លោក Jeff Beszos ស្ថាបនិកក្រុមហ៊ុន Amazon បានបន្តលក់ភាគហ៊ុនជិត ៣ លានហ៊ុន នៅក្នុងក្រុមហ៊ុនរបស់ខ្លួន ដែលមានតម្លៃសរុបប្រហែល ៦៦៥,៨លានដុល្លារ។ នេះបើតាមការចុះផ្សាយពីសារព័ត៌មាន WioNews។
យោងតាមឯកសារផ្លូវការមួួយដែលបានផ្សព្វផ្សាយកាលពីថ្ងៃទី៨ ខែកក្កដា បានបង្ហាញឲ្យដឹងថា ការលក់ភាគហ៊ុននេះ គឺជាផ្នែកមួយនៃផែនការលក់របស់លោក Bezos ដែលបានរៀបចំទុកជាមុន ចាប់តាំងពីខែមីនាមកម្លេះ ដោយលោកមានគម្រោងបន្តលក់ភាគហ៊ុនចេញរហូតដល់ទៅ ២៥លានហ៊ុន នៅត្រឹមខែឧសភា ឆ្នាំ២០២៦។
រម្លឹកផងដែរថា កាលពីដើមខែកក្កដានេះ លោក Bezos ក៏បានលក់ចេញភាគហ៊ុនរបស់ខ្លួនមួយចំនួនរួចម្តងហើយ ដែលមានតម្លៃសរុប្រមាណជាង ៧០០លានដុល្លារ ពោលគឺនៅត្រឹមតែប៉ុន្មានថ្ងៃប៉ុណ្ណោះ បន្ទាប់ពីលោកបានរៀបអាពាហ៍ពិពាហ៍ ជាមួយគូដណ្តឹង លោកស្រី Lauren Sanchez នៅប្រទេសអ៊ីតាលី។
ជម្រាបជូនថា បើទោះបីជាមានការលក់ចេញភាគហ៊ុនថ្មីៗនេះក៏ដោយ ក៏លោក Bezos នៅតែជាម្ចាស់ភាគហ៊ុនធំជាងគេរបស់ Amazon ដដែល ដោយកាន់កាប់ភាគហ៊ុនច្រើនជាង ៩០០ លានហ៊ុន មានតម្លៃជិត ២០០ពាន់លានដុល្លារ។ យោងតាម Forbes លោក Bezos បច្ចុប្បន្នមានទ្រព្យសម្បត្តិសរុបប្រមាណ ២៣៦ពាន់លានដុល្លារ៕
