នាព្រឹកថ្ងៃទី១ ខែមករា ឆ្នាំ២០២៦នេះ សម្តេចតេជោហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា បានទទួលជួបសំណេះសំណាល ជាមួយវីរៈកងទ័ពកម្ពុជាទាំង១៨រូប ដែលបានធ្វើមាតុភូមិនិវត្តន៍មកកម្ពុជាវិញ ដោយសុខសុវត្ថិភាព នៅវិមាន៧មករា រាជធានីភ្នំពេញ។
ក្នុងឱកាសជួបសំណេះសំណាល ជាមួយវីរៈកងទ័ពកម្ពុជាទាំង១៨រូបនេះដែរ មានការអញ្ជើញចូលរួមពី ថ្នាក់ដឹកនាំ អភិបាលរាជធានី ខេត្ត ព្រមទាំងមានវត្តមាន អ្នកឧកញ៉ា គិត ម៉េង អគ្គនាយកក្រុមហ៊ុន រ៉ូយ៉ាល់ គ្រុប និង អ្នកឧកញ៉ា លាង ម៉េង សហស្ថាបនិក និងជាប្រធានក្រុមអគ្គនាយកក្រុមហ៊ុន ជីប ម៉ុង ផងដែរ។
វីរៈកងទ័ពកម្ពុជា ទាំងចំនួន ១៨រូប បានត្រឡប់មដល់កម្ពុជាវិញ នៅថ្ងៃទី៣១ ខែធ្នូ ឆ្នាំ២០២៥ បន្ទាប់ពីកងទ័ពថៃប្រើល្បិចដ៏អាក្រក់ចាប់ខ្លួន និងឃុំទុករយៈពេល១៥៥ថ្ងៃ បន្ទាប់ពីការប៉ះទង្គិចគ្នានៅសមរភូមិព្រំដែនកម្ពុជា-ថៃ។
សូមបញ្ជាក់ថា ការដោះលែងយោធិនកម្ពុជាចំនួន ១៨រូបត្រឡប់មកកម្ពុជាវិញ គឺធ្វើឡើងក្រោមការឯកភាពគ្នារវាងកម្ពុជានិងថៃ នៅក្នុងសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ (GBC) រវាងព្រះរាជាណាចក្រកម្ពុជា និងព្រះរាជាណាចក្រថៃ ដែលត្រូវបានចុះហត្ថលេខាកាលពីថ្ងៃទី២៧ ខែធ្នូ ឆ្នាំ២០២៥៕
