យោងតាមប្រព័ន្ធផ្សព្វផ្សាយរដ្ឋអ៊ីរ៉ង់ បានចំអកចំៗឱ្យប្រធានាធិបតីអាមេរិក លោក ដូណាល់ ត្រាំ បន្ទាប់ពីមានរបាយការណ៍ថា លោកបានប្តូរយន្តហោះដោយសម្ងាត់ ដោយសារតែហានិភ័យសន្តិសុខ។ នេះបើតាមការចុះផ្សាយពីសារព័ត៌មាន Reuters។
ទូរទស្សន៍រដ្ឋអ៊ីរ៉ង់បាននិយាយនៅថ្ងៃទី១៣ ខែសីហាថា ៖”លោកប្រធានាធិបតី ដូណាល់ ត្រាំ កំពុងជាប់ពាក់ព័ន្ធនឹងរឿងអាស្រូវម្តងទៀត ហើយបានក្លាយជាប្រធានបទកំពូលនៅក្នុងប្រព័ន្ធផ្សព្វផ្សាយ។ រឿងអាស្រូវនេះកើតចេញពីការភ័យខ្លាចរបស់លោកចំពោះអំណាចយោធាអ៊ីរ៉ង់ រហូតដល់ចំណុចមួយដែលលោកត្រូវបង្ខំចិត្តប្តូរយន្តហោះដោយសម្ងាត់នៅពេលចាកចេញពីប្រទេសតួកគីកាលពីខែមុន”។
អ៊ីរ៉ង់ ក៏បាននិយាយបន្ថែមទៀតផងដែរថា ឧប្បត្តិហេតុនេះនឹងក្លាយជារឿងដ៏អាម៉ាស់ខ្លាំងបំផុត សម្រាប់មេដឹកនាំសហរដ្ឋអាមេរិក។
តែទោះជាយ៉ាងណាក៏ដោយ មន្ត្រីអ៊ីរ៉ង់រហូតមកដល់ពេលនេះ នៅមិនទាន់បានធ្វើអត្ថាធិប្បាយលើការប៉ាន់ស្មានថា ពួកគេមានបំណងកំណត់គោលដៅលើយន្តហោះ Air Force One ឬប្រធានាធិបតី លោក ត្រាំ នៅក្នុងខែកក្កដានៅឡើយនោះទេ។
គួរជម្រាបជូនផងដែរថា ក្នុងរយៈពេលប៉ុន្មានថ្ងៃកន្លងមកនេះ ប្រព័ន្ធផ្សព្វផ្សាយអាមេរិកបានរាយការណ៍ថា សេវាសម្ងាត់បានទទួលការព្រមានថា យន្តហោះដែលដឹកប្រធានាធិបតីអាមេរិកអាចត្រូវបានវាយប្រហារដោយមីស៊ីលបាញ់លើស្មា នៅពេលដែលលោកចាកចេញពីកិច្ចប្រជុំកំពូល NATO នៅទីក្រុងអង់ការ៉ា ប្រទេសតួកគី។ ហើយជាមួយគ្នានោះ កាសែត New York Times ដោយដកស្រង់ប្រភពព័ត៌មានដែលបានជូនដំណឹង បានរាយការណ៍ថា មន្ត្រីអាមេរិកមានការព្រួយបារម្ភថា អ៊ីរ៉ង់ដឹងច្បាស់ថា លោក ត្រាំ កំពុងស្នាក់នៅក្នុងទីក្រុងអង់ការ៉ា សូម្បីតែជាន់ពិតប្រាកដនៃសណ្ឋាគារដែលលោកស្នាក់នៅក៏ដោយ៕
