នារសៀលថ្ងៃទី១២ ខែសីហា ឆ្នាំ២០២៦ នៅទីស្នាក់ការក្រុមហ៊ុន រ៉ូយ៉ាល់ គ្រុប, អ្នកឧកញ៉ា គិត ម៉េង ប្រធានក្រុមប្រឹក្សាភិបាល និងអគ្គនាយកប្រតិបត្តិក្រុមហ៊ុន រ៉ូយ៉ាល់ គ្រុប បានទទួលស្វាគមន៍គណៈប្រតិភូស្ថានទូតសហរដ្ឋអាម៉េរិកប្រចាំព្រះរាជាណាចក្រកម្ពុជា ដឹកនាំដោយលោកស្រី Aleks Zittle ភារធារី ស្ថានទូតអាម៉េរិកប្រចាំកម្ពុជា ដើម្បីពិភាក្សាអំពីការពង្រឹងកិច្ចសហប្រតិបត្តិការធុរកិច្ច និងវិនិយោគរវាងកម្ពុជា និងសហរដ្ឋអាម៉េរិក។
ក្នុងជំនួបនេះ ភាគីទាំងពីរបានផ្តោតសំខាន់លើឱកាសវិនិយោគរបស់ក្រុមហ៊ុនអាម៉េរិកនៅកម្ពុជា ព្រមទាំងលទ្ធភាពក្នុងការចាប់ដៃគូជាមួយ ក្រុមហ៊ុន រ៉ូយ៉ាល់ គ្រុប ជាពិសេសក្នុងវិស័យថាមពល និងថាមពលកកើតឡើងវិញ ដែលត្រូវបានចាត់ទុកថាជាវិស័យមានសក្តានុពលសម្រាប់ការវិនិយោគ និងកិច្ចសហប្រតិបត្តិការរយៈពេលវែង។
លោកស្រី Aleks Zittle បានបង្ហាញពីការចាប់អារម្មណ៍របស់ក្រុមហ៊ុន និងវិនិយោគិនសហរដ្ឋអាម៉េរិក ចំពោះវិស័យថាមពលកកើតឡើងវិញនៅកម្ពុជា ជាពិសេសចំពោះគម្រោងវិនិយោគធំៗរបស់ រ៉ូយ៉ាល់ គ្រុប ដែលអាចបង្កើតឱកាសសម្រាប់ក្រុមហ៊ុនអាម៉េរិកចូលរួមជាដៃគូ និងពង្រីកវត្តមានរបស់ខ្លួននៅក្នុងទីផ្សារកម្ពុជា។
ជាការឆ្លើយតប អ្នកឧកញ៉ា គិត ម៉េង បានស្វាគមន៍ និងបង្ហាញការបើកចំហចំពោះក្រុមហ៊ុនសហរដ្ឋអាម៉េរិកដែលមានបំណងមកវិនិយោគនៅកម្ពុជា ជាពិសេសក្នុងវិស័យថាមពលកកើតឡើងវិញ និងតាមរយៈកិច្ចសហការជាមួយក្រុមហ៊ុន បទុមសាគរ អេនើជី ឯ.ក (Botum Sakor Energy Company Limited) ដែលជាក្រុមហ៊ុនបុត្រសម្ព័ន្ធ គ្រប់គ្រងទាំងស្រុងដោយ រ៉ូយ៉ាល់ គ្រុប។
ទន្ទឹមនឹងនេះ អ្នកឧកញ៉ា គិត ម៉េង ក៏បានលើកឡើងពីសក្តានុពល និងភាពទាក់ទាញ នៃបរិយាកាសវិនិយោគនៅកម្ពុជា ដោយសង្កត់ធ្ងន់លើស្ថិរភាពនយោបាយ ស្ថិរភាពម៉ាក្រូសេដ្ឋកិច្ច និងការគាំទ្ររបស់រាជរដ្ឋាភិបាល ចំពោះវិស័យឯកជន និងវិនិយោគិនបរទេស។ កត្តាទាំងនេះ ត្រូវបាន មើលឃើញថាជាមូលដ្ឋានសំខាន់សម្រាប់ការទាក់ទាញទុនវិនិយោគ និងជំរុញការចូលរួមរបស់ក្រុមហ៊ុនអន្តរជាតិក្នុងការអភិវឌ្ឍវិស័យថាមពលរបស់កម្ពុជា។
សូមជម្រាបថា ក្នុងចំណោមគម្រោងវិនិយោគសំខាន់ៗរបស់ រ៉ូយ៉ាល់ គ្រុប ក្នុងវិស័យថាមពល គឺគម្រោងរោងចក្រផលិតអគ្គិសនីដើរដោយឧស្ម័នធម្មជាតិរាវ LNG របស់ ក្រុមហ៊ុន បទុមសាគរ អេនើជី ដែលមានអានុភាពសរុប ៩០០មេហ្កាវ៉ាត់ និងទុនវិនិយោគប្រមាណ ១,៣៤ពាន់លានដុល្លារអាម៉េរិក ស្ថិតនៅក្នុងស្រុកបទុមសាគរ ខេត្តកោះកុង ត្រូវបានចាត់ទុកថាជាគម្រោងថាមពលដ៏ធំមួយ ដែលអាចចូលរួមពង្រឹងសមត្ថភាពផលិតអគ្គិសនី និងសន្តិសុខថាមពលរបស់កម្ពុជា។
គម្រោងបានចាប់ផ្តើមសាងសង់ជាផ្លូវការកាលពីថ្ងៃទី១៦ ខែតុលា ឆ្នាំ២០២៤ ហើយត្រូវបានបែងចែកជាពីរដំណាក់កាល។ ដំណាក់កាលទី១ មានអានុភាព ៤៥០មេហ្គាវ៉ាត់ គ្រោងនឹងដាក់ឱ្យដំណើរការនៅចុងឆ្នាំ២០២៦ ខណៈដំណាក់កាលទី២ ដែលមានអានុភាព ៤៥០មេហ្គាវ៉ាត់ បន្ថែមទៀត គ្រោងនឹងដាក់ឱ្យដំណើរការនៅឆ្នាំ២០២៧។
