រយៈពេល៩ខែ គិតត្រឹមថ្ងៃទី៣០ ខែកញ្ញា ឆ្នាំ២០២៣ កំពង់ផែស្វយ័តក្រុងព្រះសីហនុ រកចំណូលបានជាង៦៤លានដុល្លារ ថយចុះ០,៨១ភាគរយ បើធៀបនឹងរយៈពេលដូចគ្នាកាលពីឆ្នាំ២០២២។នេះបើតាមរបាយការណ៍របស់កំពង់ផែស្វយ័តក្រុងព្រះសីហនុ។
របាយការណ៍ខាងលើបានឱ្យដឹងថា ៩ខែ ឆ្នាំ២០២៣ កំពង់ផែស្វយ័តក្រុងព្រះសីហនុ ទទួលចំណូលបានសរុប ២៦៤៥៦៧៩៩១០០០រៀល ឬស្មើនឹង៦៤ ២៦៩ ៦៤១.៧៩ដុល្លារ ថយចុះ ២១៦ ២៧១ ៦០០០រៀល ឬ៥២៥ ៤១៨.៩២ដុល្លារ ស្មើនឹង ០,៨១ភាគរយ បើធៀបនឹងរយៈពេលដូចគ្នាកាលពីឆ្នាំ២០២២។
ក្នុងត្រីមាសទី១ កំពង់ផែស្វយ័តក្រុងព្រះសីហនុ រកចំណូលបាន ៧៧ ៦២៧ ៤៤៥០០០រៀល ឬ១៨ ៨៥៦ ០៤០.៣០ដុល្លារ ថយចុះប្រមាណ១៤,១១ភាគរយ បើធៀបនឹងត្រីមាសទី១ ឆ្នាំ២០២២។ចំណែកត្រីមាសទី២ កំពង់ផែស្វយ័តក្រុងព្រះសីហនុ រកចំណូលបាន ៩២ ០៦៣ ១៣៣ ០០០រៀល ឬ២២ ៣៥៣ ៩៩១.៩០ដុល្លារ កើនជាងត្រីមាសទី២ ឆ្នាំ២០២២ ប្រមាណ០.៩១ភាគរយ។រីឯត្រីមាសទី៣ អាចរកចំណូលបាន ៩៤ ៨៧៧ ៤១៤ ០០០រៀល ឬ២៣ ០២៨ ៨២៨.៤០ដុល្លារ កើនឡើងជាងត្រីមាសទី៣ ឆ្នាំ២០២២ ប្រមាណ១១,៤៧ភាគរយ។
បើតាមលោក លូ គឹមឈុន អគ្គនាយកកំពង់ផែស្វយ័តក្រុងព្រះសីហនុ បានឱ្យដឹងថា ក្នុងត្រីមាសទី៣ដែលចំណូលមានការកើនឡើងបណ្តាលមកពីបរិមាណកុងតែន័រ និងបរិមាណទំនិញឆ្លងកាត់ កសស មានការកើនឡើង និងធ្វើឱ្យចំណេញសុទ្ធក្រោយបង់ពន្ធមានការកើនឡើង។ ហើយក្នុងត្រីមាសទី៣ ឆ្នាំ២០២៣ កុងតែន័រដែលបានឆ្លងកាត់ កសស មានការកើនឡើងប្រមាណ ៨,៦១% បើធៀបនឹងត្រីមាសទី៣ ឆ្នាំ២០២២។
លោកអគ្គនាយកបន្តថា កំពង់ផែស្វយ័តក្រុងព្រះសីហនុ នឹងបន្តកិច្ចខិតខំប្រឹងប្រែង ដើម្បីបំពេញសេវាកម្ម អាជីវកម្មឱ្យកាន់តែល្អប្រសើរ និងសម្រេចបានលទ្ធផលខ្ពស់ជាប្រយោជន៍ដល់ភាគហ៊ុនិករបស់ខ្លួន។និងពង្រឹងប្រសិទ្ធភាពការងារ និងការកសាង ហេដ្ឋារចនាសម្ព័ន្ធបន្ថែមទៀត ដើម្បីឆ្លើយតបនឹងកំណើនតម្រូវការសេវាកម្មរបស់អតិថិជន និងការរីកចម្រើន សេដ្ឋកិច្ចជាតិ៕
