បើកដំណើរការសេវារហ័សភ្លាម! ឧបនាយករដ្ឋមន្ត្រី សាយ សំអាល់ ចុះហត្ថលេខាចេញវិញ្ញាបនបត្រសម្គាល់ម្ចាស់​អចលនវត្ថុ បានចំនួន ១១០ បណ្ណ ជូនប្រជាពលរដ្ឋ

នៅថ្ងៃទី៦ ខែឧសភា ឆ្នាំ២០២៦ មជ្ឈមណ្ឌលប្រជាជន (ច្រកចេញចូលតែមួយ) នៃក្រសួងរៀបចំដែនដី នគរូបនីយកម្ម និងសំណង់ ដែលបានផ្តល់សេវាសាធារណៈរហ័ស (Express Service) នៅរដ្ឋបាល​កណ្តាលក្រសួងជាលើកដំបូង បានចេញវិញ្ញាបនបត្រសម្គាល់ម្ចាស់អចលនវត្ថុ ចំនួន ១១០ បណ្ណ ជូនប្រជាពលរដ្ឋនិងធុរជន ដែលចុះហត្ថលេខាដោយផ្ទាល់ពី ឯកឧត្តម ឧបនាយករដ្ឋមន្ត្រី សាយ សំអាល់។

ឆ្លើយតបទៅនឹងការវិវឌ្ឍរីកចម្រើនផ្នែកសេដ្ឋកិច្ច សង្គម និងបច្ចេកវិទ្យា និងដើម្បីសម្រួលដល់ប្រជាពលរដ្ឋ និងធុរជន ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី៤ ខែឧសភា ឆ្នាំ២០២៦ បានជូនដំណឹងពីការ​ពី​រៀបចំយន្តការ ផ្តល់សេវាសាធារណៈរហ័ស (Express Service) លើសេវាសុរិយោដី នៅទីស្តីការក្រសួងរៀបចំ​ដែនដី នគរូបនីយកម្ម និងសំណង់។

យន្តការផ្តល់សេវាសាធារណៈរហ័ស (Express Service) នេះ រួមមានសេវា៖ ១.ចុះបញ្ជីដីបំពេញ​បន្ថែម ២.ចុះបញ្ជីចំណែកឯកជននៃអគារសហកម្មសិទ្ធិ ៣.ចុះបញ្ជីអំពីការបង្កើតសិទ្ធិជួលអចិន្ត្រៃយ៍ និងសិទ្ធិ​សម្បទានដីសេដ្ឋកិច្ច ៤.ការបំបែកក្បាលដី ៥.ការបង្រួម​ក្បាលដី ៦.ចុះបញ្ជីប្តូរពីបណ្ណភោគៈ មកជាវិញ្ញាបន​បត្រសម្គាល់អចលនវត្ថុ ៧.ចុះបញ្ជីអំពីការផ្ទេរកម្មសិទ្ធិ ឬភោគៈ ឬចំណែកកម្មសិទ្ធិអវិភាគ ឬចំណែកភោគៈ ៨.ចុះបញ្ជីអំពីការផ្ទេរសិទ្ធិសម្បទានដីសេដ្ឋកិច្ច ឬសិទ្ធិជួលអចិន្ត្រៃយ៍ និង ៩.ចេញបណ្ណ/វិញ្ញាបនបត្រ ទុតិយតា ឬតតិយតា គ្រប់ប្រភេទ។

សូមជម្រាបថា ប្រជាពលរដ្ឋ និងធុរជនដែលមានតម្រូវការប្រើប្រាស់សេវារហ័សខាងលើ អាចអញ្ជើញទៅដាក់ពាក្យ​ស្នើសុំនៅច្រកចេញចូលតែមួយ នៅទីស្តីការក្រសួងរៀបចំដែនដី នគរូបនីយកម្ម និងសំណង់ រៀងរាល់ម៉ោង​ធ្វើការ៕