ឧកញ៉ា ប៉ិច បូឡែន ចូលរួមអមដំណើរឯកឧត្តម ហេង សួរ ចុះសួរសុខទុក្ខ និងចែកអំណោយដល់វីរៈកងទ័ព និងជនភៀសសឹក ចំនួន ២,០០០ គ្រួសារ នៅខេត្តឧត្តរមានជ័យ

ឧកញ៉ា ប៉ិច បូឡែន អគ្គនាយក ក្រុមហ៊ុន វេសឡាញ អេឌ្យូខេសិន គ្រុប (WESTLINE EDUCATION GROUP) និងជាទីប្រឹក្សាក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី៣០ ខែធ្នូ ឆ្នាំ២០២៥នេះ បានអញ្ជើញ​ចូលរួមអមដំណើរ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ចុះសួរសុខទុក្ខ និងចែក​ជូនអំណោយដល់វីរៈកងទ័ព និងជនភៀសសឹក ចំនួន ២,០០០ គ្រួសារ នៅខេត្តឧត្តរមានជ័យ។

សកម្មភាពមនុស្សធម៌ដ៏ថ្លៃថ្លានេះ ធ្វើឡើងក្រោមកិច្ចផ្តួចផ្តើមផ្ទាល់ពី ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។ កម្មវិធីនេះប្រារព្ធឡើងនៅភូមិបាតថ្កៅ ឃុំចុងកាល ស្រុកចុងកាល ខេត្តឧត្តរមានជ័យ ដែលជាការចូលរួមចំណែក​ក្នុងស្មារតី​សាមគ្គីភាព ការយកចិត្តទុកដាក់ និងការគាំទ្រដល់បងប្អូនប្រជាពលរដ្ឋ និងប្រជាពលរដ្ឋភៀសសឹក​នៅ​តាមតំបន់ព្រំដែនកម្ពុជា-ថៃ។

សូមជម្រាបថា គិតត្រឹមថ្ងៃទី២៩ ខែធ្នូ ឆ្នាំ២០២៥ ជនភៀសសឹករបស់កម្ពុជា បានកើនឡើងដល់ជាង​កន្លះលាន​នាក់​ (៥៩៦,៩២៦នាក់)។ នេះបើតាមរបាយការណ៍របស់ក្រសួងមហាផ្ទៃ។ គួររំឭកថា ចាប់តាំងពីថ្ងៃទី៧ ខែធ្នូ នៃការផ្ទុះអាវុធជាថ្មីរវាងកម្ពុជា​-ថៃ រហូតដល់ថ្ងៃទី២៦ ខែធ្នូ ឆ្នាំ២០២៥ តុល្យការចុងក្រោយគឺមានប្រជាពលរដ្ឋ​ស្លូតត្រង់​កម្ពុជា បាត់បង់ជីវិតចំនួន ៣២នាក់ និងរបួស ៩៥នាក់ ដោយសារការប្លោងទម្លាក់គ្រាប់​គ្រប់ប្រភេទចូល​តំបន់ស៊ីវិល​ជាច្រើនកន្លែង ក្នុងទឹកដីកម្ពុជា ព្រមទាំងមានប្រជាពលរដ្ឋភៀសសឹករាប់សិបម៉ឺននាក់ កំពុងរងការ​លំបាក ឃ្លាតឆ្ងាយពីផ្ទះសម្បែង៕