យោងតាមទិន្នន័យដឹកជញ្ជូនផ្លូវការមួយបានបង្ហាញឲ្យដឹងថា ប្រេងឆៅរបស់អ៊ីរ៉ង់ នៅតែអាចឆ្លងកាត់ច្រកសមុទ្រ Hormuz បានយ៉ាងរលូន នៅក្នុងអត្រាជាង ១ លានបារ៉ែលក្នុងមួយថ្ងៃ។ នេះបើតាមការចុះផ្សាយពីសារព័ត៌មាន Reuters។
ទិន្នន័យមួយដែលចេញផ្សាយដោយ TankerTrackers បានបង្ហាញថា អ៊ីរ៉ង់បាននាំចេញប្រេងឆៅប្រហែល ១៣,៧ លានបារ៉ែលចាប់តាំងពីអ៊ីស្រាអែល និងសហរដ្ឋអាមេរិក បានចាប់ផ្តើមបើកការវាយប្រហាររបស់ពួកគេលើប្រទេសនេះ នៅថ្ងៃទី២៨ ខែកុម្ភៈ មក។
ទន្ទឹមនឹងនេះ ក្រុមហ៊ុនទិន្នន័យ Kpler ក៏បានប៉ាន់ប្រមាណថា ការនាំចេញប្រេងរបស់អ៊ីរ៉ង់ក្នុងរយៈពេល ១១ថ្ងៃដំបូងនៃខែមីនាគឺមានកម្រិតខ្ពស់ជាង បើធៀបទៅនឹងពេលដូចគ្នាកាលពីឆ្នាំមុន ដែលមានប្រហែល ១៦,៥ លានបារ៉ែល។
ជុំវិញរឿងនេះ បានកើតឡើងចំពេលមានការធ្លាក់ចុះយ៉ាងខ្លាំងនៃការនាំចេញពីប្រទេសឈូងសមុទ្រផ្សេងទៀតក្នុងរយៈពេលពីរសប្តាហ៍កន្លងមក។ ដើម្បីជាការសងសឹកចំពោះការវាយប្រហាររបស់អ៊ីស្រាអែល និងសហរដ្ឋអាមេរិក អ៊ីរ៉ង់បានកំណត់គោលដៅលើការដឹកជញ្ជូន នៅក្នុងច្រកសមុទ្រ Hormuz និងហេដ្ឋារចនាសម្ព័ន្ធថាមពលនៅទូទាំងមជ្ឈិមបូព៌ា។
ជុំវិញបញ្ហានេះបានបង្ខំឲ្យនាវាដែលមិនមែនជារបស់អ៊ីរ៉ង់បញ្ឈប់ការដឹកជញ្ជូនឆ្លងកាត់តំបន់ Hormuz ហើយនាំឲ្យមានការថយចុះផលិតកម្មដោយប្រទេសផលិតប្រេងនៅក្នុងតំបន់។
យ៉ាងណាមិញ បើយោងតាមលោក Matias Togni អ្នកវិភាគប្រេង និងដឹកជញ្ជូនប្រចាំនៅស្ថាប័ន Next Barrel បានបង្ហាញជឿជាក់ថាសហរដ្ឋអាមេរិក មានការព្រួយបារម្ភថាការរារាំងកប៉ាល់ដឹកប្រេងដែលមានទំនាក់ទំនងជាមួយអ៊ីរ៉ង់អាចបង្កឲ្យមានការវាយប្រហារបន្ថែមទៀតលើកប៉ាល់នានាដែលឆ្លងកាត់តាមច្រកសមុទ្រ Hormuz នេះ។
ជម្រាបជូនថា ទិន្នន័យពី TankerTrackers និង Kpler បានបង្ហាញថា ការនាំចេញប្រេងឆៅរបស់អ៊ីរ៉ង់ចន្លោះថ្ងៃទី២៨ ខែកុម្ភៈ និងថ្ងៃទី១១ ខែមីនា មានចំនួន ១,១-១,៥ លានបារ៉ែលក្នុងមួយថ្ងៃ។ កាលពីឆ្នាំមុន ការនាំចេញជាមធ្យមរបស់ប្រទេសនេះបានឈានដល់ ១,៦៩ លានបារ៉ែលក្នុងមួយថ្ងៃ៕
