នាព្រឹកថ្ងៃចន្ទ ទី៩ ខែមីនា ឆ្នាំ២០២៦ នៅរាជធានីប៉េកាំង នៃសាធារណរដ្ឋប្រជាមានិតចិន លោកឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា បានដឹកនាំគណប្រតិភូដែលជាអនុប្រធានសហព័ន្ធស្រូវអង្ករកម្ពុជាចំនួន ៥ រូប ចូលរួមសម្ដែងការគួរសម និងពិភាក្សាការងារជាមួយក្រុមហ៊ុនសាជីវកម្មប្រេង និងស្បៀងអាហារនៃប្រទេសចិន China Oil and Foodstuffs Corporation – (COFCO)។
នៅក្នុងកិច្ចពិភាក្សានេះ ក៏មានការអញ្ជើញចូលរួមពី ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជា អគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) និងសហការី។
ក្នុងជំនួបខាងលើនេះ កិច្ចពិភាក្សាបានផ្តោតសំខាន់លើការពង្រឹង សមត្ថភាពផលិត និងគុណភាពស្រូវអង្ករកម្ពុជាសម្រាប់នាំចេញ ដោយក្នុងនោះធនាគារ ARDB និងសហព័ន្ធស្រូវអង្ករកម្ពុជា នឹងធ្វើជាតួអង្គរួមគ្នាក្នុងការសហប្រតិបត្តិការជាមួយដៃគូពាក់ព័ន្ធផ្សេងទៀតលើកិច្ចការនេះ។ ធនាគារ ARDB នឹងសម្របសម្រួលក្នុងការទូទាត់ជាអន្តរជាតិ (Cross Border Settlement) ដើម្បីសម្រួលលំហូរសាច់ប្រាក់ក្នុងការធ្វើពាណិជ្ជកម្មនាំចេញអង្ករកម្ពុជាទៅកាន់ប្រទេសចិន។
ជាមួយគ្នានេះដែរ ក្រុមហ៊ុន COFCO Grains បានសន្យាជួយផ្សព្វផ្សាយ និងបន្តជំរុញការនាំចូលអង្ករកម្ពុជា មកកាន់ទីផ្សារប្រទេសចិនផងដែរ៕
