ប្រធានផ្នែកហិរញ្ញវត្ថុរបស់ក្រុមហ៊ុនផលិតបន្ទះឈីប Nvidia លោកស្រី Colette Kress បង្ហើបឲ្យដឹងកាលពីថ្ងៃទី២ ខែធ្នូថា កិច្ចព្រមព្រៀងរបស់ Nvidia ជាមួយ OpenAI ដែលជាក្រុមហ៊ុនមេរបស់ ChatGPT ដើម្បីវិនិយោគរហូតដល់ ១០០ពាន់លានដុល្លារ នៅក្នុងក្រុមហ៊ុនចាប់ផ្តើមអាជីវកម្មថ្មីនេះ នៅតែមិនទាន់ត្រូវបានបញ្ចប់នៅឡើយទេ។ នេះបើតាមការចុះផ្សាយពីសារព័ត៌មាន CNA។
ជុំវិញការលើកឡើងរបស់លោកស្រី Kress បែបនេះ ត្រូវបានកើតឡើង នៅចំពេលមានការពិភាក្សាកាន់តែខ្លាំងឡើងជុំវិញភាពជាដៃគូដែលផ្សារភ្ជាប់រវាងក្រុមហ៊ុនលេចធ្លោបំផុតទាំងពីរ នៅក្នុងការប្រណាំងប្រជែងផ្នែកបញ្ញាសិប្បនិម្មិត ។
Nvidia ដែលបច្ចុប្បន្នជាក្រុមហ៊ុនមានតម្លៃទីផ្សារថ្លៃបំផុតនៅលើពិភពលោក កាលពីខែកញ្ញា បានបង្ហាញពីគម្រោងក្នុងការវិនិយោគលើ OpenAI ក្រោមកិច្ចព្រមព្រៀងមួយដែលពាក់ព័ន្ធជាមួយនឹងការដាក់ពង្រាយបន្ទះឈីប Nvidia យ៉ាងហោចណាស់ទំហំ ១០ ជីហ្គាវ៉ាត់ សម្រាប់ក្រុមហ៊ុនចាប់ផ្តើមថ្មីនេះ។
ប៉ុន្តែទោះជាយ៉ាងណាក៏ដោយ លោកស្រី Kress បាននិយាយថា ៖” យើងនៅតែមិនទាន់បានបញ្ចប់កិច្ចព្រមព្រៀងច្បាស់លាស់ណាមួយនៅឡើយទេ ប៉ុន្តេយើងកំពុងធ្វើការជាមួយពួកគេ”។
ជម្រាបជូនផងដែរថា OpenAI ដែលជាក្រុមហ៊ុនចាប់ផ្តើមអាជីវកម្មថ្មីថ្មោង ហាក់កំពុងតែមានលេចធ្លោយ៉ាងខ្លាំង ពាក់ព័ន្ធទៅនឹងការរីកចម្រើនផ្នែក AI ដែលបានចាប់ផ្តើមជាមួយនឹងការដាក់ឲ្យដំណើរការកម្មវិធី ChatGPT នៅចុងឆ្នាំ២០២២ មក។ មិនតែប៉ុណ្ណោះ ពួកគេគឺជាអតិថិជនដ៏សំខាន់មួយសម្រាប់បន្ទះឈីបរបស់ Nvidia ផងដែរ៕
