ព្រះមហាក្សត្រ ចេញព្រះរាជក្រឹត្យផ្តល់គោរមងារ «ឧកញ៉ា» ជូនលោកជំទាវ ហូ សារ៉េត

ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យត្រាស់បង្គាប់ផ្តល់គោរមងារដល់លោកជំទាវ ហូ សារ៉េត ជា «ឧកញ៉ា» នៅថ្ងៃទី១៤ ខែកុម្ភៈ ឆ្នាំ២០២៦ តបតាមសេចក្តីក្រាបបង្គំទូលថ្វាយរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

លោកជំទាវ ហូ សារ៉េត ជាភរិយារបស់ ឯកឧត្តម លីវ ម៉ូវ។ ឯកឧត្តម លីវ ម៉ូវ និងលោកជំទាវ ហូ សារ៉េត គឺជាសប្បុរសជនខ្មែរដ៏លេចធ្លោ ដែលតែងតែបរិច្ចាគថវិកាជារៀងរាល់ឆ្នាំជូនកាកបាទក្រហមកម្ពុជា សម្រាប់ទិវា ៨ ឧសភា និងយុទ្ធនាការមនុស្សធម៌នានា។ ជាក់ស្តែង ក្នុងឆ្នាំ២០២៥ លោកទាំងពីរបានឧបត្ថម្ភថវិកា ៣,០០០ ដុល្លារអាមេរិក ជូនកាកបាទក្រហមកម្ពុជា គាំទ្រមូលបទ «រួមគ្នាស្ម័គ្រចិត្ត ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ»៕