លោក Larry Ellison ដែលជាសហស្ថាបនិក និងជាប្រធានផ្នែកបច្ចេកវិទ្យានៃក្រុមហ៊ុនសូហ្វវែរខ្នាតយក្ស Oracle កាលពីពេលថ្មីៗនេះ បានវ៉ាដាច់នាយកប្រតិបត្តិរបស់ក្រុមហ៊ុន Meta លោក Mark Zuckerberg ក្នុងនាមជាមហាសេដ្ឋីមានដាច់គេទី០២ លើពិភពលោក។
យោងតាមការចុះផ្សាយពី Bloomberg Billionaires Index បានរាយការណ៍ថា បច្ចុប្បន្នទ្រព្យសម្បត្តិរបស់លោក Ellison មានចំនួនសរុបប្រមាណ ២៥១ពាន់លានដុល្លារ បន្ទាប់ពីទ្រព្យសម្បត្តិរបស់លោក បានកើនឡើងចំនួន ៥៩ពាន់លានដុល្លារ នៅឆ្នាំនេះ។
គួរឲ្យដឹងផងដែរថា ជុំវិញការកើនឡើងគួរឲ្យកត់សម្គាល់នេះ ត្រូវបានកើតឡើងបន្ទាប់ពីភាគហ៊ុនរបស់ Oracle បានហក់ឡើង ៥,៧% កាលពីថ្ងៃអង្គារ សប្តាហ៍នេះ បន្ទាប់ពីមានដំណឹងថា សហរដ្ឋអាមេរិក គ្រោងនឹងអនុញ្ញាតឲ្យក្រុមហ៊ុនផលិតបន្ទះឈីប Nvidia និង Advanced Mico Devices Inc. នាំចេញឧបករណ៍បន្ទះឈីប semiconductors មួយចំនួនទៅកាន់ប្រទេសចិន ឡើងវិញ។
កាលពីខែមុន លោក Ellison បានបន្ថែមទឹកប្រាក់ដល់ទៅ ២៦ពាន់លានដុល្លារ ទៅក្នុងទ្រព្យសម្បត្តិសរុបរបស់ខ្លួន ដោយសារតែការកើនឡើងនៃភាគហ៊ុនរបស់ Oracle ។
ជម្រាបជូនថា លោក Ellison បានឡើងងារជាមហាសេដ្ឋី ចាប់តាំងពីឆ្នាំ១៩៩៣ មកម្លេះ ដោយចំណូលចម្បងរបស់លោកទទួលបានពីការកាន់កាប់ភាគហ៊ុនប្រមាណ ៨០% នៅក្នុងក្រុមហ៊ុន Oracle៕
