ធនាគារពិភពលោក (World Bank) ថានឹងបន្តគាំទ្រការអនុវត្តគម្រោង និងកម្មវិធីអាទិភាពនានា សំដៅពង្រឹងសន្តិសុខទឹក និងការអភិវឌ្ឍប្រកបដោយចីរភាពនៅកម្ពុជាបន្ថែមទៀត។ នេះបើយោងតាមប្រសាសន៍របស់លោក Guangzhe Chen អនុប្រធានធនាគារពិភពលោក (World Bank) ក្នុងពេលជួបពិភាក្សាការងារជាមួយលោករដ្ឋមន្ត្រី ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម កាលថ្ងៃទី៨ ខែកក្កដា ឆ្នាំ២០២៦។
ក្នុងជំនួបនេះ លោករដ្ឋមន្រ្តី ថោ ជេដ្ឋា បានថ្លែងអំណរគុណចំពោះធនាគារពិភពលោក ដែលជាដៃគូអភិវឌ្ឍន៍យូរអង្វែង ក្នុងការគាំទ្រហិរញ្ញប្បទានលើគម្រោងកែលម្អសន្តិសុខទឹកកម្ពុជា (CaWSIP) ដែលជាគម្រោងស្នូលសម្រាប់ពង្រឹងការគ្រប់គ្រងធនធានទឹក ធ្វើទំនើបកម្មប្រព័ន្ធធារាសាស្ត្រ អភិវឌ្ឍវិស័យឧតុនិយម ការបន្ស៊ាំនឹងអាកាសធាតុ និងការពង្រឹងសហគមន៍កសិករប្រើប្រាស់ទឹក សំដៅលើកកម្ពស់សន្តិសុខទឹកប្រកបដោយចីរភាព។
ទន្ទឹមនឹងនោះ លោក ក៏បានស្នើដល់ធនាគារពិភពលោក បន្តគាំទ្រកម្ពុជាលើការងារអាទិភាពចំនួន ៤ រួមមាន៖ ១. ការអនុវត្តគម្រោង CaWSIP ឱ្យទទួលបានជោគជ័យ ២. ការអនុវត្តកិច្ចព្រមព្រៀងសន្តិសុខទឹកកម្ពុជា តាមរយៈហិរញ្ញប្បទានសមស្រប ៣. ការរៀបចំ និងអនុវត្តកម្មវិធីវិនិយោគរយៈពេលវែងសម្រាប់អាងទន្លេសាប និង ៤. ការពង្រីកសមត្ថភាពស្តុកទឹកជាយុទ្ធសាស្ត្រនៅតំបន់ព្រំដែន តាមរយៈការកសាងអាងស្តុកទឹក និងការអភិវឌ្ឍប្រព័ន្ធធារាសាស្ត្រខ្នាតតូច ដើម្បីពង្រឹងសន្តិសុខទឹក សន្តិសុខស្បៀង និងភាពធន់នឹងការប្រែប្រួលអាកាសធាតុ។
ជាការឆ្លើយតប លោក Guangzhe Chen បានកោតសរសើរចំពោះចក្ខុវិស័យរបស់រាជរដ្ឋាភិបាលកម្ពុជា និងបានបញ្ជាក់ថា ធនាគារពិភពលោកនឹងបន្តសហការយ៉ាងជិតស្និទ្ធជាមួយក្រសួង ដើម្បីគាំទ្រការអនុវត្តគម្រោង និងកម្មវិធីអាទិភាពនានា សំដៅពង្រឹងសន្តិសុខទឹក ភាពធន់នឹងការប្រែប្រួលអាកាសធាតុ និងការអភិវឌ្ឍប្រកបដោយចីរភាពនៅកម្ពុជា៕ អត្ថបទ៖ហ្សាលីន
