អ្នកឧកញ៉ា ម៉ម វណ្ណឌី ប្រធានក្រុមប្រឹក្សាភិបាលក្រុមហ៊ុន ឌីភីម្ចាស់ចម្ការ បានចូលរួមឧបត្ថម្ភថវិកាចំនួន ៥ម៉ឺនដុល្លារអាមេរិក និងខោអាវចំនួន ៥០០០ សម្រាប់ជួយដល់កងទ័ពជួរមុខកម្ពុជា និងជនភៀសសឹក តាមរយៈលោកជំទាវ ហ៊ុន ម៉ាណា អគ្គនាយិការវិទ្យុ-ទូរទស្សន៍បាយ័ន។
តាមរយៈបណ្តាញសង្គមហ្វេសប៊ុក នាល្ងាចថ្ងៃទី១០ ខែធ្នូ ឆ្នាំ២០២៥ អ្នកឧកញ៉ា ម៉ម វណ្ណឌី បានលើកឡើងបែបនេះថា៖ “ខ្ញុំបាទ និងភរិយា ចូលរួមចំណែកជាមួយលោកជំទាវ ហ៊ុន ម៉ាណា ថវិការចំនួន ៥០,០០០$ (ប្រាំម៉ឺនដុល្លារ) រួមជាមួយ ខោអាវ ចំនួន ៥០០០ ដោយអំណាចនៃសេចក្តីល្អនេះជូនដល់វិរះកងទ័ពជួរមុខ ទទួលបានជោគជ័យ និងសុខសប្បាយទាំងអស់គ្នា”។
ការចូលរួមឧបត្ថម្ភថវិការបស់ អ្នកឧកញ៉ា ម៉ម វណ្ណឌី និងលោកជំទាវអ្នកឧកញ៉ា គឺជាការចូលរួមចំណែកលើកទឹកចិត្ត ដល់កងទ័ពកម្ពុជាដ៏អង់អាចក្លាហានរបស់កម្ពុជា ដែលកំពុងឈរជើងជាប់ជាប្រចាំ ដើម្បីការពារបូរណភាពទឹកដីនៅតាមបណ្តោយព្រំដែនកម្ពុជា-ថៃ។ ក្នុងស្មារតីខ្មែរជួយខ្មែរ បងប្អូនប្រជាពលរដ្ឋទាំងអស់អាចចូលរួមឧបត្ថម្ភតាមការស្ម័គ្រចិត្តដល់កងទ័ព ដើម្បីបង្ហាញពីភាពរួបរួមគ្នាជាធ្លង់មួយនៃខឿនការពារជាតិរបស់កម្ពុជា។
ឆ្លៀតឱកាសនេះ យើងខ្ញុំសូមបួងសួងដល់ ទេវតារក្សាទឹកដីនៃព្រះរាជាណាចក្រកម្ពុជា បុព្វបុរសខ្មែរគ្រប់ព្រះអង្គ និងវត្ថុសក្តិសិទ្ធិក្នុងលោក សូមតាមថែរក្សាការពារកងទ័ពកម្ពុជារបស់យើង ឱ្យជួបប្រទះតែសេចក្តីសុខ ជៀសផុតពីជំងឺដង្កាត់ទាំងឡាយ ហើយឈ្នះអស់ខ្មាំងសត្រូវ៕
