លោកអ្នកឧកញ៉ា ពុង ឃាវសែ ប្រធានក្រុមប្រឹក្សាភិបាលក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានអញ្ជើញចូលរួមពិធីចុះហត្ថលេខាលើអនុស្សរណៈនៃការយោគយល់គ្នា (MoU) រវាងក្រុមហ៊ុន CAIC ជាមួយ អង្គការក្រៅរដ្ឋាភិបាលហុងកុង ជី អិច ហ្វោនដេសិន (GX Foundation ) ដែលជាមូលនិធិមានមូលដ្ឋាននៅ ហុងកុង ដើម្បីគាំទ្រកិច្ចការពារសុខភាពប្រឆាំងនឹងជំងឺគ្រុនឈាម និងជំងឺឆ្លងបង្កដោយវ៉ិចទ័រផ្សេងៗទៀតនៅ អាកាសយានដ្ឋានអន្តរជាតិតេជោ។
ភាពជាដៃគូលើគម្រោងនេះធ្វើឡើង ក្រោមអធិបតីភាពលោកអ្នកឧកញ៉ា ពុង ឃាវសែ ជាមួយនឹងលោក Leung Chun Ying ប្រធានក្រុមប្រឹក្សាភិបាល ជី អិច ហ្វោនដេសិន នៅថ្ងៃទី២១ ខែតុលា ឆ្នាំ២០២៥។ ភាពជាដៃគូនេះគាំទ្រដល់ការយល់ដឹងអំពី សុខភាព សាធារណៈ និងកិច្ចខិតខំប្រឹងប្រែងបង្ការនៅអាកាសយានដ្ឋានអន្តរជាតិតេជោ ដែលជាច្រកទ្វារថ្មី របស់កម្ពុជា។
លោកអ្នកឧកញ៉ា ពុង ឃាវសែ ប្រធានក្រុមប្រឹក្សាភិបាល ក្រុមហ៊ុន OCIC និង CAIC មានប្រសាសន៍ថា៖ «ការថែទាំអ្នកដំណើរគឺជាអាទិភាពសំខាន់មួយរបស់យើង ហើយភាពជាដៃគូជាមួយមូលនិធិ GX Foundation ជួយពង្រឹងចំណុចសំខាន់មួយនេះ»។
សូមជម្រាបថា ក្រោមអនុស្សរណៈយោគយល់គ្នានេះ មូលនិធិ GX Foundation នឹងផ្តល់មុង ក្រដាសអន្ទាក់រុយ និងសម្ភារៈផ្សព្វផ្សាយសុខភាពដូចជា ខិត្តប័ណ្ណ ផ្ទាំងរូបភាព និងផ្ទាំងប៉ាណូ ដើម្បីបង្កើនការយល់ដឹងដល់អ្នកដំណើរ និងបុគ្គលិកអាកាសយានដ្ឋានអន្តរជាតិតេជោ អំពីការបង្ការជំងឺគ្រុនឈាម។ គម្រោងនេះនឹងត្រូវអនុវត្តជាដំណាក់កាល ដោយចាប់ផ្តើមពីអាកាសយានដ្ឋាន និងកន្លែងចតរថយន្ត ដែលការបង្ហាញការយល់ដឹង និងសម្ភារៈនឹងត្រូវបានសម្របសម្រួលរួមគ្នារវាង GX Foundation និង CAIC៕
