យោងតាមសារព័ត៌មាន Nikkei បានរាយការណ៍ថាក្រុមហ៊ុន Aeon របស់ប្រទេសជប៉ុន នឹងលក់អាជីវកម្មផ្សារទំនើបរបស់ខ្លួននៅក្នុងប្រទេសថៃ ទៅឱ្យក្រុមហ៊ុន Central Group ដើម្បីផ្តោតលើទីផ្សារសំខាន់ៗផ្សេងទៀត រួមទាំងប្រទេសវៀតណាមផងដែរ។
យោងតាមផែនការមួយដែលបានប្រកាសនៅថ្ងៃទី៨ ខែសីហា ភាគហ៊ុនទាំងអស់របស់ក្រុមហ៊ុន Aeon ក្នុងប្រទេសថៃ ដែលជាក្រុមហ៊ុនដំណើរការផ្សារទំនើប នឹងត្រូវផ្ទេរទៅឱ្យក្រុមហ៊ុន Central Food Retail ទាំងស្រុងនៅថ្ងៃទី៣០ ខែកញ្ញា។ តែទោះជាយ៉ាងណាក៏ដោយ តម្លៃនៃប្រតិបត្តិការនេះមិនត្រូវបានបង្ហាញឱ្យដឹងនោះទេ។
បន្ទាប់ពីកិច្ចព្រមព្រៀងនេះ ក្រុមហ៊ុន Aeon នឹងដកខ្លួនចេញពីវិស័យផ្សារទំនើបនៅក្នុងប្រទេសថៃទាំងស្រុង។ ក្រោយពីនោះ ក្រុមហ៊ុន Central Food Retail នឹងដំណើរការខ្សែសង្វាក់ផ្សារទំនើប Tops រួមជាមួយនឹងប្រព័ន្ធហាងទំនិញរាយ និងផ្សារទំនើបលំដាប់ខ្ពស់ ជាចម្បងនៅក្នុងប្រទេសថៃ។
គួរឲ្យដឹងថា ក្រុមហ៊ុន Aeon បានចូលទីផ្សារថៃក្នុងឆ្នាំ១៩៨៤។ បច្ចុប្បន្ន ក្រុមហ៊ុនជប៉ុននេះមានផ្សារទំនើបសរុបចំនួន ៣០ នៅទីនោះ ក្រោមម៉ាកយីហោ MaxValu និងគំរូហាងខ្នាតតូច MaxValu Tanjai ជាដើម។
ជម្រាបជូនផងដែរថា ជុំវិញការចាកចេញនេះ ក្រុមហ៊ុន Aeon ត្រូវបានគេរាយការណ៍ថាកំពុងធ្វើឱ្យប្រសើរឡើងយ៉ាងសកម្មនូវប្រសិទ្ធភាពដើមទុន និងប្រាក់ចំណេញរបស់ខ្លួន។ នាពេលអនាគត ក្រុមហ៊ុននេះមានគម្រោងផ្តោតការរីកចម្រើនរបស់ខ្លួនលើទីផ្សារសំខាន់ៗផ្សេងទៀត រួមទាំងប្រទេសវៀតណាម ជាកន្លែងដែលផ្សារទំនើបរបស់ខ្លួនកំពុងដំណើរការប្រកបដោយប្រសិទ្ធភាពរួចហើយ។ ក្រុមហ៊ុន Aeon ក៏នឹងផ្តោតធនធានរបស់ខ្លួនលើទីផ្សារដូចជាប្រទេសម៉ាឡេស៊ី កម្ពុជា និងឥណ្ឌូណេស៊ីផងដែរ៕
