លោក Sundar Pichai នាយកប្រតិបតិ្តក្រុមហ៊ុន Alphabet ដែលជាក្រុមហ៊ុនមេរបស់ Google កាលពីពេលថ្មីៗនេះ ត្រូវបានគេរាប់បញ្ចូលក្នុងបញ្ជីឈ្មោះមហាសេដ្ឋី បន្ទាប់ពីទ្រព្យសម្បត្តិសរុបរបស់លោក កើនឡើងដល់ ១,១ពាន់លានដុល្លារ ក្រោយដឹកនាំក្រុមហ៊ុនយក្សអាមេរិក ជិត ១០ឆ្នាំ។
យោងតាមការចុះផ្សាយពីសារព័ត៌មាន Bloomberg បានរាយការណ៍ថា ការហក់ឡើងខ្ពស់នៃទ្រព្យសម្បត្តិរបស់លោក Pichai ត្រូវបានជំរុញដោយការកើនឡើងនៃភាគហ៊ុន នាពេលថ្មីៗនេះ របស់ក្រុមហ៊ុន Alphabet ។
ភាគហ៊ុនរបស់ Alphabet បានកើនឡើងដល់ ៤,១% នៅក្នុងការជួញដូចចុងក្រោយកាលពីសប្តាហ៍មុន បន្ទាប់ពីក្រុមហ៊ុនបានរាយការណ៍ពីការកើនឡើងនូវប្រាក់ចំណូល និងប្រាក់ចំណេញល្អប្រសើរជាងការរំពឹងទុក សម្រាប់ត្រីមាសទីពីរ។
គួរឲ្យដឹងថា លោក Pichai កាន់កាប់ភាគហ៊ុនប្រមាណ ០,០២% នៅក្នុង Alphabet ដែលមានតម្លៃសរុបប្រហែល ៤៤០លានដុល្លារ។ តែទោះជាយ៉ាងណាក៏ដោយ ប្រភពចំណូលជាចម្បងរបស់លោក ភាគច្រើនទទួលបានពីការលក់ភាគហ៊ុន និងប្រាក់បៀវត្សរ៍ផ្អែកលើលទ្ធផលដែលលោកទទួលបានពីការដឹកនាំក្រុមហ៊ុន នៅក្នុងរយ:ពេលជិត ១០ឆ្នាំកន្លងមក។
ជម្រាបជូនផងដែរថា លោក Pichai បានចូលរួមជាមួយ Google ក្នុងឆ្នាំ២០០៤ ។ លោកបានឡើងកាន់តំណែងជានាយកប្រតិបត្តិរបស់ក្រុមហ៊ុន នៅក្នុងឆ្នាំ២០១៥ ខណៈដែលក្រុមហ៊ុនបានរៀបចំរចនាសម្ព័ន្ធឡើងវិញដើម្បីក្លាយជាក្រុមហ៊ុនបុត្រសម្ព័ន្ធរបស់ក្រុមហ៊ុន Alphabet ដែលទើបបង្កើតថ្មី៕
