ក្នុងឆ្នាំ២០២៦នេះ ខេត្តព្រះសីហនុបានទទួលនាវាយោធាបរទេសចំនួន៦លើក សរុបចំនួន៧គ្រឿង ដែលសកម្មភាពនេះ គឺបានបង្ហាញពីកិច្ចសហប្រតិបត្តិការល្អរវាងកម្ពុជា និងបណ្តារប្រទេសជាច្រើន ទាំងក្នុងតំបន់ និងពិភពលោក។នេះបើយោងតាមជំនួបសម្តែងការគួរសមរវាងលោក ឡុង ឌីម៉ង់ អភិបាលរងខេត្តព្រះសីហនុ ជាមួយលោកវរនាវីទោ Suraj Kumar Singh មេបញ្ជាការនាវាចម្បាំងកងទ័ពជើងទឹកឥណ្ឌា INS KULISH P63 កាលថ្ងៃទី១៤ ខែកញ្ញា ឆ្នាំ២០២៦។
នាឱកាសនោះ លោក ឡុង ឌីម៉ង់ អភិបាលរងខេត្តព្រះសីហនុ បានទទួលស្វាគមន៍លោកមេបញ្ជាការដែលបានដឹកនាំនាវាចូលចតនៅមូលដ្ឋានសមុទ្ររាម និងបានវាយតម្លៃខ្ពស់ដល់គំនិតផ្តួចផ្តើមធ្វើការប្រកួតកីឡារួមគ្នាដើម្បីបង្កើនភាពស្និតស្នាលរវាងកងទ័ពទាំង២។
បន្ថែមពីនេះ លោកអភិបាលរងខេត្ត បានជម្រាបជូនពីស្ថានភាពសេដ្ឋកិច្ច ភូមិសាស្ត្រ នៃខេត្តព្រះសីហនុវឌ្ឍភាព នៃការអភិវឌ្ឍកំពង់ផែស្វយ័តក្រុងព្រះសីហនុ តំបន់សេកិដ្ឋកិច្ចពិសេស ព្រមទាំងសក្តានុពលផ្នែកវិនិយោគ និងទេសចរណ៍។
ឆ្លៀតក្នុងឱកាសនោះ លោកក៏បានស្នើឱ្យស្ថានទូតឥណ្ឌាពិនិត្យលទ្ធភាពជួយផ្សព្វផ្សាយអំពីទេសចរណ៍របស់ប្រទេសកម្ពុជាដែលមិនត្រឹមតែមានអរិយធម៌ស្រដៀងគ្នាទេ ហើយថែមទាំងមានកោះមានឆ្នេរដ៏ស្រស់ស្អាតផងដែរ។
សូមជម្រាបថា ក្នុងឆ្នាំ២០២៦នេះ ខេត្តព្រះសីហនុបានទទួលនាវាយោធាបរទេសចំនួន៦លើក សរុបចំនួន៧គ្រឿងមកពី៖ សហរដ្ឋអាមេរិច, សហព័ន្ធរុស្សី, វៀតណាម, និងចក្រភពអង់គ្លេស៕អត្ថបទ៖ ហ្សាលីន
