ទីក្រុងតេហេរ៉ង់ និងតំបន់ជុំវិញ កំពុងប្រឈមមុខនឹងមហន្តរាយបរិស្ថានដ៏គួរឲ្យរន្ធត់ បន្ទាប់ពីការវាយប្រហារតាមអាកាសរបស់អាម៉េរិក-អ៊ីស្រាអែល លើឃ្លាំងបម្រុងប្រេងឥន្ធនៈរបស់អ៊ីរ៉ង់ បានបង្កឲ្យមានពពកខ្មៅពុល និងបង្កើតជា «ភ្លៀងខ្មៅ» ធ្លាក់ស្រោចស្រពពេញផ្ទៃដី។ នេះបើយោងតាមអង្គភាព Time ចេញផ្សាយកាលពីថ្ងៃទី៩ ខែមីនា ឆ្នាំ២០២៦។
ទិដ្ឋភាពដ៏គួរឲ្យភ័យខ្លាច ដោយឡានពណ៌សបានប្រែជាខ្មៅត្រឹមតែមួយយប់ ហើយមេឃនៅពេលថ្ងៃត្រង់ប្រែជាងងឹតស្លុបដូចពាក់កណ្តាលអធ្រាត្រ។
ភ្លាមៗនេះ អង្គការកាកបាទក្រហមអ៊ីរ៉ង់ និងទីភ្នាក់ងារបរិស្ថានបានចេញការព្រមានបន្ទាន់ ដោយចាត់ថ្នាក់ភ្លៀងនេះថាជា «សារធាតុអាស៊ីត និងមានគ្រោះថ្នាក់បំផុត»។ ការប៉ះពាល់នឹងភ្លៀងនេះបានបណ្តាលឲ្យមានការរលាកស្បែក ពិបាកដកដង្ហើម និងរលាកភ្នែក និងបបូរមាត់យ៉ាងធ្ងន់ធ្ងរ ដែលអ្នកខ្លះប្រៀបធៀបអារម្មណ៍នោះទៅនឹងការដកដង្ហើមចូលនូវឧស្ម័នទឹកភ្នែក។
អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បានចោទប្រកាន់អាម៉េរិក-អ៊ីស្រាអែលថាបានប្រព្រឹត្ត «បទឧក្រិដ្ឋប្រឆាំងមនុស្សជាតិ» តាមរយៈការបញ្ចេញសារធាតុពុលទៅក្នុងបរិយាកាសដោយចេតនា ដែលធ្វើឲ្យប៉ះពាល់ដល់សុខភាពប្រជាជន និងបំផ្លាញបរិស្ថានក្នុងទ្រង់ទ្រាយធំ។
នៅក្នុងរដ្ឋធានី ក្តីអស់សង្ឃឹមបាននិងកំពុងរីករាលដាល ខណៈដែលម៉ាសការពារបានក្លាយជាទំនិញកម្រ ហើយផ្សែងពុលបានជ្រាបចូលទៅដល់ក្នុងផ្ទះសម្បែងរបស់ប្រជាពលរដ្ឋអ៊ឺរ៉ង់៕
