ប្រធានាធិបតីបារាំង លោក Emmanuel Macron បានសម្រេចតែងតាំងលោក Sebastien Lecornu ជានាយករដ្ឋមន្ត្រីថ្មីម្តងទៀត ពោលបន្ទាប់ពីប៉ុន្មានថ្ងៃប៉ុណ្ណោះ ក្រោយលោកបានស្នើសុំចុះចេញពីតំណែង។ នេះបើតាមការចុះផ្សាយពីសារព័ត៌មាន Reuters។
យោងតាមវិមាន Elysee បាននិយាយថា ៖” ប្រធានាធិបតី លោក Macron កាលពីថ្ងៃទី១០ ខែតុលា បានតែងតាំងលោក Lecornu ជានាយករដ្ឋមន្ត្រីនៃប្រទេសបារាំង និងបានប្រគល់ភារកិច្ចឲ្យលោកបង្កើតជួររដ្ឋាភិបាលថ្មីៗផងដែរ”។
យ៉ាងណាមិញក្រោយការប្រទេសនេះ លោក Lecornu ក៏បានចេញសារមួយនៅលើបណ្តាញសង្គម X ដោយសន្យាថានឹងធ្វើអ្វីៗគ្រប់បែបយ៉ាងដើម្បីជួយប្រទេសបារាំង ឲ្យឆ្លងកាត់ការអនុម័តកញ្ចប់ថវិកាមុនដំណាច់ឆ្នាំ ដោយបញ្ជាក់ទៀតថា ការស្តារហិរញ្ញវត្ថុសាធារណៈ នឹងនៅតែជាអាទិភាពកំពូលសម្រាប់អនាគតរបស់ប្រទេស។
គួរឲ្យដឹងផងដែរថា លោក Lecornu ត្រូវបានតែងតាំងជានាយករដ្ឋមន្ត្រីបារាំងម្តងហើយ ដោយប្រធានាធិបតី Macron កាលពីថ្ងៃទី៩ ខែកញ្ញា។ ប៉ុន្តែដោយសារតែមានការតវ៉ា និងស្ថិតនៅក្រោមសម្ពាធខ្លាំង បានបង្ខំឲ្យបុរសវ័យ ៣៩ឆ្នាំរូបនេះសម្រេចដាក់លិខិតលាលែងពីតំណែងវិញ ។
ជម្រាបជូនថា នយោបាយបារាំងកាន់តែមិនស្ថិតស្ថេរ ចាប់តាំងពីលោក Macron ត្រូវបានជាប់ឆ្នោតជាថ្មីនៅឆ្នាំ២០២២ ដោយមិនមានគណបក្ស ឬក្រុមចម្រុះកាន់កាប់សំឡេងភាគច្រើននៅក្នុងសភានោះឡើយ។ លោក Macron បានកោះហៅឲ្យមានការឆ្នោតសភាមុនកាលកំណត់ កាលពីឆ្នាំមុន ដោយបានបង្កធ្វើឲ្យមានវិបត្តិកាន់នយោបានតែផុងជ្រៅ៕
