ប្រទេសវៀតណាម បានចំណាយទឹកប្រាក់អស់ប្រហែល ២,៧៣ពាន់លានដុល្លារ លើការនាំចូលអាហារសមុទ្រពីបរទេស ក្នុងរយៈពេល ១០ខែកន្លងមកនេះ ដែលជាការកើនឡើងជាង ៣០% បើធៀបទៅនឹងពេលដូចគ្នា កាលពីឆ្នាំមុន។ នេះបើតាមការចុះផ្សាយពីសារព័ត៌មាន VN Express។
យោងតាមតួលេខខាងលើនេះ ត្រូវបានប្រកាសដោយក្រសួងកសិកម្ម និងបរិស្ថានវៀតណាម ដោយនៅក្នុងខែតុលាតែមួយ ការនាំចូល បានឈានដល់ចំនួនជាង ៣០៤លានដុល្លារឯណោះ ដែលបានឆ្លុះបញ្ចាំងអំពីតម្រូវការ និងការប្រើប្រាស់នៅក្នុងស្រុក។
យ៉ាងណាមិញ វៀតណាម ភាគច្រើននាំចូលអាហារសមុទ្រពីប្រទេសឥណ្ឌា ឥណ្ឌូណេស៊ី និងន័រវែស ដែលមានចំនួន ១៥% ១៤,២% និង ១០,៧% នៃតម្លៃសរុបរៀងៗគ្នា ដោយបន្ថែមពីលើទីផ្សារមួយចំនួនទៀត។ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ការនាំចូលពីប្រទេសឥណ្ឌាបានកើនឡើងទ្វេដង ខណៈពីឥណ្ឌូណេស៊ី កើនឡើង ៥៨% និងពីន័រវែសកើនឡើង ១៧% ដែលបង្ហាញថា វៀតណាមកំពុងពឹងផ្អែកលើវត្ថុធាតុដើមពីបរទេសកាន់តែខ្លាំងឡើង ជាពិសេសក្នុងរដូវកាលនាំចេញនៃអាហារសមុទ្រកែច្នៃ។
ជម្រាបជូនថា យោងតាមរបាយការណ៍ពី VASEP បានបង្ហាញឲ្យដឹងថាប្រទេសវៀតណាម មានរោងចក្រកែច្នៃអាហារសមុទ្រជាង ៦០០ ដែលនាំចេញភាគច្រើនទៅកាន់សហរដ្ឋអាមេរិក សហភាពអឺរ៉ុប ជប៉ុន និងចិន។ តែទោះជាយ៉ាងណាក៏ដោយ ការផ្គត់ផ្គង់ក្នុងស្រុក ជាពិសេសបង្គា ត្រីសមុទ្រ និងអាហារសមុទ្រលំដាប់ខ្ពស់ផ្សេងទៀត គឺមិនស្ថិតស្ថេរនោះទេ៕
