សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី កាលថ្ងៃទី០៨ ខែឧសភា ឆ្នាំ២០២៦ បានចេញព្រះរាជក្រឹត្យផ្តល់គ្រឿងឥស្សរិយយស «ជាតូបការ» ប្រគេនព្រះសង្ឃ និងជូនដល់សប្បុរសជនចំនួន ១៣រូប រួមទាំង ឧកញ៉ា ឃន ឈុនដារ៉ា ស្ថាបនិកក្រុមហ៊ុន KOI Thé Cambodia និងជាស្ថាបនិក ធ្យូបកាហ្វេ (Tube Coffee)។
តាមរយៈព្រះរាជក្រឹត្យលេខ នស/រកត/០៥២៦/៥៣៧ ប្រមុខរដ្ឋស្តីទី បានចេញព្រះរាជក្រឹត្យផ្តល់គ្រឿងឥស្សរិយយស តាមលំដាប់ថ្នាក់ ប្រគេនព្រះសង្ឃ និងជូនសប្បុរសជនសរុបចំនួន ៣៣២ អង្គ/រូប។ ក្នុងនោះដែរ មេដាយជាតូបការ មានចំនួន១៣រូប រួមមានទាំង ឧកញ៉ា ឃន ឈុនដារ៉ា។
ឧកញ៉ា ឃន ឈុនដារ៉ា គឺជាស្ថាបនិកក្រុមហ៊ុន KOI Thé Cambodia, ស្ថាបនិក ធ្យូបកាហ្វេ (Tube Coffee), ម្ចាស់ភោជនីយដ្ឋានទំនើបបែបជប៉ុន មានឈ្មោះថា «ឃីយ៉ូ សាប៊ូ» (KYŌ Shabu), សហស្ថាបនិកក្រុមហ៊ុន ចតុមុខ សឺវីស គ្រុប និងជាសមាជិកសមាគមឧកញ៉ាកម្ពុជា។
សូមជម្រាបថា មេដាយជាតូបការ ជាគ្រឿងឥស្សរិយយសប្រភេទមាតុប្រទេស លំដាប់ខ្ពស់ជាងគេបំផុតនៅកម្ពុជា សម្រាប់បំពាក់ជូនចំពោះវរជនដែលមានគុណដ៏ឧត្តុងឧត្តមក្នុងការបម្រើមាតុប្រទេស ហើយត្រូវបានប្រទានដោយព្រះមហាក្សត្រ៕
