ក្រសួងកសិកម្ម រុក្ខាប្រមាញ់ និងនេសាទ បានបង្កើននូវកិច្ចសហប្រតិបត្តិការជាមួយ សាកលវិទ្យាល័យ IPB University ក្នុងការជំរុញអភិវឌ្ឍន៍ធនធានមនុស្សរវាងប្រទេសទាំងពីរ ជាពិសេសការផ្លាស់ប្តូរនិស្សិត និងការពិសោធន៍ស្រាវជ្រាវក្នុងវិស័យកសិកម្ម។
កិច្ចសហការប្រតិបត្តិការនេះ បានធ្វើឡើងក្នុងជំនួបរវាង លោក ចាន់ សុវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ជាមួយ ប្រតិភូសាកលវិទ្យាល័យ IPB University Bogor Indonesia កាលពីថ្ងៃទី២៩ ខែមេសា ឆ្នាំ២០២៦។
នាឱកាសនៃជំនួបនោះ លោករដ្ឋលេខាធិការ បានសម្តែងការស្វាគមន៍នូវកិច្ចសហប្រតិបត្តិការជាមួយ សាកលវិទ្យាល័យ IPB University ក្នុងការជំរុញអភិវឌ្ឍន៍ធនធានមនុស្សរវាងប្រទេសទាំងពីរ ជាពិសេសការផ្លាស់ប្តូរនិស្សិត និងការពិសោធន៍ស្រាវជ្រាវក្នុងវិស័យកសិកម្ម។
តាងនាមក្រសួងកសិកម្ម រុក្ខាប្រមាញ់ និងនេសាទ លោករដ្ឋលេខាធិការ បើកចំហរស្វាគមន៍ និងគាំទ្រចំពោះកិច្ចសហប្រតិបត្តិការកសាងធនធានមនុស្ស ខណៈសាកលវិទ្យាល័យ IPB ជាសាកលវិទ្យាល័យល្បីល្បាញទាំងក្នុងតំបន់ និងសាកលលោក ព្រមទាំងមាន(MoU)និងកិច្ចសហការល្អជាមួយសាកលវិទ្យាល័យភូមិន្ទកសិកម្មស្រាប់ ដែលអនុញ្ញាតឲ្យនិស្សិតនៃប្រទេសទាំងពីរ អាចផ្លាស់ប្តូរបទពិសោធន៍ល្អៗ សិក្សាពីវប្បធម៌ ការផ្ទេរចំណេះដឹង និងការរស់នៅទៅវិញទៅមក។
គួរបញ្ជាក់ថា ក្នុងឱកាសនៃជំនួបនោះ ភាគីទាំងពីរបានបង្ហាញគោលជំហរបន្តកិច្ចសហប្រតិបត្តិការឲ្យកាន់តែរឹងមាំប្រសើរឡើងថែមទៀត។ ដោយប្រតិភូឥណ្ឌូនេស៊ីនឹងធ្វើទស្សនកិច្ចសិក្សា សាកលវិទ្យាល័យទាំង៣ ចំណុះក្រសួងកសិកម្ម រុក្ខាប្រមាញ់ និងនេសាទ បណ្តាសហគមន៍កសិកម្ម និងតំបន់សក្តានុពលកសិកម្មកម្ពុជា៕
