ក្រសួងការពារជាតិសហរដ្ឋអាមេរិក កាលពីពេលថ្មីៗនេះ បានប្រកាសថា ខ្លួនបានផ្តល់ជូនកិច្ចសន្យាធំៗចំនួនពីរ ដល់ក្រុមហ៊ុន Boeing ដែលមានតម្លៃសរុបប្រមាណជាង ៧ពាន់លានដុល្លារ។ នេះបើតាមការចុះផ្សាយពីសារព័ត៌មាន Reuters។
នៅក្រោមកិច្ចសន្យាទាំងនេះ យោធាអាមេរិក បានផ្តល់កិច្ចសន្យាមួយដែលមានតម្លៃជិត ៤,៧ពាន់លានដុល្លារ ដល់ Boeing សម្រាប់ការផលិតឧទ្ធម្ភាគចក្រវាយប្រហារ Apache AH-64E ថ្មី រួមទាំងឧទ្ធម្ភាគចក្រហ្វឹកហាត់ Longbow Crew និងឧបករណ៍ពាក់ព័ន្ធផ្សេងទៀត។
លើសពីនេះ កងទ័ពអាកាស ក៏បានផ្តល់កិច្ចសន្យាមានតម្លៃ ២,៤ពាន់លានដុល្លារផ្សេងទៀត ដល់ក្រុមហ៊ុន Boeing សម្រាប់ការផលិតយន្តហោះ Lot 12 Block G081 និងអាជ្ញាប័ណ្ណពាក់ព័ន្ធ។
ជម្រាបជូនផងដែរថា ជុំវិញកិច្ចសន្យាទីមួយ ក្រុមហ៊ុន Boeing ត្រូវបានគេរំពឹងទុកថានឹងបញ្ចប់ នៅចុងខែឧសភា ឆ្នាំ២០៣២ ខណៈពេលដែលកិច្ចសន្យាទីពីរ នឹងត្រូវបញ្ចប់នៅចុងខែមិថុនា ឆ្នាំ២០២៩៕
