យោងតាមក្រុមធុរកិច្ចដែលផ្តល់ប្រឹក្សាដល់ក្រុមអ្នកចរចាថៃ បានបង្ហាញឲ្យដឹងថា ប្រទេសថៃ បានត្រៀមខ្លួនរួចជាស្រេចហើយ ក្នុងការលុបចោលពន្ធគយលើទំនិ្របស់សហរដ្ឋអាមេរិកដល់ទៅ ៩០% ពោលគឺបានកើនឡើងពីចំនួន ៦០% នៅក្នុងសំណើផ្តល់ជូនពីមុន ក្នុងគោលបំណងដើម្បីបញ្ចៀសការជាប់ពន្ធ ៣៦% ដែលដាក់ដោយប្រធានាធិបតីអាមេរិក លោក ដូណាល់ ត្រាំ។ នេះបើតាមការចុះផ្សាយពីសារព័ត៌មាន Bangkok Post។
លោក Chanintr Chalisarapong អនុប្រធានសភាពាណិជ្ជកម្មថៃ បានប្រាប់អ្នកយកព័ត៌មាន ក្នុងបទសម្ភាសមួយកាលពីថ្ងៃព្រហស្បតិ៍ថា សំណើទីបីរសប់រដ្ឋាភីបាល អាចនឹងលុបបំបាត់ការយកពន្ធគយ និងរបាំងមិនមែនពន្ធលើផលិតផលអាមេរិក ប្រហែល ១០ ០០០។
លោក Chanintr បានបន្ថែមឲ្យដឹងទៀតថា ជុំវិញការដាក់សំណើផ្តល់ជូនចុងក្រោយនេះ អាចនឹងបន្ទាបអត្រាពន្ធគយចន្លោះពី ១៨% ទៅ ២០% ពីកម្រិតគំរាមកំហែងរបស់លោក ត្រាំ ដែលដាក់លើទំនិញរបស់ប្រទេសថៃ ដល់ទៅ ៣៦% ។
គួរឲ្យដឹងថា សំណើថ្មីដែលនឹងត្រូវដាក់បង្ហាញដល់រដ្ឋាភិបាលទីក្រុងវ៉ាស៊ីនតោន នេះ អាចកាត់បន្ថយអតិរេកពាណិជ្ជកម្មចំនួន ៤៥,៦ពាន់លានដុល្លាររបស់ប្រទេសថៃ ជាមួយសហរដ្ឋអាមេរិកបាន ៧០% ក្នុងរយៈពេល ៣ឆ្នាំ និងនាំឱ្យមានតុល្យភាពពាណិជ្ជកម្ម ក្នុងរយៈពេល ៥ឆ្នាំខាងមុខ ផងដែរ។
ជម្រាបជូនថា ថៃជាប្រទេសមួយក្នុងចំណោមប្រទេសអាស៊ីអាគ្នេយ៍ផ្សេងទៀត ដែលកំពុងព្យាយាមបញ្ចប់លក្ខខណ្ឌពាណិជ្ជកម្មជាមួយអាមេរិក ដែលជាទីផ្សារនាំចេញធំបំផុតខ្លួន ដែលមានប្រហែល ១៨% នៃការនាំចេញសរុបកាលពីឆ្នាំមុន៕
