ក្រសួងយុត្តិធម៌អាមេិរក កាលពីថ្ងៃទី៥ ខែសីហាកន្លងទៅ បាននិយាយថា ជនជាតិចិន ២នាក់ ត្រូវបានចាប់ខ្លួនភ្លាមៗនៅរដ្ឋកាលីហ្វ័រញ៉ា បន្ទាប់ពីត្រូវបានចោទប្រកាន់ពីបទលួចដឹកជញ្ជូនដោយខុសច្បាប់នូវបន្ទះឈីប AI ដែលមានតម្លៃរាប់សិបលានដុល្លារ ទៅកាន់ប្រទេសចិន។ នេះបើតាមការចុះផ្សាយពីសារព័ត៌មាន Reuters។
ជនជាប់ចោទទាំងពីរនោះ រួមមាន Chuan Geng អាយុ ២៨ឆ្នាំ នៅរស់នៅទីក្រុង Pasadena និងម្នាក់ទៀតឈ្មោះ Shiwei Yang អាយុ ២៨ឆ្នាំ រស់នៅ El Monte ដែលបាននាំចេញបន្ទះឈីប AI កម្រិតខ្ពស់ របស់ក្រុមហ៊ុន Nvidia និងបច្ចេកវិទ្យាផ្សេងទៀត ទៅកាន់ប្រទេសចិន គិតចាប់ពីខែតុលា ឆ្នាំ២០២២ ដល់ខែកក្កដា ឆ្នាំ២០២៥ ដោយគ្មានអាជ្ញាប័ណ្ណដែលទទួលស្គាល់ពីនាយកដ្ឋានពាណិជ្ជកម្មសហរដ្ឋអាមេរិកឡើយ។
គួរឲ្យដឹងផងដែរថា យោងតាមពាក្យបណ្តឹង ក្រុមហ៊ុន ALX Solutions Inc ដែលបង្កើតឡើងក្នុងឆ្នាំ២០២២ ក៏មានជាប់ពាក់ព័ន្ធនៅក្នុងសំណុំរឿងនេះផងដែរ ពោលគឺបន្ទាប់ពីសហរដ្ឋអាមេរិក បានដាក់ការត្រួតពិនិត្យលើការនាំចេញយ៉ាងទូលំទូលាយ លើបច្ចេកវិទ្យា ទៅកាន់ប្រទេសចិន ហើយចាប់ផ្តើមទាមទារអាជ្ញាប័ណ្ណ សម្រាប់បន្ទះឈីប។
ជម្រាបជូនផងដែរថា តាមច្បាប់អ្នកទាំងពីរអាចជាប់ពន្ធនាគារ ២០ឆ្នាំ ប៉ុន្តែទោះជាយ៉ាងណា Geng ដែលជាអ្នករស់នៅអចិន្ត្រៃយ៍នៅអាមេរិក ត្រូវបានដោះលែងឲ្យនៅក្រៅឃុំ ដោយបង់ប្រាក់តម្កល់ ២៥០ ០០០ដុល្លារ និង Yang ដែលស្នាក់នៅលើសទិដ្ឋាកា នៅតែបន្តឃុំខ្លួន ដើម្បីសាកសួរបន្ថែម៕
