពរដល់អត្តពលិកទាំងអស់ជួបតែសំណាងល្អនិងជោគជ័យក្នុងកិច្ចខិតខំប្រឹងប្រែង។ សូមមកជុំគ្នាដើម្បីអបអរសាទរស្មារតីកីឡានិងការរួបរួមគ្នាក្នុងពេលដ៏រំភើបនេះ”។

អាចនិយាយបានថា ព្រឹត្តិការណ៍ SEA Game ដែលមានកម្ពុជាធ្វើជាម្ចាស់ផ្ទះសារនេះ បានធ្វើឲ្យពិភពលោកស្គាល់កម្ពុជាកាន់តែច្បាស់ ដោយទទួលបានការចុះផ្សាយកោតសរសើរពីបណ្ដាញសង្គមអន្តរជាតិធំៗជាច្រើន។

សូមជម្រាបជូនដែរថា កម្ពុជាទទួលបានឱកាសធ្វើជាម្ចាស់ផ្ទះព្រឹត្តិការណ៍ស៊ីហ្គេមលើកទី ៣២ និងអាស៊ានប៉ារ៉ាហ្គេមលើកទី ១២ ជាលើកដំបូង ហើយបើទោះជាវាទើបជាការរៀបចំលើកដំបូងក៏ពិតមែន ប៉ុន្តែគ្រប់អត្តពលិកមកពីគ្រប់ប្រទេសសុទ្ធតែសរសើរពីការរៀបចំរបស់កម្ពុជា ទាំងផ្នែកបដិសណ្ឋារកិច្ច និងរឿងហូបចុកដែលកម្ពុជាជាអ្នករ៉ាប់រងទាំងអស់ មិនគិតប្រាក់មួយកាក់មួយសេនពីពួកគេឡើយ៕

The post ក្រុមហ៊ុន Meta បង្ហោះវីដេអូ អបអរសាទរជាមួយកម្ពុជា សម្រាប់ព្រឹត្តិការណ៍កំពូលស៊ីហ្គេម appeared first on .

កីឡា ៣៧ ប្រភេទនឹងយកមកប្រកួតនៅព្រឹត្តិការណ៍ស៊ីហ្គេមលើកទី ៣២ ធ្វើឡើងនៅ ៥ ខេត្ត-រាជធានី

ឧកញ៉ាសំពៅ — Thu, 23 Feb 2023 08:05:04 +0000

ការប្រកួតកីឡាស៊ីហ្គេមលើកទី ៣២ ដែលមានកម្ពុជាធ្វើជាម្ចាស់ផ្ទះជាលើកដំបូងក្នុងរយៈពេល ៦៤ ឆ្នាំ នឹងធ្វើឡើងចាប់ពីថ្ងៃទី ០៥ ដល់ថ្ងៃទី ១៧ ឧសភា ២០២៣។

ក្នុងនោះ នឹងមានកីឡារហូតដល់ ៣៧ ប្រភេទឯណោះដែលនឹងត្រូវយកមកប្រកួតនៅក្នុងព្រឹត្តិការណ៍ដ៏ឱឡារិកមួយនេះ ដូចជា៖

អត្តពលកម្ម
កីឡាលើទឹក
វាយសី
បាល់បោះ
ប៊ីយ៉ា ស្នូកឃ័រ
ប្រដាល់សកល
អុកចត្រង្គ
ទោចក្រយាន
គ្រីឃីត
កីឡារាំ
កីឡាអេឡិចត្រូនិក
គុនដាវ
ហ្លរប៊ល
បាល់ទាត់
វាយកូនហ្គោល
កាយសម្ព័ន្ធ
ហុកគី
ម៉ូតូទឹក
យូដូ
ការ៉ាតេ
យុទ្ធគុនចម្រុះ (គុនល្បុក្កតោ, អាតនីស, ជីជីតស៊ូ, ឃីកបុកស៊ីង, វ៉ូវីណាម, គុនខ្មែរ)
កីឡាឧបសគ្គ
បញ្ចសីលា
ប៉េតង់
ទូកក្ដោង
សីដក់
សូហ្វតេន្នីស
វាយកូនឃ្លីលើតុ
តេក្វាន់ដូ WT
វាយកូនបាល់
ប្រណាំងទូកប្រពៃណី
ទ្រីយ៉ាត្លុង
បាល់ទះ
លើកទម្ងន់
ចំបាប់
វ៉ូស៊ូ
កីឡាសម្ដែង

គួររំលឹកដែរថា ចំពោះកីឡាកាយវប្បកម្មត្រូវបានដកចេញពីវិញ្ញាសារប្រកួត បន្ទាប់ពីរកឃើញថាកីឡាករបានប្រើប្រាស់សារធាតុហាមឃាត់។

ចំពោះទីតាំងនៃការប្រកួតកីឡាទាំងនោះវិញគឺ ធ្វើឡើងនៅរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកំពត និងខេត្តកែប ខណៈនៅភ្នំពេញនឹងត្រូវរៀបចំប្រកួតប្រហែល ៣០ វិញ្ញាសារ នៅ ៣ កីឡដ្ឋានដូចជា កីឡដ្ឋានមរតកតេជោ កីឡដ្ឋានអូឡាំពិក និងនៅមណ្ឌលសន្និបាត និងពិព័រណ៍អន្តរជាតិជ្រោយចង្វារ OCIC៕

The post កីឡា ៣៧ ប្រភេទនឹងយកមកប្រកួតនៅព្រឹត្តិការណ៍ស៊ីហ្គេមលើកទី ៣២ ធ្វើឡើងនៅ ៥ ខេត្ត-រាជធានី appeared first on .

កម្ពុជានឹងចាយលុយតិចជាងគេ សម្រាប់ការធ្វើជាម្ចាស់ផ្ទះព្រឹត្តិការណ៍ស៊ីហ្គេម

ឧកញ៉ាសំពៅ — Thu, 23 Feb 2023 07:11:41 +0000

កាលពីថ្ងៃទី ២៣ កុម្ភៈ ២០២៣ CAMSOC សហការជាមួយក្លឹបអ្នកកាសែត រៀបចំកម្មវិធីសន្និសិទសារព័ត៌មានស្ដីពី វឌ្ឍនភាពនៃការត្រៀម Sea Games-Asean Para Games នៅឆ្នាំ ២០២៣ ដែលមានកម្ពុជាធ្វើជាម្ចាស់ផ្ទះជាលើកដំបូង។

ក្នុងឱកាសនេះផងដែរ ឯកឧត្ដម វ៉ាត់ ចំរើន អគ្គលេខាធិការគណៈកម្មការរៀបចំកីឡាស៊ីហ្គេមលើកទី ៣២ បានបញ្ជាក់ពីកញ្ចប់ថវិកា សម្រាប់ការរៀបចំព្រឹត្តិការណ៍ដ៏អស្ចារ្យខាងលើ ដែលមានទំហំប្រមាណ ៥០៥ ប៊ីលានរៀល ឬប្រមាណ ១២៤ លានដុល្លារអាមេរិក។

ឯកឧត្ដមក៏បានសង្កត់ធ្ងន់ថា កញ្ចប់ថវិកាខាងលើនេះគឺចំណាយលើព្រឹត្តិការណ៍ស៊ីហ្គេម ១០០ លានដុល្លារ ខណៈ ២៤ ដុល្លារទៀតរៀបចំសម្រាប់ព្រឹត្តិការណ៍ប៉ារ៉ាហ្គេម។

បន្ថែមពីនោះ ការចំណាយជាង ១២០ លានដុល្លារ រៀបចំព្រឹត្តិការណ៍ដ៏សំបើមទាំង ២ នេះ គឺវាតិចជាងការចំណាយរបស់ប្រទេសដទៃដែលធ្លាប់ជាម្ចាស់ផ្ទះស៊ីហ្គេម ដែលធ្លាប់ចាយលុយអស់រាប់រយលានដុល្លារឯណោះ តួយ៉ាងវៀតណាមចាយអស់ ១៤០ លានដុល្លារ គ្រាន់តែរៀបចំកីឡាស៊ីហ្គេម ខណៈប្រភពមិនផ្លូវការមួយបង្ហើបថា ឥណ្ឌូណេស៊ីចាយអស់ ៣៥ លានដុល្លារ រៀបចំកីឡាប៉ារ៉ាហ្គេមតែមួយភ្លែតប៉ុណ្ណោះ។

គួររំលឹកដែរថា កម្ពុជាប្រើយុទ្ធសាស្ត្រ “ចំណាយតិច តែមានភាពលេចធ្លោរ” ដែលសន្សំសំចៃលើការសាងសង់កន្លែងប្រកួតនានា ដោយមានការជួយឧបត្ថម្ភពីស្ថាប័នកីឡាអន្តរជាតិ និងស្ថាប័នឯកជនជាដើម ដែលជួយកម្ពុជាកាត់បន្ថយការចំណាយបានច្រើនសន្ធឹកជាដើម៕

The post កម្ពុជានឹងចាយលុយតិចជាងគេ សម្រាប់ការធ្វើជាម្ចាស់ផ្ទះព្រឹត្តិការណ៍ស៊ីហ្គេម appeared first on .

សម្តេចនាយករដ្ឋមន្រ្តីណែនាំកីឡាករ មិនត្រូវធ្វើអ្វីដែលនាំដល់ការអាប់ឱនកិត្តិយសជាតិនោះឡើយ

ឧកញ៉ាកោះក្របី — Thu, 28 Apr 2022 03:54:46 +0000

ប្រមុខរាជរដ្ឋាភិបាលកម្ពុជា បានផ្តាំផ្ញើដល់កីឡាករ កីឡាការិនី ដែលទៅចូលរួមប្រកួតកីឡា SEA Games នៅប្រទេសវៀតណាមនាពេលខាងមុខនេះ ត្រូវប្រកាន់ភ្ជាប់ថា ពេលចេញទៅប្រកួត គឺតំណាងឱ្យជាតិទាំងមូល។ សម្តេចបន្តថា សេចក្តីថ្លៃថ្នូររបស់ជាតិ គឺពិតជាសំខាន់ណាស់ ដូច្នេះយើងមិនត្រូវធ្វើអ្វីដែលនាំដល់ការអាប់ឱនកិត្តិយសជាតិនោះឡើយ។

ការលើកឡើងរបស់សម្តេចតេជោ ហ៊ុន សែន នាយករដ្ឋមន្ត្រី ធ្វើឡើងក្នុងពេលជួបសំណេះសំណាល និងផ្តល់អនុសាសន៍ ដល់កីឡាករ កីឡាការិនី និងអត្តពលិក ចំនួន៥៦០នាក់ មុនពេលពួកគេចេញទៅប្រកួតកីឡាស៊ីហ្គេម (SEA Game) លើកទី៣១ នៅប្រទេសវៀតណាម នាព្រឹកថ្ងៃទី២៨ ខែមេសា ឆ្នាំ២០២២នេះ។

សម្តេចតេជោ បានណែនាំដល់កីឡករ កីឡាការិនីទាំងអស់ត្រូវយកចិត្តទុកដាក់ប្រឹងប្រែងប្រកួត តែត្រូវចៀសវាងការបំពានច្បាប់ និងលក្ខខណ្ឌប្រកួត ក៏ដូចជាការប្រើប្រាស់សារធាតុប៉ូវកម្លាំងជាដើម។ សម្តេចបន្ថែមថា ទោះបីដាក់គោលដៅយកមេដាយឱ្យបានច្រើនក៏ដោយ តែមិនត្រូបំពានច្បាប់ បំពានវិន័យ និងការប្រើប្រាស់ថ្នាំប៉ូវ កម្លាំងជាដាច់ខាតដែលនាំឱ្យប៉ះពាល់សេចក្តីថ្លៃថ្នូររបស់ជាតិ។

ទន្ទឹមនឹងនោះ ប្រមុខរាជរដ្ឋាភិបាល ក៏បានកោតសរសើរចំពោះសមត្ថភាពកីឡាករ កីឡាការិនី និងគ្រូបង្វឹក ដែលបានខិតខំហ្វឹកហ្វឺនដល់កីឡាករទាំងអស់ទទួលបានជ័យជំនះជាបន្តបន្ទាប់។ ក្នុងឱកាសនៃការទៅចូលរួមប្រកួតកីឡា SEA Games នៅប្រទេសវៀតណាមខាងមុខ សម្តេចតេជោនាយករដ្ឋមន្ត្រី បានលើកទឹកចិត្តដល់កីឡាករ កីឡាការិនីទាំងអស់អោយខិតខំប្រឹងប្រែងដើម្បីទទួលបានជ័យជំនះបន្ថែមទៀត ។

ជាមួយគ្នានេះ ការចេញទៅប្រកួតលើកនេះសរុបទាំងអស់មានចំនួន៥៦០ នាក់ ដែលក្នុងនោះមានថ្នាក់ដឹកនាំប្រមាណជាង៤០នាក់ ដែលនេះចំនួនដ៏សមស្របមួយ ខណៈដែលសម្តេចក៏បានឧបត្ថម្ភលើកទឹកចិត្តដល់កីឡាករកីឡាការិនី និងគ្រូបង្វឹកចំនួន ៥៦០នាក់ ក្នុងម្នាក់ៗទទួលបាន $500 សម្រាប់ការធ្វើដំណើរផងដែរ៕

The post សម្តេចនាយករដ្ឋមន្រ្តីណែនាំកីឡាករ មិនត្រូវធ្វើអ្វីដែលនាំដល់ការអាប់ឱនកិត្តិយសជាតិនោះឡើយ appeared first on .

កម្ពុជា បញ្ចូនកីឡាករ កីឡាការិនី និងអត្តពលិក ៥៦០នាក់ទៅយកពានប្រកួត SEA Games នៅហាណូយ

chhan sreyin — Thu, 28 Apr 2022 00:56:48 +0000

កម្ពុជា ជ្រើសរើសយកកីឡាករ កីឡាការិនី និងអត្តពលិករបស់ខ្លួន សរុបចំនួន ៥៦០នាក់ ទៅចូលរួមការប្រកួត SEA Games លើកទី៣១ នៅទីក្រុងហាណូយ ប្រទេសវៀតណាម លើប្រភេទកីឡាចំនួន ៤០ប្រភេទ និង ៥២៦វិញ្ញាសាប្រកួត។

ក្នុងនោះ កម្ពុជា ក៏បានបញ្ចូនថ្នាក់ដឹកនាំ និងមន្ត្រីកីឡាចំនួន ៤៥នាក់, គ្រូបង្វឹក-គ្រូជំនួយចំនួន ៩៣នាក់, អាជ្ញាកណ្ដាលចៅក្រមអន្តរជាតិចំនួន ១៦នាក់, អ្នកដឹកនាំក្រុមចំនួន២២នាក់ និងក្រុមគ្រូពេទ្យចំនួន ២១នាក់។

ការប្រកួត SEA Games លើកទី៣១ នៅទីក្រុងហាណូយ ប្រទេសវៀតណាម បានរៀបចំប្រភេទកីឡាចំនួន ៤០ប្រភេទ និង ៥២៦វិញ្ញាសាប្រកួត។ ប្រទេសដែលបានចូលរួមប្រកួតជាសមាជិកសហព័ន្ធកីឡាអាស៊ីអាគ្នេយ៍មានចំនួន ១១ប្រទេស រួមមាន៖ វៀតណាម, កម្ពុជា, ឡាវ, ប្រ៊ុយណេ, ឥណ្ឌូណេស៊ី, ម៉ាឡេស៊ី, សិង្ហបុរី, ហ្វីលីពីន, ថៃ, មីយ៉ាន់ម៉ា និងទីម័រខាងកើត ដែលមានចំនួនកីឡាករ-កីឡាការិនីសរុប ៧,១១៥នាក់ និងអ្នកស្ម័គ្រចិត្តបម្រើការងាររៀបចំប្រកួត ៣,០០០នាក់។

ដោយឡែក សម្រាប់ការស្នាក់នៅហូបចុក ម្ចាស់ផ្ទះរៀបចំនៅតាមសណ្ឋាគារ បែងចែកតាមប្រភេទកីឡា។

ក្នុងនាមជាម្ចាស់ផ្ទះនៃព្រឹត្តិការណ៍កីឡាដ៏ធំបំផុតរបស់តំបន់អាស៊ានមួយនេះ វៀតណាម បានស្នើសុំកញ្ចប់ថវិកាដំបូង ប្រមាណ ៦៩,៣ លានដុល្លារ ដោយ ៤២,៣ លានដុល្លារ នឹងត្រូវប្រើប្រាស់ សម្រាប់ការចំណាយលើការរៀបចំ ខណ: ២៥,៩ លានដុល្លារផ្សេងទៀត នឹងត្រូវបែងចែកសម្រាប់ការធ្វើឱ្យប្រសើឡើង និងជួសជុលទៅលើហេដ្ឋារចនាសម្ព័ន្ធ សម្រាប់ការប្រកួត SEA Games នេះ ។

យ៉ាងណា ដោយសារតែជំងឺរាតត្បាតកូវីដ ១៩ ថវិការបស់វៀតណាម សម្រាប់ព្រឹត្តិការណ៍នេះ ត្រូវបានកាត់បន្ថយ ដោយនៅខែមករា ឆ្នាំ ២០២២ រដ្ឋាភិបាលវៀតណាម បានអនុម័តថវិការៀបចំ មកត្រឹមចំនួន ៣២,៨ លានដុល្លារវិញ។

ដោយឡែក នាថ្ងៃទី ១ ខែមេសាឆ្នាំ ២០២២ រដ្ឋាភិបាលវៀតណាម បានសម្រេចអនុម័តកញ្ចប់ថវិកាបន្ថែមចំនួន ១៦,៦៥ លានដុល្លារ សម្រាប់ការប្រកួត SEA Games ដោយទឹកប្រាក់នេះផងដែរ ត្រូវបានដកចេញពីថវិកាជាតិ សម្រាប់កីឡា និងការហ្វឹកហ្វឺនកាយសម្បទានៅឆ្នាំ ២០២២ ។

ជាមួយគ្នានេះ ក្រសួង និងទីភ្នាក់ងារកណ្តាល ចំនួន ៤ នឹងត្រូវបានផ្តល់ថវិកាចំនួន ៣៧៨,៣ ពាន់លានដុង ខណ:រដ្ឋបាលទីក្រុងហាណូយ និងខេត្តចំនួន ១១ ផ្សេងទៀត នឹងទទួលបានប្រាក់បន្ថែមចំនួន ៧០,៧ ពាន់លានដុង សម្រាប់រៀបចំព្រឹត្តិការណ៍នេះ ។

សូមជម្រាបថា SEA Games លើកទី ៣១ ដែលវៀតណាមធ្វើជាម្ចាស់ផ្ទះនេះ នឹងប្រព្រឹត្តិទៅ នៅទីក្រុងហាណូយ និង ១១ ខេត្តនៅជាប់នោះ ដែលគ្រោងនឹងចាប់ផ្តើមពីថ្ងៃទី ១២ ដល់ថ្ងៃទី ២៣ ខែឧសភា ឆ្នាំ ២០២២ នេះ ជាមួយនឹងប្រភេទកីឡាចំនួន ៤០ ដែលគ្របដណ្តប់ដោយ ៥២៦ ការប្រកួត និងត្រូវបានគេរំពឹងថាទាក់ទាញអ្នកចូលរួមប្រហែល ១០ ០០០ នាក់ ៕

The post កម្ពុជា បញ្ចូនកីឡាករ កីឡាការិនី និងអត្តពលិក ៥៦០នាក់ទៅយកពានប្រកួត SEA Games នៅហាណូយ appeared first on .