នាយកដ្ឋានកែតម្រូវរបស់ប្រទេសថៃ ថ្មីៗនេះ បានចេញមុខច្រានចោលជុំវិញរបាយការណ៍ដែលលើកឡើងថាអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា បានទិញភីហ្សាចែកជូនសម្រាប់ឆ្មាំ និងអ្នកទោសចំនួន ៦ ៥០០ នាក់ ដើម្បីធ្វើពិធីជប់លៀង នៅក្នុងពន្ធនាគារ។ នេះបើតាមការចុះផ្សាយពីសារព័ត៌មាន Bangkok Post។
អ្នកនាំពាក្យរងនៃនាយកដ្ឋានកែតម្រូវថៃ លោកស្រី Kanokwan Jiewchuaphan បាននិយាយកាលពីថ្ងៃទី១៧ ខែកញ្ញាថា លោក ថាក់ស៊ីន មិនបានទិញភីហ្សា សម្រាប់ឆ្មាំ និងអ្នកទោសដើម្បីជប់លៀង នៅក្នុងពន្ធនាគារកណ្តាល Klong Prem ដែលជាកន្លែងលោកកំពុងអនុវត្តទោស នោះឡើយ។
យ៉ាងណាមិញ ជុំវិញសេចក្តីថ្លែងការណ៍នេះ គឺត្រូវបានធ្វើឡើងដើម្បីជាការឆ្លើយតបទៅនឹងព័ត៌មានដែលចេញផ្សាយដោយអតីតសមាជិកសភា លោក Watchara Phettong ដែលបានចោទប្រកាន់ទៅលើលោក ថាក់ស៊ីន កាលពីសប្តាហ៍មុនថា លោកបានបញ្ជាឲ្យគេទិញយកនំភីហ្សារៀបចំពិធីជប់លៀង សម្រាប់ឆ្មាំ និងអ្នកទោសចំនួន ៦ ៥០០ នាក់ ក្នុងគោលបំណងអ្នកទទួលបានឥទ្ធិពល នៅក្នុងពន្ធនាគារនោះ។ លោក Phettong បានបន្ថែមទៀតថា ចំនួនទឹកប្រាក់ដែលលោក ថាក់ស៊ីន បានចំណាយលើការទិញភីហ្សាទាំងនោះ គឺលើសពីទឹកប្រាក់ឧបត្ថម្ភប្រចាំថ្ងដែលត្រូវបានអនុញ្ញាតសម្រាប់អ្នកទោស។
ទន្ទឹមនឹងនេះ លោកស្រី Kanokwan បាននិយាយថា វាគ្រាន់តែការយល់ច្រលំប៉ុណ្ណោះ ដោយពន្យល់ថា តាមពិតទៅមានមនុស្សមានចិត្តបុណ្យមួយចំនួន បានទិញភីហ្សា កាលពីថ្ងៃទី១៣ ខែកញ្ញា ដើម្បីចែកឲ្យប៉ូលិស និងប៉ូលិសចរាចរណ៍ រួមទាំងសន្តិសុខ នៅតាមផ្លូវនៅមុខពន្ធនាគារ។ ស្របពេលលោក Padej Ringrod ដែលជាប្រធានគុក Klong Prem បានបញ្ជាក់ទៀតថា ភីហ្សាទាំងនោះមិនជាប់ពាក់ពន្ធជាមួយ លោក ថាក់ស៊ីន នោះឡើយ៕
