នារសៀលថ្ងៃទី១៩ ខែមករា ឆ្នាំ២០២៦ អ្នកឧកញ៉ា ម៉ម វណ្ណឌី អនុប្រធានសមាគមអតីតយុទ្ធជន និងនិវត្តជនកម្ពុជា តំណាងឯកឧត្តមកិត្តិសង្គហបណ្ឌិត គន់ គីម អនុប្រធាន និងជាអគ្គលេខាធិការសមាគម បានជួបពិភាក្សាការងារជាមួយលោក Israel Moseson ស្ថាបនិក និងជាអគ្គនាយកក្រុមហ៊ុន AGROTOP ដែលជាក្រុមហ៊ុនមកពីប្រទេសអ៊ីស្រាអែល លើគម្រោងវិនិយោគការចិញ្ចឹមមាន់នៅកម្ពុជា។
ជំនួបនេះធ្វើឡើងនៅទីស្នាក់ការកណ្តាលសមាគមអតីតយុទ្ធជន និងនិវត្តជនកម្ពុជា ដែលមានទីតាំងស្ថិតនៅភូមិស្លាបតាអោន ឃុំគគីរ ស្រុកគៀនស្វាយ ខេត្តកណ្តាល។
ក្នុងជំនួបពិភាក្សាធុរកិច្ចនេះ អ្នកឧកញ៉ា ម៉ម វណ្ណឌី មានប្រសាសន៍ថា ក្នុងនាមអនុប្រធានសមាគម ទទួលបន្ទុកការងារធុរកិច្ច និងវិនិយោគ និងក្នុងនាមសមាគមអតីតយុទ្ធជន និងនិវត្តជនកម្ពុជា ពិតជាមានក្តីរីករាយដែលក្រុមហ៊ុន AGROTOP ចាប់អារម្មណ៍ចង់មកវិនិយោគផ្នែកចិញ្ចឹមមាន់នៅកម្ពុជា។ អ្នកឧកញ៉ា បន្តថាក្នុងនាមសមាគម នឹងរង់ចាំសហការ និងជួយសម្រួលរាល់កិច្ចការគម្រោងវិនិយោគស្របច្បាប់នានា ជូនវិនិយោគិនដែលចង់មកវិនិយោគនៅកម្ពុជា។
លោក Israel Moseson ស្ថាបនិក និងជាអគ្គនាយកក្រុមហ៊ុន AGROTOP បានលើកឡើងថា លោកពិតជារីករាយណាស់ និងសូមអរគុណដល់ អ្នកឧកញ៉ា ក៏ដូចជាសមាគមអតីតយុទ្ធជន និងនិវត្តជនកម្ពុជា ដែលបានទទួលស្វាគមន៍យ៉ាងកក់ក្តៅ ហើយលោករំពឹងថាជំនួបពិភាក្សាការងារលើកទី១ ជាមួយសមាគមស្តីពីគម្រោងវិនិយោគរបស់ក្រុមហ៊ុន AGROTOP នៅកម្ពុជា នឹងទទួលបានលទ្ធផលល្អ។ ក្នុងកិច្ចពិភាក្សានេះ លោកបានបង្ហាញការចាប់អារម្មណ៍ខ្ពស់ក្នុងការមកវិនិយោគនៅកម្ពុជា។ នៅជំហ៊ានបន្ទាប់ ក្រុមហ៊ុនរបស់លោក នឹងបញ្ជូនក្រុមការងារមកសិក្សាពីទីផ្សារ និងតម្រូវការសាច់ និងចំណីអាហារនៅកម្ពុជាបន្ថែម ព្រមទាំងពន្លឿនកិច្ចការឯកសារនានា ឱ្យបានឆាប់រហ័ស។
អ្នកឧកញ៉ា ម៉ម វណ្ណឌី បានគូសបញ្ជាក់ថា ឱកាសវិនិយោគស្ថិតក្នុងស្ថានភាពជម្លោះព្រំដែនរវាងកម្ពុជា-ថៃ នាពេលបច្ចុប្បន្ននេះ គឺជាពេលវេលាមួយដ៏ល្អសម្រាប់ក្រុមហ៊ុនដែលចង់ផលិតនូវផលិតផលនានា នៅក្នុងប្រទេសកម្ពុជា ដោយសារតែពេលនេះ ប្រជាជនកម្ពុជាស្ទើរតែទាំងអស់ បានផ្លាស់ប្តូរ និងមានទំនោរខ្លាំងមកគាំទ្រផលិតផលក្នុងស្រុក។ ដូច្នេះម្ចាស់ក្រុមហ៊ុន អាជីវកម្ម សហគ្រាសនានា នឹងជោគជ័យ ហើយមិនសូវចំណាយច្រើន លើការផ្សព្វផ្សាយផលិតផលនោះឡើយ។
សូមជម្រាបថា ក្រៅពីកិច្ចពិភាក្សាធុរកិច្ច អ្នកឧកញ៉ា ម៉ម វណ្ណឌី ក៏បានជម្រាបប្រាប់ដល់ប្រតិភូវិនិយោគិនរបស់ក្រុមហ៊ុន AGROTOP ពីបច្ចុប្បន្នភាព និងវឌ្ឍនភាពថ្មីៗរបស់សមាគមអតីតយុទ្ធជន និងនិវត្តជនកម្ពុជា និងឱកាសពិសេសក្នុងការវិនិយោគផ្នែកកសិកម្ម នៅភូមិគម្រូរបស់អតីតយុទ្ធជន គឺភូមិប៊ុនរ៉ានីសែនជ័យ ដំណាក់ត្រយឹង ដែលមានទីតាំងនៅឃុំព្រងិល ស្រុកភ្នំក្រវាញ ខេត្តពោធិ៍សាត់៕
