អ្នកឧកញ៉ា សួរ វីរៈ អគ្គនាយកក្រុមហ៊ុន វីរៈ ប៊ុនថាំ អេចប្រេស បានបង្ហើបឱ្យដឹងថា កម្ពុជានិងសហរដ្ឋអាម៉េរិក បានព្រមព្រៀងគ្នា និងគ្រោងនាំចេញអង្ករកម្ពុជា ចំនួន ១០ កុងតឺន័រ ជាលើកដំបូង ដើម្បីសាកល្បងលក់នៅទីផ្សារសហរដ្ឋអាម៉េរិក។
ការបង្ហើបឱ្យដឹងរបស់អ្នកឧកញ៉ា សួរ វីរៈ ខាងលើនេះ គឺបន្ទាប់ពីអ្នកឧកញ៉ា បានអញ្ជើញចូលរួមបេសកកម្មចំនួន ១០ថ្ងៃ អមដំណើរ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងក្រុមការងារក្រសួងពាណិជ្ជកម្ម និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្ដន៍ ក្នុងបេសកកម្មទាក់ទាញ និងជំរុញវិនិយោគ នៅសហរដ្ឋអាម៉េរិក និងប្រទេសកាណាដា ផ្តោតលើវិស័យកសិកម្ម និងវិស័យទេសចរណ៍ ចាប់តាំងពីថ្ងៃទី២៧ ខែតុលា ឆ្នាំ២០២៥ ដល់ថ្ងៃទី៥ ខែវិច្ឆិកា ឆ្នាំ២០២៥។
អ្នកឧកញ៉ា សួរ វីរៈ បានថ្លែងប្រាប់ ឧកញ៉ាញូស៍ បែបនេះថា៖ “យើងបានព្យាយាមទៅជួបក្រុមហ៊ុនដែលផ្គត់ផ្គង់អង្ករ និងផលិតផលផ្សេងៗ ដែលលក់នៅតាមផ្សារទំនើប ផ្សារអាស៊ី នៅសហរដ្ឋអាម៉េរិក និងប្រទេសកាណាដា។ ពួកគាត់បានយល់ព្រមទទួលទិញយករាល់ផលិតផលខ្មែរទាំងអស់ ដែលអាចនាំចេញទៅបាន ដើម្បីចែកចាយទូទាំងសហរដ្ឋអាម៉េរិក និងប្រទេសកាណាដា ទៅតាមតំបន់ផ្សេងៗ នូវគ្រប់ផលិតផលដូចជា អង្ករ ស្វាយចន្ទី និងផលិតផលសិប្បកម្មផ្សេងៗពាក់ព័ន្ធនឹងចំណីអាហារ”។
“ក្នុងនោះដែរ យើងបានព្រមព្រៀងគ្នានឹងនាំចេញអង្ករទៅកាន់សហរដ្ឋអាម៉េរិក ចំនួន ១០កុងតឺន័រដំបូង ហើយកាណាដា យើងនឹងសាកល្បងនាំចេញទៅ ១ទូកុងតឺន័រដំបូង នៅរដូវកាលថ្មីនេះ។ ដោយឡែក យើងក៏នឹងនាំអង្ករចេញទៅប្រទេសអូស្ត្រាលី ចំនួន ៨ទូកុងតឺន័រ ដំបូងផងដែរ”។ អ្នកឧកញ៉ា សួរ វីរៈ បានបន្ថែម។
អ្នកឧកញ៉ា សួរ វីរៈ បានគូសបញ្ជាក់ថា ជាលទ្ធផលវិជ្ជមាននៃបេសកកម្មនេះ យើងទទួលបានការគាំទ្រច្រើនទៅលើផលិតកសិកម្ម និងសិប្បកម្ម។ នេះជាលទ្ធផលផ្លែផ្កាមួយដ៏ល្អ ដោយសារសហរដ្ឋអាម៉េរិក អូស្ត្រាលី និងកាណាដា មានការគាំទ្រ និងព្រមទទួលយកផលិតផលកសិកម្មខ្មែរយើង ប៉ុន្តែជោគជ័យឬយ៉ាងណា គឺអាស្រ័យលើគុណភាពអង្កររបស់យើង និងគុណភាពផលិតផលសិប្បកម្មរបស់យើងផ្សេងៗផងដែរ។
សូមបញ្ជាក់ថា គណៈប្រតិភូសមាគមឧកញ៉ាកម្ពុជា ដែលបានចូលរួមក្នុងបេសកម្មទាក់ទាញ និងជំរុញវិនិយោគទៅកាន់ប្រទេសទាំងពីរនេះត្រូវបានដឹកនាំដោយ អ្នកឧកញ៉ា សៀ ឬទ្ធី ដោយរួមមានសមាសភាពដូចជា អ្នកឧកញ៉ា លី សុភាព, អ្នកឧកញ៉ា សួរ វីរៈ, ឧកញ៉ា លីម តារារិទ្ធ និងលោក អ៊ឹង វីរៈ៕
