(ហ្វីលីពីន)៖ ប្រធានាធិបតីហ្វីលីពីន លោក ហ្វឺរឌីណង់ ម៉ាកូស ជូណៀ (Ferdinand Marcos Jr) បានប្រកាសពី «អាសន្នថាមពលជាតិ» ដើម្បីឆ្លើយតបទៅនឹងវិបត្តិថាមពល ដែលបង្កពីសង្គ្រាមរវាងអ៊ីស្រាអែល-សហរដ្ឋអាមេរិក និងអ៊ីរ៉ង់ ដែលធ្វើឱ្យការផ្គត់ផ្គង់ថាមពលរបស់ហ្វីលីពីនកំពុងខិតកាន់តែជិតគ្រោះថ្នាក់។ នេះបើតាមការចុះផ្សាយរបស់បណ្ដាញព័ត៌មាន Al Jazeera។
លោក ម៉ាកូស បានឱ្យដឹងថា «ការប្រកាសអាសន្នថាមពលជាតិ នឹងអនុញ្ញាតឱ្យរដ្ឋាភិបាលអនុវត្តវិធានការឆ្លើយតប និងសម្របសម្រួលក្រោមច្បាប់ដែលមានស្រាប់ ដើម្បីដោះស្រាយហានិភ័យដែលបង្កឡើងពីការរំខានផ្នែកផ្គត់ផ្គង់ថាមពលសកល និងសេដ្ឋកិច្ចក្នុងស្រុក»។
លោកបន្ថែមថា ជាផ្នែកមួយនៃការឆ្លើយតបក្នុងគ្រាអាសន្ន គណៈកម្មាធិការមួយត្រូវបានបង្កើតឡើង ដើម្បីធានាបាននូវការផ្គត់ផ្គង់ ការចែកចាយ និងការអាចរកបាននៃប្រេងឥន្ធនៈ អាហារ ថ្នាំពេទ្យ ផលិតផលកសិកម្ម និងទំនិញចាំបាច់ផ្សេងទៀតប្រកបដោយសណ្តាប់ធ្នាប់។
សេចក្ដីប្រកាសអាសន្ន ដែលមានសុពលភាពរយៈពេល ១ ឆ្នាំ អនុញ្ញាតឱ្យរដ្ឋាភិបាលទិញប្រេងឥន្ធនៈ និងផលិតផលប្រេងកាត ដើម្បីធានាបាននូវការផ្គត់ផ្គង់ទាន់ពេលវេលា និងគ្រប់គ្រាន់ ហើយប្រសិនបើចាំបាច់ អាចបង់ប្រាក់ជាមុនសម្រាប់កិច្ចសន្យាទិញពីអ្នកផ្គត់ផ្គង់។
គូសបញ្ជាក់ថា ជម្លោះនៅមជ្ឈិមបូព៌ាបានបង្កវិបត្តិថាមពលជុំវិញពិភពលោក ជាពិសេសតំបន់អាស៊ីអាគ្នេយ៍ ដែលពឹងផ្អែកខ្លាំងលើប្រភពផ្គត់ផ្គង់ប្រេងពីមជ្ឈិមបូព៌ា ដឹកកាត់តាមច្រកសមុទ្រហ័រមូហ្ស ដែលត្រូវជាប់គាំង៕
