អ្នកឧកញ៉ា ឧកញ៉ាៗតំណាងសភាពាណិជ្ជកម្មកម្ពុជា ចូលរួមកិច្ចពិភាក្សារៀបចំសេចក្តីព្រាងយុទ្ធសាស្ត្រអន្តរកាល លើវិស័យពាណិជ្ជកម្ម សម្រាប់ការចាកចេញរបស់កម្ពុជា ពីចំណាត់ក្រុមប្រទេសអភិវឌ្ឍន៍តិចតួច

(រាជធានីភ្នំពេញ)៖ នារសៀលថ្ងៃពុធ ទី២៣ ខែកញ្ញា ឆ្នាំ២០២៦ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា តំណាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា អមដោយ ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា និងលោកជំទាវ ឧកញ៉ា នួន ពេជ្រសុផល អគ្គនាយិការងជាន់ខ្ពស់សភាពាណិជ្ជកម្មកម្ពុជា បានទទួលជួបពិភាក្សាជាមួយលោក Paul Baker ទីប្រឹក្សាជាន់ខ្ពស់នៃគម្រោង EU-German GATE។

សភាពាណិជ្ជកម្មកម្ពុជា បានឱ្យដឹងថា កិច្ចពិភាក្សានេះមានគោលបំណងប្រមូលធាតុចូលសំខាន់ៗពីវិស័យឯកជន ពាក់ព័ន្ធនឹង កង្វល់ បញ្ហាប្រឈម និងវិស័យអាទិភាព ដើម្បីរួមចំណែកក្នុងការរៀបចំសេចក្តីព្រាង យុទ្ធសាស្ត្រអន្តរកាលដោយរលូនលើវិស័យពាណិជ្ជកម្ម (Smooth Transition Strategy on Trade Sector) សម្រាប់ការចាកចេញរបស់កម្ពុជា ពីចំណាត់ក្រុមប្រទេសអភិវឌ្ឍន៍តិចតួច (LDC Graduation)។

យុទ្ធសាស្ត្រនេះទទួលបានការគាំទ្រពី ក្រសួងពាណិជ្ជកម្ម និងសហការជាមួយ GIZ ក្នុងការវាយតម្លៃលើការផ្លាស់ប្តូរគោលនយោបាយ និងបទប្បញ្ញត្តិ ការចូលទីផ្សារ ផលប៉ះពាល់តាមវិស័យ ឱកាសធ្វើពិពិធកម្មទីផ្សារ និងផលិត​ផល ព្រមទាំងការរៀបចំផែនទីបង្ហាញផ្លូវ និងក្របខណ្ឌតាមដាន និងវាយតម្លៃ។

សភាពាណិជ្ជកម្មកម្ពុជា ក្នុងនាមតំណាងឱ្យវិស័យឯកជន បានបង្ហាញពីការស្វាគមន៍ចំពោះការរៀបចំយុទ្ធសាស្ត្រអន្តរកាលដោយរលូនរបស់កម្ពុជា និងត្រៀមខ្លួនជាស្រេចក្នុងការសហការយ៉ាងជិតស្និទ្ធជាមួយ ក្រសួងពាណិជ្ជកម្ម និងដៃគូអភិវឌ្ឍន៍ ដើម្បីធានាថា យុទ្ធសាស្ត្រនេះឆ្លើយតបទៅនឹងតម្រូវការជាក់ស្តែងរបស់អាជីវកម្មកម្ពុជា ជាពិសេសសហគ្រាសធុនតូច និងមធ្យម។

សភាពាណិជ្ជកម្មកម្ពុជាជឿជាក់ថា កិច្ចសហការរវាងរាជរដ្ឋាភិបាល និងវិស័យឯកជន ជាការពង្រឹងសមត្ថភាព និងការបន្តគាំទ្រដល់ការចូលទីផ្សារ នឹងមានសារៈសំខាន់ក្នុងការធានាឱ្យដំណើរការផ្លាស់ប្តូររបស់កម្ពុជា ពីចំណាត់ក្រុមប្រទេសអភិវឌ្ឍន៍តិចតួច (LDC Graduation) ប្រព្រឹត្តទៅដោយរលូន ប្រកបដោយភាពធន់ និងចីរភាព។